যাত্রা 36 - Chakma Bible1 “সেনত্তে কেধোক্ক্যেনগুরি এই পবিত্র তাম্বুল-ঘরান্ বানা পুরিবো সিয়েন্ বুঝিবাত্তেই লগেপ্রভু বৎসলেলরে, অহলীয়াবরে আর অন্য যিদুক্কুন্ কালিগররে জ্ঞান আর বুদ্ধি দুয়োন্ তারা যেনে লগেপ্রভুর্ উগুম মজিম্ সেই বেক্ কামানি গরন্।” 2 ইয়েনর্ পরেদি মোশি এই কামানি গুরিবাত্তেই বৎসলেলরে আর অহলীয়াবরে ডাগিলো আর এধোক্ক্যেন বেক্ কাবিল্ কালিগরুনোরে ডাগিলো যিগুনোরে লগেপ্রভু কাম্ গুরিবার্ খেমতা দিয়্যে আর যিগুনে মনত্তুন্ সাড়া পেইয়োন। 3 পবিত্র তাম্বুল-ঘরান্ বানেবাত্তে ইস্রায়েলীয়গুনোর্ আন্যে বেক্ পযাপিরানি তারা মোশিত্তুন্ গুজি ললাক্। মাত্তর্ মানুচ্চুনে পত্তিদিন বেন্যেমাদান্ নিজোর্ আওজ্ মজিম আরঅ জিনিস আনা ধুরিলাক্। 4-5 সিয়েন্ দেগিনেই যিদুক্কুন্ কাবিল্ কালিগরে পবিত্র তাম্বুল-ঘর বানেবার্ কাম্ গরদন্ তারা তারার্ কামানি থামেইনে মোশি ইদু যেইনে কলাক্, “লগেপ্রভুর্ উগুম্ মজিম কাম্ গুরিবাত্তেই যিয়েনি দরকার্ মানুচ্চুনে সিত্তুন্ আরঅ বোউত্ বেশ্ পযাপিরা আনদন্।” 6 সেক্কে মোশির উগুমে তারা ইস্রায়েলীয়গুনোর্ তাম্বুলর বেক্ জাগায়ানিত্ কোই পাদেলাক্, মরদ বা মিলেগুনে কনঅ জনে পবিত্র তাম্বুল-ঘরত্তেই যেনে আর কনঅ পযাপিরা ন-আনন্। সেক্কে মানুচ্চুনে পযাপিরা আনানা বন্ধ গুরিলাক্, 7 কিত্তে যেদক্কানি পযাপিরা তারার জমা ওইয়্যে কামান্ থুম্ গুরিবাত্যেই যিয়েনি লাগিবো সিত্তুনো বেশ্ অলঅ। থেবার্-তাম্বুল 8 যিগুনে কাম্ গোজ্যন্ সিগুনোত্তুন কাবিল্ কালিগরুনে পাগেয়্যে মসীনা সুদো আর য়েল্, বিগুনি আর রাঙা রঙয়র্ সুদোলোই বানেয়্যে দশ কট্টা কাবড় দিইনে থেবার্-তাম্বুলান্ বানেলাক্। কাবিল্ কালিগরলোই সিয়েনি ভিদিরে করূব্পুনোর্ ফোটুগুন্ বুনিলাক্। 9 কট্টাগুন্ বেক্কুন্ এক্কুই মাবে বানা অলঅ-লাম্বান্দি আটেশ্ আত্ আর পাদাজ্যে চের্ আত্। 10 কট্টাগুন্ পাচ্চো পাচ্চো গুরি জোড়া লাগেইনে দ্বিবে দাঙর্ কট্টা বানা অলঅ। 11 পত্তম দাঙর্ কট্টাবোর্ পাদাজ্যে এক কিত্তেন্দি কাজাগান্ ধুরিনে য়েল্ সুদোলোই কুদুক্কুন্ কুঝিক্ বানা অলঅ। দ্বিলম্বর্ দাঙর্ কট্টাবোয়ো ঠিগ্ সেধোক্ক্যেন গরা অলঅ। 