যিহিষ্কেল 20 - Chakma Bibleউল্লোমী ইস্রায়েল 1 সাত বজরর্ পাচ্ মাসর দশ দিনোত্ ইস্রায়েলর কয়েক্কো বুড়ো নেতা লগেপ্রভুর আওজ্ জানিবাত্তে এইনে মঅ মুজুঙোত্ বজিলাক্। 2 সেক্কে লগেপ্রভুর এ কধাগান মইধু ফগদাং অলঅ, 3 ও মান্জ্যর পুয়োবো, তুই ইস্রায়েলর বুড়ো নেতাগুনোরে কঅ, প্রভু লগেপ্রভু কোইয়্যেদে, তুমি কি মঅ আওজ্চান জানিবাত্তে এচ্চো? মঅ জিংকানির নাঙে কঙর্, মুই তমারে মঅ আওজ্চান জানিবাত্তে ন-দিম। 4 ও মান্জ্যর পুয়োবো, তুই কি তারারে বিচের্ গুরিবে? সালে তারার্ পুরোণি মানুচ্চুনোর জঘন্য আচার-বেবহারর কধানি তারারে জানা। 5 তারারে কঅ, প্রভু লগেপ্রভু কোইয়্যেদে, যেদিন্যে মুই ইস্রায়েলরে বেঈ লোইয়োং সেদিন্যে যাকোব বংশর মানুচ্চুনো ইধু শমক্ হেইয়োঙ্ আর মিসরত্ তারা ইধু নিজোরে ফগদাং গোজ্যং। মুই শমক্ হেইনে তারারে কোইয়োং, মুয়ই তারার্ গোজেন লগেপ্রভু। 6 সেদিন্যে মুই তারা ইধু আরঅ শমক্ হেইয়োঙ, মিসর দেজত্তুন তারারে নিগিলেনে তারাত্তে যে দেজ্চান মুই ঠিগ্ গোজ্যং সে দেজত্ তারারে নেযেম্। সিদু দুধ, মধু আর কনঅ কিজুর অভাব নেই; সিয়েন বেগ্ দেজ্চানিত্তুন্ সেরা। 7 মুই তারারে কোইয়োং, যিদুক্কুন জঘন্য মূত্তি তারার ইধু গম্ লাক্যে সিগুন যেন তারা পত্তিজনে দূর গুরি দুয়োন আরঅ মিসরর মূত্তিগুন দিইনে নিজোরে অসিজি ন-গরন, কিত্তে মুয়ই তারার গোজেন লগেপ্রভু। 8 মাত্তর্ তারা মঅ বিরুদ্ধে উল্লোমী গুরিলাক্, মঅ কধানি শুনিবাত্তে রাজি ন-অলাক্। যিদুক্কুন জঘন্য মূত্তি তারা ইধু গম্ লাগিদো সিগুন তারা দূর্ ন-গুরিলাক্ আর মিসরর মূত্তিগুন ন-ছাড়িলাক্। সেনত্তে মুই কলুং মিসরত্ মুই তারা উগুরে মঅ রাগ্কান আর অমকদ অহুজি অনাগান্ পুরোপুরি ঢালি দিম। 9 মাত্তর্ মঅ সুনাঙান্ রোক্ষ্যে গুরিবাত্তে মুই সিয়েন ন-গরং, যেনে তারা যে জাদ্তুনো ভিদিরে বজত্তি গোজ্যন তারা ইধু মঅ নাঙান্ অসিজি ন-অয়। মিসর দেজত্তুন্ ইস্রায়েলীয়গুনোরে নিগিলেই আনিনে সেই বেক্ জাদ্তুনোর চোগো মুজুঙোত্ মুই ইস্রায়েলীয়গুনো ইধু নিজোরে ফগদাং গুরিলুং। 10 মুই মিসরত্তুন্ তারারে নিগিলেনে ধূল্যেচর-চাগালাত্ আনিলুং। 11 মুই তারারে মঅ সুদোমান দিলুং আর মর্ রীদি-সুদোমানি তারারে জানেলুং; যে সিয়েনি পালেব তে সিয়েনর্ ভিদিরেদি জিংকানি পেবঅ। 12 মর্ আর তারা ভিদিরে চিহ্নো ইজেবে জিরেবার দিনুন্অ তারারে দিলুং যেনে তারা হবর্ পান, মুই লগেপ্রভু মর্ নাঙে তারারে যুদো গুরিলুং। 