যাত্রা 3 - Chakma Bibleগোজেনে মোশিরে ডাগিলো 1 একদিন্যে মোশি তা শুয়োর্বো যিথ্রোর্, অত্তাৎ রূয়েলর ছাগল-ভেড়াছাগল পালুন্ চরার্। যিথ্রো অলদে মিদিয়নীয়গুনোর্ এক্কো ধর্মগুরু। ছাগল-ভেড়াছাগলর্ পালুন্ চরাদে চরাদে মোশি ধূল্যেচর-চাগালাত্ আরেক্ কিত্তেদি গোজেন মুড়ো হোরেব ইধু যেইনে লুমিলোগোই। 2 সিয়েনত্ এক্কো ঝুবো সেরেত্তুন্ জ্বোল্জোল্যে আগুনো ভিদিরেত্তুন্ লগেপ্রভুর্ দূত্তো তাল্লোই দেগা দিলো। মোশি দেগিলোদে, ঝুপ্পোত্ আগুন জুলিলেয়ো সিবে পুড়ি ন-যার্। 3 এ ঘটনাগান দেগিনে তে মনে মনে কলঅ, “মুই এক কিত্তেদি যেইনে এ আমক্ অবার ঘটনাগান্ রিনি চেম্বোই, চেম্বোই ঝুপ্পো কিত্তে পুড়ি ন-যার্।” 4 ঝুপ্পো চেবাত্তে মোশি এক কিত্তেদি যাদে দেগিনে লগেপ্রভু গোজেনে ঝুবো সেরেত্তুন্ ডাগিলো, “মোশি, মোশি।” মোশি কলঅ, “এইয়্যে দঅ মুই।” 5 লগেপ্রভু কলঅ, “আর কায়-কুরে ন-এইচ্। তুই পবিত্র জাগানত্ ঠিয়্যেই আগচ্। তঅ টেঙর্ জদানি খুলি ফেলা। 6 মুই তঅ বাবর গোজেন; মুই অব্রাহাম, ইস্হাক আর যাকোবর্ গোজেন।” সেক্কে মোশি তা মুয়োন্ ঢাগিলো, কিত্তে গোজেন ইন্দি রিনি চেবাত্তে তার্ মনত্ দর্বুগ লাগিলো। 7 লগেপ্রভু কলঅ, “মিসর দেজত্ মঅ মানুচ্চুনো উগুরে যে অত্যেচার অর্ সিয়েন মর্ চোগোর বারেদি নয়। মিসরীয় সদ্দারুনোর্ অত্যেচারত্ ইস্রায়েলীয়গুনে যে কানা-কুদি গরদন্ সিয়েন মুই শুন্যং। তারা দুগোর্ কধানি মুই হবর্ পাং। 8 মিসরীয়গুনোর্ আঢত্তুন্ তারারে রোক্ষ্যে গুরিবাত্যে মুই লামি এচ্চোং। মুই তারারে সে দেজত্তুন্ নিগিলেনে কনানীয়, হিত্তীয়, ইমোরীয়, পরিষীয়, হিব্বীয় আর যিবূষীয়গুনো দেজত্ নেযেম্। দেজ্সান্ এদক্ দাঙর্ আর দোল্; সিয়েনত্ দুধ, মধু আর কনঅ কিজুর্ অভাব নেই। 9 ইস্রায়েলীয়গুনোর্ কানা-কুদিগানি ইক্কিনে মইধু এইনে লুম্মেগি। মিসরীয়গুনে কেধোক্ক্যেন গুরি তারা উগুরে অত্যেচার্ গরদন্ সিয়েনঅ মুই দেক্কোং। 10 সেনত্যে তুই ইক্কিনে যাহ্। মুই তরে ফরৌণ ইধু পাদাঙর্। তুই যেইনে মঅ মানুচ্চুনোরে, অত্তাৎ ইস্রায়েলীয়গুনোরে মিসর্ দেজত্তুন্ নিগিলেই আনিবে।” 11 মাত্তর্ মোশি, গোজেনরে কলঅ, “মুই আর্ কন্না, ফরৌণ ইধু যেইনে মিসর দেজত্তুন্ ইস্রায়েলীয়গুনোরে নিগিলেই আনি পারং।” 12 গোজেনে কলঅ, “মুয়ই তঅ লগে থেইম্। তুই মিসর দেজত্তুন্ মানুচ্চুনোরে নিগিলেই আনিবে আর তুমি এ মুড়োবোত্ মঅ নাঙে উবোসনা গুরিবা। মুয়ই যে তরে পাদেলুং ইয়েনই অবঅ তইধু তার্ চিহ্নো।” 