যিহিষ্কেল 34 - Chakma Bible

ইস্রায়েলর্ পালক্

¹ পরেদি লগেপ্রভু মরে কলঅ,

² ও মান্‌‌‌‌‌‌‌জ্যর পুয়োবো, ইস্রায়েলর পালক্কুনো বিরুদ্ধে তুই ভাববাদী ইজেবে এ কধাগান কঅ, প্রভু লগেপ্রভু কোইয়্যেদে, অভিশাব্ পোড়োক্, ইস্রায়েলর সেই পালক্কুনোর, যিগুনে বানা নিজোর্ দেগাশুনো গরন্! ভেড়াপালর দেগাশুনো গরানা কি পালক্কুনোর্ উজিত্ নয়?

³ তুমি দঅ তেল্ খঅ, ভেড়া কেশ্‌‌চোই কাবড় বানেইনে উরো আর বেঈ লোইয়্যে ভেড়া কাবঅ, মাত্তর্ তুমি মেষচুনোর্ যত্তন্ ন-গরঅ।

⁴ তুমি বল্‌‌‌‌‌‌‌‌পোজ্যেগুনোরে সবল ন-গরঅ, অসুখ্যেগুনোরে গম্ ন-গরঅ, আহতগুনোরে ঘা-গানি বানি ন-দুয়ো। যিগুনে ভান্ন্যেই পধেদি যেইয়োন তারারে তুমি ফিরেই ন-আন বা আজি যেইয়্যে মানুচ্চুনোরে ন-তগঅ, বরং কড়া আর চিৎনপুজ্যেগুরি তারারে শাজন্ গোজ্য।

⁵ পালক নেই বিলিনে তারা ছিদি পোজ্যন্ আর ঝার য়েমানর্ হানা ওইয়োন।

⁶ মর্ ভেড়াগুন বেক মুড়ো-মুড়িগুনোত্ ঘুরি বেড়াদন্। তারা পুরো পিথ্‌তিমীগানত্ ছিদি পোজ্যন; কনজনে তারারে ন-তগান্।

⁷ সেনত্তে, ও গরগ্‌কুন‌, তুমি মঅ কধানি শুনো।

⁸ মুই প্রভু লগেপ্রভু মর্ জিংকানির নাঙে কঙর্, গরগ অভাবে মর্ পালুন লুদেয়্যে জিনিস ওইয়োন্ আর ঝার্‌‌বো য়েমানর্ হানা ওইয়োন। মর্ গরগ্‌‌কুনে মর্ পালুনোর হবর্ ন-লন্ আর দেগাশুনোয়ো ন-গরন; সিয়েনর বদলে তারা নিজোর্ দেগাশুনো গোজ্যন্।

⁹ সেনত্তে, ও গরগ্‌‌‌কুন, মঅ কধানি শুনো। ‌

¹⁰ মুই প্রভু লগেপ্রভু কঙর্, মুই গরগ্‌‌কুনোর বিপক্ষে; মুই তারার্ আঢত্তুন্ মর্ ভেড়াগুনোরে আদায় গুরি নেযেম। মর্ পাল চরানার্ কামত্তুন্ মুই তারারে সোরেই দিম যেনে তারা আর নিজে লাভবান ওই ন-পারন্। তারা মুয়োত্তুন্ মুই মঅ পালুন্ রোক্ষ্যে গুরিম আর ভেড়াগুন আর্ তারার হানা ন-অবাক্।

¹¹ মুই প্রভু লগেপ্রভু কঙর্, মুই নিজেই মর্ ভেড়াগুনোরে তোগেম্ আর তারার্ দেগাশুনো গুরিম।

¹² গরগে যেবাবোত্যেগুরি তার ছিদি পোজ্যে পালরে তগায় সেবাবোত্যেগুরি মুই মর্ ভেড়াগুনোরে তোগেম্। মেঘ আর আন্ধার দিনোত্ তারা যেদক্কানি জাগাত্ ছিদি পোজ্যন্ মুই সিয়েনিত্তুন্ তারারে উদ্ধোর্ গুরিম।

¹³ মুই নানান্ জাদ আর দেজ ভিদিরেত্তুন্ তারারে নিগিলেই আনিম আর তারার্ নিজো দেজত্ তারারে এগত্তর্ গুরিম। ইস্রায়েলর্ মুড়ো-মুড়ি উগুরে, গাঙ পারত্ আর দেজর্ বেক বজত্তি গুরিবার জাগায়ানিত্ মুই তারারে চোরেম্।

¹⁴ চরি বেড়েবার গম্ জাগাত্ মুই তারারে চোরেম্ আর ইস্রায়েলর্ অজল্ অজল্ মুড়োত্ তারারে চোড়েবার জাগা অবঅ। গম্ গম্ চোড়েবার জাগাত্ তারা থেবাক্ আর সিয়েনত্ ইস্রায়েলর মুড়োগুনো উগুরে গম্ চরেদে ভূইয়োত্ হেই হেই বেড়েবাক্।

