যিহিষ্কেল 31 - Chakma Bible

লেবাননর্ এরস গাজ্

¹ আমা বন্দীদজার্ এগার বজরর্ তিন মাজর্ পৌইল্যা দিনোত্ লগেপ্রভুর এ কধাগান মইধু ফগদাং অলঅ,

² ও মান্‌‌‌‌‌‌জ্যর পুয়োবো, মিসরর রাজা ফরৌণ আর তার বেক্ মানুচ্চুনোরে কঅ, সয়-সাগোজ্যে ইন্দিত্তুন্ তুই কা সং সং?

³ আসিরিয়ার কধা চিন্তে গুরি চাহ্, তে একদিন লেবাননর্ এরস গাজ্ এলঅ। তার দোল্ দোল্ ডেলাগুন ঝারত্ ঘন ছাবা ফেলেদ; সিবে অমকদ অজল্ এলঅ, তার মাঢাবো যেন আগাজ ইধু লুম্মেগোই।

⁴ বোউত্ পানিয়ে তারে বোল্‌বোল্যে গুরি তুল্যে, গভীন পয়নালা তারে লাম্বা গোজ্যে; পয়নালার্ গঙারান্ তা জাগানর্ চেরোকিত্তেদি বেঈ যেদঅ আর তা নালাগুনে ঝারর্ বেক্ গাজ্‌চুনোরে পানি দিদো।

⁵ এবাবোত্যেগুরি ঝারর্ বেক গাজ্‌চুনোত্তুন্ তে অজল্ ওইনে উদিলো; অমকদ পানি পানার্ কারনে তার বোউত্ ডেলা অলাক্ আর ডেলাগুন লাম্বা লাম্বা ওইনে ছিদি পড়িলাক্।

⁶ আগাজর্ বেক পেখ্‌‌কুনে তার ডেলাগুনোত্ বাহ্ বানিলাক্ আর ঝারর্ বেক পেখ্‌‌কুনে তার ডেলাগুনো তলে ছঅ পুদেদাক্; তার ছাবাবোত্ বজত্তি গুরিদাক্ বেক দাঙর্ দাঙর্ জাদে।

⁷ তার ছিদি পোজ্যে ডেলাগুনোর দোলান্দোই তে দাঙর্ এলঅ, কিত্যে তা শিঙোরানি তলে বোউত্ পানি ইধু যেইয়্যে।

⁸ গোজেনর বাগান এরস গাজ্‌চুনেয়ো তা সমারে পাল্লা দি ন-পারিদাক্। বেরস গাজর্ ডেলাগুন্‌অ তার দাঙর্ দাঙর্ ডেলাগুনো সং ন-এলাক্; তার ডেলাগুনোর লগে আর্মোণ গাজর্ তুলনা ন-অদঅ। আজল্ কধা, গোজেনর বাগান কনঅ গাজ দোলদি তার সং সং ন-এলাক্।

⁹ বোউত্ ডেলালোই মুই তারে দোল্ বানেয়োং; তে এলদে এদনত্ গোজেন বাগানর বেক্ গাজ্‌‌চুনোত্তুন ইংসের্ গাজ।

¹⁰ ইক্কিনে মুই প্রভু লগেপ্রভু কঙর্, তে অজল্ ওইয়্যে, তার মাঢাবো যেন আগাজত্ লুম্মেগোই, আর তে লাম্বা বিলিনে তার অহংকার ওইয়্যে।

¹¹ সেনত্তে মুই তারে জাদ্‌‌‌তুনোর্ শাজন্‌গুরিয়্যেগুনো আঢত্ তুলি দুয়োং; তার ভান্ন্যেই কাম মজিম তে তা লগে বেবহার গুরিবো। মুই তারে এলাফেলা গোজ্যং।

