যিহিষ্কেল 15 - Chakma Bible

আংগুর গাজর্ উদাহরন

¹ পরেদি লগেপ্রভু মরে কলঅ,

² ও মান্‌জ্যর্ পুয়োবো, আংগুর গাজর্ ডেলাগুন্ কি ঝারর্ অন্য যে কনঅ গাজ ডেলাত্তুন্ গম্?

³ দরকারী কনঅ কিজু বানেবাত্তে কি সিগুনোত্তুন্ তক্তা নেযা অয়? পযাপিরা ঠাঙেই রাগেবাত্তে মান্‌জ্যে কি সিয়েনিলোই দুড়ি বানান্?

⁴ জ্বালেবার তক্তা ইজেবে সিয়েন আগুনোত্ ফেলানার পরেদি যেক্কে তক্তাগানর দ্বিকিত্তেদি পড়ি যায় আর সংমোধ্যেগান কালা ওই যায় সেক্কে কি সিয়েন কনঅ কামত্ লাগে?

⁵ আগুনোত্ ফেলেবার আগেদি যুনি সিয়েন কন কিজুত্তে কামত্ ন-লাগি থায় সালে আগুনোত্ পুড়িনে কালা ওই গেলে কি সিয়েনদোই কনঅ দরকারী কিজু বানা যায়?

⁶ “সেনত্তে মুই প্রভু লগেপ্রভু কঙত্তে, ঝার গাজ্‌চুনো ভিদিরে আংগুর গাজর্ ডেলাগুন মুই যেবাবোত্যে দার্‌বো ইজেবে আগুনোত্ দুয়োং, সেবাবোত্যে যিরূশালেমত্ বজত্তি গুরিয়্যে মানুচ্চুনোরেয়ো আগুনোত্ দিম।

⁷ মুই তারা বিরুদ্ধে যেম্। আগুনোত্তুন্ তারা নিগিলি এলেয়ো আগুনানে তারারে পুড়ি ফেলেব। মুই যেক্কে তারা বিরুদ্ধে যেম্ সেক্কে তুমি হবর্ পেবা যে, মুয়ই লগেপ্রভু।

⁸ দেজ্‌চান মুই মানুচ্ নেইয়্যে গুরিম, কিত্তে তারা অবিশ্বেজি ওইয়োন্। মুই প্রভু লগেপ্রভু এ কধাগান কঙর্।”