যিহিষ্কেল 32 - Chakma Bibleফরৌণত্তে আবিলেচ্ গরানা 1 আমা বন্দীদজার্ বার বজরর্ বার মাজর্ পত্তম দিনোত্ লগেপ্রভুর এ কধাগান মইধু ফগদাং অলঅ, 2 ও মান্জ্যর পুয়োবো, মিসরর রাজা ফরৌণ পৌইদ্যেনে তুই আবিলেচ্ গুরি গুরি তারে কঅ, তুই মনে গুরিদে তুই জাদ ভিদিরেত্তুন্ এক্কো সিংহ ধোক্ক্যেন, মাত্তর্ আজলে তুই গাঙ সংমোধ্যে কুমোর ধোক্ক্যেন্। তুই নিজো গাঙ ভিদিরে লাপালাপি গুরিদে, টেঙোই পানিগান উলোত্-পালত্ গুরিদে আর গাঙ পানিগান কুলুগ্ গুরিদে। 3 মুই প্রভু লগেপ্রভু কঙর্, মানুচ্চুনোর এক্কো দাঙর্ দল নিইনে মুই তঅ উগুরে মঅ জালান্ ফেলেম; তারা মঅ জালান্দোই তরে টানি তুলিবাক্। 4 মুড়ো উগুরে খুলো মাদত্ মুই তরে লুঙি মারি ফেলেই দিম। মঅ উগুমে আগাজর্ বেক পেখ্কুনে তঅ উগুরে বুজিবাক্ আর পিত্থিমীর বেক্ য়েমানুনে তরে হেইনে ঈল্ ফুদেবাক্। 5 মুই তর্ মরা কিয়্যেগান্ কট্টা কট্টা গুরি মুড়োই মুড়োই, কলগে কলগে ছিদি দিম। 6 মুড়ো-মুড়ি সং মুই তর্ লোগান্দোই দেজ্চান ভিজেম্; সেক্কে তঅ লোগান্দোই গঙার পানিগান রাঙা ওই যেবঅ। 7 তরে শেজ্ গুরি দিবার সময় মুই আগাজ্চান নাঢি দিম আর তারাগুন্ কালা গুরি দিম; মেঘ্কোই মুই বেলানরে নাঢি দিম আর চানানে পহ্র ন-দিবো। 8 তঅ উগুরে আগাজর্ বেক পহ্রান মুই কালা গুরি দিম; তঅ দেজ উগুরে মুই আন্ধার্ আনিম। মুই প্রভু লগেপ্রভু এ কধাগান কঙর্। 9 নানান্ জাদ ভিদিরে, এন্ কি, তর্ হবর্ ন-পেইয়্যে নানান্ দেজ ভিদিরে যেক্কে মুই তর্ ভস্ত অনার্ হবর্ দিম সেক্কে তারা মনত্ দুঘ্ পেবাক্। 10 মুই তঅ উগুরে যিয়েনি গুরিম সিয়েনি দেগিনে ভালোক্কুন্ জাদে আমক্ অবাক্। মুই যেক্কেনে তারা মুজুঙোত্ মঅ লাম্বা ছুরিগান্ ঘুরেম সেক্কে তারার রাজাগুনে দরে গির্গিরেবাক। তর্ পতনর দিনোত্ তারার পত্তিজনে তা নিজোর পরাণান দরে আমিযে গির্গিরে গির্গিরে থেবাক্। 11 মুই প্রভু লগেপ্রভু কঙর্, বাবিল রাজার লাম্বা ছুরিগান তঅ উগুরে এবঅ। 12 খেমতাবলা মানুচ্চুনোর লাম্বা ছুরিলোই, অত্তাৎ বেক্ জাদ ভিদিরেত্তুন্ চিৎনপুজ্যে জাদর্ লাম্বা ছুরিলোই মুই তর্ বেক মানুচ্চুনোর পতন ঘোদেম্। তারা মিসরর্ অহংকার চুরমার গুরিবাক্ আর তার বেক মানুচ্চুনোরে ভস্ত গুরিবাক্। 13 পানি কুরে থেইয়্যে তার বেক্ য়েমানুনোরে মুই ভস্ত গুরি দিম; সেই পানিগান মান্জ্য টেঙত্ বা য়েমান টেঙ টুগোত্ আর ঘোলা ন-অবঅ। 