যিহিষ্কেল 19 - Chakma Bible

ইস্রায়েলর শাজন্‌গুরিয়্যেগুনোত্তে আবিলেচ্ গরানা

¹ লগেপ্রভু মরে কোইয়্যেদে, তুই ইস্রায়েলর শাজন্‌গুরিয়্যেগুনোত্তে আবিলেচ্ গুরিনে কঅ,

² সিংহগুনো ভিদিরে তঅ মাবো এলদে সেরা পাড়িসিংহ। তে গাবুজ্যে সিংহগুনো মোধ্যে পড়ি থেদঅ; তা ছঅগুনোরে তে পালেদ।

³ তার এক্কো ছঅ দাঙর্ ওইনে বোলী সিংহ ওই উদিলো। তে য়েমান শিগের্ গরানা শিগিলো আর মানুচ্ হাঃ ধুরিলো।

⁴ জাদ্‌‌‌তুনে তা পৌইদ্যেনে শুনিলাক্; তে তারার গাঢ্‌‌‌তোদ্ ধরা পড়িল। তারা তা নাগত্ হেবা দিইনে মিসর দেজত্ নেযেলাক্।

⁵ সেই সিংহীবো দেগিলো তা আজাগান ন-ফুরেল; তে যিয়েন চেইয়্যে সিয়েন ন-অলঅ; সেক্কে তে তার আর এক্কো ছঅ লোইনে তারে বোলী গুরি তুলিলো।

⁶ সিবে সিংহ ছঅগুনো ভিদিরে ঘুরোগুরি গুরিনে এক্কো বোলী সিংহ ওইনে উদিলো। তে য়েমান শিগের্ গত্তে শিগিলো আর মানুচ্ হাঃ ধুরিলো।

⁷ তে তারার্ ঘরানি ভাঙিলো আর শঅরান্ বেক্কান ভস্ত গুরি ফেলেল। তার গুজুরোনিলোই দেজর্ বেক্কুনে দোরেলাক্।

⁸ সেক্কে তা চেরোকিত্তে জাদ্‌তুনে তা বিরুদ্ধে এলাক্। তারা তাত্তে তারারে জাল্ পাদিলাক্, আর তে তারা গাদত্ ধরা পড়িলো।

⁹ নাগত্ হেবা দিইনে তারা তারে খাজাত্ রাগেলাক্ আর বাবিল রাজা ইধু নেযেলাক্। তারা তারে ঘরত্ তালা মারি রাগেলাক্; ইস্রায়েলর মুড়োই মুড়োই তার গুজুরোনি আর শুনো ন-গেলঅ।

¹⁰ তঅ মাবো পানি পারত্ লাগেয়্যে এক্কো আংগুর গাজ ধোক্ক্যেন; পানি যগাজ্যে গুরি পানার কারনে সিবে এলদে গুলোগুলিয়ে আর ডেলালোই ভর্‌‌পুনং।

¹¹ তার ডেলাগুন এলাক্ দরমর, শাজন্‌গুরিয়্যেবোর রাজলুদিক্ অবার্ যগাজ্যে। সেই গাজ্‌‌সো অজল্ ওইনে যেন মেঘত্ লুমিলো; সেনত্তে তা পাদালোই-ভরা ডেলাগুন সহজে চোগোত্ পড়িলো।

¹² মাত্তর্ লগেপ্রভু তার রাগে সিবে উগুরেনে মাদিত্ ফেলেই দিলো। পূগে বোইয়্যেরে সিবে শুগেই গেলঅ, তা গুলোগুলিগুন ঝুরি পড়িলাক্; তার দরমর ডেলাগুন ভাঙিনে শুগেই গেলাক্, আর আগুনানে সিগুন পুড়ি ফেলেল।

¹³ ইক্কিনে সিগুনোরে ধূল্যেচরত্, শুগুনো, পানিনেইয়্যে দেজত্ লাগা ওইয়্যে।

¹⁴ তার গুড়িগানিত্তুন্ আগুন ছিদি পড়িলো; তার ডেলা আর গুলোগুলিগুন পুড়ি গেলাক্। শাজন্‌গুরিয়্যেবোর রাজলুদিক্ অবার যগাজ্যে কনঅ দরমর ডেলা সিয়েনত্ ন-থেলঅ। “ইবে এক্কো আবিলেচ্ গরানা; দুঘোর্ গান ইজেবে ইবে বেবহার গরা অবঅ।”