যিহিষ্কেল 17 - Chakma Bible

দ্বিবে ঈগল পেক্ আর এক্কান লুদি

¹ পরেদি লগেপ্রভুর এ কধাগান মইধু ফগদাং অলঅ,

² ও মান্‌জ্যর পুয়োবো, উদাহরনর্ মাধ্যমে ইস্রায়েলীয়গুনোরে জানেই দুয়ো,

^3-4 প্রভু লগেপ্রভু কোইয়্যেদে, নানান্ রঙর্ লাম্বা লাম্বা পোর্‌লোই ভরা দাঙর্ ডুয়োবলা এক্কো দাঙর্ ঈগল পেখ্ লেবাননত্ এলঅ। সিবে সিদুগোর্ এক্কো এরস গাজর্ বেগত্তুন অজল্ ডেলা ভাঙিনে বণিক্‌‌কুনোর দেজত্ নেযেইনে বেপারিগুনো শঅরত্ লাগেই দিলো।

⁵ সে পরেদি তে কিজু বীজ্ বোল্‌‌বোল্যে মাদিত্ লাগেই দিলো। পানি নাল পারত্ উইলো গাজ ধোক্ক্যেন গুরি তে সিগুন লাগেই দিলো।

⁶ সিগুন গেজেই উদিনে মাদিত্ ছিদি পোজ্যে এক্কান লুদি অলঅ। সেই লুদিগানর্ আগাগুন্ সেই ঈগল ইন্দি ফিরিলাক্, আর সিয়েনর শিঙোরানি রলঅ মাদিত্ তলে। এবাবোত্যেগুরি সেই লুদিগান দাঙর্ অলঅ আর সেক্কে পাদাসুদ্ধো ভালক্কুন্ আগা নিগিলিলাক্।

⁷ মাত্তর্ সিয়েনত্ পোর্‌লোই ঢাক্যে দাঙর্ ডুয়োবলা আর এক্কো দাঙর্ ঈগল এলঅ। সেই লুদিগানে পানি পেবাত্তে তা শিঙোরানি আর আগাগুন সিয়েনত্তুন্ সেই ঈগল ইন্দি বাড়েই দিলো।

⁸ বোউত্ পানি পারত্ গম্ মাদিত্ তারে লাগা ওইয়্যে যেনে তে বোউত্ আগা নিগিলেই পারে, ফল ফোলেই পারে আর দোল্ লুদি ওইনে উদি পারে।

⁹ “তুই তারারে কঅ, প্রভু লগেপ্রভু কোইয়্যেদে, ‘তে কি বাড়ি উদিবো? তে যেনে শুগেই যায় সেনত্তে কি তারে উগুরে ফেলেইনে তা ফলুন্ ফেলেই দিয়্যে অবঅ? তার্ নুয়ো গোজেয়্যে আগা বেক্কুন শুগেই যেবাক্। তার শিঙোর্ ধুরি তুলি ফেলেবাত্তে কনঅ খেমতাবলা আঢ্ বা ভালোক্কুন মানুচ্ ন-লাগিবাক্।

¹⁰ যুনিয়ো তারে গমেডালে লাগা ওইয়্যে তো তে ন-বাঁজিবো। যে ভুইয়োত্ তে বাড়ি উঠ্যে সিয়েনত্ পূগো বোইয়্যেরে তে এক্কুবারে শুগেই যেবঅ।’”

¹¹ সে পরেদি লগেপ্রভু মরে কলঅ,

¹² তুই এই উল্লোমী জাদ্‌তোরে কঅ‌, ইয়েনির্ অত্ত কি সিয়েন কি তুমি হবর্ ন-পঅ? বাবিলর রাজা যিরূশালেমত্ এইনে তার রাজা আর রাজপুরুষ্‌‌চুনোরে ধুরিনে বাবিলোত্ নেযেল।

