যাত্রা 32 - Chakma Bibleসনার্ গোরুর চেলা ছঅ 1 মুড়োবোত্তুন লামি এত্তে মোশির্ দেরি অর্ দেগিনে মানুচ্চুনে হারোণর্ চেরোকিত্তে এগত্তর্ ওইনে কলাক্, “পথ্ দেগেইনে নেযেবাত্তে তুই আমারে ভুত্-দেবেদা বানেই দে কিত্তে সেই মোশি, যে আমারে মিসর দেজত্তুন্ নিগিলেই আন্যে, তার্ কি ওইয়্যে আমি হবর্ ন-পেই।” 2 জোবত্ হারোণে তারারে কলঅ, “তমার মোক্কুনোর আর পূঅ-ঝিগুনোর্ কানর্ সনার্ কান্ফুলানি খুলি আনিনে মরে দুয়ো।” 3 সেক্কে বেক্কুনে তারার্ কানর্ জিনিসছানি খুলি আনিনে হারোণরে দিলাক্। 4 মানুচ্চুনে হারোণরে যিয়েনি দিলাক্ সিয়েনি গোলেইনে ছাচি ছাজাই মিশিন্দোই তে গোরু ছঅ ধোক্ক্যেন এক্কো মূত্তি বানেল। সিবে দেগিনেই ইস্রায়েলীয়গুনে কলাক্, “ভেইলক্, ইবে ভিদিরে আগন্ তমার দেব-দেবেদাগুন্। মিসর্ দেজত্তুন্ এই দেব-দেবেদাগুনে তমারে নিগিলে আন্যন্।” 5 এ অবস্থাগান্ দেগিনে হারোণে সেই গোরু ছবোর মুজুঙোত্ এক্কো ডালিপূজো বানেইনে এই কধাগান্ ফগদাঙ্ গুরিলো, “এজেত্যে কেল্যে লগেপ্রভুর্ নাঙে উৎসব অবঅ।” 6 তার্ কেল্যে মানুচ্চুনে বেন্যেপোত্যে উদিনে পুজ্যে-উৎসর্ব আর উদোলোলি-উৎসর্বর অনুষ্ঠান্ গুরিলাক্। সে পরেন্দি তারা হানা-দানা গুরিবাত্তে বঝিলাক্ আর পরেন্দি রঅ রঅ গুরিনে ফুত্তি গুরিবাত্তে উদিলাক্। 7 ইয়েনত্যে লগেপ্রভু মোশিরে কলঅ, “তুই তলেন্দি লামি যাহ্। তর্ সেই বেক্ মানুচ্চুনে যিগুনোরে তুই মিসর্ দেজত্তুন্ নিগিলেই আন্যচ্ তারা অমহদ বেশ্ ওইয়োন্।” 8 এ ভিদিরে তারা মর্ উগুমোত্তুন্ দূরোত্ সুরি যেইয়োন্। তারা নিজোত্তেই গোরু ছঅ ধোক্ক্যেন এক্কো মূত্তি বানেয়োন। তারা মাদিত্ পুরিনে সিবেরে পূজো গোজ্যন্ আর সিবের্ নাঙে য়েমান্-উৎসর্ব গুরিনে কোইয়োন, ভেইলক্, ইবে ভিদিরে আগন্ তমা দেব-দেবেদাগুন্। এই দেব-দেবেদাগুনে মিসর্ দেজত্তুন্ তমারে নিগিলেই আন্যন্। 9 লগেপ্রভু মোশিরে আরঅ কলঅ, “এই বেক্ মানুচ্চুনোরে মুই চিনোং। ইগুনে এক বাবোত্যে উল্ল্য জাত্।” 10 তুই মরে মানা নঅ গুরিচ্। তারা বিরুদ্ধে মর্ রাক্কান্ আগুনো ধোক্ক্যেন জুলিবো। মুই তারারে ভস্ত গুরি ফেলেম্। সে পরেন্দি তমা ভিদিরেত্তুন্ মুই এক্কো দাঙর্ জাত্ সৃট্টি গুরিম্। 11 মোশি সেক্কে তার গোজেন লগেপ্রভুরে কোজোলী গুরিনে কলঅ, “লগেপ্রভু, তর্ খেমতাবলা আত্তান্ বাবেইনে দাঙর্ বল্লোই যিগুনোরে তুই মিসর্ দেজত্তুন্ নিগিলেই আন্যচ্ তর্ সেই মানুচ্চুনো উগুরে কিত্তেই তর্ এদক্ রাগ্?” 