যাত্রা 5 - Chakma Bibleফরৌণ মুজুঙোত্ মোশি আর হারোণে 1 পরেদি মোশি আর হারোণে যেইনে ফরৌণরে কলাক্, “লগেপ্রভু, যিবে ইস্রায়েলীয়গুনোর্ গোজেন, তে কোইয়্যেদে, মঅ মানুচ্চুনে যেনে ধূল্যেচর-চাগালাত্ যেইনে মঅ নাঙে এক্কো মেইত্বান গুরি পারন সেনত্যে তারারে যেবাত্তে দে। ” 2 মাত্তর্ ফরৌণে কলঅ, “কন্না আরঅ এই লগেপ্রভু, মুই যে তা উগুম্ মানিনে ইস্রায়েলীয়গুনোরে যেবাত্তে দিম? এই লগেপ্রভুরেয়ো মুই ন-চিনোং আর ইস্রায়েলীয়গুনোরেয়ো মুই যেবাত্তে ন-দিম।” 3 সেক্কে তারা কলাক্, “ইব্রীয়গুনোর্ গোজেন আমা লগে দেগা দিয়্যে। সেনত্যে তুই দোয়্যে গুরি আমারে যেবাত্তে দে যেনে আমি ধূল্যেচর-চাগালাত্ তিন দিনো পথ যেইনে আমা গোজেন লগেপ্রভু নাঙে য়েমান উৎসর্ব গুরি পারিই। সিয়ান ন-গুরিলে তে দগে নঅলে কনঅ মরন পীড়েলোই বা যুদ্ধোর্ মাধ্যমে আমা উগুরে সাজা-আনিবো।” 4 জোবত্ মিসর রাজাবো তারারে কলঅ, “মোশি আর হারোণ, তুমি কামানিত্তুন্ মানুচ্চুনোর্ মনানি ভাঙি দুয়োর্ কিত্তে? যঅ, তুমি কামত্ ফিরি যঅ। 5 চঅ, দেজত্ তমা মানুচ্চুন ইক্কিনে বোউত্ ওইয়োন, আর তমাত্ত্যে তারা কামানি থামেই দেদন্।” 6 ফরৌণে সেদিন্যে চাগরুনো উগুরে কাম দিয়্যে অত্যেচারী সদ্দারুনোরে আর ইস্রায়েলীয় পরিচালক্কুনোরে এ উগুমান্ দিলো, 7 “ইট বানেইয়্যে মানুচ্চুনোরে তুমি আর দার্বো ন-দিবা। তারা নিজেই নিজো দার্বো থোগেই নেযেবাক্। 8 মাত্তর্ যুনিয়ো তারা আগে যিদুক্কুন্ ইট বানেদাক্ ঠিগ্ সিদুক্কুন তুমি তারাত্তুন্ গুণি লবা, এক্কোয়ো ন-কোমেবা। মানুচ্চুন্ আল্সি বিলিনে তারা যেইনে তারা গোজেন নাঙে য়েমান্ উৎসর্ব গুরিবার্ কধানিলোই রঅ ছারদন্। 9 তুমি তারা উগুরে আরঅ জদবদে কাম্ চাপি দুয়ো, যেনে মিজে কধালোই কান্ ন-পাদিনে তারা কামত্ মুদ্ধুবি থান।” 10 সেক্কে চাগরুনো উগুরে কাম্-দিয়্যে অত্যেচারী সদ্দারুনে আর ইস্রায়েলীয় পরিচালক্কুনে বারেদি যেইনে মানুচ্চুনোরে কলাক্, “ফরৌণে কত্তে, তে আর্ তমারে দার্বো যুগেই ন-দিবো। 11 তুমি যিয়েনত্ পঅ সিয়েনত্তুন্ দার্বো তোগেই নিবা। মাত্তর্ সেক্কে তমা কামানি এক্কেনায়ো কোমেই দিয়া ন-অবঅ।” 12 সেনত্যে মানুচ্চুনে দার্বো বদলে নাড়া তোগেবাত্তে মিসর্ দেজর্ বেক্ জাগানিত্ ছিদি পড়িলাক্। 