যাত্রা 23 - Chakma Bibleন্যায়বিচের্ আর দোয়্যে 1 মিজে কধানি ন-বাড়েবা। সিয়েনি গুরিনে অন্যেয়র্ পক্ষ ওইনে পাজি মান্জ্যরে এজাল্ ন-দিবা। 2 দশজনে অন্যেয়্ গোজ্যন্ বিলিই তুইয়ো সেধোক্ক্যেন গুরিবাত্তে ন-যেচ্। কনঅ মকদ্দমাত্ সাক্ষী দিবাত্তে যেইনেই মানুচ্ বেশ্ আগন্দে ইন্দি মিজেইনে ন্যায় বিচেরত্ মানা ন-গুরিচ্। 3 কনঅ নাদা মান্জ্যর্ বিচের্ গুরিবাত্তে যেইনে তে নাদা বিলিনেই তার্ পক্ষ ন-নিবা। 4 “তর্ শত্রুর কনঅ গোরু বা গাধারে যুনি অন্য কনজাগাত্ যাদেগোই দেগচ্ সালে সিবে হামাক্কায়্ তাইদু ফিরেই নেযেবে।” 5 তরে ঘিনেই এধোক্ক্যেন কনঅ মান্জ্যর্ গাধারে যুনি পযাপিরার্ ভরে পত্তে দেগচ্ সালে সে মানুচ্চোরে সে অবস্থাত্ ফেলেই ন-যেচ্। তুই হামাক্কায়্ তারে তুলোদে বল্ দিবে। 6 “কনঅ নাদা মান্জ্যর্ মকদ্দমাত্ অন্যেয় বিচের্ ন-গুরিবা।” 7 সাজেয়্যে মামলাত্তুন্ দূরোত্ থেবা আর কনঅ দুষ্ নেইয়্যে বা গম্ মান্জ্যরে মরণর সাজা-ন-দিবা। এই অন্যেয়ানি যে গুরিবো তারে মুই রেহাই ন-দিম্। 8 ঘুষ ন-হেবা, কিত্তে যার্ চোগ আঘে তারেয়ো ঘুষে চোগ্ কান গুরিদে। ঘুষ গম্ মান্জ্যর্ কধাত্অ প্যাজাল্ লাগেই দে। 9 পর্ভাস্যেগুনো উগুরে অত্যেচার্ ন-গোজ্য। পর্ভাস্যে অনা যে কেধোক্ক্যেন সিয়েন্ তুমি নিজেই হবর্ পঅ, কিত্তে মিশর্ দেজত্ তুমিয়ো একদিন পর্ভাস্যে এলা। ঝিরেবার সুদোম 10 পর পর ছয় বজর্ তুমি ক্ষেদত্ চাষ্ গুরিবা আর ফসল কাবিবা, 11 মাত্তর্ সাত বজরত্ ভুইয়ো চাষ্অ ন-গুরিবা আর কনঅ কিজু নয়ো লাগেবা। সেক্কে এমনে যিয়েনি জোর্মেব তমা ভিদিরে নাদা মানুচ্চুনে সিয়েনিত্তুন্ হেই পেবাক্ আর যিয়েনি পড়ি থেবঅ সিয়েনি ঝাড়্বো য়েমানুনে হেই পারিবাক্। তমার আংগুর্ আর জলপাই বাগান পৌইদ্যেনেয়ো সেই এক্কুই সুদোমানি পালেবা। 12 তুমি সাপ্তায় ছয়দিন কাম্ গুরিবা মাত্তর্ সাত দিনোত্ কনঅ কাম্ ন-গুরিবা। সেক্কে তমার্ গোরু আর গাধাগুনে জিরেন্ পেবাক্ আর তমা ঘরত্ জোর্মেয়োন এধোক্ক্যেন চাগর্ বা চাগরানী আর অন্য জাদর্ মানুচ্চুনেয়ো কামত্তুন্ জিরেন পেবাক্। 