যিহিষ্কেল 24 - Chakma Bibleরানেদে পিলেবো 1 আমা বন্দীদজার্ নয় বজরর্ দশ মাজর্ দশ দিনোত্ লগেপ্রভুর এ কধাগান মইধু ফগদাং অলঅ, 2 ও মান্জ্যর্ পুয়োবো, তুই এচ্চ্যে, এচ্চ্যের্ তারিগো কধা লিগি রাগা, কিত্তে এচ্চ্যে বাবিল রাজা যিরূশালেমান ঘিরি ফেল্যে। 3 এ উল্লোমী জাদ ইধু এ উপমাগান কধা কঅ। তারারে কঅ, প্রভু লগেপ্রভু কোইয়্যেদে, পিলেবো চোলুন চড়া, চোলুন চড়া আর সিবে ভিদিরে পানি দে। 4 সিবে ভিদিরে য়েরা দমাগুন দে, রানর্ আর কানাগানর্ গম্ গম্ য়েরা কুট্টেগানি দে। গম্ গম্ আর্ দিইনে সিবে ভোরেই দে। 5 পালত্তুন্ সেরা ভেড়াবো নেযা; পিলেবো তলে দার্বো সাজা; সিবে গমেডালে উজিনে আড়ুন্ রান্। 6 প্রভু লগেপ্রভু আরঅ কোইয়্যেদে, অভিশাব্ পোরোক্, সেই লো ঝোরেয়্যে শঅরান্! সিয়েন যেন এক্কো পিলে যিবেত্ কজরা কুড়্ ওইয়্যে, যিবে কাজা ন-যায়। য়েরানি বেঈ বেঈ ন-নিইনে দমাগুন্ এক্কো এক্কো গুরি নিগিলা। 7 সেই শঅর ভিদিরে লো ঝড়া ওইয়্যে। সেই লোগান্ পাত্তর উগুরে ঢালা ওইয়্যে; সিয়েন মাদিত্ ঢালা ন-অয় যিয়েনত্ ধূল্যেলোই সিয়েন নাঢা যেদঅ। 8 রাগ্ তুলিনে যেনে হেনা সুজো অয় সেনত্তে মুই সেই লো-গান পাত্তর উগুরে রাগেয়োং যেন সিয়েন নাঢা ন-পড়ে। 9 প্রভু লগেপ্রভু কোইয়্যেদে, অভিশাব্ পোড়োক্, সেই লো-ঝোরেয়্যে শঅরান, মুইয়ো দার্বো তুবেইনে অজল্ গুরিম। 10 সেনত্তে ভালোক্কানি দার্বো সাজা, আগুন জ্বালা, মজলা মিজেইনে য়েরাগান গমেডালে রান্, আড়ুন্ পুড়ি যেবাত্তে দে। 11 সে পরেদি খালি পিলেবো আগুনো উগুরে রাগা যেন সিবে গরম্ অয়, সিবের্ তামাগান পুড়িনে রাঙা অয়, সিবের্ অসিজিগানি বেক্কানি গুলি যায় আর সিবের্ কজরাগান পুড়ি যায়। 12 মাত্তর্ বেক চেট্ট্যাগান মিজে ওই যেইয়্যে; সিবের্ কজরাগান কাজা ন-যায়, সেনত্তে সিবে আগুনোত্ ফেলেই দুয়ো। 13 “‘ও যিরূশালেম, তর্ ভান্ন্যেই কামান অলঅ তর্ সেই অসিজিগান। মুই তরে কাজেবাত্তে চেট্ট্যা গুরিলুং মাত্তর্ তর্ অসিজিগানত্তুন্ তুই সাব্ ন-অলে। তঅ বিরুদ্ধে মঅ রাগ্কান পুরোপুরি ঢালি ন-দেনা সং তুই আর সাব্ ন-অবে। 