যিহিষ্কেল 21 - Chakma Bibleগোজেনর্ লাম্বা ছুরি 1 সে পরেদি লগেপ্রভু মরে কলঅ, 2 ও মান্জ্যর পুয়োবো, তর্ মুয়োন তুই যিরূশালেম ইন্দি থোইনে উবোসনা-ঘর বিরুদ্ধে কধা কঅ আর ইস্রায়েল দেজর্ বিরুদ্ধে আগাম্ কধা কঅ। 3 তারে কঅ, লগেপ্রভু কোইয়্যেদে, মুই তঅ বিরুদ্ধে। মুই খাবত্তুন্ মঅ লাম্বা ছুরিগান্ নিগিলেনে তঅ ভিদিরেত্তুন গম্ আর পাজি বেক্কুনোরে মারে ফেলেম। 4 গম্ আর ভান্ন্যেই বেক্কুনোরে মারে ফেলেবাত্তে মর্ লাম্বা ছুড়িগানে খাবত্তুন্ নিগিলিনে দোগিণেত্তুন্ ধুরি উত্তোরেদি সং বেক মানুচ্চুনোরে মারে ফেলেব। 5 সেক্কে বেক মানুচ্চুনে হবর্ পেবাক যে, মুই লগেপ্রভু খাবত্তুন্ লাম্বা ছুরিগান্ নিগিলেয়োং; সিয়েনে আর ন-ফিরিবো। 6 “সেনত্তে ও মান্জ্যর পুয়োবো, তুই ভঅ নিজেস্ ফেলা, মন মরা আর অমকদ দুঘে তারা মুজুঙোত্ ভঅ নিজেস্ ফেলা। 7 তারা যেক্কে তরে পুযোর্ গুরিবাক্, ‘কিত্তে ভঅ নিজেস্ ফেলর্?’ তুই কবে, ‘যে হবরান্ এজের্ সিয়েনত্তে ভঅ নিজেস্ ফেলাঙর্। সে অক্তত্ বেক্কুনোর মনানি গুলি যেবঅ আর বেক্কুনোর আঢ্তানি ন-লুরিবো; বেক্কুনোর মনানি ভাঙিবো আর বেক্কুনোর আঢুগুন্ বল্পোজ্যে ওই যেবাক্। প্রভু লগেপ্রভু কোইয়্যেদে, সিয়েনি এজের্; সিয়েনি অবদে অবঅ।’” 8 লগেপ্রভু মরে আরঅ কলঅ, 9 “ও মান্জ্যর পুয়োবো, তুই এই আগাম্ কধাগান কঅ, প্রভু লগেপ্রভু কোইয়্যেদে, ‘এক্কান লাম্বা ছুরি! ধারেয়্যে আর পালিশ্ গোজ্যে এক্কান লাম্বাছুরি! 10 কাবি ফেলেবাত্তে সিয়েন ধারা ওইয়্যে, সিয়েন পালিশ্ গরা ওইয়্যে আর সিয়েন কারেন ধোক্ক্যেন ঝক্ঝক্ গরের্।’ ” ইস্রায়েলীয়গুনে কদন্, “যিহূদার রাজলুদিক্কো নিইনে আমি ফুত্তি গুরিবোং; সেই রাজলুদিক্কো বেক্ লুদিক্কুনোরে ঈচ্ গরের্।” 11 লগেপ্রভু কোইয়্যেদে, লাম্বা ছুরিগান্ পালিশ্ গরা ওইয়্যে যেন সিয়েন বেবহার গরা যায়; যে মারে ফেলেব তা আঢত্ দিবাত্তে সিয়েন ধারানা আর পালিশ্ গরা ওইয়্যে। 12 ও মান্জ্যর্ পুয়োবো, কানি লঅ আর আবিলেচ্ গর্, কিত্তে সেই তলোয়ারান্ মঅ মানুচ্চুনোর বিরুদ্ধে আর ইস্রায়েলর্ বেক নেতাগুনোর্ বিরুদ্ধে। মঅ মানুচ্চুনো সমারে তারারেয়ো লাম্বাছুরি আঢত্ দিয়্যে অবঅ। সেনত্তে তুই বুগ্ বাজ্যে। 13 এ পোরোক্ষ্যেবো এবদে এবঅ। যিহূধার রাজা যুনি মর্ সাজাগানরে ঈচ্ গরে সালে কি তে টিগি থেই পারিবো? 14 “সেনত্তে ও মান্জ্যর পুয়োবো, তুই আগাম্ কধা কঅ আর আঢত্ আঢ্তোই আঘাত্ গর্। সেই লাম্বা ছুরিগানে দ্বিবার, এমন্ কি, তিনবার আঘাত্ গোরোক্। এই লাম্বা ছুরিগানে কাবিবাত্তে; বোউত্ মান্জ্যরে কাবিবাত্তে এক্কান লাম্বাছুরি; সিয়েনে চেরোকিত্তেত্তুন্ তারা উগুরে চাবিনে এবঅ। 15 কাবি ফেলেবাত্তে তারার্ বেক্ গেট্তুনোত্ মুই লাম্বাছুরি বোজেয়োং আর যেনে তারার্ মনানি বেক্কানি গুলি যায় আর ভালোক্কুনে মুরি যান্। অয়, সেই লাম্বা ছুরিগানে কারেন ধোক্ক্যেন ঝিমিলায়; সিয়েনে কাবি ফেলেবাত্তে ধারা ওইয়্যে। 16 ও ধারেয়্যে লাম্বা ছুরিগান্, ডেনেদি আঘাত্ গর্, সে পরেদি বাঙেদি গর্, যিন্দি তর্ ফলাবো ঘুরি যায় সিন্দি আঘাত্ গর্। 