যিহিষ্কেল 28 - Chakma Bibleসোর রাজা পৌইদ্যেনে লগেপ্রভুর কধা 1 পরেদি লগেপ্রভু মরে কলঅ, 2 ও মান্জ্যর পুয়োবো, তুই সোরর্ শাজন্গুরিয়্যেবোরে কঅ, প্রভু লগেপ্রভু কোইয়্যেদে, তর্ মনর্ অহংকারে কোইয়োচ্, তুই দেবেদা; তুই সাগর ভিদিরে দেবেদা সিংহাসনত্ বুয়োই আগচ্। মাত্তর্ তুই দঅ এক্কো মানুচ্, দেবেদা নয়, যুনিয়ো তুই নিজোরে দেবেদা ধোক্ক্যেন জ্ঞানী মনে গরর্। 3 তুই দঅ দানিয়েলত্তুন্অ বেশ্ জ্ঞানী; বেক্ গুমুরো বিষয়ানি তর্ জানা আঘে। 4 তর্ জ্ঞান আর বুদ্ধিলোই তুই নিজোত্তে ধন-সোম্বোত্তি পেইয়োচ্ আর তর্ ধন-ভান্ডালত্ সোনা আর রূবো থুবেয়োচ্। 5 কাবিল্ বেবসায়ী বুদ্ধিলোই তুই তর্ ধন বাড়েয়োচ্ আর তর্ ধন-সোম্বোত্তিগানিত্তে তর্ মনান্ অহংকারে ভুরি উঠ্যে। 6-7 “‘তুই নিজোরে দেবেদার সমান জ্ঞানী মনে গোজ্যস্ বিলিনে মুই জাদ্তুনো ভিদিরেত্তুন্ বেগত্তুন্ চিৎনপুজ্যে জাদ মানুচ্চুন্ তঅ বিরুদ্ধে আনিম। তর্ কাবিদ্যেঙিলোই তুই যেদক্কানি দোল্ দোল্ পযাপিরা পেইয়োচ্ সিয়েনি তারা যুদ্ধোর্ ভিদিরেদি বর্বাত্ গুরি ফেলেবাক্ আর তর্ সয়সাগোজ্যেগানি ভস্ত গুরি দিবাক্। 8 তারা তরে মরণ জাগাত্ লামেবাক্; তুই সাগরর্ গভীনোত্ জদবদে শেজ্ ওই যেবে। 9 যিগুনে তরে শেজ্ গুরি দিবাক্ তারা মুজুঙোত্ সেক্কে তুই কি কবে, তুই দেবেদা? যিগুনে তরে মারে ফেলেবাক্ তারা ইধু তুই অবে এক্কো বানা মানুচ্, দেবেদা নয়। 10 তুই বিদেশীগুনো আঢত্ সুন্নত-ন-গোজ্যে মানুচ্চুনো ধোক্ক্যেন মুরি যেবে। মুই প্রভু লগেপ্রভু এ কধাগান কঙর্।’” 11 লগেপ্রভু মরে আরঅ কোইয়্যেদে, 12 “ও মান্জ্যর্ পুয়োবো, সোরর রাজা পৌইদ্যেনে তুই আবিলেচ্ গুরি গুরি তারে কঅ, প্রভু লগেপ্রভু কোইয়্যেদে, ‘তুই এলে পুরোপুরি থুদি নেইয়্যে, জ্ঞানে ভরা আর দোল্লোই পরিপূরোন্। 13 তুই গোজেনর বাগান এদনত্ এলে। নানান্ বাবোত্যে মংগা মংগা পাত্তর্, সার্দীয়মুণি, সূর্যকান্তমণি, নীলকান্তমণি, চুনী, পান্না আর সোনালোই তুই সাজেয়্যে এলে; তর্ সিরিস্টির্ দিনোত্ ইগুনোরে যুক্কোল্ গরা ওইয়্যে। 14 রোক্ষ্যেগুরিয়্যে করূব ইজেবে তরে অভিষেগ্ গরা ওইয়্যে, কিত্তে সেবাবোত্যেগুরি মুই তরে নেযেয়োং। তুই গোজেনর সুদ্ধো-সাংগ মুড়োবোত্ এলে; তুই আগুনো ধোক্ক্যেন চোক্চোক্যে গোজ্যে পাত্তর ভিদিরেদি আঢা-উদো গুরিদে। 15 তর্ সৃষ্টির্ দিনোত্তুন্ ধুরি তর্ চালচলনত্ তুই নিদ্দুযি এলে, মাত্তর্ যেরেদি তঅ ভিদিরে পাজি কাম্ পাহ্ গেলঅ। 