যিহিষ্কেল 18 - Chakma Bible

যে পাপ গরে তে মুরিবো

¹ পরেদি লগেপ্রভু মরে কলঅ,

² ইস্রায়েল দেজত্ তুমি এ দাগঅ কধাগান্ কঅ সিয়েনর ভেদ্‌তান্ কি, বাব্‌পুনে হর আংগুর হেইয়োন মাত্তর্ পুয়োগুনোর্ দাত্‌তুন হর ওইয়োন‌্‌?

³ মঅ জিংকানিগান নাঙে কঙর্, ইস্রায়েলত্ আর এ দাগঅ কধাগান্ কুয়ো ন-যেবঅ।

⁴ জেদা বেক্ মানুচ্চুন মর্, বাপ্ আর পুয়ো দ্বিয়োবো মর্। যে পাপ গুরিবো তেয়ই মুরিবো।

⁵ ধোজ্য এক্কো গম্ মান্‌জ্যে ন্যায় আর ঠিগ্ কাম গরে।‍‌

⁶ তে মুড়োমুড়ি উগুরে কনঅ পূজোর্ জাগানত্ হানা-দানা ন-গরে, বা ইস্রায়েলীয়গুনোর কনঅ মূত্তি পূজো ন-গরে। তে আদামর্ কনঅ মিলেরে বর্‌‍‌বাত ন-গরে, বা মাসিক অর্ এবাবোত্যে মিলে লগে ন-মিজেই।

⁷ তে কাররে অত্যেচার্ ন-গরে বরং সুদি টেঙা লোইয়্যে মান্‌জ্যরে বন্ধগী জিনিস ফিরেই দে। তে চুর্ ন-গরে, মাত্তর্ যিগুনোর পেট্ পুরের্ তারারে হেবাত্তে দে আর লাংটা-বাংটা গুনোরে কাবড় দে।

⁸ তে সুদি টেঙা উদোর্ ন-দে বা বেশ্ সুদ ন-নেযায়। তে অন্যেয় গরানাত্তুন্ আঢ্‌তানি সোরেই রাগায় আর মানুচ্চুনো ইধু গমেডালে বিচের্ গরে।

⁹ তে মর্ সুদোম্ মজিম চলে আর বিশ্বেজ্ গুরিনে মর্ সুদোমানি পালায়। এ মানুচ্চো ঘেচ্চেকগুরি গম্; তে হামাক্কায় বাঁজিবো। মুই প্রভু লগেপ্রভু এ কধাগান কঙর্।

^10-11 ইক্কিনে মনে গর, সে মানুচ্চোর্ এক্কো অত্যেচারী পুয়ো আঘে। তে লো ঝরায় বা অন্য কনঅ ভান্ন্যেই কাম্ গরে যিয়েনি তা বাবে কনদিন্‌অ ন-গরে। তে মুড়োমুড়ি উগুরে পূজোর্ জাগায়ানিত্ হানা-দানা গরে। তে আদাম মিলেরে বর্‌‌বাত্ লাগায়।

¹² তে নাঢা আর অভাবীগুনোরে অত্যেচার গরে। তে চুর্ গরে আর বন্ধগী জিনিস্‌‌চানি ফিরেই ন-দে। তে মূত্তিপূজো গরে আর জঘন্য কাম্ গরে।

¹³ তে সুদি টেঙা উদোর্ দে আর বেশ্ সুদ নেযায়। সেই পুয়োবো কি বাঁজিবো? তে ন-বাঁজিবো। এই বেক্ জঘন্য কামানি গোজ্যে বিলিনে তে মুরিবোদে মুরিবো। তে তার মরণত্তে নিজেই দায়ী অবঅ।

¹⁴ আরঅ ধোজ্য, সেই পুয়োবোর এক্কো পুয়ো আঘে। তে তা বাবরে এ পাপ্‌‌‌পানি গত্তে দেগিনেয়ো সিয়েনি ন-গরে।

^15-16 তে মুড়ো উগুরে পূজোর্ জাগায়ানিত্ হানা-দানা ন-গরে বা ইস্রায়েলীয়গুনোর মূত্তিত্ পূজো ন-গরে। তে তার আদাম্মে মিলেরে বর্‌‌‌বাত্ ন-লাগায় বা কাররে অত্যেচার ন-গরে। তে সুদি টেঙালোই কনঅ কিজু বন্ধগ্ ন-নেযায়। তে চুর্ ন-গরে বরং যিবের্ পেট পুরের্ তারে হানা দিয়্যে আর লাংটা-বাংটাগুনোরে কাবড় দিয়্যে।