17 মুইয়ো আঢত্ আঢ্তোই আঘাত্ গুরিম আর মঅ রাগ্কান থামেব। মুই লগেপ্রভু এ কধাগান কঙর্।” 18 পরেদি লগেপ্রভু মরে কলঅ, 19 ও মান্জ্যর্ পুয়োবো, বাবিল রাজার লাম্বা ছুরিগান যেবাত্তে দ্বিয়েন পদথ্ চিহ্নো দুয়ো, সেই দ্বিয়েন পথ এক্কান দেজত্তুন্ নিগিলিবো। যিয়েনত্ পথ ভাগ ওইনে শঅর ইন্দি যেইয়্যে সিয়েনত্ পথ চিনিবার খুদো দুয়ো। 20 লাম্বা ছুরিগানত্তে অম্মোনীয়গুনোর রব্বা শঅর বিরুদ্ধে যেবার এক্কান পদথ্ আর যিহূদা আর দেবাল-ঘিজ্যে যিরূশালেমর বিরুদ্ধে যেবার অন্য এক্কান পদথ্ চিহ্নো দুয়ো, 21 কিত্যে বাবিল রাজা গোণেবাত্তে-পড়িবাত্তে সিদু থামেব যিয়েনত্ পথ্তান ভাগ ওই যেইয়্যে, অত্তাৎ দ্বিয়েন পথ যিয়েনত্ এগত্তর্ ওইয়্যে। তে সেল্ মারিবো, তা দেবেদাগুনো সমারে সল্লা গুরিবো আর কনঅ য়েমান কলিজেলোই পোরোক্ষ্যে গুরি চেবঅ। 22 তার ডেন্ আঢত্ থোইয়্যে গোণেবার-পড়িবার জিনিস্চানে যিরূশালেম ইন্দি পথ্তান দেগেই দিবো; সিয়েনত্ তে দেবাল আর গেট্ ভাঙিবার মিশিন বোজেব, মারে ফেলেবার উগুম দিবো, যুদ্ধোর্ ডাগনি দিবো, নিযো কুড়্ আর অজল্ কুড়্ বানেব। 23 যিরূশালেমর যে মানুচ্চুনে বাবিল রাজার অধীনোত্ থেবার শমক্ হেইয়োন তারা ইধু এই গোণা-পড়া মিজে মনে অবঅ, মাত্তর্ তারার দুষোর্ কধানি তে তারারে ইদোত্ তুলি দিবো আর তারারে বন্দী গুরি নেযেব। 24 মুই প্রভু লগেপ্রভু কঙর্, তুমি খুলোমেলাগুরিনে পাপ গুরিনে তমা দুজ্চানি দেগেই দুয়ো; তমা বেক্ কামানিত্ তমার ভান্ন্যেই ফগদাং পার্। সিয়েনত্তে তমারে বন্দী গুরি নেযা অবঅ। 25 ও অসিজি আর পাজি ইস্রায়েলর রাজা, তঅ দিন্নো আজিল্ ওইয়্যে, তর্ সাজার্ সময় এচ্চ্যে। 26 মুই প্রভু লগেপ্রভু কঙর্, তঅ খবঙান্ খুল্, মুকুট্তো লামেই ফেলা। যেবাবোত্যে এলঅ সেবাবোত্যে আর ন-অবঅ। চিগোন্নোরে দাঙর্ আর দাঙর্বোরে চিগোন গরা অবঅ। 27 ভস্ত! ভস্ত! মুই এই বেক্কানি ভস্ত গুরি দিম! যিবের্ ঘেচ্ছেকগুরি অধিকার আঘে তে ন-এযানা সং ইয়েনি আর ন-থেবঅ। মুই তারে ইয়েনি দিম। 28 “ও মান্জ্যর পুয়োবো, তুই আগাম্ কধা কঅ, অম্মোনীয়গুনো পৌইদ্যেনে আর তারার্ অগমানর্ পৌইদ্যেনে প্রভু লগেপ্রভু কোইয়্যেদে, ‘এক্কান লাম্বাছুরি ধোক্ক্যেন ঝিমিলায়। 29 ও লাম্বা ছুরিগান্, তঅ পৌইদ্যেনে মিজে দর্শন পেলেয়ো আর মিজে গোণা-পড়া গুরিলেয়ো যিগুনোরে মারে ফেলা অবঅ সেই পাজিগুনোর গত্তনাগুনো উগুরে তরে রাগা অবঅ; তারার্ দিনুন লুম্মেগি, তারার্ সাজার্ সময় লুম্মেগি। 30 ও অম্মোনীয়গুন, তমা লাম্বা ছুরিগানি খাপত্ থঅ। যে জাগানত্তুন্ তমারে বানা ওইয়্যে, তমার্ সেই পুরোণি মানুচ্চুনো দেজত্ মুই তমারে বিচের্ গুরিম। 31 মঅ রাগ্কান মুই তমা উগুরে ঢালি দিম আর তমা বিরুদ্ধে মর্ অমকদ রাগর্ আগুনোত্ ফুন্ দিম। মুই তমারে এমন চিৎনপুজ্যে মান্জ্য আঢত্ তুলি দিম যিগুনে ভস্ত গুরিবার কামত্ কাবিল্। 32 তুমি আগুনোত্তে ধার্বো ধোক্ক্যেন অবা। তমা লোনি তমা দেজ ভিদিরে পুরিবো আর তমারে ভুলি যাহ্ অবঅ। মুই লগেপ্রভু এ কধাগান কঙর্।’” |
Copyright © 2021 Bangladesh Bible Society
Bangladesh Bible Society