যিহিষ্কেল 13 - Chakma Bible

ভন্ড ভাববাদীগুনে দুষি

¹ পরে লগেপ্রভু মরে কোইয়্যেদে,

² ও মান্‌জ্যর্ পুয়োবো, ইস্রায়েলর যে ভাববাদীগুনে ইক্কিনে কধা কধন্ তুই তারার্ বিরুদ্ধে ভাববাদী ইজেবে কধা কঅ। যিগুনে নিজোর মনগড়া কধা কদন্ তুই তারারে কঅ, তারা যেন লগেপ্রভুর কধা শুনোন্।

³ প্রভু লগেপ্রভু কোইয়্যেদে, অভিশাব্ পোড়োক্, সেই ভোক্তিনেইয়্যে ভাববাদীগুনোর, যিগুনোর কনঅ দর্শন ন-পেইনে তারার্ মনগড়া কধা কন্।

⁴ ও ইস্রায়েল, তর্ ভাববাদীগুন ভস্ত ওইয়্যে জাগা ভিদিরে শিয়েল ধোক্ক্যেন্।

⁵ তারা ইস্রায়েল জাদর্ দেবাল ফাদানি তালি দিবাত্তে সিদু ন-উদোন্ যেনে লগেপ্রভুর দিনোত্ যুদ্ধোর্ সময়োত্ সিয়েন দরমরগুরি থিয়্যেই থেই পারে।

⁶ তারার্ দর্শনান্ মিজে আর তারার্ গোণানা-পড়িদেনাগানি ঠিগ্ নয়। তারা কন্দে, মুই এ কধানি কঙর্, অদচ মুই তারারে ন-পাদাং; তো তারা আজা গরন তারার্ কধানি ফলিবো।

⁷ তারা কি মিজে দর্শন ন-দেগন্ বা মিজে গোণা-পড়া ন-গরন? তারা দঅ কদন্, মুই এ কধাগান কঙর্, অদচ মুই ন-কং।

⁸ মুই প্রভু লগেপ্রভু কঙর্, তারার্ মিজে কধানি আর মিজে দর্শনানিত্তে মুই তারা বিরুদ্ধে।

⁹ মঅ আঢ্‌তানি সেবাবোত্যে ভাববাদীগুনো বিরুদ্ধে উদিবো যিগুনে মিজে দর্শন দেগন্ আর মিজে গোণা-পড়া গরন্। মঅ মানুচ্চুনো সমাজত্ তারা ন-থেবাক্ বা ইস্রায়েলর বংশ লিস্টি ভিদিরে তারা নাঙানি ন-থেবঅ, আর ইস্রায়েল দেজত্‌অ তারা ফিরি এই ন-পারিবাক্। সেক্কে তুমি হবর্ পেবা যে, মুয়ই প্রভু লগেপ্রভু।

¹⁰ যেক্কে কনঅ সুগ্-শান্দি নেই সেক্কে ভাববাদীগুনে কবাক্, সুগ্-শান্দি আঘে, আর এবাবোত্যেগুরি তারা মঅ মানুচ্চুনোরে ভান্ন্যেই পধেদি নেযেয়োন। তারা যেন মানুচ্চুনোর বানেয়্যে এধোক্ক্যেন দেবাল উগুরে চিবিদি দিয়্যে যিয়েন দরমর নয়।

¹¹ সেনত্তে যিগুনে এ কামানি গোজ্যন্ তুই তারারে কঅ, সে দেবালান্ ভাঙি পড়িবো। অমকদ ঝড় আর দাঙর্ দাঙর্ শিল্ পড়িবাক্ আর ঝড়ে-বোইয়্যেরে এবঅ।

¹² সে দেবালান যেক্কে ভাঙি পড়িবো সেক্কে মান্‌জ্যে কি তারারে পুযোর্ ন-গুরিবাক্ যে, তারা যে চিবিদি গুলিনে দেবালান্ ঢাক্যন্ সেই চিবিদিগান গেল কুদু?

