যিহিষ্কেল 27 - Chakma Bibleসোরত্তে আবিলেচ্ গরানা 1 পরেদি লগেপ্রভু মরে কলঅ, 2 ও মান্জ্যর্ পুয়োবো, সোরর পৌইদ্যেনে তুই আবিলেচ্ গর্। 3 সাগরত্ সোমেবার মুয়োনত্ যে রোইয়্যে, সাগর পারর্ ভালোক্ জাদর্ যে বেবসায়িবো সেই সোররে তুই কঅ, প্রভু লগেপ্রভু কোইয়্যেদে, ও সোর, তুই কত্তে তুই অমকদ দোল্। 4 সাগর ভিদিরে তর্ রেজ্যগান; এক্কান দোল্ জাহাজ ধোক্ক্যেন গুরি মিস্ত্রিগুনে তর্ দোলান্ ফিরি আন্যন্। 5 সনীর চাগালার বেরস গাজত্তুন্ তারা তর্ বেক তক্তানি বানেয়োন; তর্ জাহাজ পাল খুদোবো বানেবাত্তে তারা লেবাননত্তুন্ এরস গাজ্ আন্যন্। 6 তারা বাশন দেজর্ এলোন গাজত্তুন্ বানেয়োন তর্ পাঙেইয়ানি; সাইপ্রাসত্তুন্ তাশূর গাজ আনিনে তারা তর্ তক্তা বানেইনে এদো দাত্তোই সাজেয়োন্। 7 মিসরর্ দোল্ নক্সা মসীনা কাবড়্লোই তর্ পালান্ বানা ওইয়্যে আর সিয়েন্দোই মান্জ্যে তরে চিনিদাক্। ইলীশাত্তুন্ আন্যে য়েল্ আর বিগুনি কাবড়ানি এলঅ তাম্বুল্। 8 সীদোন আর অর্বদ মানুচ্চুনে তর্ জাহাজ পাঙেইয়ানি ধুরিদাক্। ও সোর, কাবিল্ মানুচ্চুনে তর্ নাবিক এলাক্। 9 গবালর বুড়ো নেতাগুন কাবিল্ মানুচ্ ইজেবে তইধু ঠিগ্ গরানার কাম গুরিদাক্। সাগরর্ বেক জাহাজ্চানি আর সিয়েনির নাবিক্কুনে তর্ পযাপিরানি দেনা-নেযানা তইধু ভিরেদাক্। 10 পারস্য, লূদ আর পূট দেজর্ মানুচ্চুনে তর্ সৈন্যদলত্ যোদ্ধার কাম গুরিদাক্। তারা তারার্ ঢাল আর মাঢাবো-রোক্ষ্যে গুরিবার তোক্ক্যে তইধু টাঙেনে তর্ সয়-সাগোজ্যে বাড়েই তুলিদাক্। 11 অর্বদ আর হেলেকর মানুচ্চুনে তর্ চেরোকিত্তে দেবাল উগুরে চুগি দিদাক্, আর গাম্মাদর মানুচ্চুনে তর্ অজল্ চুগিদার-ঘরত্ চুগি দিদাক্। তর্ চেরোকিত্তে দেবালত্ তারা তারার্ ঢালানি টাঙেই রাগেদাক্; তর্ দোলর্ ভর্পুনঙান্ তারাই আন্যন্। 12 তর্ অমকদ ধন-সম্পদত্তে তর্শীশে তঅ লগে বেবসা গুরিদো; রূবো, লুয়ো, টিন আর সীসের বদলে তারা তঅ পযাপিরানি নিদাক্। 13 গ্রীস, তূবল আর মেশকে তঅ লগে বেবসা গুরিদাক্; তারা তর্ পযাপিরানির বদলে চাগর্-চাগরানি আর পিদোল পিলে দিদাক্। 14 তঅ পযাপিরানির বদলে বৈৎ-তোগর্মের মানুচ্চুনে ঘোড়া, যুদ্ধোর্ ঘোড়া আর খচ্চর দিদাক্। 15 দদানর্ মানুচ্চুনে তঅ সমারে বেবসা গুরিদাক্ আর সাগর পারর্ ভালোক্কানি দেজে তর্ পযাপিরানি কিনিদাক্; দাম ইজেবে তারা দিদাক্ এদো দাত্ আর আবলুস গাজ্। 16 তর্ বানেয়্যে ভালোক্কানি পযাপিরাত্তে সিরিয়া তঅ লগে বেবসা গুরিদো; তঅ পযাপিরানির বদলে তারা দিদাক্ চিবিদি পাত্তর্; বিগুনি কাবড়, নক্শা তুল্যে কাবড়, পাদল্ মসীনার কাবড়, প্রবাল আর পদ্মরাগমণি। 17 যিহূদা আর ইস্রায়েলে তঅ লগে বেবসা গুরিদো; তারা তঅ পযাপিরানির বদলে মিন্নীতের গম, হানার জিনিস, মধু, তেল আর তুম্বাজ মজলা দিদাক্। 18 তর্ বানেয়্যে ভালোক্কানি পযাপিরা আর অমকদ ধন-সম্পদত্তে দামেস্ক হিল্বোনর আংগুর-রস আর ধুব্ কেশ্চোই তঅ লগে বেবসা গুরিদাক্। 