¹⁵ মুই নিজে মর্ ভেড়াগুন চোরেম্ আর জিরেবার জাগানত্ নেযেম।

¹⁶ যিগুনে আজি যেইয়োন্ মুই তারারে তোগেম্ আর যিগুনে ভান্ন্যেই পধেদি যেইয়োন তারারে ফিরেই আনিম। মুই আহতগুনোরে ঘা-গানি বানি দিম্ আর বল্‌‌পোজ্যেগুনোরে সবল্ গুরিম্, মাত্তর্ পক্তামক্তা আর বোলিবন্দগুনোরে মুই ভস্ত গুরিম, কিত্যে মুই ন্যায়বিচেরর্ মাধ্যমে মর্ পালুনোরে দেগাশুনো গুরিম।

¹⁷ ও মর্ পালুন্, শুনো। মুই গম্ আর ভান্ন্যেই ভেড়াগুনোরে বিচের্ গুরিম। বেক্ ভেড়া আর ছাগলুন বজং বিলিনে মুই তারারে সাজা দিম্।

¹⁸ তমা তপ্পে গম্ চোরেয়্যে ভূইয়োত্ হানা কি যগাজ্যে ন-অর্? আরঅ বাদবাগি ঘাস্‌চানিয়ো কি টেঙোই মাড়া পড়িবো? তমা তপ্পে সাব্ পানি হানা কি যগাজ্যে ন-অর্? আরঅ বাদবাগি পানিগান্‌অ কি টেঙোই কুলুগ্ গরা পড়িবো?

¹⁹ তঅ টেঙোই যিয়েনি মাড়েয়োচ্ আর যে পানিগান ঘোলা গোজ্যস্ সিয়েনি কি মঅ ভেড়াগুনে হেই পেবাক্?

²⁰ চঅ, মুই প্রভু লগেপ্রভু নিজেই পক্তা আর কেঙেদা ভেড়াগুনো ভিদিরে বিচের্ গুরিম।

²¹ বেক্ বল্‌‌‌পোজ্যে ভেড়াগুনোরে ধাবেই ন-দেনা সং তুমি কিয়্যে আর কানাগানিলোই তারারে ঠেলর্ আর শিঙোই গুদোর্।

²² সেনত্তে মুই মর্ ভেড়াগুনোরে রোক্ষ্যে গুরিম আর তারা আর লুদেয়্যে জিনিস্ ন-অবাক্। মুই গম্ আর ভান্ন্যেই ভেড়াগুনো ভিদিরে বিচের্ গুরিম।

²³ মুই তারা উগুরে এক্কো গরগরে, অত্তাৎ মর্ চাগর্ দায়ূদোরে নেযেম; তে নিজেই তারারে দেগাশুনো গুরিবো আর তারার্ গরগ্ অবঅ।

²⁴ মুই লগেপ্রভু তারার্ গোজেন ওম্ আর মর্ চাগর্ দায়ূদে তারার্ নেতা অবঅ। মুই লগেপ্রভু এ কধাগান কঙর্।

²⁵ “‘মুই তারাত্তে ভালেদির্ এক্কান বেবস্থা থিদেবর্ গুরিম আর দেজত্তুন্ চিৎনপুজ্যে য়েমানুনোরে শেজ্ গুরিম যেনে তারা গমেডালে ধূল্যেচর-চাগালাত্ বজত্তি গত্তে আর ঝার-জংগলত্ ঘুমেই পারন্।

²⁶ মুই তারারে বর্ দিম আর মর্ মুড়োগুনোর্ চেরোকিত্তে জাগানিরে বর্ দিম। মুই ঠিগ্ সময়োত্ ঝড়্ পাদেম; সিয়েন অবঅ বর্ পানার্ ঝড়।

²⁷ মাদ গাজ্‌চুনোত্ গুলো ধুরিবাক্ আর মাদিগানে তার খেত্‌-খেত্তি দিবো; তারা গমেডালে নিজোর্ নিজোর্ ভূইয়োত্ বজত্তি গুরিবাক্। মুই যেক্কে তারার্ জুঙোলান্ ভাঙি ফেলেম আর যিগুনে তারারে চাগর্ বানেয়োন তারা আঢত্তুন্ ছাড়েই আনিম সেক্কে তারা হবর্ পেবাক্, মুয়ই লগেপ্রভু।

²⁸ তারা আর জাদ্‌‌‌‌তুনোর্ লুদেয়্যে জিনিসপাদি ন-অবাক্ বা ঝার য়েমানুনেয়ো তারারে ন-হেবাক্। তারা গমেডালে বজত্তি গুরিবাক্ আর কনজনে তারারে দর্‌‌‌‌বুক ন-লাগেবাক্।

²⁹ মুই তারারে বোল্‌‌‌‌বোল্যে ভূই দিম; দেজ ভিদিরে তারা আর ভাদরাদত্ ন-পড়িবাক্ বা অন্য জাদ ইধু অসর্মান ন-অবাক্।

³⁰ সেক্কে তারা হবর্ পেবাক্, মুই তারার গোজেন লগেপ্রভু তারা লগে লগে আগং আর তারা, অত্তাৎ ইস্রায়েলীয়গুনে মর্ মানুচ্।

³¹ ও মর্ ভেড়াপালুন, মর্ চোরেয়্যে ভূইয়োর পাল, তুমি মঅ মানুচ্ আর মুয়ই তমার্ গোজেন। মুই প্রভু লগেপ্রভু এ কধাগান কঙর্।’”