যিহিষ্কেল 16 - Chakma Bible

যিরূশালেমান যেন অসতী মিলে ধোক্ক্যেন্

¹ পরেদি লগেপ্রভু মরে কলঅ,

² ও মান্‌জ্যর্ পুয়োবো, তুই যিরূশালেমর জঘন্য কামানি পৌইদ্যেনে তারে জানা।

³ তুই কঅ, প্রভু লগেপ্রভু যিরূশালেমানরে কোইয়্যেদে, তঅ ঘরান আর তঅ জর্মর জাগায়ান কনানীয়গুনোর দেজত্; তঅ বাপ্পো অলঅ ইমোরীয় আর মাবো হিত্তীয়।

⁴ যেদিন্যে তুই জোর্মেয়োচ্ সেদিন্যে তঅ নেইবো কাবা ন-অয়, তরে পানিলোই ধোইনে সাব্ গরা ন-অয়, তঅ কিয়্যেত্ নুন গুলি দেনা ন-অয় বা তরে কাবড়্‌লোই বেড়েইনে লুয়ো ন-অয়।

⁵ কনজনে তরে মেয়্যেলি চোগেদি ন-দেগন্ বা তঅ উগুরে ইয়েনি গুরিবাত্তে কারঅ মনত্ দোয়্যেও ন-জাগে। তরে বরং খুলো মাদত্ ফেলেই রাগা ওইয়্যে, কিত্তে যেদিন্যে তুই জোর্মেয়োচ্ সেদিন্যে তরে ঈচ্ গরা ওইয়্যে।

⁶ মুই তঅ মুজুঙেদি যেবার অক্তত্ তরে লোগানত্ ছদ্‌‌ফদাদে দেগিলুং। সেক্কে মুই তরে উগুম দিলুং যেন তুই তর্ লো-লোই বাঁজি থাচ্।

⁷ মুই তরে খেদর্ চারা ধোক্ক্যেন দাঙর্ গুরি তুলিলুং। তুই দাঙর্ ওই উদিনে হার্‌কোজ্যে গাবুর্ অলে, তঅ বুগ্‌কো দাঙর্ অলঅ, কেশ্ উদিলো, মাত্তর্ তুই লাংটা-বাংটা আর কাবড় ছাড়া এলে।

⁸ পরেদি মুই তঅ কায়-কুরেদি যেবার অক্তত্ তন্দি রিনি চেইনে দেগিলুং, তর্ ইক্কিনে প্রেম গুরিবার সময় ওইয়্যে; সেনত্তে মঅ পোজাগর্ কিজু ভাগ্ মুই তঅ উগুরে বিজেই দিইনে তর্ লাংটা-বাংটাগান নাঢি দিলুং। মুই তইধু শমক্ হেইনে তঅ সমারে চুক্তি গুরিলুং, আর সেক্কে তুই মর্ অলে।

⁹ মুই তরে পানিলোই গাদে দিইনে তর্ লো-নি ধুয়োই দিলুং আর কিয়্যেত্ তেল গুলি দিলুং।

¹⁰ মুই তর্ কিয়্যেনত্ নক্‌শা গোজ্যে কাবড় দিলুং আর টেঙত্ শুগর চামর্ দোল্ জদা পিনেলুং। মুই তঅ মাঢাবোত্ পাদল্ মসীনা কাবড় উরেই দিলুং আর রেশম কাবড়লোই তরে ঢাগি দিলুং।

¹¹ মুই গয়নালোই তরে সাজেলুং; তঅ আঢত্ হাড়ু, গত্তনাবোত্ নেগেলেচ্,

¹² নাগত্ নাগফুল, কানত্ কানদুল আর মাঢাবোত্ দোল্ এক্কো মুকুট দিলুং।

¹³ এবাবোত্যেগুরি সোনা আর রূবোলোই তরে সাজা অলঅ; তঅ কাবড়-চুগোরানি এলদে পাদল্ মসীনার, রেশমর আর নক্‌শা গোজ্যে কাবড়র্। তঅ হানাগানি এলদে নিগুজ্ মোইদ্যে, মধু আর জলপাইয়র তেল। তুই জদবদে দোল্ ওইনে রাণী ধোক্ক্যেন্ অলে।