13 মুই তমারে যেদক্কানি উগুম্ দিলুং সিয়েনি বেক্কানি হামাক্কায়্ পালেবা। কনঅ দেবেদার নাঙ্ মুয়োত্ ন-আনিবা, সিয়েনি যেনে তমা মুয়োত্তুন্ শুনো ন-যায়। বজরত্ তিন্নো পরব্ 14 “পত্তি বজর তুমি মর্ নাঙে তিন্নো গুরিনে পরব্ পালেবা।” 15 তুমি সদাছাড়া পিদের্ পরব্ পালেবা। মুই তমারে যে উগুমানি দুয়োং সেধোক্ক্যেনগুরি তুমি সাত দিন সং সদাছাড়া পিদে হেবা। আবীব মাজর্ ঠিগ্ সময়োত্ ইবে পালেবা, কিত্তে সেই মাজত্ তুমি মিসর্ দেজত্তুন্ নিগিলি এচ্চ্য। কনজনে যেনে সেক্কে সুদো আত্তোই মইদু ন-এজন্। 16 তুমি খেদত্ যিয়েনি লাগেবা সিয়েনির্ পত্তম ফসল্লোই ক্ষেত-ক্ষেত্তি কাবিবার্ পরপ্পো পালেবা। চাষকামর্ শেষ্ মাজত্ ক্ষেদত্তুন্ ফসল্ তুলিবার্ অক্তত্ তুমি ফসল তুবেবার্ পরপ্পো পালেবা। 17 বজরে তিনবার্ গুরিনে তমার্ বেক্ মরত্তুনে প্রভু লগেপ্রভুর্ মুজুঙোত্ আঝিল্ অবাক্। 18 যেক্কে তুমি মর্ নাঙে য়েমানর্ লো উৎসর্ব গুরিবা সেক্কে সিয়েনর্ লগে যেন কনঅ সদা-দিয়্যে পিদে উৎসর্ব গরা ন-অয়। পরবর্ অক্তত্ মর্ নাঙে যিদুক্কুন য়েমান উৎসর্ব গুরিবা সিয়েনর্ কনঅ তেল্বলা ভাগ্ যেনে বেন্যে সং পড়ি ন-থায়। 19 তমা খেদত্তুন্ কাবি আন্যে পত্তম ফসলর্ বেগত্তুন্ গম্ ভাগ্কান্ তুমি তমার্ গোজেন লগেপ্রভুর্ ঘরত্ নেযেবা। ছাগল ছবোর্ য়েরাগান তার্ মাবো দুত্তোই ন-রানিবা। শমক্ আর উগুম 20 “যে জাগাগান্ মুই ঠিগ্ গুরি রাগেয়োং সিদু তমারে নেযেবাত্তে আর পদত্ রোক্ষ্যে গুরিবাত্তে মুই তমা আগেদি একজন দূতরে পাধেই দুয়োঙর্।” 21 তুমি তার্ কধা শুনিবা আর সিয়েন মানি চুলিবা। তুমি তা বিরুদ্ধে মনানি ঝাগুলুক্ ন-গোজ্য। তমা উল্লোমিগানি তে মাপ্ ন-গুরিবো, কিত্তে মুয়ই তা সমারে আগং। 22 তুমি যুনি তা কধানি শুনো আর মুই যিয়েনি কোইয়োং সিয়েনি গরঅ সালে মুই তমার শত্রুগুনোর্ শত্রু ওম্ আর যিগুনে তমা বিরুদ্ধে থিয়েবাক্ মুই তারা বিরুদ্ধেয়ো ঠিয়েম্। 23 ইমোরীয়ো, হিত্তীয়, পরিষীয়, কনানীয়, হিব্বীয় আর যিবূষীয়গুনে যে দেজত্ বজত্তি গত্তন্ মর্ দূত্তো তমার আগ্ মোলিম্ ওইনেই সেই দেজত্ তমারে নেযেব। মুই তারারে বেক্কুনোরে শেজ্ গুরি ফেলেম্। 