16 তর্ বোউত্ বেবসার কারনে তুই অত্যেচারি ওইনে পাপ গুরিলে। সেনত্তে গোজেনর মুড়োবোত্তুন্ মুই তরে অসিজি অবস্থায় ধাবেই দিলুং। ও রোক্ষ্যেগুরিয়্যে করূব, মুই তরে আগুনো ধোক্ক্যেন চক্চক্ গোজ্যে পাত্তর ভিদিরেত্তুন্ সোরেই দিলুং। 17 তর্ দোল্ অনাত্তে তর্ মনান্ অহংকারে ভুরি উঠ্যে আর তর্ সয়-সাগোজ্যে গানত্তে তুই তর্ জ্ঞানানরে বর্বাত্ গোজ্যস্। সেনত্তে মুই তরে মাদিত্ ফেলেই দিলুং; রাজাগুনো মুজুঙোত্ মুই তরে রাগেলুং যেনে তরে দেগিনে তারা হুজি অন্। 18 তর্ বোউত্ পাপ আর ভান্ন্যেই বেবসালোই তুই নিজোর্ উবোসনার জাগায়ানি অসিজি গোজ্যস্। ইয়েনত্তে মুই তঅ ভিদিরে আগুন বাজেই দিলুং আর সিয়েনে তরে পুড়ি ফেলেল; যিগুনে দেখ্যন তারার্ বেক্কুনো চোগো মুজুঙোত্ মুই তরে মাদি উগুরে ছেই গুরি দিলুং। 19 যিদুক্কুন জাদে তরে চিনিদাক্ তারা তরে দেগিনে আমক্ ওই গেলাক্। তুই দর্গরেপারা শেজ্ ওই যেয়োচ্; তুই আর ন-থেবে।’” সীদোনর বিরুদ্ধে আগাম্ কধা 20 পরেদি লগেপ্রভু মরে কোইয়্যেদে, 21 “ও মান্জ্যর পুয়োবো, তুই সীদোন ইন্দি তর্ মুয়োন থোইনে তা বিরুদ্ধে আগাম্ কধা কঅ, 22 প্রভু লগেপ্রভু কোইয়্যেদে, ‘ও সীদোন, মুই তর্ বিপক্ষে; মুই তঅ ভিদিরে যিয়েনি গুরিম সেক্কে মর্ মহিমাগান ফগদাং অবঅ। মুই যেক্কে তরে সাজা দিম্ আর তঅ ভিদিরে মর্ পবিত্রতাগান ফগদাং গুরিম সেক্কে তঅ মানুচ্চুনে হবর্ পেবাক্, মুয়ই লগেপ্রভু। 23 তঅ উগুরে মুই ভানা পাদেম্ আর তর্ পধে পধে লো ঝুরিবো। তরে চেরোকিত্তেত্তুন্ আক্রমণ গরা অবঅ আর সেক্কে মান্জ্যে খুন ওইনে তইধু পুড়ি থেবাক্। সেক্কেনে তঅ মানুচ্চুনে হবর্ পেবাক্, মুয়ই লগেপ্রভু।’” ইস্রায়েলত্তে বর্পানা 24 প্রভু লগেপ্রভু আরঅ কোইয়্যেদে, ইস্রায়েল জাদত্তে ব্যথা দিয়্যে কনঅ কাদাগাজ্ বা সূচো কাদা ধোক্ক্যেন ঠাট্টা-মশ্কারী গুরিয়্যে পাড়াল্যে জাদ্ আর ন-থেবাক্। সেক্কে তারা হবর্ পেবাক্, মুয়ই প্রভু লগেপ্রভু। 25 “নানান্ জাদত্ ছিদি পোজ্যে ইস্রায়েলীয়গুনোরে মুই যেক্কে এগত্তর্ গুরিম সেক্কে জাদ্তুনো চোগো মুজুঙোত্ তারা ভিদিরে মুই নিজোর পবিত্রতাগান ফগদাং গুরিম। সেক্কে তারা নিজোর্ সেই দেজত্ বজত্তি গুরিবাক্ যে দেজচান মুই মর্ চাগর্ যাকোবরে দুয়োঙ্। 26 সিয়েনত্ তারা ঘর-বাড়ি বানেইনে গমেডালে বজত্তি গুরিবাক্ আর আংগুর খেত্ গুরিবাক্। তারার ঠাট্টা-মশকারি গুরিয়্যে কায়কুরে জাদ্ বেক্কুনোরে যেক্কে মুই সাজা দিম সেক্কে তারা গমেডালে বজত্তি গুরিবাক্। সেক্কে তারা হবর্ পেবাক্, মুয়ই তারার্ গোজেন লগেপ্রভু।” |
Copyright © 2021 Bangladesh Bible Society
Bangladesh Bible Society