¹⁴ তর্ দোলানত্তে তঅ নাঙান্ জাদ ভিদিরে ছিদি পড়িল, কিত্তে মর্ দিয়্যে সয়সাগজ্যেই তর্ দোলান জদবদে ওইয়্যে।

¹⁵ মাত্তর্ তুই তর্ দোলানর্ সুনাঙান বেশ্যে অবাত্তে বেবহার গোজ্যস্। যে কনজনে তঅ কায়-কুরেদি গেলে তা সমারে তুই সিনেলী গুরিদে আর তে তরে ভোগ্ গুরিদো।

¹⁶ তর্ কনঅ কনঅ কাবড়্‌লোই তুই পূজোর্ অজল্ জাগায়ান সাজেইনে সিয়েনত্ তর্ বেশ্যের্ কাম চালেয়োচ্। সেবাবোত্যে কাম গরানা তর্ কনদিন্‌অ উজিত্ ন-এলঅ।

¹⁷ মর্ সনা-রূবোলোই বানেয়্যে গয়না, যিয়েনি মুই তরে দুয়োং, সেই দোল্ গয়নানি তুই নিজোত্তে মরদ মূত্তি বানেইনে সিগুনো সমারে সিনেলী গুরিদে।

¹⁸ তর্ নক্‌শা গোজ্যে কাবড়-চুগোড়ানি তুই সিগুনোরে উরে দিদে আর তারা মুজুঙোত্ তুই মঅ তেলান্ আর আগর্‌বাট্টি উৎসর্ব গুরিদে।

¹⁹ মুই তর্ হেবাত্তে তরে যে নিগুজ্ মোইদ্যে, জলপাই তেল আর মধু দুয়োং সিয়েনি তুই তারা মুজুঙোত্ তুম্বাজ্ ইজেবে থদে। মুই প্রভু লগেপ্রভু কঙর্, ইয়েনি বেক্কানি ঘোট্যে।

²⁰ তর্ যিদুক্কুন ঝি-পুয়ো তুই মত্তে পেদত্ ধোজ্যস্ তারারে নিইনে তুই হানা ইজেবে মূত্তিগুনো নাঙে উৎসর্ব গোজ্যস্। তর্ সিনেলীর্ কামানি বোউত্ এলঅ।

²¹ আরঅ মর্ ঝি-পুয়োগুনোরে কাবিনে তুই মূত্তিগুনো নাঙে তারারে আগুনোত্ পুড়িনে উৎসর্ব গোজ্যস্।

²² তর্ বেক জঘন্য কামানিত্ আর তর্ সিনেলীত্ তুই তর্ চিগোন অক্তর্ কধানি ইদোত্ ন-তুলোচ্ যেক্কে তুই লাংটা-বাংটা এলে আর উট্যেবুট্যে নিজো লো-গান উগুরে ছদফদর্।

^23-24 ছি, ছি তরে! তর্ এই পাজিগানির পরেয়ো তুই নিজোত্তে শঅরর্ পত্তি খুলো জাগাত্ এক্কো গুরি মূত্তির্ আসন বানেয়োচ্।

²⁵ দবদা পধত্ মূত্তির্ আসন বানেইনে তর্ দোলানরে তুই অগমান গোজ্যস্। যে কনজনে তঅ কায়-কুরেদি গেলে তারে তর্ কিয়্যেগান দান গুরিনে তুই তর্ ব্যভিচারর কামান বাড়েয়োচ্।

²⁶ তর্ পাড়াল্যে মিসরীয়গুনো পেরেত্যে সমারে তুই সিনেলী গোজ্যস্ আর তর্ ব্যভিচারর কামান বাড়েইনে মরে অমকদ অহুজি গোজ্যস্।

²⁷ সেনত্তে মুই তঅ বিরুদ্ধে মঅ আঢ্‌তানি বাবেইনে তঅ সোম্বোত্তিগানি কোমেই দুয়োং। তঅ শত্রুগুনোর, অত্তাৎ পলেষ্টীয়গুনোর মিলেগুন, যিগুনে তর্ জঘন্য খাচ্চ্যদত্তে লাজ্ পেইয়োন মুই তারা আঢত্ তরে তুলি দুয়োং।