14 এবাবোত্যেগুরি মুই তার পানিগান সাব্ রাগেম আর তার বেক্ গাঙানিরে তেল ধোক্ক্যেন বেঈ যেবাত্তে দিম। 15 মুই যেক্কে মিসররে ভস্ত ওইয়্যে জাগা বানেম্ আর দেজ ভিদিরে বেক্কানি খালি গুরি ফেলেম আর সিদুগোর্ বেক আদাম্মেগুনোরে আঘাত্ গুরিম সেক্কে তারা হবর্ পেবাক, মুয়ই লগেপ্রভু। 16 “‘এই বেক্ কধানি তারা মিসরত্তে দুঘ কধা ফগদাং গুরিনে গেবাক্। নানান্ জাদর্ মিলেগুনেয়ো সিয়েন গেবাক্; তারা মিসর আর তার বেক মানুচ্চুনোত্তে সিয়েন গেবাক্। মুই প্রভু লগেপ্রভু এ কধাগান কঙর্।’” মরণ জাগা মিসর 17 আমা বন্দীদজার বার বজরর্ সময় সেই মাজর্ পনর দিনোত্ লগেপ্রভুর এ কধাগান মইধু ফগদাং অলঅ, 18 ও মান্জ্যর পুয়োবো, মিসর মানুচ্চুনোত্তে আবিলেচ্ গর আর যিগুনে মরণ জাগাত্ লামদন্ তারা লগে তারে আর অন্য খেমতাবলা জাদর্ মানুচ্চুনোরে পিত্থিমীর গভীনোত্ পাধেই দে। 19 তুই মিসররে কঅ, অন্যগুনোত্তুন্ কি তুই বেশ্ দোল্? তুই মরণ জাগাত্ লামিনে সুন্নত-ন-গোজ্যে মানুচ্চুনো ইধু পড়ি থাচ্। 20 যুদ্ধোত্ যিগুনে মারা পোজ্যন্ তারা ভিদিরে তা মানুচ্চুনে পড়ি থেবাক্। লাম্বা ছুরি আঢত্ তারে তুলি দিয়্যে অবঅ; তার বেক মানুচ্চুনো সমারে তারেয়ো টানি নেযা অবঅ। 21 মরণ জাগা ভিদিরেত্তুন্ খেমতাবলা যোদ্ধাগুনে মিসর আর তা সমাজ্যেগুনো পৌইদ্যেনে কবাক্, যুদ্ধোত মুরি যেইয়্যে সেই সুন্নত-ন-গোজ্যে মানুচ্চুনে তলেদি লামি এইনে পড়ি আগন্। 22 আসিরিয়া তার বেক সৈন্যগুনো সমারে সিয়েনত্ আঘে। তারে ঘিরিনে রোইয়্যেদে তার বেক্ মুরি যেইয়্যে মানুচ্চুনোর গোরুন্; ইগুনে বেক্কুনে যুদ্ধোত্ মুরি যেইয়োন্। 23 তারার গোরান্ মরণ জাগার্ গভীনোত্ আঘে আর তার সৈন্যদলুন তা গোরানর্ চেরোকিত্তে পড়ি আগন্। জেদাগুনো দেজত্ যিগুনে দর্বুক ছোরেয়োন্ তারার বেক্কুনোরে যুদ্ধোত্ মারে ফেলা ওইয়্যে। 24 এলম সিয়েনত্ আঘে; তা গোরর্ চেরোকিত্তে আঘন্ তার বেক মানুচ্চুন। তারারে বেক্কুনোরে যুদ্ধোত্ মারে ফেলা ওইয়্যে। তারা জেদাগুনোর দেজত্ দর্বুক ছোরেয়োন, মাত্তর্ যেরেদি বেক্কুনে সুন্নত-ন-গোজ্যে অবস্থায় পিত্থীমির গভীনোত্ লামি যেইয়োন। যিগুনে মরণ জাগাত্ লামি যেইয়োন তারা লগে এ মানুচ্চুনে অসর্মান ওইয়োন্। 