যিহিষ্কেল 2 - Chakma Bible

যিহিষ্কেলরে ডাগা অলঅ

¹ তে মরে কলঅ, “ও মান্‌‌‌‌জ্য পুয়োবো, তুই টেঙোই ভর্ দিইনে থিয়্যে; মুই তঅ লগে কধা কোম্।”

² তে যেক্কে কধা কর্ সেক্কে গোজেনর আত্মাগান মঅ ভিদিরে এইনে মরে টেঙত্ ভর্ দিইনে থিয়্যেল আর মুই শুনিলুং তে মঅ লগে কধা কর্।

³ তে কলঅ, “ও মান্‌‌‌জ্যর্ পুয়োবো, মুই তরে ইস্রায়েলীয়গুনো ইধু, অত্তাৎ যিগুনে মঅ বিরুদ্ধে উল্লোমী গোজ্যন্ সেই উল্লোমী জাদ ইধু পাদাঙর্; তারা আর তারার্ পুরোণি মানুচ্চুনে এজঅ সং মঅ বিরুদ্ধে উল্লোমী গুরি এত্তন্।

⁴ যে মানুচ্চুনো ইধু মুই তরে পাদাঙর্ তারা একবুস্যে আর জেদী। তুই তারা ইধু প্রভু লগেপ্রভুর কধা কবে।

⁵ তারা সে কধানি নয়ো শুনি পারন্, কিত্যে তারা উল্লোমী জাদ; তো তারা হবর্ পেবাক্ যে, এক্কো ভাববাদী তারা ভিদিরে আঘে।

⁶ মাত্তর্ ও মান্‌‌‌জ্য পুয়োবো, তুই তারার আর তারা কধানিলোই ন-দোরেচ্। যুনিয়ো তারা হের্ আর কাদাগাজ ধোক্ক্যেন তঅ চেরোকিত্তে থেবাক্ আর বিছেগুনো ভিদিরে তুই বজত্তি গুরিবে তো ন-দোরেচ্। তারারে দেগিনে বা তারা কধানি শুনিনে তুই ন-দোরেচ্; তারা দঅ উল্লোমী জাদ্।

⁷ তারা উল্লোমী বিলিনে মঅ কধা নয়ো শুনি পারন্, মাত্তর্ তারা শুনোদোক্ বা ন-শুনোদোক্ তুই তারা ইধু মঅ কধানি কবে।

⁸ ও মান্‌‌‌জ্যর পুয়োবো, মুই তরে যিয়েনি কং সিয়েনি শুন্। সে উল্লোমী জাদ্‌‌‌তো ধোক্ক্যেন্ তুই উল্লোমী ন-ওচ্। তুই আঃ গর্, মুই তরে যিয়েনি দুয়োঙর্ সিয়েনি হা।”

⁹ সেক্কে মুই রিনি চেইনে দেগিলুং মঅ ইন্দি এক্কান আঢ্ বাবেইয়্যে আঘে। সিয়েনত্ আগেদে এক্কো গুজেই থোইয়্যে বোই।

¹⁰ মঅ মুজুঙোত্ তে সিবে খুলিনে ধুরিলো। সিবের্ দ্বিকিত্তেদি লেগা রোইয়্যেদে আবিলেচ্, চিৎপুরোনা আর দুঘো কধানি।