¹³ “‘মর্ রাগে মুই ঝড় বোইয়্যের্ খুলি দিম। মর্ অমকদ বেজারে মুই দাঙর্ দাঙর্ শিল্ আর ন-থামেয়্যে ঝড় দিইনে সিয়েন ভস্ত গুরি দিম।

¹⁴ যে দেবালান্ ভাববাদীগুনে চিবিদি গুলিনে নাঢি দুয়োন্ সিয়েন মুই ভাঙিনে মাদি সমারে সং গুরি দিম যেনে সিয়েনর গোড়াগান খুলো পড়ি থায়। সিয়েন ভাঙি পড়িবার অক্তত্ তা তলাগান্দোই তারায়ো ভস্ত ওই যেবাক্। সেক্কে তারা হবর্ পেবাক্ যে, মুয়ই লগেপ্রভু।

¹⁵ সেই দেবালান্ আর সিয়েনরে যিগুনে চিবিদিলোই নাঢি দুয়োন তারা উগুরে মুই মঅ রাগ্‌কান পুরোপুরি ঢালি দিম। মুই মানুচ্চুনোরে কোম্, সেই দেবালান্ নেই আর যিগুনে সিয়েন চিবিদি গুল্যন্,

¹⁶ অত্তাৎ ইস্রায়েলর সেই ভাববাদীগুনে যিগুনে যিরূশালেম মানুচ্চুনো ইধু কধা কোইয়োন আর শান্তি ন-থেলেয়ো শান্তির দর্শনান্ দেখ্যন তারায়ো নেই। মুই প্রভু লগেপ্রভু এ কধাগান কঙর্।’”

¹⁷ সে পরেদি লগেপ্রভু মরে কলঅ, ও মান্‌জ্যর্ পুয়োবো, তঅ জাদর্ যে মিলেগুনে ভাববাদী ইজেবে নিজোরে মনেমনজক্কা কধা কন্ ইক্কিনে তুই তারা বিরুদ্ধে থিয়্যে। তুই তারা বিরুদ্ধে এ কধানি কঅ,

¹⁸ প্রভু লগেপ্রভু কোইয়্যেদে, অভিশাব্ পোজ্যে মিলেগুন! তুমি দঅ মান্‌জ্য আঢত্ তাবিজ আর মাঢাগুন নাঢিবাত্তে নানান্ বাবোত্যে কাবড় বানঅ যেনে তুমি সেই মানুচ্চুনোরে বশ্ গুরি পার। তুমি কি মঅ মানুচ্চুনোর পরাণানি শিগের্ গরর্ আর নিজো পরাণানি রোক্ষ্যে গরর্?

¹⁹ কয়েক্ মুঠ্ কেচ্‌বিজি আর কয়েক কট্টা রুটিত্তে তুমি মঅ মানুচ্চুনো মুজুঙোত্ মরে অসর্মান গোজ্য। মঅ মানুচ্চুন, যিগুনে মিজে কধা শুনোন্, তুমি তারা ইধু মিজে কধা কোইনে যিগুনে মুরিবার নয় তারারে মারে ফেল্য আর যিগুনে বাঁজিবার নয় তারারে বাঁজেই রাগেয়ো।

²⁰ “‘সেনত্তে মুই প্রভু লগেপ্রভু কঙর্, তুমি যে তাবিজ্ দিইনে পেগো ধোক্ক্যেন্‌গুরি মানুচ্চুনোরে ধর মুই সিয়েনর বিপক্ষে। তমা আঢত্তুন্ মুই সিয়েনি ছিনি ফেলেই দিম। পেগো ধোক্ক্যেন্‌গুরি যে মানুচ্চুনোরে তুমি ধর তারারে মুই ইরি দিম্।

²¹ তমা মাঢাগুন নাঢিবার কাবড়ানি মুই ফাদিনে তমা আঢত্তুন্ মঅ মানুচ্চুনোরে উদ্ধোর্ গুরিম; তারা আর তমা আঢত্ শিগের ধোক্ক্যেন্ ধরা ন-পড়িবাক্। সেক্কে তুমি হবর্ পেবা যে, মুয়ই লগেপ্রভু।

²² যে গম্ মানুচ্চুনোরে মুই দুঘ্ ন-দুয়োং, মিজে কধা কোইনে তুমি তারারে আশানেইয়্যে ন গোজ্য আর পাজি মানুচ্চুনোরে তুমি উচ্চোমি দুয়ো যেনে তারা পরাণানি বাজেবাত্তে ভান্ন্যেই পধত্তুন্ ন-ফিরোন্।

²³ সেনত্তে তুমি আর মিজে দর্শন ন-দেগেবা বা গোণা-পড়ায়ো ন-গুরিবা। তমা আঢত্তুন্ মুই মঅ মানুচ্চুনোরে উদ্ধোর গুরিম। সেক্কে তুমি হবর্ পেবা যে, মুয়ই লগেপ্রভু।’”