24 তুমি তারার্ দেবেদাগুনোরে পূজো বা সেবা ন-গুরিবা আর সিদুগোর্ মানুচ্চুনে যিয়েনি গরন্ সিয়েনি ন-গুরিবা। তুমি তারার্ দেব-দেবেদার মুর্তিগুন্ ভাঙি ফেলেবা আর তারার্ পূজো গোজ্যে পাত্তরুন কট্টা কট্টা গুরি ফেলেবা। 25 তুমি বানা তমার্ গোজেন লগেপ্রভুর, অত্তাত্ মরে সেবা গুরিবা। সেক্কে তমার হানা আর পানি উগুরে মর্ আশিদ্বাদ থেবঅ আর মুয়ই তমার্ বেক্ অসুখ-বিসুখ্কানি দূর্ গুরি দিম্। 26 সেক্কে তমা দেজত্ কারঅ পেদ ভিদিরে গুরোগুন্ বর্বাদ ন-অবাক্ আর কনজনে ভাজ্ ন-থেবাক্। মুই তমারে দীর্ঘ আয়ুলোই বাঁজেই রাগেম। 27 তুমি যিদুক্কুন্ জাদ ইদু যেবা তারার মনত্ মঅ পৌইদ্যেনে এক্কান্ দর্গরেপারা মনভাব্ মুই আগে আগে জাগেই দিম্ আর তারা ভিদিরে এক্কান্ ওলোজোলো গুরি দিম। তমার বেক্ শত্রুগুনে পিজেদি ফিরিনে ধেই যেবাক্। 28 হিব্বীয়, কনানীয় আর হিত্তীয়গুনোরে তমা মুজুঙোত্তুন্ ধাবে দিবাত্তেই মুই তমা আগে আগে ভিঙুর্ পুক্ পাধেই দিম্। 29 মাত্তর্ মুই যে তারারে এক বজর ভিদিরে বেক্কুনোরে ধাবেই দিম্ সিয়েন নয়, কিত্তে সিয়েন গুরিলে দেজ্চান্ খাল্যে পড়ি থেবঅ আর ঝাড়্বো-জানোয়ারর্ সোংখ্যে তমার পক্ষে অমহদ বেশ্ ওই যেবাক্। 30 তুমি মান্জ্যন্দি বেশ্ ওইনে গোদা দেজ্চান্ গজক্ গুরি ন-নেযানা সং মুই সেই জাদ্তুনোরে কিজু কিজু গুরি দেজত্তুন্ ধাবেইনে নিগিলেই দিম্। 31 “এক কিত্তেদি লোহিত সাগরত্তুন্ পলেষ্টীয়গুনোর দেজর্ সাগরান সং আর এক কিত্তেদি ধূল্যেচর-চাগালাত্তুন ধুরি ইউফ্রেটিস গাঙান্ সং তমা দেজর্ দুঝিবো মুই ঠিগ্ গুরি দিম। সেই দেজত্ যিগুনে বজত্তি গত্তন্ তারারে মুই তমা আদত্ তুলি দিম্ আর তমা মুজুঙোত্তুন্ তুমি তারারে ধাবেইনে নিগিলেই দিবা।” 32 তারা সমারে বা তারা দেবেদাগুনো সমারে কনঅ চুক্তি ন-গুরিবা। 33 তমা দেজ ভিদিরে তারারে বজত্তি গুরিবাত্তে ন-দিবা। সিয়েন গুরিলে তারা মঅ বিরুদ্ধে তমারে পাপ কামত্ টানি নেযেবাক্, কিত্তে যুনি তুমি তারার্ দেব-দেবেদাগুনোরে পূজো গরঅ সালে হামাক্কায়্ তুমি সিয়েনর কাবুগোত্ আক্সো যেবা। |
Copyright © 2021 Bangladesh Bible Society
Bangladesh Bible Society