যিহিষ্কেল 37 - Chakma Bibleশুগুনো আড়র্ কলগ্ 1 লগেপ্রভুর আঢ্তানি মঅ উগুরে এলঅ আর তে তার্ আত্মালোই মরে নেযেইনে এক্কো কলগর্ সংমোধ্যে রাগেল; জাগায়ান আড়্গোড়ালোই ভরা এলঅ। 2 তে সিগুনোর্ চেরোকিত্তেদি মরে নেযেল। মুই সেই কলগ ভিদিরে বোউত্ আড়্গোড়া দেগিলুং; সিগুন এলাক্ অমকদ শুগুনো। 3 তে মরে পুযোর্ গুরিলো, “ও মান্জ্যর পুয়োগুন, এ আড়ুন্ কি জেদা ওই উদি পারন্?” মুই কলুং, “ও প্রভু লগেপ্রভু, তুয়ই বানা সিয়েন হবর্ পাজ্।” 4 সেক্কে তে মরে সেই আড়ুনো ইধু এই আগাম্ কধানি কবাত্তে কলঅ, “ও শুগুনো বেক্ আড়ুন, তুমি লগেপ্রভুর কধানি শুনো। 5 প্রভু লগেপ্রভু কত্তে, ‘মুই তমা ভিদিরে নিজেস্ ভোরেই দিম্ আর তুমি জেদা অবা। 6 মুই তমা আড়ুনো লগে আড়্ বানি দিম, তমা উগুরে য়েরা বাড়েই দিম আর চামাড়ালোই সিয়েনি নাঢি দিম। মুই তমা ভিদিরে নিজেস্ দিম আর তুমি জেদা অবা। সেক্কে তুমি হবর্ পেবা যে, মুয়ই লগেপ্রভু।’” 7 মরে যেবাবোত্যেগুরি উগুম্ দিয়্যে ওইয়্যে মুই সেবাবোত্যেগুরি আগাম্ কধা কলুং। আগাম্ কধা কবার্ অক্তত্ খট্খট্ রঅ উয়া ধুরিলো আর আড়ুন্ পত্তিবো নিজো নিজো আড় লগে এগত্তর্ অলাক্। 8 মুই দেগিলুং আড় লগে আড়র্ জড়া অলঅ, সে উগুরে য়েরা অলঅ আর চামাড়ালোই সিয়েনি নাঢা গেলঅ, মাত্তর্ সিয়েনি ভিদিরে নিজেস্ ন-এলঅ। 9 সেক্কে তে মরে কলঅ, “তুই বোইয়্যের নাঙে আগাম্ কধা কঅ; ও মান্জ্যর পুয়োবো, তুই এ আগাম্ কধানি কঅ, প্রভু লগেপ্রভু কোইয়্যেদে, ‘ও বোইয়্যেরান, তুই চেরোকিত্তেত্তুন্ আয় আর এই বেক্ মোজ্যন্দে মানুচ্চুনো ভিদিরে নিজেস্ দে যেনে তারা জেদা অন্।’” 10 সেনত্তে তার উগুম মজিম্ মুই আগাম্ কধা কলুং আর সেক্কে তারা ভিদিরে নিজেস্ চোমেল; তারা জেদা ওইনে টেঙোই ভর্ দিইনে উদিনে থিয়্যেল। তারা এলাক্ এক্কো দাঙর্ সৈন্যদল। 11 সে পরেদি তে মরে কলঅ, “ও মান্জ্যর পুয়োবো, এই আড়ুন্ অলাক্ গোদা ইস্রায়েল জাত্তো। তারা কদন্, আমা আড়ুন শুগেই যেইয়োন আর আমা আজায়ো যেয়্যেগোই; আমি মুরি যেইয়্যেই। 12 সেনত্তে তুই তারা ইধু এই আগাম্ কধানি কঅ, প্রভু লগেপ্রভু কোইয়্যেদে, ‘ও মঅ মানুচ্চুন, মুই তমারে গোর্ খুলিনে সিয়োত্তুন্ তমারে তুলি আনিম। ইস্রায়েল দেজত্ মুই তমারে ফিরেই আনিম। 13 মুই যেক্কে তমারে গোর্ খুলিনে সিয়োত্তুন্ তমারে নিগিলেই আনিম সেক্কে তুমি হবর্ পেবা যে, মুয়ই লগেপ্রভু। 14 মঅ আত্মাগান মুই তমা ভিদিরে দিম্ আর তুমি জেদা অবা। তমা নিজো দেজত্ মুই তমারে বজত্তি গোরেম্। সেক্কে তুমি হবর্ পেবাদে যে, মুই লগেপ্রভু এ কধাগান কোইয়োং আর সিয়েন গোজ্যং।’” এক্কো রাজার অধীনোত্ এক্কো জাদ 15 পরেদি লগেপ্রভুর এই কধানি মইধু ফগদাং অলঅ, 16 ও মান্জ্যর পুয়োবো, এক্কো লুদিক্কোই তুই তা উগুরে এ কধাগান লেগ্, যিহূদা আর তা সমারে ইস্রায়েলীয়গুনোত্তে। সে পরেদি আর এক্কো লুদিক্কোই তা উগুরে লেগ্, ইফ্রয়িমর লুদিক্, অত্তাৎ যোষেফ আর তা সমারে বেক্ ইস্রায়েলীয়গুনোত্তে। 