যিহিষ্কেল 14 - Chakma Bible

মূত্তি পূজোত্তে ইস্রায়েলীয়গুনোর্ সাজা

¹ পরে ইস্রায়েলর কয়েক্কো বুড়ো নেতা মইধু এইনে মঅ মুজুঙোত্ বজিলাক্।

² সেক্কে লগেপ্রভুর এ কধানি মইধু ফগদাং অলঅ,

³ ও মান্‌জ্যর্ পুয়োবো, এ মানুচ্চুনে তারার্ মন ভিদিরে মূত্তি থিদেবর্ গুরিনে পাপত্ পড়েদে ধোক্ক্যেন জিনিস তারা মুজুঙোত্ রাগেয়্যে। সেনত্তে মইধু যুনি তারা কনঅ কিজু পুযোর্ গরন সালে মুই তারারে জোব্ ন-দিম।

⁴ সেনত্তে তুই তারারে কঅ, প্রভু লগেপ্রভু কোইয়্যেদে, কনঅ ইস্রায়েলীয় যুনি তা মন ভিদিরে মূত্তি থিদেবর্ গুরিনে পাপত্ পড়েদে ধোক্ক্যেন জিনিস নিজো মুজুঙোত্ রাগায় আর সে পরেদি ভাববাদীগুনো ইধু এজে, সালে মুই লগেপ্রভু নিজে তার ভালোক্কুন মূত্তি ইজেবে তারে জোব্ দিম।

⁵ ইস্রায়েলীয়গুনোর মনানি আরঅ জিদিই নিবাত্তে মুই ইয়েন গুরিম, কিত্তে তারা বেক্কুনে তারার্ মূত্তিগুনোত্তে মরে ছাড়ি যেইয়োন।

⁶ সেনত্তে তুই তারারে কঅ, প্রভু লগেপ্রভু কোইয়্যেদে, তুমি মন ফিরো। তমা মূত্তিগুনোত্তুন্ ফিরো আর বেক্ জঘন্য কামানি ছাড়।

⁷ কনঅ ইস্রায়েলীয় বা ইস্রায়েল দেজত্ বজত্তি গুরিয়্যে কনঅ বিদেশী যুনি মত্তুন্ ফারগ্ ওই যান আর তা মনত্ মূত্তি থিদেবর্ গুরিনে পাপত্ পড়েদে ধোক্ক্যেন জিনিস তা মুজুঙোত্ রাগায় আর সে পরেদি মইধু পুযোর্ গুরিবাত্তে কনঅ ভাববাদী ইধু এজন্, সালে মুই লগেপ্রভু নিজেই তারে জোব্ দিম।

⁸ মুই সে মানুচ্চোর বিপক্ষে থিয়্যেম্ আর তারে এক্কান উদাহরন আর এক্কান দাগঅ কধা ধোক্ক্যেন গুরিম। মঅ মানুচ্চুনো ভিদিরেত্তুন্ মুই তারে কাবি ফেলেম। সেক্কে তুমি হবর্ পেবা যে, মুয়ই লগেপ্রভু।

⁹ “‘যুনি সেই ভাববাদীবো তারে কনঅ জোব্ দে সালে হবর্ পেবাদে যে, মুই লগেপ্রভু জোব্ দিবাত্তে তারে ভুলেয়োং। সে পরেদি সেই ভাববাদীবোর বিরুদ্ধে মুই আঢ্ বাবেম্ আর মঅ মানুচ্চো ইস্রায়েলীয়গুনো ভিদিরেত্তুন্ তারে ভস্ত গুরিম।

¹⁰ তারা দ্বি’জনে তারার্ অন্যেয়র্ সাজা পেবাক্; সেই ভাববাদীবোর্ আর সেই সল্লা গুরিবাত্তে এচ্চ্যে মানুচ্চোর সং সং সাজা অবঅ।

¹¹ সেক্কে ইস্রায়েলীয়গুনে আর মত্তুন্ ভান্ন্যেই পধেদি ন-যেবাক্ আর তারার্ বেক পাপ্পানিলোই নিজোরে আর অসিজি ন-গুরিবাক্। তারা মঅ মানুচ্ অবাক্ আর মুই তারার্ গোজেন ওম্। মুই প্রভু লগেপ্রভু এ কধাগান কঙর্।”