13 সেক্কে মোশি গোজেনরে কলঅ “মাত্তর্ মুই যেইনে ইস্রায়েলীয়গুনোরে যেক্কে কোম্ তারার্ পুরোণি মানুচ্চুনোর্ গোজেনে মরে তারা ইধু পাদেয়্যে, সেক্কে তারা দগেনলে মরে পুযোর্ গুরিবাক্, ‘তা নাঙান্ কি?’ সে সময়োত্ মুই তারারে কি জোব্ দিম?” 14 গোজেনে মোশিরে কলঅ, যিবে মুই আগং মুয়ই তে। তুই ইস্রায়েলীয়গুনোরে কবেদে, মুই আগং তমাইধু তারে পাদেইয়্যে। 15 তুই তারারে আরঅ কবেদে, তারার্ পুরোণি মানুচ্ অব্রাহাম, ইস্হাক আর যাকোবর্ গোজেন লগেপ্রভু তরে তারা ইধু পাদেয়্যে। মর্ উমরর্ নাঙান্ লগেপ্রভু। বংশর্ পর্ বংশ ধুরিনে মরে এ নাঙে মান্জে মনত্ রাগেবাক্। 16 তুই যেইনে ইস্রায়েলীয় বুড়ো নেতাগুনোরে একলগে এগত্তর্ গুরি তারারে কবেদে, তারার্ পুরোণি মানুচ্ অব্রাহাম, ইস্হাক আর যাকোবর্ গোজেন লগেপ্রভু তরে দেগা দিইনে কোইয়্যেদে, তমা ইন্দি আর মিসরত্ তমা উগুরে যিয়েনি গরা অর্ সিন্দি মর্ চোগ্ আঘে। 17 সেনত্যে মুই কঙর্, মিসর দেজর্ অত্যেচারত্তুন্ নিগিলেনে মুই তমারে কনানীয়, হিত্তীয়, ইমোরীয়, পরিষীয়, হিব্বীয় আর যিবূষীয়গুনোর দেজত্ নেযেম্। সিয়েনত্ দুধ, মধু আর কনঅ কিজুর্ অভাব নেই। 18 “ইস্রায়েলীয় বুড়ো নেতাগুনে তঅ কধানি শুনিবাক্। তুই আর তারা মিলিনে মিসর রাজাবো ইধু যেইনে কবাগোই, ‘ইব্রীয়গুনোর্ গোজেন লগেপ্রভু আমা লগে দেগা দিইনে কধা কোইয়্যে। সেনত্যে তুই দোয়্যে গুরিনে আমারে যেবাত্তে দে, যেনে আমি ধূল্যেচর-চাগালা ভিদিরেদি তিন দিনো পথ যেইনে আমা গোজেন লগেপ্রভুর্ নাঙে য়েমান্-উৎসর্ব গুরি পারিই।’ 19 মুই হবর্ পাং দরমর আদত্ পুড়িলেয়ো মিসর রাজাবো তমারে যেবাত্তে ন-দিবো। 20 সেনত্তে মঅ খেমতাগান্ বেবহার্ গুরিনে মুই এন্ আমক্ অইদে কামবোই মিসররে আঘাত্ গুরিম যিয়েনর্ ফলে ফরৌণে তমারে যেবাত্তে দিবো। 21 ইস্রায়েলীয়গুনো উগুরে মিসরীয়গুনোর্ মনত্ মুই এন্ এক্কান্ মেইয়্যের্ মনভাব গুরি দিম্ যেনে মিসরত্তুন্ নিগিলি যেবার সময় তমারে সুদোআঢে যাহ্ ন-পড়ে। 22 পত্তি ইব্রীয় মিলে তারা পাড়াল্যেগুন্ আর নিজো ঘরত্ আগন্ এবাবোত্যে বেক্ মিসরীয় মিলেগুনোত্তুন্ সোনা আর রূবোর জিনিস আর কাবড়-চুগোর চেইনে নেযেবা। সে পরেদি সিয়েনিলোই তুমি তমার্ ঝি-পূয়োগুনোরে সাজেবা। এবাবোত্যেগুরি মিসরীয়গুনোর্ জিনিসছানি ইস্রায়েলীয়গুনে গজক্ গুরি নিবা।” |
Copyright © 2021 Bangladesh Bible Society
Bangladesh Bible Society