12 এবাবোত্যেগুরি পঞ্চাশ্ছুয়ো কুঝিক্ পত্তম দাঙর্ কট্টাবোর্ কাজান্দি আর পঞ্চাশ্ছুয়ো কুঝিক্ দ্বিলম্বর দাঙর্ কট্টাবোর্ কাজাকুরেন্দি বানা অলঅ। এই দ্বিবে দাঙর্ কট্টাবোর্ কুঝিক্কুন্ এক্কো আর এক্কোর্ ঠিগ উগুদোগুরি থেলাক্। 13 সে পরেদি পঞ্চাশছুয়ো সনার্ হেবা বানেইনে সিগুনোরে কুঝিগো ভিদিরে ভোরেইনে সেই দাঙর্ কট্টা দ্বিবেরে আক্সো দিয়্যে অলঅ। সেক্কে দ্বিবে দাঙর্ কট্টালোই এক্কান থেবার্-তাম্বুল অলঅ। 14 থেবার্-তাম্বুল উগুরেগান্ নাঢি দিবাত্তে ছাগলর্ কেশ্ছোই কাবড় ধোক্ক্যেন গুরি এগারগান্ কট্টা বুনি নেযা অলঅ। 15 কট্টাগুন্ এক্কুই মাবর্ গরা অলঅ-ত্রিশ আত্ লাম্বা আর চের্ আত পাদাজ্যে। 16 সিয়োত্তুন্ পাচ্চুয়ো কট্টা একলগে জোড়া দিইনে এক্কো দাঙর্ কট্টা বানা অলঅ। বাগি ছোবুয়ো কট্টা একলগে জোড়া লাগেইনে আর এক্কো দাঙর্ কট্টা বানা অলঅ। 17 পত্তম দাঙর্ কট্টাবোর্ পাদাজ্যে এককিত্তেন্দি কাজাগান্ ইন্দি পঞ্চাশ্ছুয়ো কুঝিক্ বানা অলঅ, আর দ্বিলম্বর্ দাঙর্ কট্টাবোয়ো ঠিগ্ সেধোক্ক্যেন গরা অলঅ। 18 সে পরেদি পিদোল্লোই পঞ্চাশ্ছুয়ো হেবা বানেইনে সে দাঙর্ কট্টা দ্বিবে একলগে আক্সো দিয়্যে অলঅ। সেক্কে দাঙর্ কট্টা দ্বিবে মিজেইনে এক্কান তাম্বুল-ঢাগনি অলঅ। 19 রাঙা রং গোজ্যে ভেড়াছাগলর্ চাম্বোই সিয়েন উগুরেদি ছাল্ বানা অলঅ আর সিয়েন উগুরে ছাল্ দিয়্যে অলঅ ডলপিনোর্ চাম্ দিইনেই। 20 থেবার্-তাম্বুলত্যেই বাব্লা তক্তালোই কদক্কানি উজু ফ্রেম বানা অলঅ। 21 এক এক্কান্ ফ্রেম দশ আত্ লাম্বা আর দেড়্ আত্ পাদাজ্যে গরা অলঅ, 22 আর পত্তি ফ্রেমত্ দ্বিবে গুরি পায়্যে দিয়্যে অলঅ। থেবার্-তাম্বুলর বেক্ ফ্রেমানি এক বাবোত্যে গুরি বানা অলঅ। 23 দোগিণেন্দি কুড়িগান্ ফ্রেম্ বানা অলঅ। 24 সেই ফ্রেমানিত্ পত্তি পায়্যেগুনোর তলে বোজেবাত্তে চোল্লিশ্ছুয়ো রূবোর্ টেং-বদঙ্ বানা অলঅ-পত্তি ফ্রেমত্তে দ্বিবে গুরি, অত্তাৎ পত্তি পায়্যেত্তে এক্কো গুরি। 25-26 থেবার-তাম্বুলর্ অন্য কিত্তেন্দিয়ো, অত্তাৎ উত্তোরেন্দিয়ো কুড়িগান্ ফ্রেম্ আর পত্তি ফ্রেমত্তে দ্বিবে গুরিনে বেক্কুনে চোল্লিশ্ছুয়ো রূবোর টেং-বদঙ্ বানা অলঅ। 