যে বিচেরান বাদ দিয়্যে ন-যায়

¹² সে পরেদি লগেপ্রভু মরে কোইয়্যেদে,

¹³ ও মান্‌‌জ্য পুয়োবো, ধুরিচ্, অবিশ্বেজি ওইনে কনঅ দেজ্ মঅ বিরুদ্ধে পাপ গুরিলো আর মুই তা বিরুদ্ধে আঢ্ বাবেইনে তা হানার যোগানানি বন্ধ গুরিলুং আর ভাদরাত্ পাধেইনে তা মানুচ্ আর এ্যামানুনোরে মারে ফেলেলুং।

¹⁴ এ অবস্থাত্ সিয়েনত্ যুনি নোহ, দানিয়েল আর ইয়োব-এ তিনজন মানুচ্ থেদাক্ সালে তারার্ সততাগানত্তে তারা বানা নিজোরে রোক্ষ্যে গুরি পারিদাক্। মুই প্রভু লগেপ্রভু এ কধাগান কঙর্।

¹⁵ ধর, মুই সেই দেজত্ ঝার্‌বো য়েমান পাধেই দিলুং আর তারা দেজচানরে মানুচ্ নেইয়্যে গুরিলাক্। সেক্কে সিয়েন এমন দর্‍গরেপারা অলদে যে, য়েমান দরে সিয়েন ভিদিরেদি কনজনে যানা-এযানা গুরি ন-পারিলাক্।

¹⁶ মঅ জিংকানিগানর্ নাঙে কঙর্, সেই তিনজন মানুচ্ সিয়েনত্ থেলেয়ো তারা নিজো ঝি-পুয়োগুনোরে রোক্ষ্যে গুরি ন-পারিদাক্। তারা নিজে রোক্ষ্যে পেদাক্ মাত্তর্ দেজ্‌চান মানুচ্ নেইয়্যে ওই যেদাক্।

¹⁷ ধর, মুই সেই দেজ বিরুদ্ধে যুদ্ধো আনিনে কলুং, দেজর্ বেক্ জাগানিত্ যুদ্ধো ওক্, আর মুই সিদুগো মানুচ্চুন আর এ্যামানুনোরে মারে ফেলেলুং।

¹⁸ মঅ জিংকানিগানর্ নাঙে কঙর্, সিয়েন ভিদিরে সেই তিনজন মানুচ্ থেলেয়ো তারা নিজো ঝি-পুয়োগুনোরে রোক্ষ্যে গুরি ন-পারিদাক্। তারা নিজে বানা রোক্ষ্যে পেদাক্।

¹⁹ আরঅ ধর, মুই সেই দেজ ভিদিরে ভানা পাধেলুং আর সিয়েনর মানুচ্ আহ্ এ্যামানুনোরে মারে ফেলানার মাধ্যমে মঅ রাগকান্ সিয়েন উগুরে ঢালি দিলুং।

²⁰ মঅ জিংকানির নাঙে কঙর্, সিয়েন ভিদিরে নোহ, দানিয়েল আর ইয়োবে থেলেয়ো তারা তারার্ কনঅ পুয়ো বা ঝিরে রোক্ষ্যে গুরি ন-পারিদাক্। তারার্ সততাগানত্তে তারা বানা নিজোরে রোক্ষ্যে গুরি পারিদাক্।

²¹ “ইক্কিনে মুই প্রভু লগেপ্রভু কঙর্, মুই যেক্কে যিরূশালেমর মানুচ্ আর এ্যামানুন মারে ফেলেবাত্তে সিয়েন বিরুদ্ধে যুদ্ধো, ভাদরাত্, ঝার্‌বো য়েমান আর ভানা-এ চেরান্ দর্‌গরেপারা সাজা পাদেম্ সেক্কে কত্তমান না ভান্ন্যেই অবঅ!

²² তো সিদুগোর্ কয়েকজনে বাঁজিবাক্ আর তারারে নিগিলেনে আনা অবঅ। তারা তমা ইধু এবাক্, আর যেক্কে তুমি তারার্ ভান্ন্যেই খাচ্চ্যত্ আর কামানি দেগিবা সেক্কে যিরূশালেম উগুরে মর্ আন্যে দযাগান পৌইদ্যেনে তুমি সান্তনা পেবা।

²³ তারার্ খাচ্চ্যত্ আর কামানি দেগিনে তুমি সান্তনা পেবা আর বুঝি পারিবা যে, এনেবাদে মুই কিচ্চু ন-গরং। মুই প্রভু লগেপ্রভু এ কধাগান কঙর্।”