13 মাত্তর্ ইস্রায়েলর মানুচ্চুনে ধূল্যেচর-চাগালাত্ মঅ বিরুদ্ধে উল্লোমী গুরিলাক্। তারা মর্ সুদোমানি ন-পালেলাক্ আর মর্ যে রীদি-সুদোমানি পালেইলে মানুচ্ জিংকানি পান সিয়েনি তারা এলাফেলা গুরিলাক্; তারা মর্ দিয়্যে জিরেবার দিনুনোর্ পবিত্রতাগান রোক্ষ্যে ন-গুরিলাক্। সেনত্তে মুই কলুং, মুই তারা উগুরে মঅ রাগ্কান ঢালি দিইনে ধূল্যেচর-চাগালাত্ তারারে ভস্ত গুরি ফেলেম। 14 মাত্তর্ মঅ সুনাঙান রোক্ষ্যে গুরিবাত্তে মুই সিয়েন ন-গরং, যেনে যে জাদ্তুনো মুজুঙোত্ মুই তারারে নিগিলেই আন্যং তারা ইধু মঅ নাঙান্ অসিজি ন-অয়। 15 ইয়েনিবাদেয়ো সেই ধূল্যেচর-চাগালাত্ তারা ইধু মুই শমক্ হেইয়োঙ্, মর্ দিয়্যে দেজ্-যে দেজত্ দুধ, মধু আর কনঅ কিজুর্ অভাব নেই, যে দেজ্চান বেক্ দেজ্চানিত্তুন সেরা-সে দেজত্ মুই তারারে ন-নেযেম। 16 তারা মর্ রীদি-সুদোমানি এলাফেলা গোজ্যন আর মর্ সুদোমানি অমান্য গোজ্যন আর মর্ দিয়্যে জিরেবার দিনুনোর পবিত্রতাগান রোক্ষ্যে ন-গরন্, কিত্তে তারার মনর্ টানান এলদে মূত্তিপূজো ইন্দি। 17 তো মুই তারারে মেয়্যের্ চোগেদি চেইনে ধূল্যেচর-চাগালাত্ তারারে এক্কুবারে ভস্ত ন-গরং। 18 সিদু তারার্ পুয়ো-ঝিগুনোরে মুই কলুং, তারা যেন তারার্ পুরোণি মানুচ্চুনো ধোক্ক্যেন কাম্ ন-গরন, তারার আচার-বেবহার মজিম্ ন-চলন আর তারার্ মূত্তিগুন দিইনে নিজোরে অসিজি ন-গরন। 19 মুই তারারে আরঅ কলুং, মুয়ই তারার্ গোজেন লগেপ্রভু, সেনত্তে মর্ সুদোমানি যেন তারা পালান্ আর মর্ রীদি-সুদোমানি মানি চলন। 20 তারা যেন মর্ দিয়্যে জিরেবার দিনুনোর পবিত্রতাগান রোক্ষ্যে গরন; সেক্কে মর্ আর তারা ভিদিরে সিয়েন এক্কান চিহ্নো ওই থেবঅ, আর তারা হবর্ পেবাক্ যে, মুয়ই তারার্ গোজেন লগেপ্রভু। 21 মাত্তর্ সেই পুয়ো-ছাগুনে মঅ বিরুদ্ধে উল্লোমী গুরিলাক্। তারা মর্ সুদোমানি ন-পালেলাক্ আর যে রীদি-সুদোমানি পালেইলে মানুচ্ জিংকানি পায় তারা মর্ সেই আইন-কানুনানি মানি চলানা ইন্দি মনযোগ ন-দিলাক্; তারা মর্ দিয়্যে জিরেবার দিনুনোর পবিত্রতাগান রোক্ষ্যে ন-গুরিলাক্। সেনত্তে মুই কলুং ধূল্যেচর-চাগালাত্ মুই তারা উগুরে মর্ রাগ্কান আর অমকদ অহুজি অনাগান পুরোপুরি ঢালি দিম। 22 মাত্তর্ মঅ আঢ্তান মুই সোরেই রাগেলুং আর মর্ সুনাঙান রোক্ষ্যে গুরিবাত্তে মুই সিয়েন ন-গরং যেনে যিদুক্কুন্ জাদ মুজুঙোত্ মুই তারারে নিগিলেই আন্যং তারা ইধু মর্ নাঙান অসিজি ন-অয়। 23 সিয়েন বাদেয়ো ধূল্যেচর-চাগালাত্ মুই তারা ইধু শমক্ হেইয়োং, নানান্ জাদ আর দেজ ভিদিরে মুই তারারে ছিদি দিম, 24 কিত্তে তারা মর্ রীদি-সুদোমানি ন-পালান, মর্ সুদোমানি এলাফেলা গোজ্যন্, মর্ দিয়্যে জিরেবার দিনুনোর পবিত্রতাগান রোক্ষ্যে ন-গরন, আর তারার পুরোণি মানুচ্চুনোর মূত্তিগুন তারা ইধু গম্ লাক্যে। 