27-28 তাম্বুলর্ পোজিমেন্দিয়ো, অত্তাৎ পিজেন্দিত্তে ছগান ফ্রেম আর পিজেন্দি দ্বিকোণাত্তেয়ো আরঅ দ্বিয়েন্ ফ্রেম্ বানা অলঅ। 29 এই ফ্রেম দ্বিয়েনর্ পত্তি দ্বিকোণাত্ দ্বিয়েন ফ্রেম লগে এগত্তর্ গুরিনে তলেত্তুন্ ধুরি উগুরে সং জোড়া দিয়্যে অলঅ। পত্তি কোণাত্ দ্বিয়েন ফ্রেম আর কায়-কুরে ফ্রেমান হেবালোই একলগে জড়া দিয়্যে অলঅ। দ্বিবে কোণা এক বাবোত্যে গরা অলঅ। 30 ইয়েনত্ পিজেদি আস্টোগান্ ফ্রেম আর পত্তি ফ্রেমর্ তলেন্দি দিবাত্তে দ্বিয়েন্ গুরিনে বেক্কানিয়ে ষুলোগান্ রূবোর্ টেং-বদঙ্ বানা অলঅ। 31-32 থেবার-তাম্বুলর্ ফ্রেমানিত্তে বাব্লা তক্তার্ লাগাড়া বানা অলঅ। ইয়েন ভিদিরে পাচ্চুয়ো লাগাড়া অলাক্ এক কিত্তেন্দি ফ্রেমানিত্তে আর পাচ্চুয়ো অন্য কিত্তেন্দি ফ্রেমানিত্তেই আর পাচ্চুয়ো পিজেন্দি, অত্তাৎ পোজিমেন্দি ফ্রেমত্তেই। 33 উগুরে আর তলেন্দি লাগাড়াগুনোত্তেই ভিদিরে লাম্বা লাগাড়াবো ফ্রেমর্ ভিদিরেন্দি দিইনে এ ডাগত্তুন্ উ ডাগন্দি সং গেলঅ। 34 ফ্রেমানি সনালোই বেড়েই দিয়্যে অলঅ আর লাগাড়াগুন্ ভোরেবাত্যেই সনার্ হেবা বানেইনে ফ্রেমানিত্ লাগেই দিয়্যে অলঅ। লাগাড়াগুন্ সনালোই বেড়েই দিয়্যে অলঅ। 35 কালিগরুনে য়েল্, বিগুনি আর রাঙা রংয়র্ সুদো আর পাগেয়্যে মসীনা সুদোলোই এক্কান্ পর্দা বানেলাক্। কাবিল্ কালিগর্লোই সিয়েন উগুরে করূপ্পুনোর্ ফোটুগুন বুনি নেযা অলঅ। 36 সেই পর্দাগানত্তেই চের্বো বাব্লা তক্তার্ খুদো বানা অলঅ আর খুদোগুন্ সনালোই বেড়েই দিয়্যে অলঅ। সেই খুদোগুনোত্তেই কয়েক্কো সনার্ হুক্ বানা অলঅ আর খুদোগুন্ বোজেবাত্তেই চের্বো রূবোর্ টেং-বদঙ্ বানা অলঅ। 37 তাম্বুল দোরানত্তেয়ো সিলেইনে আড়ুক্ বানেয়্যে ধোক্ক্যেন গুরি য়েল্, বিগুনি আর রাঙা রংয়র্ সুদো আর পাগেয়্যে মসীনা সুদোলোই এক্কান্ পর্দা বানা অলঅ। 38 এই পর্দাগানত্তে হুক্ সহ পাচ্চুয়ো খুদো বানা অলঅ। খুদোবোর্ মাদাবো আর তার্ বানেদে-পাত্তান্ সনালোই বেড়েই দিয়্যে অলঅ। খুদোগুন্ বোজেবাত্তে পিদোললোই পাচ্ছুয়ো টেং-বদঙ্ বানেই দিয়্যে অলঅ। |
Copyright © 2021 Bangladesh Bible Society
Bangladesh Bible Society