যাত্রা 9 - Chakma Bibleমিসর উগুরে পাচ্ লম্বর্ আঘাত-য়েমান পিড়ের্ ভানা 1 ইয়েন পরেদি লগেপ্রভু মোশিরে কলঅ, “ফরৌণ ইধু যেইনে কগোই, ইব্রীয়গুনোর গোজেন লগেপ্রভু কত্তে, ‘মর্ উবোসনা গুরিবাত্যে মঅ মানুচ্চুনোরে যেবাত্তে দে। 2 মাত্তর্ সিগুনোরে ইরি ন-দিইনে যুদি তুই তারারে ধুরি রাগাচ্, 3 সেক্কে মাদত্ তর্ ঘোড়া, গাধা, উট, গরু, ভেড়াছাগল, ছাগল, এক্ কধায় তর্ বেক্ য়েমানপালুনো উগুরে মুই যাদিমাদি নিজো আঢ্তোই অমকদগুরি পীড়ের ভানা বেবস্তা গুরিম। 4 মাত্তর্ মুই ইস্রায়েলীয়গুনোর য়েমান পালুনোরে মিসরীয়গুনোর য়েমান পালত্তুন্ যুদো গুরি চেম্। তারার্ যিদুক্কুন্ য়েমান আগন্ সিগুন এক্কোয়ো ন-মুরিবাক্।’ ” 5 পীড়ের্ ভানাগান কক্কে অবঅ সিয়েনঅ লগেপ্রভু ঠিগ্ গুরিলো। তে কলঅ, “এযেত্যে কেল্যে এ দেজ্ছান উগুরে মুই ইয়েন্ ঘোদেম্।” 6 তার্ কেল্যে লগেপ্রভু সিয়েন গুরিলো। সেক্কে মিসরীয়গুনোর্ বেক্ য়েমানুন্ মুরি গেলাক্, মাত্তর্ ইস্রায়েলীয়গুনো পালত্তুন্ এক্কো য়েমান্অ ন-মুরিলাক্। 7 ফরৌণে মানুচ্ পাধেইনে হবর্ নিইনে জানি পারিলো, ইস্রায়েলীয়গুনোর্ এক্কো য়েমান্অ ন-মরন্। তো ফরৌণ মনান্ দরঅ ওই রলঅ; তে মানুচ্চুনোরে যেবাত্তে ন-দিলো। মিসর উগুরে ছয় লম্বর্ আঘাত-ফোড়া 8 সে পরেদি লগেপ্রভু মোশি আর হারোণরে কলঅ, “চুলোত্তুন্ তুমি কয়েক মুঠ্ কালি নেযঅ। ফরৌণ চোগো মুজুঙোত্ মোশি সিয়েনি আগাজ মোক্ক্যে উড়েই দোক্। 9 সিয়েনি পাদল্ ধূল্যে ধোক্ক্যেন ওইনে গোদা মিসর্ দেজত্ লামি এবঅ। সেক্কে গোদা মিসর্ দেজ মানুচ্চুনোর আর য়েমানুনো কিয়্যেত্ ফোড়া উদিনে ঘা ওই যেবঅ।” 10 সেক্কে মোশি আর হারোণে চুলোত্তুন্ কালি নেযেইনে ফরৌণ মুজুঙোত্ ঠিয়্যেলাক্। মোশি সিয়েনি আগাজ মোক্ক্যে ইরি দেনার পরেদি মান্জ্যর আর য়েমান কিয়্যেত্ ফোড়া উদিনে ঘা ওই গেলঅ। 11 যাদু গুরিয়্যেগুনে মোশি মুজুঙোত্ ঠিয়্যেই ন-পারিলাক্, কিত্তে অন্য মিসরীয়গুনো ধোক্ক্যেন তারার্অ ফোড়া ওইয়োন্। 