যাত্রা 7 - Chakma Bible1 সেক্কে লগেপ্রভু মোশিরে কলঅ, “চাহ্, ফরৌণ ইধু মুই তরে গোজেন ধোক্ক্যেন গুরিম, আর তর্ ভেই হারোণে অবঅ তর্ ভাববাদী। 2 মুই তরে যেদক্কানি উগুম্ দোঙর্ সিয়েনি বেক্কানি তুই ফগদাঙ্ গুরিবে। তর্ ভেই হারোণ ফরৌণরে কবঅ, যেনে তে তা দেজত্তুন্ ইস্রায়েলীয়গুনোরে যেবাত্তে দে। 3-4 মাত্তর্ মুই ফরৌণ মনান্ একবাবোত্যে গুরি দিম যেনে মুই মিসর দেজত্ ভালক্কানি চিহ্নো দেগেই পারঙ্ আর আমক্ অবার কাম্ গুরি পারঙ্। তে কনবাবদে তমা কধা ন-শুনিবো। সেনত্যে মুই মিসর্ দেজ উগুরে আঢ্ দিম আর অমকদ সাজা-দিইনে মুই মঅ সৈন্যগুনোরে, অত্তাৎ মঅ মানুচ্ ইস্রায়েলীয়গুনোরে সে দেজত্তুন্ নিগিলেই আনিম। 5 মুই যেক্কে মঅ বলান্ দেগেইনে মিসর্ দেজ ভিদিরেত্তুন্ ইস্রায়েলীয়গুনোরে নিগিলেই আনিম সেক্কে মিসরীয়গুনে বুঝি পারিবাক্, মুই লগেপ্রভু।” 6 লগেপ্রভু মোশি আর হারোণরে যেধোক্ক্যেন উগুম দিয়্যে তারা ঠিগ্ সেধোক্ক্যেন গুরিলাক্। 7 ফরৌণ লগে কধা কবার্ সময়োত্ মোশির্ বয়জ্ আশি বজর আর হারোণর তিরেশি। হারোণ লুদিক্ 8 লগেপ্রভু মোশি আর হারোণরে আরঅ কলঅ, 9 “ফরৌণে যেক্কে তমারে কনঅ আমক্ অইদে কাম্ গুরি দেগেবাত্তে কবঅ, সেক্কে তুই হারৌণরে কবে, ‘ফরৌণ মুজুঙোত্ তঅ লুদিক্কো ফেলা,’ আর সেক্কে সিবে সাপ ওই যেবঅ।” 10 লগেপ্রভু তারারে যিয়েন কোইয়্যে মোশি আর হারোণে ফরৌণ ইধু যেইনে ঠিগ্ সিয়েন গুরিলাক্। হারোণে তা লুদিক্কো ফরৌণ আর তার্ কাম্গুরিয়্যেগুনো মুজুঙোত্ ফেলেল, আর সিবে সাপ ওই গেলঅ। 11 ফরৌণে সেক্কে জ্ঞানীগুনোরে আন মাত্তলে ধরেদে বাবোত্যে জিনিস কামত্ লাগেই পারন্দে মানুচ্চুনোরে, অত্তাৎ যাদু পারিয়্যেগুনোরে ডাগিলো। তারায়ো তারার যাদুমন্ত্রলোই একই কাম গুরিলাক্। 12 তারা পত্তিজনে তারার লুদিক্কুন্ মাদিত্ ফেলেলাক আর সিগুন্ সাপ ওই গেলাক্, মাত্তর্ হারোণ লুদিক্কো তারার লুদিক্কুনোরে গিলি ফেলেল। 13 মাত্তর্ লগেপ্রভু তারারে যিয়েনি কোইয়্যে সিয়েন অলঅ। ফরৌণ মনান্ দরঅ ওই রলঅ; তে মোশি আর হারোণ কধা ন-শুনিলো। মিসর উগুরে পত্তম আঘাত-লো 14 সেক্কে লগেপ্রভু মোশিরে কলঅ, “ফরৌণ মনান্ দরঅ ওই আঘে, সেনত্যে তে মানুচ্চুনোরে যেবাত্তে ন-দের্। 