¹⁷ তে নাঢাগুনোরে অত্যেচার ন-গরে আর কনঅ বাবদে সুদ্ ন-নেযায়। তে মর্ সুদোমানি রোক্ষ্যে গরে আর রীদি-সুদোমানি পালায়। তে তা বাবর্ পাপত্তে ন-মুরিবো; তে হামাক্কায় বাঁজিবো।

¹⁸ মাত্তর্ তা বাবে তা নিজোর্ পাপত্তে মুরিবো, কিত্তে তে জোর্ গুরি টেঙা আদায় গুরিদো, ভেইয়ুনো জিনিসচানি চুর্ গুরিদো আর তা মানুচ্চুনো ভিদিরে অন্যেয় কাম গুরিদো।

¹⁹ তো তুমি কত্তে, বাবর্ দুজোত্তে কিত্তে পুয়োবো সাজা ন-পেবঅ? সেই পুয়োবো দঅ ন্যায় আর ঠিগ্ কাম গোজ্যে আর মর্ বেক সুদোমানি যত্তন্ গুরি পালেয়্যে, সেনত্তে তে হামাক্কায় বাঁজিবো।

²⁰ যে পাপ গুরিবো তেয়ই মুরিবো। পুয়োবো বাব দুজোত্তে সাজা ন-পেবঅ। গম্ মানুচ্ তা গম্ কামর্ ফল পেবঅ আর পাজি মানুচ্ তার পাজিগানির ফল পেবঅ।

²¹ মাত্তর্ যুনি এক্কো পাজি মানুচ্ তার বেক পাপ্পানিত্তুন্ ফিরিনে মর্ বেক সুদোমানি পালায় আর ন্যায় আর ঠিগ্ কাম গরন সালে হামাক্কায় বাঁজিবো, ন-মুরিবো।

²² তে যেদক্কানি অন্যেয় গোজ্যে সিয়েনি মুই আর মনত্ ন-রাগেম। তে যেদক্কানি গম্ কাম গোজ্যে সিয়েনিত্তে তে বাঁজিবো।

²³ পাজি মান্‌জ্যর মরনত্ কি মুই হুজি অং? বরং তে যেক্কে তা ভান্ন্যেই পধত্তুন ফিরি এইনে বাঁজে সেক্কেয়ই মুই হুজি অং।

²⁴ মাত্তর্ যুনি এক্কো গম্ মানুচ্ তা সততাত্তুন্ ফিরিনে পাপ গরে আর পাজি মান্‌‌জ্য ধোক্ক্যেন জঘন্য কাম গরে সালে তে কি বাঁজিবো? তার কনঅ গম্ কাম সেক্কে মুই মনে ন-গুরিম। তার কনঅ গম্ কামানি সেক্কে মুই মনে ন-গুরিম। তার অবিশ্বেজ্ আর পাপত্তে তে মুরিবো।

²⁵ তো তুমি কত্তে, প্রভুর পথ্‌তান ঠিগ নয়। ও ইস্রায়েলীয়গুন, শুনো। মঅ পথ্‌তান কি অন্যেয়র পথ? না, বরং তমা পথ্‌তানই অন্যেয়র পথ।

²⁶ যুনি এক্কো গম্ মানুচ্ তা সততাত্তুন্ ফিরিনে পাপ গরে আর মরে, সালে তে তার্ পাপত্তে মুরিবো।

²⁷ মাত্তর্ যুনি এক্কো পাজি মানুচ্ তার ভান্ন্যেয়ত্তুন্ ফিরিনে ন্যায় আর গম্ কাম গরে, সালে তে তা পরাণান্ বাঁজেব।

²⁸ তার অন্যেয়র্ কধানি ভাবিনে সিয়েনিত্তুন্ ফিজ্যে বিলিনে তে হামাক্কায় বাঁজিবো, ন-মুরিবো।

²⁹ তো তুমি কত্তে, প্রভুর পথ্‌তান ঠিগ্ নয়। ও ইস্রায়েলীয়গুন, মঅ পথ্‌তান কি অন্যেয়র্? অন্যেয়র পথ্‌তান দঅ তমার।

³⁰ “সেনত্তে ও ইস্রায়েলীয়গুন, মুই তমার পত্তিজনর্ আচার-ব্যবহার মজিম্ বিচের্ গুরিম। তুমি ফিরো, তমা বেক্ অন্যেয় কামানিত্তুন্ মনান্ ফিরো; সালে পাপত্তুন্ তুমি ভস্ত ন-অবা।

³¹ তমা বেক্ অন্যেয়ানি তমা নিজোত্তুন্ দূর গরঅ আর তমা রিবেঙানি আর মনানি নুয়ো গুরি তুলো। কিত্তে তুমি মুরিবা?

³² মুই কারঅ মরণত্তে হুজি ন-অং। তুমি মনান্ ফিরেইনে বাঁজঅ। মুই প্রভু লগেপ্রভু এ কধাগান কঙর্।”