12 মাত্তর্ লগেপ্রভু ফরৌণ মনান্ দরঅ গুরি দিলো। সেক্কে লগেপ্রভু যিয়েনি কোইয়্যে সিয়েনি অলঅ। মোশি আর হারোণ কধা ফরৌণে ন-শুনিলো। মিসর উগুরে সাত লম্বর্ আঘাত-শিলো-ঝর্ 13 সেক্কে লগেপ্রভু মোশিরে কলঅ, “তুই বেন্যেপোত্যে উদিনে ফরৌণ মুজুঙোত্ যেইনে থিয়্যেবেগোই, আর তারে কবেদে, ইব্রীয়গুনোর গোজেন লগেপ্রভু কোইয়্যেদে, ‘মর্ উবোসনা গুরিবাত্যে মঅ মানুচ্চুনোরে যেবাত্তে দে, 14 ইয়েন পরেদি তমা উগুরে আর তমা কামগুরিয়েগুন্ আর মানুচ্চুনো উগুরে মুই মর্ নানান বাবোত্যে আঘাত পাধেই দিম। সেক্কে তুই বুঝি পারিবেদে, গোদা পিত্থিমীয়ানত্ মঅ ধোক্ক্যেন কনঅ জন নেই। 15 ইয়েন ভিদিরে মুই মঅ বলান্ বেবহার্ গুরিনে তর্ আর তঅ মানুচ্চুনো উগুরে এন্ এক্কান্ পীড়ের ভানা বেবস্থা গুরি পাত্তুং যেনে তুমি পিত্থিমীয়ানত্তুন্ শেজ্ ওই যেদাগোই। 16 মাত্তর্ মুই তরে বাজেই রাগেয়োং যেনে তরে মঅ বলান্ দেগেই পারং আর গোদা পিত্থিমীত্ যেন মঅ নাঙান্ ফগদাঙ্ অয়। 17 তুই এজঅ মঅ মানুচ্চুনো বিরুদ্ধে নিজোরে অদে অদে রাগেয়োচ্ আর তারারে যেবাত্তে ন-দুয়োর্। 18 সেনত্যে এযেত্যেকেল্যে ঠিগ্ এ সময়োত্ মুই এন্ এক্কান অমকদ শিল্ পড়েদে-ঝর পাধেই দিম্ যিয়েন মিসর দেজর্ পৌইল্যাত্তুন্ ধুরি এজঅ সং আর কনদিন্অ ন-অয়। 19 ইয়েনত্যে মাদঠ্ তর্ যিদুক্কুন্ য়েমান আর মানুচ্ আগন্, মানুচ্ পাধেইনে তারারে আশ্রয় নেযেবার্ জাগাত্ আন্দোই। কনঅ মানুচ্ বা য়েমান্ ঘরত্ ন-এইনে যুদি মাদঠ্ থেই যান্ সালে শিল্ পড়িনে তারা মুরি যেবাক্।’ ” 20 সেক্কে ফরৌণর কাম্ গুরিয়্যেগুনো ভিদিরে যিগুনে লগেপ্রভুর্ কধালোই দোরেয়োন্ তারা যাদিমাদি তারার্ চাগরুনোরে আর য়েমানুনোরে ঘরত্ আনিলাক্। 21 মাত্তর্ যিগুনে সিয়েন্ ন-শুনিলাক্ তারা তারার্ চাগরুনোরে আর য়েমান পালুনোরে মাদঠ্ রাগেলাক্। 22 পরেদি লগেপ্রভু মোশিরে কলঅ, “আগাজ কিত্তেদি তঅ আত্তান্ বাবেই দে। সেক্কে গোদা মিসর্ দেজ মানুচ্চুনো উগুরে, য়েমান আর গাছ-পালাগুনো উগুরে শিল্ পড়িবাক্।” 23 সেক্কে মোশি আগাজ কিত্তেদি তা লুদিক্কো উজু গুরি ধুরিলো। সিয়েন্দোই লগেপ্রভু এমন্ গুরিলো যিয়েনত্যে মেঘ গুজুরি উদিলো আর শিল পড়েদে-ঝড় পড়া ধুরিলো আর মাদি উগুরে থাদাল্ (পেরাক্) পড়া ধুরিলো। এধোক্ক্যেন গুরিনে লগেপ্রভু মিসর দেজ্ছান উগুরে শিলো-ঝড় পাদেল। 