12 কিত্তেই মিসরীয়গুনে এই কধাগান্ কবার্ সুযোগ্ পেবাক্, মুড়োমুড়ি চাগালা ভিদিরে আনিনে তারারে মারে ফেলেইনে পিত্থিমীর্ বুগোত্তুন্ তুলি দিবার্ ভান্ন্যেই আওজে তুই তারারে নিগিলেই আন্যচ্? তর্ এই জদবদে রাক্কান্ তুই থামা। দোয়্যে গর্, তঅ মানুচ্চুনো উগুরে তুই এই বিপদ্থান্ ন-আনিচ্। 13 তঅ চাগর্ অব্রাহাম, ইস্হাক আর ইস্রায়েলর কধা মনত্ তুল্। তুই নিজোর্ নাঙে শমক্ খেইনে তারারে কোইয়োচ্, তারার্ বংশধরুনোরে আগাজ তারা ধোক্ক্যেন গুণি ন-পুড়েইয়্যে গুরি তুলিবে আর তর্ শমক্ খেইয়্যে দেজ্চান পুরো বেক্কানই উমরর্ অধিকার ইজেবে তারার্ বংশধরুনোরে দিবে। 14 এই কধাগান্ শুনিনে লগেপ্রভুর্ মনত্ দোয়্যে অলঅ। তার্ মানুচ্চুনো উগুরে যে দজাগানি আনিবার্ কধা তে কোইয়্যে সিয়েনি আর তে ন-আনিলো। 15 ইয়েন পরেদি মোশি সাক্ষ্য-আরুগ্ দ্বিবে আঢত্ গুরিনে মুড়োবোত্তুন্ তলেন্দি লামিলো। ফলক্ দ্বিবে মুজুঙেন্দি আর পিজেন্দি দ্বিকিত্তেদি লেগা এলঅ। 16 সেই দ্বিবে অলঅ গোজেনর নিজো আদর্ কাম্, আর সিগুনো উগুরে কাবিনে লেখ্যে লেগাগান্অ তার্ অলঅ। 17 যিহোশূয় মানুচ্চুনোর্ কিজিক্-কাজাক্ শুনিনে মোশিরে কলঅ, “তাম্বুলত্তুন্ যুদ্ধোর্ রঅ শুনো যার্।” 18 জোবত্ মোশি কলদে, “সিবে যুদ্ধোত্ জিদিবার্ রয়ো নয়্, যুদ্ধোত্ উদি যেবার্ রয়ো নয়। মুই যিবে শুনোঙর্ সিবে গানর্ রঅ।” 19 সে পরেদি মোশি তাম্বুলোর্ কায়-কুরে যেইনে সেই গোরু ছবো আর মানুচ্চুনোরে নাজদে দেগিলো। সিয়েন্ দেগিনে তে রাগে জুলি উদিলো আর আদত্ গুরি আন্যে পাত্তর-ফলক্কুন দ্বিবে ফেলেই দিলো। সেক্কে সেই দ্বিবে পাত্তর-আরুগ্ মুড়োবোত্ তলে পরিনে কট্টা কট্টা ওইনে ভাঙি গেলাক্। 20 মোশি তারার্ বানেয়্যে সেই গুরু ছবোর্ মূত্তিবো আগুনোত্ পুড়ি দিলো। সে পরেদি সিবে নিগুজ্ গুরিনে পানি উগুরে ছিদি দিইনে ইস্রায়েলীয়গুনোরে হাবেল। 21 তে হারোণরে কলঅ, “সেই মানুচ্চুনে তরে কি গোজ্যন্দে, তুই তারারে এবাবোত্যেগুরি অমহদ পাপর্ কামত্ টানি আনিলে?” 22 জোবত্ হারোণে কলঅ, “তুই রাগ ন-গুরিচ্, তুই দঅ হবর্ পাজ্ ভান্ন্যেয়দি এই মানুচ্চুনোর অভ্যেস্।” 23 তারা এইনে মরে কলাক্কে, পথ্ দেগেইনে নেযেবাত্তে তুই আমারে ভুত্-দেবেদা বানেই দে, কিত্তে সেই মোশি, যে মিসর দেজত্তুন্ আমারে নিগিলেই আন্যে, তার্ কি ওইয়্যে আমি হবর্ ন-পেই। 