যিহিষ্কেল 39 - Chakma Bible1 ও মান্জ্যর পুয়োবো, গোগর বিরুদ্ধে তুই এই আগাম্ কধানি কঅ, প্রভু লগেপ্রভু কোইয়্যেদে, ও মেশক আর তূবলর আজল্ শাজন্গুরিয়্যে গোগ, মুই তর্ বিপক্ষে। 2 মুই তরে পিজেদি ঘুরেইনে টানি নেযেম্। মুই তরে উত্তোরেদি শেজ্ দুযিত্তুন্ আনিনে ইস্রায়েলর মুড়োমুড়িগুনো বিরুদ্ধে পাদেম্। 3 সে পরেদি মুই আঘাত গুরিনে তঅ বাঙ্ আঢত্তুন্ তঅ ধনুগান আর ডেন্ আঢত্তুন্ তর্ সেলুন্ ফেলেই দিম। 4 ইস্রায়েলর মুড়োমুড়ি উগুরে তুই, তর্ বেক সৈন্যগুন আর তঅ লগে জাদ্তুনে পড়ি থেবাক্। মুই তরে শকুন আর ঝার য়েমানুনোরে হানা ইজেবে দিম্। 5 তুই খুলো মাদত্ পড়ি থেবে, কিত্তে মুই প্রভু লগেপ্রভু এ কধাগান কোইয়োং। 6 মুই মাগোগ উগুরে আর যিগুনে দূর দেজ্চানিত্ গমেডালে বজত্তি গত্তন্ তারা উগুরে আগুন পাদেম্; সেক্কে তারা হবর্ পেবাক্, মুয়ই লগেপ্রভু। 7 মর্ মানুচ্ ইস্রায়েলীয়গুনো ভিদিরে মুই মঅ পবিত্রতাগান ফগদাং গুরিম। মঅ নাঙান্ মুই আর্ অপবিত্র অবাত্তে ন-দিম; সেক্কে জাদ্তুনে হবর্ পেবাক, মুয়ই লগেপ্রভু, ইস্রায়েল ভিদিরে সেই সুদ্ধো-সাংগ মানুচ্চো। 8 ইয়েন্ এজের্, ইয়েন অবদে অবঅ। এ দিন্নো কধা মুই প্রভু লগেপ্রভু কোইয়োং। 9 সেক্কে যিগুনে ইস্রায়েল শঅরত্ বজত্তি গত্তন্ তারা বারেদি যেইনে দার্বো ইজেবে আত্যের্ পুড়িবাক্। তারা চিগোন আর দাঙর্ ঢাল, সেল্ আর ধনু আহ্ যুদ্ধোর লুদিক্ আর সেল্ সাত বজর্ সং ধার্বো বদলে পড়িবাক্। 10 মাদত্তুন্ বা ঝার্-জংলত্তুন্ তারার্ আর দার্বো তুবো ন-পুরিবো, কিত্তে গাজ বদলে তারা আত্যের্ পড়িবাক্। তারা তারার্ লুদেয়্যে পযাপিরানি লুদেবাক্; তারার্ পযাপিরানি যিগুনে কাড়ি নেযেয়োন তারার্ পযাপিরানি তারা কাড়ি নিবাক্। মুই প্রভু লগেপ্রভু এ কধাগান কঙর্। 11 সেদিন্যে মুই গোগরে ইস্রায়েল ভিদিরে এক্কান গোর্ দিম। সিয়েন অবদে সাগর পূগেদি আঢি যেইয়্যেগুনোর কলগ ভিদিরে। যিগুনে যানা-এযানা গরন্ তারা পথ্তান ইয়েনে বন্ধ গুরি দিবো, কিয়া গোগ আর তার বেক্ দলবলুনোরে সিয়েনত্ গোর্ দিয়্যে অবঅ। সেনত্তে ইয়েনরে কুয়ো অবঅ গোগর দলবলর্ কলগ্। 12 ইস্রায়েলীয়গুনে সাত মাস সং তারার্ গোরত্ দিইনে দেজ্চান সিজি গুরিবাক্। 13 দেজর্ বেক মানুচ্চুনে তারারে গোর্ দিবাক। এবাবোত্যেগুরি মর্ মহিমাগান্ ফগদাং গুরিবার দিনোত্ তারার সুনাঙান্ ছিদি পড়িবো। 14 সেই সাত মাস শেজত্ দেজ্চান সিজি গুরিবাত্তে মানুচ্চুনোরে নেযা অবঅ। তারা দেজ্চান গুরি বেড়েইনে মাদিত্ পড়ি থেইয়্যে আড়্ গোড়াগুন্ তোগেবাক্ আর সিগুনোরে গোর্ দিবাক্। 15 দেজ ভিদিরে ঘুরোফেরার্ অক্তত্ তারার কনজনে যুনি মান্জ্যর এক্কো আড়্ দেগন সালে যেদক্কন সং গোর্ খুড়িবার মানুচ্চুনে সিয়েনরে গোগ দলবলর্ কলগত্ গোর্ ন-দুয়োন সেদক্কন সং তারা সেই আড়ুন্ দেগেবাত্তে এক্কান চিহ্নো উজু গুরি রাগেবাক্। 