²⁸ আসিরিয়গুনো সমারেয়ো তুই ব্যভিচের্ গোজ্যস্, কিত্তে তুই ঈল্ ন-ফুত্যে এলে; মাত্তর্ সে পরেদিয়ো তর্ ঈল্ ন-অয়।

²⁹ সে পরেদি তুই তর্ ব্যভিচারর কাম বাড়েইনে বণিক্‌কুনোর দেজ্ বাবিল সমারেয়ো ব্যভিচের্ গুরিলে, মাত্তর্ ইয়োত্‌অ তর্ ঈল্ ন-অলঅ।

³⁰ “‘মুই প্রভু লগেপ্রভু কঙর্, তুই কদক্ মন-মরা, কিত্তে তুই বেগেয়্যে বেশ্যে ধোক্ক্যেন্ এ কামানি গোজ্যস্।

³¹ তুই যেক্কে দবদা পধে পধে মূত্তির্ আসন বানেয়োচ্ সেক্কে বেশ্যের কাম গুরিনেয়ো তর্ পাওনা টেঙাগুন্ এলাফেলা গোজ্যস্।

³² তুই সিনেলী গোজ্যে মিলে ধোক্ক্যেন্, তুই তঅ নেক্কোত্তুন বেশ্ ন-চিন্যেগুনোরে বেঈ লোইয়োচ্।

³³ বেক্ বেশ্যেগুনে বক্‌শিজ্ পান, মাত্তর্ তুই তর্ বেক লাঙেগুনোরে বক্‌‌শিজ্ দি থাচ্। তঅ লগে সিনেলী গুরিবাত্তে যেনে তারা বেক্ জাগানিত্তুন্ তইধু এজন্ সেনত্তে তুই তারারে ঘুষ্ দি থাচ্।

³⁴ সেনত্তে তর্ বেশ্যেগিরিত্ তুই অন্য বেশ্যেগুনোত্তুন্ যুদো; তঅ লগে ব্যভিচের্ গুরিবাত্তে কনজনে তঅ পিজেদি দাবা ন-দুয়োন্। তুই এক্কুবারে যুদো, কিত্তে তুই টেঙা ন-নেযাচ্ বরং টেঙা দি থাচ্।’”

³⁵ ও বেশ্যে, লগেপ্রভুর কধানি শুন্।

³⁶ প্রভু লগেপ্রভু কোইয়্যেদে, ব্যভিচের্ কামত্ তুই তর্ লাজেবার-জাগায়ান খুলি দিইনে তঅ লাঙেগুনো ইধু তর্ লাংটা-বাংটাগান ফগদাং গোজ্যস্। তর্ বেক জঘন্য মূত্তিত্তে আর তারা নাঙে তর্ ঝি-পুয়োগুনোর যে লো-নি দুয়োচ্,

³⁷ সিয়েনত্তে মুই তর্ সেই বেক্ লাঙেগুনোরে এগত্তর্ গুরিম যিগুনো সমারে তুই ফুত্তি গোজ্যস্। যিগুনোরে তুই কোচ্‌পেইয়োচ্ আর যিগুনোরে ঈচ্ গোজ্যস্ তারারে বেক্কুনোরে মুই এগত্তর্ গুরিম। মুই চেরোকিত্তেত্তুন্ তঅ বিরুদ্ধে তারারে এগত্তর্ গুরিম আর তারা মুজুঙোত্ তর্ বেক্ কাবড়-চুগোড়ানি খুলি দিম যেনে তারা তর্ লাংটা-বাংটাগান দেগন্।

³⁸ যে মিলেগুনে ব্যভিচের্ গরন আর যিগুনে লো ঝরান্ তারারে যে সাজাগান দিয়্যে অয় সেই সাজাগান মুই তরে দিম। মর্ রাগে আর মনর্ জ্বালাত্তে মুই তরে মরণর্ সাজা দিম।