24 এই কধাগান্ শুনিনে মুই তারারে কোলুং, যিগুনোর্ সনার্ গহনা আঘে তারা যেনে সিয়েনি খুলিনেই মইদু আনন্। তারা মরে সনা আনি দিবার্ পরেদি মুই সিয়েনি আগুনোত্ মেলা মারি ফেলেই দিলুং আর সেক্কে এই গোরু ছবো নিগিলি এলঅ। 25 মোশি দেগিলোদে মানুচ্চুনে অমকদ বেশ্ ওইয়োন। তে বুঝি পারিলো হারোণে তারারে আঢ বারেদি যেবাত্তে দিয়্যে আর সেনত্যেই শত্রুগুনো ইদু তারা খুজির্ মানুচ্ ওইয়োন্। 26 মোশি তাম্বুলোত্ সোমেবার্ পদথ্ ঠিয়্যেইনে কলঅ, “তুমি যিগুনে লগেপ্রভুর্ পক্ষে আঘ তারা মইধু এজঅ।” সেক্কে লেবি-বংশধরুনে বেক্কুনে তাইধু এগত্তর্ অলাক্। 27 সেক্কে তে তারারে কলঅ, “ইস্রায়েলীয়গুনোর গোজেন্ লগেপ্রভু কোইয়্যেদে, ‘তুমি বেক্কুনে নিজোর্ নিজোর্ কমরত্ লাম্বা কিরিচ্ বানি নেযঅ, আর তাম্বুলোর্ বেক্ জাগানিত্ যেইনে যিবেরে মুজুঙোত্ পঅ তারেই মারে ফেলঅ-তে ভেই ওক্, সমাজ্যে ওক্ বা আদাম্মে ওক্।’ ” 28 লেবীয়গুনে মোশির্ উগুম মজিম্ কাম্ গুরিলাক। সেক্কে সেদিন্যে প্রায়্ তিন আজার্ মানুচ্ মারা পড়িলাক্। 29 সে পরেদি মোশি কলদে, “তুমি এচ্চ্যে লগেপ্রভুর্ নাঙে নিজোরে ফারক্ গুরি নেযঅ, কিত্তে তুমি নিজোর্ নিজোর্ পূঅ আর ভেইয়ুনোর্ বিরুদ্ধেয়ো ঠিয়্যেদে পিজেন্দি ন-আলঅ। সেনত্তে এচ্চ্যে তুমি লগেপ্রভুর্ আশিদ্বাদ পেলা।” 30 তার্কেল্যে মোশি মানুচ্চুনোরে কলঅ, “তুমি জদবদে পাপ্ গোজ্য। মাত্তর্ মুই ইক্কিনে লগেপ্রভু ইদু উদোঙল্লোই। অয়ত তমা পাপ্পানি নাঢি দিবার্ এক্কান বেবস্থা মুই গুরি পারিম।” 31 মোশি লগেপ্রভু ইদু ফিরি যেইনে কলগোই, “হায় লগেপ্রভু! এই মানুচ্চুনে অমহদ পাপ গুরি ফেল্যন্। তারা নিজোত্তেই সনার্ দেব-দেবেদা বানেই নেযেয়োন।” 32 মাত্তর্ তুই ইক্কিনে দোয়্যে গুরিনে তারার্ পাপ্পানি ক্ষেমা গুরি দে, আর যুনি সিয়েন ন-গরচ্ সালে তর্ লেখ্যে বোইবোত্তুন্ মর্ নাঙান্অ বাদ দি দে। 33 জোবত্ লগেপ্রভু মোশিরে কলঅ, “যিগুনে মর্ বিরুদ্ধে পাপ গোজ্যন বানা তারার্ নাঙানিয়ই মুই মর্ বোইবোত্তুন্ বাদ্ দিম্। 34 শুনিচ্, যে জাগানর্ কধা মুই কোইয়োং তুই ইক্কিনে যেইনে মানুচ্চুনোরে সিদু নেযা। মর্ দূত্তুনে তমারে পথ্ দেগেইনে নেযেবাক্। যেক্কে সাজা-দিবার্ অক্ত এবঅ সেক্কে মুই তারারে পাপর্ সাজা দিম্।” 35 হারোণর্ বানেয়্যে গোরু ছবোলোই মানুচ্চুনে যিয়েনি গোজ্যন্ সিয়েনিত্যে লগেপ্রভু তারা উগুরে দাঙর্ দজা পাধেই দিলো। |
Copyright © 2021 Bangladesh Bible Society
Bangladesh Bible Society