25 সেনত্তে যেদক্কানি সুদোম গম্ নয় আর যে রীদি-সুদোমর্ মাধ্যমে তারা জিংকানি ন-পেবাক্ সেই বেক্কুনো আদত্ মুই তারারে ইরি দিলুং। 26 পত্তম্ জোর্মেয়্যে এবাবোত্যে পত্তি পুয়োরে তারা আগুনোত্ পুড়িনে উৎসর্ব গোজ্যন্, আর সিয়েনর মাধ্যমে মুই তারারে অসিজি অবাত্তে দিলুং যেন মুই তারারে ভস্ত গুরি পারং। সেক্কে তারা হবর্ পেবাক্ যে, মুয়ই লগেপ্রভু। 27 “সেনত্তে ও মান্জ্যর পুয়োবো, তুই ইস্রায়েলীয়গুনোরে কঅ, প্রভু লগেপ্রভু কোইয়্যেদে, ‘তমা পুরোণি মানুচ্চুনে অবিশ্বেজর্ কাম গুরিনে মরে অগমান গোজ্যন্। 28 যে দেজ্চান দিবার শমক্ মুই তারা ইধু গোজ্যং সিদু নেযানার পরেদি যেক্কে তারা কনঅ অজল্ মুড়ো বা ডেলা ছিদি পোজ্যে য়েল্ গাজ দেগিলাক্ সিয়েনত্ তারা তারার এ্যামানুন উৎসর্ব গরা ধুরিলাক্। সেই উৎসর্বর অনুষ্ঠানান্ গুরিনে তারা মর্ অহুজি অনাগান জাগেই তুলিলাক্। ইয়েনি বাদেয়ো তারা সিয়েনত্ তারার তুম্বাজ্-আগর্বাট্টি জ্বালেলাক্ আর পানীয় উৎসর্বর অনুষ্ঠানান্ গুরিলাক্। 29 সেক্কে মুই তারারে পুযোর্ গুরিলুং সেই বেক্ অজল্ জাগানিত্ তারা কিত্তে যান।’” এজঅ সেই বেক্ অজল্ জাগানির্ নাঙ্ রোইয়্যে “পূজোর অজল্ জাগা।” বিচের্ আর উদ্ধোর 30 সেনত্তে লগেপ্রভু মরে কোইয়্যেদে, তুই ইস্রায়েলীয়গুনোরে কঅ, প্রভু লগেপ্রভু কোইয়্যেদে, তুই কি তমা পুরোণি মানুচ্চুনো ধোক্ক্যেন গুরি নিজোরে অসিজি গুরিবা আর তারার জঘন্য মূত্তিগুনোরে পূজো গুরিবা? 31 এজঅ সং যেক্কে তুমি মূত্তি মুজুঙোত্ তমা ঝি-পুয়োগুনোরে আগুনোত্ পুড়িনে উৎসর্ব গরঅ সেক্কে সেই বেক্ মূত্তিগুন্দোই তুমি নিজোরে অসিজি গুরি থাগঅ। ও ইস্রায়েলীয়গুন, মুই কি তমারে মর্ আওজ্চান জানিবাত্তে দিম? মর্ জিংকানি নাঙে, মুই কনমতে মর্ আওজ্চান তমারে জানিবাত্তে ন-দিম। 32 তুমি কোই থাগঅ, তুমি জগদর্ অন্য জাদর্ মানুচ্চুনো ধোক্ক্যেন অবাত্তে চঅ যিগুনে গাজ্ আর পাত্তর পূজো গরন্। মাত্তর্ তমা মনত্ যিয়েনি আঘে সিয়েনি কনদিন্অ ন-অবঅ। 33 মুই প্রভু লগেপ্রভু মর্ জিংকানির নাঙে কঙর্, মর্ খেমতাবলা আঢ্তানি বাবেইনে রাগে মুই তমা উগুরে রাজাগিরি গুরিম। 34 মর্ খেমতাবলা আঢ্তানি বাবেইনে রাগে নানান্ জাদ ভিদিরেত্তুন্ মুই তমারে আনিম আর যেদক্কানি দেজত্ তমারে ছিদি দিয়্যে ওইয়্যে সিয়েনিত্তুন্ তমারে এগত্তর্ গুরিম। 35 জাদ্তুনোরে ধূল্যেচর-চাগালাত্ তমার মুজুঙো-মুজুঙি ওইনে মুই তমারে বিচের্ গুরিম। 36 মিসর দেজর্ ধূল্যেচর-চাগালাত্ মুই যেবাবোত্যে তমা পুরোণি মানুচ্চুনোর বিচের্ গোজ্যং সেবাবোত্যে তমারেয়ো বিচের্ গুরিম। 37 মঅ লুদিক্কো তলেদি তমাত্তুন যাহ্ পুরিবো; মর্ সুদোমর্ দুড়িগান্দোই মুই তমারে বানিম। 