³⁹ সে পরেদি মুই তরে তর্ লাঙুনো আঢত্ তুলি দিম; তারা তর্ মূত্তির আসনানি ভস্ত গুরি দিবাক্। তারা তর্ কাবড়-চুগোড়ানি খুলি ফেলেবাক্ আর তর্ দোল্ গয়নানি নেযেবাক্ আর তরে এক্কুবারে লাংটা-বাংটা গুরি থোই যেবাক্।

⁴⁰ তারা তঅ বিরুদ্ধে একদল মান্‌জ্যরে উত্তেজিত গুরিবাক্; তারা তরে পাত্তর্ মেলা দিইনে মারে ফেলেবাক্ আর তারার্ তলোয়ার্‌লোই তরে কট্টা কট্টা গুরি কাবিবাক্।

⁴¹ তারা তর্ ঘরানি পুড়ি ফেলেবাক্ আর ভালোক্কুন্ মিলের্ চোগো মুজুঙোত্ তরে সাজা দিবাক্। এবাবোত্যেগুরি তর্ বেশ্যেগিরি বন্ধ গুরি দিম; তর্ লাঙেগুনোরে তুই আর টেঙা-পোইজ্যে ন-দিবে।

⁴² সে পরেদি তঅ উগুরেত্তুন মর্ রাগ্‌কান আর মনর্ জ্বালাগান থামেব। মুই শান্ত ওম, আর অহুজি ন-ওম।

⁴³ তুই তর্ চিগোন সেময়োর্ দিনুন্ ইদোত্ ন-রাগাচ্, বরং এ কামানিলোই মরে কাঙেলেত্যে গোরেয়োচ্; সেনত্তে মুইয়ো তর্ কামর ফল তরে দিম। তর্ অন্য বেক্ ভান্ন্যেই কামর্ সমারে কি তুই এই জঘন্য কামানিয়ো মিজেচ্?

⁴⁴ মান্‌জ্যে তঅ পৌইদ্যেনে এই দাগ কধানি কবাক্, যেধোক্ক্যেন মা সেধোক্ক্যেন ঝি।

⁴⁵ তুই তঅ মাবোর্ যগাজ্যে ঝি, তঅ মাবো তা নেক্কোরে আর ঝি-পুয়োগুনোরে ঈচ্ গুরিদো; তুই তর্ বোনুনোর যগাজ্যে বোন, সেই বোনুনে তারার্ নেক্কুনোরে আর ঝি-পুয়োগুনোরে ঈচ্ গুরিদাক্। তমা মাবো অলঅ হিত্তীয়া আর বাপ্পো ইমোরীয়।

⁴⁶ তঅ দাঙর্ বোন্নো শমরিয়া; তা ঝিগুনোরে নিইনে তে তঅ উত্তোরেদি বজত্তি গরে। তঅ চিগোন বোন্নো অলঅ সদোম; তে তার ঝিগুনোরে নিইনে তর্ দোগিণেদি বজত্তি গরে।

⁴⁷ তুই যে তারার্ চালচলন আর জঘন্য অভ্যেস ধোক্ক্যেন চোল্যস্ বানা সিয়েন নয় বরং তর্ বেক আচার-বেবহারে তুই কানক্কণ্ ভিদিরে তারাত্তুন্‌অ বেশ্ আরঅ জঘন্য ওইয়োচ্।

⁴⁸ মঅ কধাগান সত্য যে, তর্ যিগুনে আর তুই যিয়েনি গোজ্যস্ তর্ বোন্নো সদোমে আর তা ঝিগুনে কনদিন্‌অ সিয়েনি ন-গরন। মুই প্রভু লগেপ্রভু এ কধাগান কঙর্।

⁴⁹ তর্ বোন্নো সদোমর পাপ্পানি ইয়েনি-তে আর তা ঝিগুনে এলাক্ বাড়্‌বো, কিত্যে তারার্ বোউত্ হানা এলঅ আর তারা গমেডালে বজত্তি গুরিদাক্, মাত্তর্ তারা নাঢা আর অভাবীগুনোরে সাহায্য ন-গুরিদাক্।

⁵⁰ তারা এলাক্ বাড়্‌বো আর মঅ মুজুঙোত্ জঘন্য কাম গুরিদাক্। সেনত্তে তুই যেবাবোত্যে দেখ্যস্ সেবাবোত্যে মুই তারারে দূর্ গুরি দুয়োং।