24 বানা যে শিল্ পড়িলাক্ সিয়েন নয়, তা লগে লগে নিত্য ঝিমিলেনি এলঅ। মিসর্ দেজর্ পোইল্যাত্তুন্ ধুরি এজঅ সং গোদা দেজছানত্ এধোক্ক্যেনগুরি জদবদে ঝড় আর্ কনদিন্অ ন-অয়। 25 মিসর্ দেজ মাঠ্তুনোত্ যিদুক্কুন্ মানুচ্ আর য়েমান এলাক্ শিলুনে তারারে কনজনরে রেহাই ন-দিলো। শিলুন্ পড়িনে মাদর্ বেক্ ক্ষেত্-ক্ষেত্তিগানি বর্বাদ্ ওই গেলঅ আর গাজ ডেলাগুন্ ভাঙি পড়িলাক্। 26 মাত্তর্ ইস্রায়েলীয়গুনে যিয়েনত্ থেদাক্ সে গোশন চাগালানত্ শিল্ ন-পড়িলাক্। 27 ফরৌণে সেক্কে মোশি আর হারোণরে ডাগি আনিনে কলঅ, “এবেরা মুই পাপ কাম গোজ্যং। লগেপ্রভু ঠিগ্ কামান্ গোজ্যে। মুই আর মঅ মানুচ্চুনে দুষী। 28 তুই লগেপ্রভু ইধু কোজোলী গর্। আগাজ বাজ্ আর শিল্ পড়ানা জদবদে ওইয়্যে। এবেরা মুই তমারে যেবাত্তে দিম। ইধু আর তমাত্তুন্ থাহ্ ন-পড়িবো।” 29 মোশি তারে কলঅ, “শঅরত্তুন্ নিগিলি যেইনে মুই লগেপ্রভু ইধু আত্তানি মিলিনে তবনা গুরিম। সেক্কে আগাজ বাজঅ থামেব, শিল আর্ ন-পড়িবাক্। ইয়েন্দোই তুই বুঝি পারিবেদে, পিত্থিমীগান্ লগেপ্রভুর। 30 মাত্তর্ মুই হবর্ পাং, তুই আর তঅ কাম্ গুরিয়্যেগুনে লগেপ্রভু গোজেনরে এজঅ ন-দোরান্।” 31 শিলো-ঝড়ত্তে মিসরর্ বেক্ মসীনা আর কেজ্ বিজিগুন্ এক্কুবারে বর্বাদ্ ওই যেইয়োন্। সে সময়োত্ কেজ্ বিজির শিজেগুন নিগিল্যন্ আর মসীনা গাজত্ ফুল্ ধোজ্যন্, 32 মাত্তর্ বোলী আর মরা মরা গমুন্ কনবো বর্বাদ্ ন-যান কিত্তে সেক্কেয়ো সিগুন্ পাগিবার্ সময় ন-অন্। 33 ইয়েন পরেদি মোশি ফরৌণ ইত্তুন্ গেলগোই। শঅরত্তুন্ নিগিলিনে তে লগেপ্রভু ইধু আঢ্তানি মিলিনে তবনা গুরিলো। সেক্কে আগাজ বাজ্ পড়ানা আর শিল্ পড়ানা থামেল। মাদি উগুরে ঝড় পড়ানায়ো থামেল। 34 মাত্তর্ ফরৌণে আর তা কাম্গুরিয়্যেগুনে যেক্কে দেগিলাক্, ঝড়, শিল্ আর আগাজ বাজ্ পড়ানা বন্ধ ওই যেইয়্যে সেক্কে তারা আরঅ পাপ কাম গরা ধুরিলাক্। তারা আরঅ তারার্ মনানি দর-মর গুরিলাক্। 35 লগেপ্রভু মোশিরে দিইনে যিয়েনি কোইয়্যে সেবাবোত্যে ফরৌণ মনান্ দরঅ ওই রোইয়্যে; তে ইস্রায়েলীয়গুনোরে যেবাত্তে ন-দিলো। |
Copyright © 2021 Bangladesh Bible Society
Bangladesh Bible Society