যাত্রা 33 - Chakma Bible1 সে পরেদি লগেপ্রভু মোশিরে কলঅ, “তর্ যে মানুচ্চুনোরে তুই মিসর দেজত্তুন্ নিগিলেই আন্যচ্ তারারে নেযেইনে তুই এই জাগায়ান্ ছাড়িনে মর্ এগেম্ গোজ্যে দেজত্ যাহ্। সেই দেজ্ছান পৌইদ্যেনে মুই অব্রাহাম, ইস্হাক আর যাকোব ইদু এই এগেমান্ গোজ্যং, মুই তারার্ বংশধরুনোরে সিয়েন্ দিম। 2 মুই তমার আগে আগে এক্কো স্বর্গদূতরে পাদেইনে সেই দেজত্তুন্ কনানীয়, ইমোরীয়, হিত্তীয়, পরিষীয়, হিব্বীয় আর যিবূষীয়গুনোরে ধাবেই দিম্। 3 সিদু দুধ, মধু আর কনঅ কিজুর্ চিদে চজ্জা নেই। মাত্তর্ তুমি এক্কো একবুচ্চ্যে জাদ্ বিলিনে মুই তমা লগে ন-যেম্, গেলে পদথ্ মুই তমারে শেজ্ গুরি দিম্।” 4 এই দজাগানর্ কধা শুনিনে মানুচ্চুনে কানা-কুদি গরা ধুরিলাক্। তারা কনজনে আর কনঅ সনা-রূবো ন-পিনিলাক্, 5 কিত্তে লগেপ্রভু মোশিরে কোইয়্যেদে, “ইস্রায়েলীয়গুনোরে কোইদে, তারা এক্কো একবুচ্চ্যে জাদ্। সেনত্যে যুনি মুই কানক্কন্অ তারা সমারে থাং, সালে মুই তারারে শেজ্ গুরি ফেলেম্। তারার কিয়্যেত্ সনা-রূবো যেদক্কানি আঘে সিয়েনি ইক্কিনে তারা খুলি ফেলাদোক্। সে পরেদি মুই ঠিগ্ গুরিম্ তারারে নিইনে মুই কি গুরিম্।” 6 সেনত্তেই ইস্রায়েলীয়গুনে হোরেব মুড়োবোত্ তারার্ সনা-রূবোনি খুলি ফেলেলাক্; তারা আর কনদিন্অ সিয়েনি ন-পিনোন্। মিলন-তাম্বুল 7 মোশি ইস্রায়েলীয়গুনোর্ তাম্বুলোর্ বারেদি দূরোত্ এক্কান্ বিশেজ্ তাম্বুল বানেল আর সিয়েনরে তে কদঅ “মিলন-তাম্বুল্।” লগেপ্রভু ইত্তুন্ কনজনে কিজু জানিবার্ চেলে তে সেই মিলন-তাম্বুল ইদু যেদঅ। 8 মোশি যেক্কে সেই মিলন-তাম্বুলত্ যেদঅ সেক্কে মানুচ্চুনে নিজোর্ নিজোর্ তাম্বুল দুয়োর মু্জুঙোত্ ঠিয়্যেই থেদাক্ আর তে সেই তাম্বুলোত্ ন-সমানা সং তাইন্দি চেই থেদাক্। 9 মোশি সেই তাম্বুলোত্ সমানার্ পরেদি মেঘঅ চাক্কো লামি এদঅ আর লগেপ্রভু যেদক্কণ মোশি লগে কধা কদঅ সেদক্কণ্ সং সিবে তাম্বুলোর্ দুয়োরান ইদু থেদঅ। 10 মানুচ্চুনে যেক্কে এই চাক্কানরে তাম্বুল দুয়োরান ইদু দেগিদাক্ সেক্কে বেক্কুনে উদিনে নিজোর্ নিজোর্ তাম্বুলো দুয়োরান ইদু মাদিত্ মাদা নিগিরিনে লগেপ্রভুরে ভোক্তি জানেদাক্। 