25 মোজ্যেদে মানুচ্চুনো ভিদিরে এলমর্ বিচ্চোনান্ পাদা ওইয়্যে; তা গোরানর্ চেরোকিত্তে তা সমারে রোইয়্যেদে তার বেক্ মানুচ্চুন। এই বেক্ সুন্নত্ ন-গোজ্যে মানুচ্চুনোরে যুদ্ধোত্ মারে ফেলা ওইয়্যে। জেদাগুনোর্ দেজত্ তারা দর্বুক লাগেয়োন, মাত্তর্ যিগুনে মরণ জাগাত্ লামি যেইয়োন তারা সমারে এ মানুচ্চুনে অসর্মান পেইয়োন; মোজ্যন্দে মানুচ্চুনো ভিদিরে তারারে থুয়ো ওইয়্যে। 26 মেশক আর তূবল সিয়েনত্ আঘে; তারার চেরোকিত্তে রোইয়্যেদে তারার বেক মানুচ্চুনোর গোরুন্। এই বেক সুন্নত-ন-গোজ্যে মানুচ্চুনোরে যুদ্ধোত্ মারে ফেলা ওইয়্যে। জেদাগুনোর দেজত্ তারা দর্বুক লাগেয়োন। 27 তারা সুন্নত-ন-গোজ্যে অন্য যোদ্ধাগুনে সমারে পড়ি ন-থেবাক্। সেই যোদ্ধাগুনে তারার্ যুদ্ধোর্ আত্যেরানি নিইনে মরণ জাগাত্ লামি যেইয়োন, তারার তলোয়ারানি তারার্ মাঢাগুনো তলে রাগা ওইয়্যে আর তারার পাপর্ সাজা তারার আড়ুনো উগুরে আঘে। তারায়ো জেদাগুনো দেজত্ দর্বুক লাগেয়োন্। 28 ও মিসর, তরেয়ো ভাঙি ফেলা অবঅ আর তুই সেই সুন্নত-ন-গোজ্যে মানুচ্চুনো ভিদিরে পড়ি থেবে যিগুনোরে যুদ্ধোত্ মারে ফেলা ওইয়্যে। 29 ইদোম, তার রাজাগুনে আর তার বেক শাজন্গুরিয়্যেগুনে সিয়েনত্ আগন; তারার্ খেমতা থেলেয়ো যুদ্ধোত্ মোজ্যন্দে মানুচ্চুনো সমারে তারারে থুয়ো ওইয়্যে। যিগুনে মরণ জাগাত্ লাম্যন্ সেই সুন্নত ন-গোজ্যে মানুচ্চুনো সমারে তারা পড়ি আগন্। 30 “উত্তোরেদি দেজর্ বেক শাজন্গুরিয়্যেগুন আর সীদোনীয়োগুন বেক্কুনে সিয়েনত্ আগন্। যুনিয়ো তারার খেমতালোই তারা দর্বুক লাগেয়োন তুয়ো অসর্মানর লগে তারা যুদ্ধোত্ মোজ্যে মানুচ্চুনো সমারে তলেদি লামি যেইয়োন্ আর তারা লগে সুন্নত-ন-গোজ্যে অবস্থায় পড়ি আগন্। যিগুনে মরণ জাগাত্ লামি যেইয়োন তারা সমারে এই মানুচ্চুনে তারার্ অসর্মান পাদন্। 31 যেক্কে ফরৌণ আর তার বেক্ সৈন্যদলুনে যুদ্ধোত্ মুরি যেবাক্ সেক্কে তে সেই বেক্ মানুচ্চুনোরে দেগিবো আর তার বেক্ মানুচ্চুনো পৌইদ্যেনে তারে বুঝো অবঅ। 32 যুনিয়ো মুই ফরৌণরে দিইনে জেদাগুনোর দেজত্ দর্বুক লাগেয়োং তুয়ো তারে আর তার বেক্ মানুচ্চুনোরে সেই সুন্নত-ন-গোজ্যে, যুদ্ধোত্ মোজ্যে মানুচ্চুনো সমারে থুয়ো অবঅ। মুই প্রভু লগেপ্রভু এ কধাগান কঙর্।” |
Copyright © 2021 Bangladesh Bible Society
Bangladesh Bible Society