38 তমা ভিদিরে যিগুনে মঅ বিরুদ্ধে থান্ আর উল্লোমী গরন মুই তারারে দূর্ গুরি দিম। তারা যে দেজত্ বজত্তি গত্তন্ যুনিয়ো সিয়োত্তুন মুই তারারে নিগিলেই আনিম তো তারা ইস্রায়েল দেজত্ চোমেই ন-পারিবাক্। সেক্কে তারা হবর্ পেবাক্ যে, মুয়ই লগেপ্রভু। 39 “‘ও ইস্রায়েলীয়গুন,মুই প্রভু লগেপ্রভু কঙর্, যঅ, তুমি পত্তিজনে যেইনে তমা মূত্তিগুনোরে সেবা গরঅ। মাত্তর্ পরেদি মঅ কধা তুমি হামাক্কায় শুনিবা আর সেক্কে তুমি তমার বক্শিজ্ আর মূত্তিলোই আর মর্ সুদ্ধো-সাংগ নাঙান অসিজি ন-গুরিবা। 40 সেক্কে দেজ ভিদিরে মর্ সুদ্ধো-সাংগ মুড়োবো উগুরে, ইস্রায়েলর অজল্ মুড়োবো উগুরে ইস্রায়েলর বেক্ মানুচ্চুনে মরে সেবা গুরিবাক্ আর সিয়েনত্ মুই তারারে গুজি লোম্। সিয়েনত্ মুই তমার বেক সুদ্ধো-সাংগ উৎসর্বনি, দান আর গম্ গম্ বক্শিজচানি মাগিম্। 41 মুই যেক্কে জাদ্তুনো ভিদিরেত্তুন তমারে নিগিলেই আনিম আর যেদক্কানি দেজত্ ছিদি পোজ্যন সিয়েনিত্তুন্ এগত্তর্ গুরিম সেক্কে তুম্বাজ্ আগর্বাট্টি ধোক্ক্যেন মুই তমারে গুজি লোম। সেক্কে তমা মাধ্যমে জাদ্তুনে বুঝি পারিবাক্ যে, মুই সুদ্ধো-সাংগ। 42 তমা পুরোণি মানুচ্চুনো ইধু যে দেজ্চান দিবার শমক্ মুই গোজ্যং সেই ইস্রায়েল দেজত্ তমারে নেযানার পরেদি তুমি হবর্ পেবা যে, মুয়ই লগেপ্রভু। 43 সিদু তমার আগ আচার-বেবহারর কধা আর যেদক্কানি কামত্তে তুমি নিজোরে অসিজি গোজ্য সিয়েনি ইদোত্ রাগেবা আর তমা বেক্ ভান্ন্যেই কামানিত্তে নিজোরে নিজে ঈচ্ গুরিবা। 44 ও ইস্রায়েলীয়গুন, মুই তমার ভান্ন্যেই আচার-বেবহার আর ভান্ন্যেই কাম মজিম্ তমা সমারে বেবহার ন-গুরিম, মাত্তর্ নিজো সুনাঙান্ রোক্ষ্যে গুরিবাত্তে তমা সমারে গম্ বেবহার গুরিম। সেক্কে তুমি হবর্ পেবা যে, মুয়ই লগেপ্রভু।’ মুই প্রভু লগেপ্রভু এ কধাগান কঙর্।” দোগিণ দেজ বিরুদ্ধে আগাম কধা 45 পরেদি লগেপ্রভু মরে আরঅ কলঅ, 46 “ও মান্জ্যর পুয়োবো, তঅ মুয়োন তুই দোগিণেদি রাগেইনে সেই দেজ বিরুদ্ধে কধা কঅ আর সিদুগোর্ ঝারান বিরুদ্ধে আগাম্ কধা কঅ। 47 তুই দোগিণোর ঝারানরে মঅ কধানি শুনিবাত্তে কঅ। তারে কঅ, প্রভু লগেপ্রভু কোইয়্যেদে, ‘মুই তঅ ভিদিরে আগুন জ্বালেবাত্তে যাঙর্ আর সিয়েনে তর্ বেক্ কাজা আর শুগুনো গাজ্চুন পুড়ি ফেলেবে। সেই জোল্জোল্যে আগুনান্ ন-মুরিবো আর দোগিণেত্তুন উত্তোরেদি সং বেক্ মানুচ্চুন সেক্কে পুড়ি যেবাক্। 48 পত্তিজনে দেগিবাক্, মুই লগেপ্রভু সিয়েন জ্বালেয়োং; সিয়েন ন-মুরিবো।’” 49 সেক্কে মুই কলুং, “ও প্রভু লগেপ্রভু, মানুচ্চুনে মঅ পৌইদ্যেনে কদন্, মুই বানা হিত্যে কধানি কঙর্।” |
Copyright © 2021 Bangladesh Bible Society
Bangladesh Bible Society