11 মান্জে যেধোক্ক্যেন গুরি মুয়োমি ওইনে সমাজ্যে লগে কধা কন্ লগেপ্রভু ঠিগ্ সেধোক্ক্যেন গুরিই মোশির্ লগে কধা কদঅ। পরেন্দি মোশি ইস্রায়েলীয়গুনোর্ তাম্বুলোত্ ফিরি যেদঅ মাত্তর্ নূনোর্ পূঅবো যিহোশূয় মিলন-তাম্বুলান ছাড়ি ন-যেদঅ। যিহোশূয় নাঙে এই গাবুজ্যেবো অলদে মোশিরে এজাল্দিয়্যে। মোশি ইদু লগেপ্রভুর্ এগেম্ 12 পরেদি মোশি লগেপ্রভুরে কলঅ, “তুই মরে এই মানুচ্চুনোরে নেযেবাত্তে কোইয়োচ্, মাত্তর্ মর্ লগে কারে পাধেবে সিয়েন্ দঅ ন-কচ্। তুই কোয়োচ্চে তুই মরে তর্ নিজোর্ বিলিনেই জানচ্ আর মঅ উগুরে তর্ দোয়্যে আঘে।” 13 যুনি মুই তর্ দোয়্যে পেই থাং সালে তুই কি আজালোই কি গরচ্ সিয়েনি মরে জানেই দিচ্ যেনে মুই তরে বুঝি পারং আর তর্ দোয়্যেলোই থেই পারং। মনত্ রাগেচ্, এই জাদ্তো তর্। 14 জোবত্ লগেপ্রভু কলঅ, “মুই নিজেই তর্ লগে যেম্ আর তরে জিরেন্ দিম।” 15 মোশি তারে কলঅ, “তুই যুনি আমা লগে ন-যাচ্ সালে ইয়োত্তুন্ আমারে ন-পাদেচ্।” 16 তুই আমা লগে ন-গেলে মানুচ্চুনে কিঙিরিনে বুঝিবাক্, মঅ উগুরে আর তর্ মানুচ্চুনো উগুরে তর্ দোয়্যে আঘে? মুই আর তর্ মানুচ্চুনে যে পিত্থিমীর্ অন্য মানুচ্চুনোত্তুন্ যুদো সিয়েন্ আর কেধোক্ক্যেনগুরি বুঝো যেবঅ? 17 সেক্কে লগেপ্রভু মোশিরে কলঅ, “তুই যিয়েনি কোইয়োচ্ মুই সিয়েনি গুরিম্, কিত্তে মর্ দোয়্যেগান্ তঅ উগুরে আঘে আর মুই তরে মর্ নিজোর্ বিলিনে হবর্ পাং।” 18 মোশি কলঅ, “সালে তর্ মহিমাগান মরে দেগা।” 19 লগেপ্রভু কলঅ, “মুই মর্ বেক্ আওজ্চানি তঅ মুজুঙোত্ তুলি ধুরিম। তর্ মুজুঙোত্ মুই মর্ ‘লগেপ্রভু’ নাঙান্ ফগদাঙ্ গুরিম্। মর্ যিবে গম্ লাগে তারে দোয়্যে গুরিম্, যিবেরে গম্ লাগে তারে মেয়্যে গুরিম্। 20 মাত্তর্ তুই মর্ মুয়োন্ ন-দেগিবে, কিত্তে মরে দেগানার্ পরেন্দি কনজনে বাঁজি থেই ন-পারন্।” 21 সে পরেদি লগেপ্রভু কলঅ, “তুই মইদু এই জাগায়ান ইন্দি চেই থাক্। এই পাত্তরর্ মুড়োবো কাপ্পান উগুরে যেইনে তুই ঠিয়্যেবে। 22 মর্ মহিমাগান যেক্কে তর্ মুজুঙেন্দি যেবগোই সেক্কে মুই তরে মুড়োবোর্ ফাদান ভিদিরে সোরেই দিম্ আর মুই ন-যানা সং তরে মর্ আত্তান্দোই ঢাগি রাগেম্। 23 সে পরেন্দি মুই মর্ আত্তান্ সোরেই নিলে তুই মর্ পিজেন্দিগান্ দেগিবে, মাত্তর্ মর্ মুয়োন্ দেগানা সম্ভব নয়।” |
Copyright © 2021 Bangladesh Bible Society
Bangladesh Bible Society