17 পরেদি সেই দ্বিবে লুদিক্ জড়া দিইনে এক্কো লুদিক্ বানা যেনে তঅ আঢত্ সেই দ্বিবে লুদিক্ এক্কো লুদিক্ অয়। 18 তঅ জাদর্ মানুচ্চুনে যেক্কে তরে পুযোর্ গুরিবাক্, তুই কি ইয়েনর ভেদ্তান্ আমারে ন-কবে? 19 সেক্কে তুই তারারে কবে, প্রভু লগেপ্রভু কোইয়্যেদে, ইফ্রয়িম আঢত্ যোষেফ আর তা সমারে ইস্রায়েল গুট্টিগুনোর্ যে লুদিক্কো এলঅ মুই সিবে নিইনে যিহূদার লুদিক্কো লগে জড়া দিইনে এক্কো লুদিক্ বানেম্ আর সে দ্বিবে মঅ আঢত্ এক্কো অবঅ। 20-21 তুই যে লুদিক্ দ্বিবে উগুরে লেখ্যচ্ সিবে তারা চোগো মুজুঙোত্ তুলি ধুরিনে তারারে কবে, প্রভু লগেপ্রভু কোইয়্যেদে, ইস্রায়েলীয়গুন যিদুক্কুন জাদ ভিদিরে আগন্ সিয়োত্তুন মুই তারারে নিগিলেই আনিম। মুই চেরোকিত্তেত্তুন্ তারারে এগত্তর্ গুরিনে তারা নিজো দেজত্ ফিরেই নেযেম। 22 সিয়েনত্ ইস্রায়েলর মুড়ো-মুড়ি উগুরে মুই তারারে নিইনে এক্কান রেজ্য বানেম্। তারা বেক্কুনো উগুরে একজনে রাজা অবঅ আর তারা আর্ কনদিন্অ দ্বিবে ন-অবাক্ বা দ্বিয়েন রেজ্য ভাগ্ ন-অবঅ। 23 তারার্ বেক মূত্তিগুন, মূত্তি বা তারার্ কনঅ বজং জিনিস্চোই তারা আর্ নিজোরে অসিজি ন-গুরিবাক্। তারার্ বেক পাপ আর ভান্ন্যেই পধেদি যানাত্তুন্ মুই তারারে রোক্ষ্যে গুরিম আর সিজি গুরিম। তারা মঅ মানুচ্ অবাক্ আর মুই তারার্ গোজেন ওম্। 24 “‘মঅ চাগর্ দায়ুদে তারার্ রাজা অবঅ আর তারার্ বেক্কুনোর পালক একজন অবঅ। তারা মর্ রীদি-সুদোম মজিম্ চলিবাক আর মর্ বেক সুদোমানি উজিয়ার্ ওইনে পালেবাক্। 25 যে দেজ্চান মুই মঅ চাগর্ যাকোবরে দুয়োং, যে দেজত্ তারার্ পুরোণি মানুচ্চুনে বজত্তি গুরি যেইয়োন সিয়েনত্ তারা বজত্তি গুরিবাক্। তারা, তারার্ পুয়ো-ছাগুনে আর নাদিন্ পুদিনুনে সিয়েনত্ জিংকানিবর্ বজত্তি গুরিবাক্ আর মর্ চাগর্ দায়ূদে উমরত্যে তারার্ রাজা অবঅ। 26 মুই তারাত্তে এক্কান ভালেদির্ বেবস্থা থিদেবর্ গুরিম; সিয়েন অবঅ এক্কান্ উমরর্ বেবস্থা। মুই তারারে খেমতাবলা গুরিম আর তারারে জনেদি বাড়েই দিম আহ্ মঅ ঘরান্ মুই উমরত্তে তারা ভিদিরে থিদেবর্ গুরিম। 27 মর্ থেবার জাগায়ান অবঅ তারা ভিদিরে; মুই তারার্ গোজেন ওম্ আর তারা মঅ মানুচ্ অবাক্। 28 মঅ ঘরান্ যেক্কে উমরত্তে তারা ভিদিরে অবঅ সেক্কে জাদ্তুনে বেক্কানি হবর্ পেবাক্, মুই লগেপ্রভু ইস্রায়েলরে মর্ নাঙে যুদো গোজ্যং।’” |
Copyright © 2021 Bangladesh Bible Society
Bangladesh Bible Society