⁵¹ তুই যেদক্কানি পাপ গোজ্যস্ তার্ অদ্দেক্‌অ শমরিয়া ন-গরে। তুই তারাত্তুন বেশ্ আরঅ জঘন্য জঘন্য কাম গোজ্যস্। তুই ইয়েনি যেদক্কানি কাম গোজ্যস্ সিয়েনি দেগিনে তর্ বোনুনোরে বরং ধার্মিক মনে ওইয়্যে।

⁵² তর্ অসর্মানান তত্তুন্ মানি নেযা পড়িবো, কিত্যে তর্ কামানিয়ে তঅ বোনুনোর তপ্পে সাক্ষি দের্। তর্ পাপ্পানি তারাত্তুন্‌অ বেশ্ জঘন্য বিলিনে মনে অয়। সেনত্তে তুই লাজেস্ আর তর্ অসর্মানান্ মানি নেযা, কিত্যে তুই তর্ বোনুনোরে ধার্মিক প্রমান গোজ্যস্।

⁵³ যাওক্, মুই সদোম আর তার মিলেগুনোরে, শমরিয়া আর তার মিলেগুনোরে আর তারা লগে লগে তর্‌অ অবস্থা ফিরেম।

⁵⁴ সেক্কে তুই অসর্মান মনে গুরিবে আর তর্ সে ভান্ন্যেই কামানিত্তে তারা নিজোরে গম্ বিলি মনে গোজ্যন্ সিয়েনিত্তে তুই লাজেবে।

⁵⁵ তঅ বোনুনে তারার্ ঝিগুনোরে নিইনে আগে যেবাবোত্যে এলাক্ সেবাবোত্যে অবাক্; আর তুই আহ্ তঅ ঝিগুনে আগে যেবাবোত্যে এলাক্ সেবাবোত্যে অবাক্।

⁵⁶ তর্ অহংকারর্ দিনোত্ তুই তর্ বোন সদোমরে ঠাট্টা-মশকারী গুরিদে;

⁵⁷ সেক্কে তর্ পাজিগানি ফগদাং ন-পায়। ইক্কিনে অরামর্ ঝিগুন আর তার্ পাড়াল্যেগুন, পলেষ্টীয়গুনোর ঝিগুন, অত্তাৎ তঅ চেরোকিত্তেদি যিগুনে তরে ঈচ্ গরন তারা বেক্কুনে তরে ঠাট্টা-মশকারী গত্তন্।

⁵⁸ তুই তর্ ভান্ন্যেই আর জঘন্য কামর্ ফল ভুগিবে।

⁵⁹ “তর্ কাম মজিম্ মুই তঅ লগে বেবহার গুরিম, কিত্যে তুই মর্ থিদেবর্ গোজ্যে সুদোমান ভাঙিনে মর্ শমক্তান্ তুচ্ছো গোজ্যস্।

⁶⁰ তো তর্ কম বয়জত্ তত্তে মুই যে সুদোমান থিদেবর্ গোজ্যং সিয়েন মুই মনে গুরিম আর তত্তেই এক্কান উমরর্ সুদোম থিদেবর্ গুরিম।

⁶¹ মুই তর্ ঝি ইজেবে তর্ দাঙর্ আর চিগোন বোনুনোরে তরে দিম আর তুই তারারে গুজি লবে, যুনিয়ো তারা মঅ সুদোমর্ ভিদিরে নেই। সেক্কে তুই তর্ চালচলনর কধা ইদোত্ তুলিনে লাজেবে।

⁶² মুই তত্তে মর্ সুদোমান থিদেবর্ গুরিম, আর তুই হবর্ পেবেদে যে, মুয়ই লগেপ্রভু।

⁶³ মুই যেক্কে তর্ বেক অন্যেয়ানি খেমা গুরিম সেক্কে তুই সেই বেক্ অন্যেয় কামানির্ কধা ইদোত্ তুলিনে লাজেবে আর তর্ অসর্মানত্তে আর কনদিন্‌অ মুয়োন ন-খুলিবে। মুই প্রভু লগেপ্রভু এ কধাগান কঙর্।”