যিহিষ্কেল 10 - Chakma Bibleলগেপ্রভুর মহিমাগানে উবোসনা-ঘর ছাড়িলো 1 সে পরেদি মুই রিনি চেলুং, আর করূব্পুনোরে মাঢা উগুরেদি যিয়েনি বিজেয়্যে এলঅ সিয়েন উগুরে নীলকান্তমণির সিংহাসন ধোক্ক্যেন কিজু এক্কান দেগিলুং। 2 লগেপ্রভু মসীনার কাবড় উজ্যে মানুচ্চোরে কলঅ, “করূব্পুনোর তলে যে চাক্কাগুন আগন্ তুই সিগুনো ভিদিরে যাহ্। সে করূব্পুনোর সংমোধ্যেত্তুন্ তুই দ্বিআঢে ভুরিনে জোল্জোল্যে আঙারা লোইনে শঅর উগুরে ছিদি দে।” মঅ চোগো মুজুঙোত্ মানুচ্চো সিয়েনত্ সোমেল। 3 সেক্কে করূব্পুনে উবোসনা ঘরর্ দোগিণেদি থিয়্যেই এলাক্, আর ভিদিরে উদোনান্ মেঘে ভুরি গেলঅ। 4 সে অক্তত্ লগেপ্রভুর মহিমাগান্ করূব্পুনো উগুরেত্তুন উদিনে উবোসনা-ঘরর্ ফ্রেমানি ইন্দি গেলঅ। উবোসনা ঘরান্ মেঘ্কোই ভুরি গেলঅ, আর সেক্কে লগেপ্রভুর মহিমাগানর্ পহ্রে উদোনান্ ভরা এলঅ। 5 করূব্পুনোর ডুয়োগানির রঅ বারেদি উদোন সং শুনো যার্; সেই রবো এলদে বেগত্তুন্ খেমতাবলা লগেপ্রভুর কধা কবার্ রঅ ধোক্ক্যেন। 6 লগেপ্রভু যেক্কে মসীনার কাবড় উজ্যে মানুচ্চোরে এ উগুমান দিলো, “তুই করূব্পুনোর সংমোধ্যে চাক্কাবোত্তুন্ আগুন নেযা,” সেক্কে মানুচ্চো ভিদিরে যেইনে এক্কো চাক্কার্ কায়-কুরে থিয়্যেল। 7-8 করূব্পুনোর ডুয়োগানির তলাত্ মান্জ্য আঢ ধোক্ক্যেন কিজু এলঅ, সেনত্তে করূব্পুনোর একজনে তারা সংমোধ্যে আগুনো ইন্দি আঢ্ বাড়েল। তে কিজু আগুন নিইনে সেই মসীনার কাবড় উজ্যে মানুচ্চো আঢত্ দিলো। তে সিয়েনিলোই নিগিলি গেলঅ। 9 পরেদি মুই রিনি চেইনে করূব্পুনোরে পত্তিজনর কায়-কুরে এক্কো গুরি বেক্কুনে চের্বো চাক্কা দেগিলুং; চাক্কাগুন বৈদুর্যমণি ধোক্ক্যেন ঝোক্ঝোক্যে গরের্। 10 সেই চের্বো চাক্কা রিনি চাদে এক বাবোত্যে এলাক্; এক্কো চাক্কা ভিদিরে যেন আর এক্কো চাক্কা। 11 ঘুরিবার সময় সেই চাক্কাগুন চেরোকিত্তে যে কনঅ ইন্দি সোজা ঘুরিদাক্; অন্য কনঅ কিত্তেদি ন-ফিরিদাক্। করূব্পুনো মাঢাগুন্ যিন্দি থেদাক্ তারা সিন্দি ঘুরিদাক্; ঘুরিবার সময় ন-ফিরিদাক্। 12 তারার্ চের্বো চাক্কাত্, গোদা কিয়্যেত্, পিদোত্, আঢত্ আর ডুয়োনির চেরোকিত্তে চোগে ভরা এলঅ। 13 মুই শুনিলুং চাক্কাগুনোরে “ঘুরেদে চাক্কা” বিলি ডাগা অর্। 14 পত্তি করূবোর চেরান্ গুরি মু এলঅ-পৌইল্যাবো করূবোর, দ্বিলম্বরবো মান্জ্যর, তিন লম্বরবো সিংহর আর চের্লম্বরবো ঈগল পেগোর্। 15 পরেদি সেই করূব্পুনে উগুরেদি উদিলাক্। ইগুনে সেই জেদা প্রাণী যিগুনোরে মুই কবার গাঙ পারত্ দেখ্যং। 16 করূব্পুনে গেলে তারার্ কায়-কুরে চাক্কাগুনো যেদাক্; করূব্পুনে মাদিত্তুন্ উগুরে উদিবাত্তে ডুয়ো মিলিলে চাক্কাগুন তারার্ কায়-কুরেত্তুন ন-যেদাক্। 17 করূব্পুনে থামেলে সিগুনো থামেদাক্ আর করূব্পুনে উদিলে তারা সমারে চাক্কাগুনো উদিদাক্, কিত্যে সেই জেদা পরাণবলাগুনোর আত্মাগানি সিগুনো ভিদিরে এলঅ। 18 সে পরেদি লগেপ্রভুর মহিমাগান্ লগেপ্রভুর ঘরর ফ্রেমানি উগুরেত্তুন্ যেইনে করূব্পুনো উগুরে থামেল। 19 মঅ চোগো মুজুঙোত্ করূব্পুনে ডুয়ো মিলি দিইনে মাদিত্তুন্ উগুরে উদো ধুরিলাক্, আর চাক্কাগুনো তারা সমারে যা ধুরিলাক্। তারা লগেপ্রভুর ঘরর্ পূগেদি গেদোত্ সোমেবার পদথ্ যেইনে থামেলাক্; ইস্রায়েলর গোজেনর মহিমাগান্ তারা উগুরে রলঅ। 20 এই জেদা পরাণবলাগুনোরে মুই কবার গাঙ পারত্ ইস্রায়েলর গোজেন সিংহাসনত্ তলে দেখ্যং, আর তারা যে করূব সিয়েন মুই বুঝি পারিলুং। 21 পত্তিজনর চেরান্ গুরি মু আর চেরান্ গুরি ডুয়ো এলঅ আর তারার্ ডুয়োগানি তলে মান্জ্য আঢ ধোক্ক্যেন কিজু এলঅ। 22 কবার গাঙ পারত্ মুই যেবাবোত্যে দেখ্যং তারার্ মুয়ো চেঙেরানি সেবাবোত্যে এলঅ। তারা পত্তিজনে সোজা মুজুঙেদি যেদাক্। |
Copyright © 2021 Bangladesh Bible Society
Bangladesh Bible Society