19 বদান আর গ্রীসর মানুচ্চুনে তঅ পযাপিরানির বদলে দিদাক্ উষলত্তুন আন্যে পিদেয়্যে লুয়ো, দারচিনি আর বচ। 20 দদানে তঅ লগে ঘোড়া পিঠর্ গদি কাবড়র বেবসা গুরিদো। 21 আরব আর কেদরর বেক্ সদ্দারুনে এলাক্ তর্ খদ্দের; তারা তর্ পযাপিরানির বদলে ভেড়া ছঅ, ভেড়া আর ছাগল দিদাক্। 22 শিবা আর রয়মার বেবসায়ীগুনেয়ো তঅ লগে বেবসা গুরিদাক্; তঅ পযাপিরানির বদলে তারা দিদাক্ নানান্ বাবোত্যে গম্ গম্ মজলা, মংগা পাত্তর্ আর সোনা। 23 হারণ, কন্নী, এদন আর শিবার বেবসায়ীগুনে আর আসিরিয়া আহ্ কিল্মদ তঅ লগে বেবসা গুরিদাক্। 24 তারা তঅ বাজারত্ দোল্ দোল্ পোজাক্, য়েল্ কাবড়্, নক্শা গোজ্যে কাবড় আর রং বেরংয়র কার্পেট দুড়িলোই দরমর গুরি বানি আনিদাক্। 25 তর্শীশর জাহাজচানি তর্ পযাপিরা বুয়োই আনিদাক্। সাগরর্ সংমোধ্যে বোউত্ পযাপিরালোই তুই ভর্পুনং এলে। 26 যিগুনে পাঙেই বেদাক্ তারা তরে মাঝ দরিয়ায় নেযেয়োন; মাত্তর্ সাগরর্ সংমোধ্যে পূগে বোইয়্যেরে তুই কট্টা কট্টা ওই গেলে। 27 তর্ ভস্তর্ দিনোত্ তর্ ধন-সোম্বোত্তিগানি, বেবসার পযাপিরানি আর অন্য পযাপিরানি, তর্ বেক নাবিক্কুনে, ঠিগ্ গুরিয়্যেগুনে, তর্ বেবসায়িগুনে আর তর্ বেক সৈন্যগুন আর তইধু থেইয়্যেগুন আর অন্য বেক্কুনে সাগর সংমোধ্যে ডুবিলাক্। 28 তর্ নাবিক্কুনোর রঅ ছাড়নিলোই সাগর পারর্ জাগায়ানি গির্গিরে উদিবো। 29 যিগুনে পাঙেই টানন্ তারা বেক্কুনে তারার্ জাহাজ ছাড়িনে যেবাক্; নাবিক্কুন বেক্কুনে সাগর পারত্ থিয়্যেই থেবাক্। 30 তারা তত্তে রঅ ছাড়িনে অমকদ কানাকুদি গুরিবাক্ আর নিজো মাঢাত্ ধূল্যে দিবাক্ আর ছেইয়ো ভিদিরে গোজ্যেবাক্। 31 তারা তত্তে মাঢা মুড়েবাক্ আর বস্তা ফাদা পিনিবাক্। তারা মনত্ দুঘে তত্তে আবিলেচ্ গুরি গুরি অমকদ কানিবাক্। 32 তারা তত্তে গুজুরি গুজুরি কানিবাক্ আর চিৎপরা হেবাক্; তরে নিইনে তারা এই আবিলেচ্ গুরিবাক্; “‘সাগর-ঘিজ্যে সোর ধোক্ক্যেন্ গুরি আর কাররে কি জুরো গুরি দিয়্যে ওইয়্যে? 33 তঅ বেবসার পযাপিরানি যেক্কে সাগরত্ নিগিলিদো সেক্কে তুই ভালোক্ জাদরে ঈল্ অই সং খাবেদে; তর্ বোউত্ ধন-সোম্বোত্তি আর পযাপিরা দিইনে তুই পিথ্তিমীর রাজাগুনোরে তাগোয়্যে গুরিদে। 34 তুই ইক্কিনে সাগরর আঘাতে গভীন্ পানি ভিদিরে চুরমার ওইয়োচ্; তর্ পযাপিরানি আর তর্ বেক্ মানুচ্চুন তঅ সমারে ডুবি যেইয়োন। 35 সাগর পারত্ বজত্তিগুরিয়্যে মানুচ্চুন বেক্কুনে তঅ অবস্থা দেগিনে আমক্ ওইয়োন; তারার্ রাজাগুনে দরে গির্গিরে উঠ্যন্ আর তারার মুয়োনি দরে শুগেই যেইয়্যে। 36 জাদ্তুনো ভিদিরে বেবসায়িগুনে তরে দেগিনে ঈচ্ গত্তন্। তুই দর্গরেপারা শেজ্ ওই যেইয়োচ্; তুই আর ন-থেবে।’” |
Copyright © 2021 Bangladesh Bible Society
Bangladesh Bible Society