16 এবাবোত্যেগুরি তারা দেজ্চান সিজি গুরিবাক্। সেই কলগত্ এক্কান শঅর নাঙ্ অবঅ হামোনা (যিয়েনর্ ভেদ্তান্ দলবল)। 17 ও মান্জ্যর পুয়োবো, মুই প্রভু লগেপ্রভু কঙর্, তুই নানান্ বাবোত্যে পেখ্ আর নানান্ বাবোত্যে ঝার্বো য়েমানুনোরে ডাগিনে কঅ, তুমি এগত্তর্ অ আর মুই তমাত্তে ইস্রায়েলর মুড়োমুড়িগুনো উগুরে যে দাঙর্ দালিপূজোর্ বেবস্থা গোজ্যং সিয়েনত্তে চেরোকিত্তেত্তুন্ এগত্তর্ অ। সিয়েনত্ তুমি য়েরা আর লো হেবা। 18 তুমি খেমতাবলা মানুচ্চুনোর য়েরা হেবা আর পিত্থিমীর শাজন্গুরিয়্যেগুনোর লো হেবা; এ মানুচ্চুনে যেন বাশন দেজর্ পক্তামক্তা পাডা ভেড়া, ভেড়া ছঅ, পাডা আর বলদ্। 19 যে ডালিপূজোর্ বেবস্থা মুই তমাত্তে গুরিম সেক্কে তুমি পেট ন-ভরানা সং তেল্ হেবা আর মাত্তল্ ন-অনা সং লো হেবা। 20 মঅ টেবিলোত্ তুমি পেট ভুরিনে ঘোড়া, রথচালেয়্যে, খেমতাবলা মানুচ্ আর নানান্ বাবোত্যে সৈন্যগুনোর য়েরা হেবা। 21 “মুই জাদ ভিদিরে মর্ মহিমাগান ফগদাং গুরিম আর মর্ খেমতাবলা আঢ্তানিলোই তারারে যে সাজাগান দিম্ সিয়েন বেক্ জাদ্তুনে দেগিবাক্। 22 সেদিন্যেত্তুন্ ধুরি ইস্রায়েলীয়গুনে হবর্ পেবাক্, মুয়ই তারার গোজেন লগেপ্রভু। 23 আর জাদ্তুনে হবর্ পেবাক যে, ইস্রায়েলীয়গুনে তারার্ পাপত্তে বন্দীদজাত্ যেইয়োন, কিত্যে তারা মঅ উগুরে অবিশ্বেজি ওইয়োন্। সেনত্তে মর্ মুয়োন মুই তারাত্তুন্ ফিরেই রাগেয়োং আর শত্রুগুনো আঢত্ তারারে তুলি দুয়োং; তারা বেক্কুনে যুদ্ধোত্ মারা পোজ্যন্। 24 তারার্ অসিজি আর পাপ মজিম্ মুই তারা লগে বেবহার গোজ্যং আর তারাত্তুন্ মর্ মুয়োন ফিরেই রাগেয়োং।” 25 প্রভু লগেপ্রভু আরঅ কোইয়্যেদে, “মুই ইক্কিনে যাকোবরে বন্দীদজাত্তুন্ ফিরেই আনিম আর ইস্রায়েলর বেক্ মানুচ্চুনোরে মেয়্যে গুরিম আরে মঅ নাঙানর্ পবিত্রতাগানত্তে আওজি ওম্। 26 যেক্কে তারা তারার্ দেজত্ গমেডালে বজত্তি গুরিবাক্ আর কনজনে তারারে দর্বুক ন-দেগেবাক্ সেক্কে মঅ উগুরে অবিশ্বেজর্ কারনে তারার্ লাজ কধা তারা ভুলি যেবাক্। 27 জাদ ভিদিরেত্তুন্ মুই যেক্কে তারারে ফিরেই আনিম আর শত্রুগুনো দেজত্তুন্ তারারে এগত্তর্ গুরিম সেক্কে ভালোক্ জাদ চোগো মুজুঙোত্ মুই তারা ভিদিরেদি মর্ পবিত্রতাগান ফগদাং গুরিম। 28 সেক্কে তারা হবর্ পেবাক, মুয়ই তারার্ গোজেন লগেপ্রভু, কিত্যে নানান্ জাদ ভিদিরে তারারে বন্দীদজাত্ পাদেলেয়ো মুই তারারে নিজো দেজত্ ফিরেই আনিম, কাররে ফেলেই ন-রাগেম। 29 তারা ইত্তুন্ মুই মর্ মুয়োন আর্ ফিরেই ন-রাগেম, কিত্যে ইস্রায়েলীয়গুনো উগুরে মুই মর্ আত্মাগান ঢালি দিম। মুই প্রভু লগেপ্রভু এ কধাগান কঙর্।” |
Copyright © 2021 Bangladesh Bible Society
Bangladesh Bible Society