¹² জাদ ভিদিরে বেগত্তুন্ চিৎনপুজ্যে জাদর্ মানুচ্চুনে তারে কাবি ফেলেইনে থোই যেইয়োন্। তার দাঙর্ দাঙর্ ডেলাগুন মুড়োই মুড়োই আর বেক্ কলগত্ পোজ্যন্দোই; তার ডেলাগুন ভাঙিনে দেজর্ বেক পানি গঙার ভিদিরে পড়ি আঘে। পিত্‌‌‌‌থিমীর বেক্ জাদ্‌‌‌‌তুনে তা ছাবাবোত্তুন নিগিলিনে তারে ফেলেই যেইয়োন।

¹³ সেই পড়ি থেইয়্যে গাজ্‌‌‌‌চোত্ আগাজর্ বেক পেখ্‌‌‌‌কুনে এইনে থেলাক্ আর ঝারর্ বেক্ য়েমানুনেয়ো তার ডেলাগুনোর কায়কুরে থেলাক্।

¹⁴ সিয়েনত্তে পানি পার অন্য কনঅ গাজে অহংকারে অজল্ ন-অবঅ, তার মাঢাবো আগাজত্ ন-লুমিবো আর তে এদক্ অজলজত্‌অ ন-লুমিবো। তারা বেক্কুনে মান্‌‌‌‌জ্য ধোক্ক্যেন মরণর্ তলে; তারা পিত্‌‌‌‌থিমীর গভীনোত্, অত্তাৎ মরণ জাগাত্ লামিবাত্তে ঠিগ্ ওই আগন।

¹⁵ মুই প্রভু লগেপ্রভু আরঅ কঙর্, যেদিন্যে তে মরণর্ জাগাত্ লামিলো সেদিন্যে তাত্তে আবিলেচ্ গরানার চিহ্নো ইজেবে সেই গভীন্ পয়নালাবো মুই নাঢি দিলুং; মুই তার বেক্ গঙারান থামেই দিলুং, সেক্কে তার বেক্ পানিগান বন্ধ ওই গেলঅ। ইয়েনত্তে মুই লেবাননরে আবিলেচ্ গোরেলুং আর ঝারর্ পত্তি গাজ্ শুগেই গেলঅ।

¹⁶ মরা মানুচ্চুনো লগে মুই যেক্কে তারে মরণ জাগাত্ লামেই দিলুং সেক্কে তার পড়ি যানার্ রলোই জাদ্‌‌‌‌‌তুনে গির্‌‌‌‌‌গিরে উদিলাক্। সেক্কে এদনর্ বেক গাজ্‌‌‌‌‌চুন, লেবাননর্ বেঈ লোইয়্যে আর সেরা গাজ্‌‌‌‌‌চুন আর গমেডালে পানি পেইয়্যে বেক্ গাজ্‌‌‌‌‌চুন পিত্‌‌‌‌‌থিমীর গভীনোত্ সান্তনা পেলাক্।

¹⁷ যিগুনে তা ছাবাত্ বজত্তি গুরিদাক্, অত্তাৎ জাদ্‌তুনো ভিদিরে তা সমাজ্যেগুনে তা লগে মরণ জাগাত্ যুদ্ধোত্ মোজ্যন্দে মানুচ্চুনো ইধু লামিলাক্।‌‌‌‌

¹⁸ ও ফরৌণ, সয়-সাগোজ্যে আর বাঈনী গরানাগান ইন্দি এদনর্ গাজ্‌চুনো ভিদিরে এক্কোয়ো তর্ সং সং নয়। তো এদনর্ গাজ্‌‌‌‌‌‌চুনো সমারে তরেয়ো পিত্‌‌‌‌‌‌থিমীর গভীনোত্ লামেই দিয়্যে অবঅ; যিগুনে যুদ্ধোত্ মুরি যেইয়োন সেই সু্ন্নত-ন-গোজ্যে মানুচ্চুনো সমারে তুই পড়ি থেবে। মুই প্রভু লগেপ্রভু কঙর্, সেই গাজ্‌‌‌‌‌‌‌চুন অলাক্ ফরৌণ আর তার বেক্ দলুন।