যিহিষ্কেল 35 - Chakma Bible

ইদোমর বিরুদ্ধে আগাম্ কধা

¹ পরেদি লগেপ্রভু মরে কোইয়্যেদে,

² ও মান্‌‌‌‌‌জ্যর্ পুয়োবো, সেয়ীর মুড়োবো ইন্দি তর্ মুয়োন রাগেইনে তা বিরুদ্ধে এ আগাম্ কধাগান কঅ,

³ প্রভু লগেপ্রভু কোইয়্যেদে, ও সেয়ীর মুড়োবো, মুই তর্ বিপক্ষে; মুই তঅ বিরুদ্ধে মঅ আঢ্‌তানি বাবেইনে তরে এক্কান মানুচ্ নেইয়্যে উগুজ্যে ভূইয়ো ধোক্ক্যেন বানেই রাগেম।

⁴ তর্ শঅরানি মুই ভস্তর্ জাগা বানেম আর তুই মানুচ্ নেইয়্যে অবে। সেক্কে তুই হবর্ পেবে, মুয়ই লগেপ্রভু।

⁵ তুই ভালোক্ দিন ধুরিনে ইস্রায়েলর শত্রু ওই আগচ্ আর তারার্ দযার্ দিনোত্ যেক্কে তারারে সাজা পুরোপুরিভাবে দিয়্যে ওইয়্যে সেক্কে তুই লাম্বা ছুরি আঢত্ তারারে তুলি দুয়োচ্।

⁶ সেনত্তে মুই প্রভু লগেপ্রভু মর্ জিংকানির নাঙে কঙর্, মুই তরে লো ঝরেদে আঢত্ তুলি দিম আর সিয়েনে তঅ পিজেদি লোড়েব। তুই যেক্কে লো ঝরানা ঈচ্ ন-গরচ্ সেক্কে লো ঝরানাগানে তঅ পিজেদি লোড়েব।

⁷ মুই সেয়ীর মুড়োবোরে মানুচ্ নেইয়্যে আর ভস্তর্ জাগা বানেম আর যিগুনে সিয়েনত্ আদা-উদো গরন তারারে বেক্কুনোরে শেজ্ গুরি দিম।

⁸ তর্ মুড়ো-মুড়িগুন মুই মোজ্যন্দে মানুচ্চুনোরে দিইনে নাঢি দিম; যুদ্ধোত্ যিগুনে মুরি যেইয়োন তারা তর্ মুড়োই মুড়োই, কলগে কলগে আর তর্ বেক পানি গঙারানিত্ পড়ি থেবাক্।

⁹ উমরত্তে মুই তরে মানুচ্ নেইয়্যে গুরি রাগেম; তর্ শঅরানিত্ কনজনে বজত্তি ন-গুরিবাক্। সেক্কে তুই হবর্ পেবে, মুয়ই লগেপ্রভু।

¹⁰ “‘মুই লগেপ্রভু যুনিয়ো ইস্রায়েল আর যিহূদাত্ এলুং তো তুই কোইয়োচ্, এ দ্বি’দেজ মানুচ্চুন আর তারা দেজ্‌চান তমার্ অবঅ আর তুমি সিয়েন অধিকার গুর‌‌‌িবা।

¹¹ সেনত্তে মুই প্রভু লগেপ্রভু মর্ জিংকানির নাঙে কঙর্, তারা উগুরে ঈচ্ গরানায় তুই যেবাবোত্যে রাগ্ আর ইংসে দেগেয়োচ্ সেই ইজেবে মুই তঅ লগে বেবহার গুরিম; মুই যেক্কে তঅ বিচের্ গুরিম সেক্কে তারা ভিদিরে মুই নিজোরে ফগদাং গুরিম।

¹² সে অক্তত্ তুই হবর্ পেবে, তুই ইস্রায়েলর মুড়ো-মুড়িগুনোর বিরুদ্ধে যেদক্কানি অগমানর্ কধা কোইয়োচ্ সিয়েনি মুই লগেপ্রভু শুন্যং। তুই কোইয়োচ্চে যে, সিয়েনি ভস্ত ওইনে পড়ি আঘে আর সিয়েনি গজক্ গুরিবাত্তে তরে দিয়্যে ওইয়্যে।

¹³ তুই মঅ বিরুদ্ধে বাড়্‌বো গুরিনে বোউত্ কধা কোইয়োচ্। মুই সিয়েনি বেক্কানি শুন্যং।

¹⁴ যেক্কেনে বেক পিত্‌‌‌‌‌‌‌থিমীগানে ফুত্তি গুরিবো সেক্কে মুই তরে মানুচ্ নেইয়্যে গুরিম।

¹⁵ ইস্রায়েল জাদে অধিকার ইজেবে যে দেজ্‌‌‌‌‌‌‌চান পেইয়্যে সিয়েন মানুচ্ নেইয়্যে দেগিনে তুই যেবাবোত্যে ফুত্তি গোজ্যস্ সেবাবোত্যেগুরি মুই তঅ লগে বেবহার গুরিম। ও সেয়ীর মুড়োবো, তুই আর ইদোমর বাদবাগি বেক জাগায়ানি মানুচ্ নেইয়্যে অবাক্। সেক্কে মানুচ্চুনে হবর্ পেবাক যে, মুয়ই লগেপ্রভু।”