15 কেল্যে বেন্যে ফরৌণে যেক্কে বারেদি গাঙ ঘাদত্ যেবঅ, সেক্কে তুই তা সমারে দেগা গুরিবাত্যে গাঙ পারত্ থিয়্যেই থেচ্। যে লুদিক্কো সাপ ওই যেইয়্যে সিবেয়ো আঢত্ রাগেচ্। 16 তারে কবে, ‘ইব্রীয়গুনোর্ গোজেন লগেপ্রভু মরে এ কধাগান্ কবাত্তে ত’ইধু পাদেয়্যে, তা মানুচ্চুনে যেনে ধূল্যেচর-চাগালাত্ তারে উবোসনা গুরি পারন সেনত্যে তুই যেন তারারে যেবাত্তে দুয়োচ্। মাত্তর্ তুই তা কধালোই এবঅ সং ন শুনোচ্। 17 সেনত্যে লগেপ্রভু কত্তে, তেয়ই যে লগেপ্রভু সিয়েন্ তুই এ চিহ্নোগান্ দেগিনে বুঝি পারিবে। তুই কবে, ‘মুই ইক্কিনে মর্ আঢঅ এ লুদিক্কো গাঙ পানিত্ আঘাত্ গুরিবাত্তে যাঙর্ আর সিবেলোই গাঙ পানিগান্ লো ওই যেবঅ। 18 ইবেলোই বেক্ মাছ্চুন্ মুরিবাক্ আর এন্ পজাবাজ্ নিগিলিবো, পানি হেবাত্তে যেইনে মিসরীয়গুনে ঘিনেইনে মুয়োন্ ফিরেবাক্।’ ” 19 পরেদি লগেপ্রভু মোশিরে কলঅ, “হারোণরে কঅ যেনে তে তা লুদিক্কো আঢত্ লয় আর মিসরর বেক্ গাঙানি, ছড়ানি, পোরুন্ আর থুবেই রাগেয়্যে পানিগানিত্ তা আঢ্তান্ বাবেইনে ঘুরেই আনে। সেক্কে বেক্ পানিগান্ লো ওই যেবঅ। মিসর দেজ বেক্ জাগানি ইধু লো দেগা যেবঅ; এন্ কি, গাজ্সোই বানেয়্যে আর পাত্তর ছাড়িত্ থোইয়্যে পানিয়ো বাদ ন-যেবঅ।” 20 মোশি আর হারোণে লগেপ্রভুর্ উগুম মজিম বেক্কানি গুরিলাক্। ফরৌণ আর তা কাম্গুরিয়েগুনো মুজুঙোত্ হারোণে তা লুদিক্কো তুলিনে গাঙ পানিত্ আঘাত্ গুরিলো। সেক্কে গাঙর্ বেক্ পানিগান লো ওই গেলঅ। 21 গাঙ মাছ্চুন্ বেক্কুন্ মুরি যেইনে এন্ পজাবাজ্ অলঅ, মিসরীয়গুনে সে পানিগান্ হেই ন-পারিলাক্। মিসর্ দেজর্ বেক্ জাগানিত্ লো দেগা গেলঅ। 22 সেক্কে মিসরীয় যাদু পারিয়্যেগুনে তারার্ যাদুমন্ত্রলোই একই কাম্ গুরিলাক্। সেনত্যে ফরৌণ মনান্ আরঅ চিৎনপুজ্যে ওই উদিলো। লগেপ্রভু যিয়েনি কোইয়্যে সিয়েন অলঅ; মোশি আর হারোণর্ কধা ফরৌণে ন-শুনিলো, 23 মাত্তর্ তে পিজেন্দি ফিরিনে নিজো ঘরত্ যেইনে সোমেল। তে সিন্দি খিয়েল্অ ন-গুরিলো। 24 গাঙ পানিগান্ হেই ন-পারে দেগিনে মিসরীয়গুনে পানিত্যে গাঙ কায়-কুরে মাদি খুড়িলাক্। 25 নীল গাঙ উগুরে লগেপ্রভুর্ এ আঘাত্থান্ লামি এজানার্ পরেদি সাত্ দিন্ বিদি গেলঅ। |
Copyright © 2021 Bangladesh Bible Society
Bangladesh Bible Society