^13-14 সে পরেদি তে রাজপরিবারর্ একজন সমারে চুক্তি গুরিনে তারে তার বাধ্য থেবাত্তে শমক্ হাবেল। তে দেজর্ আজল্ আজল্ মানুচ্চুনোরে ধুরি নেযেল যেনে সেই রেজ্যগানর্ অধিনে রাগা যায় আর সিয়েন খেমতাবলা ওইনে উদি ন-পারে মাত্তর্ চুক্তি রোক্ষ্যে গুরিনে টিগি টেই পারে।

¹⁵ মাত্তর্ সেই শাজন্‌গুরিয়্যেবো ঘোড়া আর এক্কো দাঙর্ সৈন্যদল পেবাত্তে মিসরত্ দূত পাধেইনে বাবিল রাজার বিরুদ্ধে উল্লোমী গুরিলো। তে কি সফল অবঅ? যে এই কামানি গরে তে কি রেহাই পেবঅ? শমক্ ভাঙিলে কি তে রোক্ষ্যে পেবঅ?

¹⁶ মুই প্রভু লগেপ্রভু মর্ জিংকানির দিব্য দিইনে কঙর্, তারে যে রাজাবো সিংহাসনত্ বোজেল, যিবের্ শমক্তানরে তে ঈচ্ গুরিলো, আর যিবের্ চুক্তি তে ভাঙি ফেলেল তে সেই রাজার দেজত্ বাবিলোত্ মুরি যেবঅ।

¹⁷ যুদ্ধোত্ যেক্কে ভালোক্কানি জিংকানি ভস্ত গুরিবাত্তে অজল্ কুড়্ আর নিযো কুড়্ বানা অবঅ সেক্কে ফরৌণর খেমতাবলা দাঙর্ সৈন্যদলুনে তারে সাহায্য ন-গুরিবাক্।

¹⁸ তে দঅ চুক্তি ভাঙিনে শমক্তান্ ঈচ্ গোজ্যে। তে অধীনতার চুক্তি গুরিনেয়ো এ কামানি গোজ্যে বিলিনে রেহাই ন-পেবঅ।

¹⁹ “‘মুই প্রভু লগেপ্রভু মর্ জিংকানির নাঙে কঙর্, তে মঅ নাঙে শমক্ গুরিনে সিয়েনি ঈচ্ গোজ্যে আর অধীনতার চুক্তিগান ভাঙে বিলিনে তা ফল মুই তারে দিম।

²⁰ মুই তাত্তে মঅ জালান্ পাদিম্ আর তে মঅ ফালত্ ধরা পড়িবো। তে মঅ উগুরে অবিশ্বেজি ওইয়্যে বিলিনে মুই তারে বাবিলোত্ নেযেম আর সিদু তারে সাজা দিম।

²¹ তার সেরা সৈন্যগুনে যুদ্ধোত্ মুরি যেবাক্ আর বাদবাগি সৈন্যগুনে চেরোকিত্তে ছিদি পড়িবাক্। সেক্কে তুমি হবর্ পেবা যে, মুই লগেপ্রভু এ কধাগান কোইয়োং।’”

²² প্রভু লগেপ্রভু কোইয়্যেদে, মুই নিজে এরস গাজর্ মাঢাত্তুন্ এক্কো কুজি আগা নিইনে মুড়োমুড়ির্ অজল্ চুগোত্ লাগেই দিম।

²³ ইস্রায়েলর অজল্ মুড়ো উগুরেত্তুন্ ডেলা নিগিলিনে ফল ধুরিবাক্; সিবে এক্কো বেগত্তুন দোল্ এরস গাজ্ ওই উদিবো। নানান্ বাবোত্যে পেগ্ তা ডেলাগুনো ভিদিরে ঘর্ বানেবাক্ আর তা ছাবাত্ বজত্তি গুরিবাক্।

²⁴ ইয়েন্দোই মাদর্ বেক গাজ্‌‌‌চুনে হবর্ পেবাক যে, মুই লগেপ্রভু অজল্ গাজরে তলে গরং আর তলে গাজরে অজল্ গরং। মুয়ই য়্যেল্ গাজরে শুগুনো গরং আর শুগুনো গাজরে জেদা গরং। “মুয়ই লগেপ্রভু এ কধাগান কোইয়োং আর মুই সিয়েন গুরিম।”