13 সেই সদ্দারুনে তারারে ধাবেই দিইনে কুয়া ধুরিলাক্, “আগেদি দার্বো দিবার অক্তত্ তুমি একদিনে যিদুক্কুন্ ইট বানেদা ইক্কিনিয়ো তমাত্তুন্ ঠিগ্ সিদুক্কুন বানেই দিয়া পড়িবো।” 14 পরেদি একদিনোত্ ফরৌণর সেই সদ্দারুনে তারার্ কাম দিয়্যে ইস্রায়েলীয় পরিচালক্কুনোরে পিদিনে কলাক্, “যিদুক্কুন ইট দিনপত্তি তমার্ বানেবার্ কধা তুমি আগঅ ধোক্ক্যেন সিদুক্কুন্ ন-গরর্ কিত্তে? তুমি এচ্ছ্যেয়ো সিয়েন ন-গরঅ আর তা আগঅ দিন্নোত্অ ন-গরঅ।” 15 সেক্কে ইস্রায়েলীয় পরিচালক্কুনে ফরৌণ ইধু যেইনে কানা-কুদি গুরিনে কলাক্, “তঅ চাগরুনো লগে তুই ইয়েনি কেধোক্ক্যেন বেবহার্ গরর্? 16 কনঅ দার্বো আমারে দিয়্যে ন-অর্, অদচ সদ্দারুনে আমারে ইট বানেবাত্যে কন্। আর চাহ্, তঅ চাগরুনোরে মারপিট্ গরা অর্, মাত্তর্ দুষ্সান্ তঅ নিজো মানুচ্চুনোর্।” 17 জোবত্ ফরৌণে তারারে কলঅ, “তুমি আল্সি, এদক্ কি আল্সি। সেনত্যে তুমি কত্তে, ‘লগেপ্রভুর্ নাঙে য়েমান্ উৎসর্ব গুরিবাত্তে আমারে যেবাত্তে দে।’ 18 যঅ, যেইনে কাম্ গরঅ। তমারে আর দার্বো দিয়া ন-অবঅ, তো তমার্ যিদুক্কুন্ ইট বানেবার্ কধা সিদুক্কুন্ বানা পড়িবো।” 19 সেক্কে ইস্রায়েলীয় পরিচালক্কুনে বুঝিলাক্, তারা দজাদ্ পোজ্যন্, কিত্তে তারারে কুয়ো ওইয়্যেদে আগে দিনপত্তি তারা যিদুক্কুন্ ইট বানেদাক্ ইক্কিনেয়ো ঠিগ্ সিদুক্কুন্ বানা পড়িবো। 20 তারা ফরৌণ মুজুঙোত্তুন্ নিগিলি এইনে মোশি আর হারোণরে দেগিলাক্। তারা তারাত্যেই বাজ্জে আগন্। 21 পরিচালক্কুনে তারারে কলাক্, লগেপ্রভু যেন তমারে সাজা-দে, কিত্তে ফরৌণে আর তা কাম্গুরিয়্যেগুনো ইধু তুমি আমারে একবাবোত্যে ঈচ্ গরেদে ধোক্ক্যেন গোজ্য, আর সেনে আমারে মারে ফেলেবার্ তলোয়ারানি তারা আঢত্ তুলি দুয়োন্। মোশির আবিলেচ্ হানা আর গোজেনর আজা দেনা 22 সেক্কে মোশি ফিরি যেইনে লগেপ্রভুরে কলঅ, “ও প্রভু, এ জাদ্তোরে কিত্যে তুই দুগোত্ ফেলেয়োচ্? কিত্যে বা তুই মরে পাদেয়োচ্? 23 তঅ নাঙে ফরৌণ ইধু কধা কনার্ পরেত্তুন্ ধুরি এ মানুচ্চুনো উগুরে দজা লামি এচ্চ্যে। কক্কে তুই তঅ মানুচ্চুনোরে রোক্ষে গুরিলে?” |
Copyright © 2021 Bangladesh Bible Society
Bangladesh Bible Society