14 মর্ কাম গুরিবার সময় এচ্চ্যে। মুই সিয়েন গুরিম্বে গুরিম, মেয়্যেয়ো ন-গুরিম বা নরমঅ ন-ওম্। তর্ আচার-বেবহার আর তর্ কাম মজিম্ তরে বিচের্ গরা অবঅ। মুই প্রভু লগেপ্রভু এ কধাগান কঙর্।’” যিহিষ্কেলর মোক্কো মরাণা 15 পরেদি লগেপ্রভু মরে কলঅ, 16 “ও মান্জ্যর্ পুয়োবো, মুই এক আঘাতে তত্তুন্ তঅ চোগো মানেক্কোরে নেযেবাত্তে যাঙর্। তো তুই আবিলেচ্ ন-গুরিচ্, ন-কানিচ্ বা চোগো পানি ন-ফেলেচ্। 17 তুই ভিদিরে ভিদিরে ভঅ নিজেস্ ফেলেবে। তুই মরাগুনোত্তে আব্সোজ্ ন-গুরিচ্। তুই মাপালার্ বান্ আর টেঙত্ জদা পিন্; তর্ মুয়োর্ তলেদিগান ন-ঢাগিচ্ বা মানুচ্চুনোর পাদেয়্যে হানাগানি ন-খেয়ো।” 18 মুই বেন্যেমাঢান্ মানুচ্চুনো সমারে কধা কলুং আর সাজোন্যে মঅ মোক্কো মুরি যেইয়্যে। পরেদি বেন্যেমাঢান্ মুই লগেপ্রভুর উগুম মজিম্ কাম গুরিলুং। 19 সেক্কে মানুচ্চুনে মরে পুযোর্ গুরিলাক্, “তুই যিয়েন গোজ্যস্ আমাত্তে সিয়েনর্ ভেদ্তান্ কি? সিয়েন কি আমারে ন-কবে?” 20-21 সেনত্তে মুই তারারে কলুং, প্রভু লগেপ্রভু মরে ইস্রায়েলীয়গুনোত্তে এ কধাগান কবাত্তে কোইয়্যেদে, “মঅ ঘরান, যিয়েন তমার খেমতার বাড়্বো গরানা, যিয়েন তমার চোগোর সুগ্ আর তমার্ মেয়্যের্ জিনিস, সিয়েনরে মুই অসিজি গোরেম। তমার্ যিদুক্কুন ঝি-পুয়ো তুমি ফেলেই যেইয়ো তারা যুদ্ধোত্ মুরিবাক্। 22 সেক্কে যিহিষ্কেলে যিয়েনি গোজ্যে তুমিয়ো সিয়েনি গুরিবা। মুয়োর্ তলেদিগান তুমি ন-ঢাগিবা বা মানুচ্চুনোর পাদেয়্যে হানাগান ন-হেবা। 23 তমা মাঢাত্ তুমি মাপালার্ বানিবা আর টেঙত্ জদা পিনিবা। তুমি আবিলেচ্ ন-হেবা বা ন-কানিবা, মাত্তর্ নিজো নিজো পাপত্তে বল্পোজ্যে ওই যেবা আর একজন আর একজন ইধু ফোবেবা। 24 যিহিষ্কেলে তমা ইধু এক্কান চিহ্নো ধোক্ক্যেন অবঅ; তে যিয়েনি গোজ্যে তুমি ঠিগ্ সেবাবোত্যে গুরিবা। যেক্কে ইয়েনি ঘুদিবো সেক্কে তুমি হবর্ পেবা, মুয়ই প্রভু লগেপ্রভু।” 25 লগেপ্রভু মরে আরঅ কলঅ, “ও মান্জ্যর পুয়োবো, যেদিন্যে মুই তারার্ সেই খেমতার অহংকার, তারার্ হুজি আর বাঈনী গরানা, তারার্ চোগোর্ সুগ, তারার মনর্ চাওয়া আর তারার্ ঝি-পুয়োগুনোরেয়ো নেযেম, 26 সেদিন্যে এক্কো ধেই এচ্চ্যে মান্জ্যে তরে হবর্ দিবাত্তে এবাক্। 27 সে অক্তত্ তঅ মুয়োন খুলো যেবঅ; তুই তা সমারে কধা কবে, তঅ জিলান্ আর আক্সোয়ে ন-থেবঅ। এবাবোত্যেগুরি তুই তারা ইধু এক্কান চিহ্নো অবে আর তারা হবর্ পেবাক, মুয়ই লগেপ্রভু।” |
Copyright © 2021 Bangladesh Bible Society
Bangladesh Bible Society