যাত্রা 20 - Chakma Bibleদশছান উগুম 1 ইয়েন পরেন্দি গোজেনে কলঅ, 2 ও ইস্রায়েলীয়গুন্, মুই লগেপ্রভু তমার্ গোজেন। মিসর্ দেজর্ চাগর্ খাদানাত্তুন্ মুয়ই তমারে নিগিলেই আন্যং। 3 মঅ জাগানত্ কনঅ দেবেদারে ন-রাগেবা। 4 পূজো গুরিবার্ নাঙে তুমি কনঅ মূত্তি ন-বানেবা, সিবে আগাজর্ কনকিজু ধোক্ক্যেন ওক্ বা মাদি উগুরে কনঅ কিজু ধোক্ক্যেন ওক্ বা পানি ভিদিরেত্তুন্ কনঅ কিজু ধোক্ক্যেন ওক্। 5 তুমি তারারে পূজোয়ো ন-গুরিবা, তারারে সেবায়ো ন-গুরিবা, কিত্তে বানা মুয়ই লগেপ্রভু তমার্ গোজেন। মর্ পাওনা ভোক্তিগান মুই চাং। যিগুনে মরে ঘিনেন্ তারার্ পাবর্ সাজা-মুই তারারে তিনোত্তুন্ ধুরি চের্ পুরুষ সং দুয়োং। 6 মাত্তর্ যিগুনে মরে কোচ্পান্ আর মর্ বেক্ উগুমানি পালান্, আজার্ আজার্ পুরুষ ধুরিনে তারা উগুরে মর্ বুক ভরা দোয়্যে থেবঅ। 7 কনঅ ভান্ন্যেই আশাই তুমি তমার গোজেন লগেপ্রভুর্ নাঙান্ ন-গিনিবা। যিবে সিয়েন্ গুরিবো তারে লগেপ্রভু সাজা-দিবো। 8 জিরেবার্ দিন্নো মর্ নাঙে যুদো গুরি রাগেবা আর সিবে পালন গুরিবা। 9 সাপ্তায়্ ছয়দিন্ তুমি কাম্ গুরিবা আর তমার বেক্ কামানি গুরিবা, 10 মাত্তর্ সাত্ দিন্নো অলঅ তমার গোজেন লগেপ্রভুর্ নাঙে জিরেবার্ দিন। সেদিন্যে তুমি, তমার ঝি-পূঅগুন, তমা চাগর্-চাগরানিগুন, তমার য়েমানুন্ বা তমার শঅরত্ আর আদামত্ বজত্তি গোজ্যে অন্য জাদর্ মানুচ্চুন, আজল্ কধা, কনজনে কনঅ কাম্ গরানা ন-চুলিবো। 11 লগেপ্রভু ছয়দিনোত্ দাঙর্ আগাজ্ছান, পিত্থিমীগান, বড়গাঙানি আর সিয়েনি ভিদিরে বেক্কানি বানেইয়্যে, মাত্তর্ সাত্ দিনোত্ সেই কামানি আর্ ন-গরে। সেনত্তে তে এই জিরেবার্ দিন্নোরে আশিদ্বাদ্ গুরিনে তার্ নিজোত্তেই যুদো গোজ্যে। 12 তমার মা-বাবরে সর্মান গুরিনে চুলিবা। সেক্কে তমার গোজেন লগেপ্রভুর্ দিয়্যে দেজত্ তুমি ভালোক্ দিন বাঁজি থেবা। 13 খুন্ ন-গোজ্য। 14 সিনেলী (বেশ্যে-হাঙ্গি) ন-গোজ্য। 15 “চুর্ ন-গোজ্য।” 16 কারঅ বিরুদ্ধে মিজে সাক্ষী ন-দুয়ো। 17 “অন্য মান্জ্যর্ ঘর-দুয়োর্, মোক্, চাগর-চাগরানী, গোরু-গাধা বা আরঅ কনঅ কিজু উগুরে লুভ্ ন-গোজ্য।” 18 ইস্রায়েলীয়গুনে যেক্কে ঝিমিলাদে আর মুড়োত্তুন্ ধুমো উদোদে দেগিলাক্ আর মেঘ গুজুরোনি আর শিঙের রঅ শুনিলাক্ সেক্কে তারা দূরোত্ ঠিয়্যেইনে গির্গিরা ধুরিলাক্। 19 তারা মোশিরে কলাক্, “তুই আমা লগে কধা কঅ, আমি শুনিবোং; মাত্তর্ গোজেনে যুনি আমা লগে কধা কয়্ সালে আমি মারা পুড়িবোং।” 20 সেক্কে মোশি মানুচ্চুনোরে কলঅ, “তুমি ন-দোরেয়ো। গোজেনে তমারে পোরোক্ষেত্ ফেলেয়্যে যেনে তমার মনত্ ভক্তির্ মনভাব থায়্ আর সিয়েনর্ কারনে তুমি পাপ ন-গরঅ। সেনত্তেই তে এচ্চ্যে।” 21 মানুচ্চুনে দূরোত্ ঠিয়্যেই রলাক্ আর মোশি গোজেন ইদু সেই ঘন মেঘ ইন্দি উজেই গেলঅ। ডালিপূজো পৌইদ্যেনে উগুম 22 লগেপ্রভু মোশিরে কলঅ, “তুই ইস্রায়েলীয়গুনোরে এই কধাগান্ কঅ, ‘মুই লগেপ্রভু স্বর্গত্তুন্ দঅ তমা লগে কধা কোইয়োং সিয়েন্ তুমি নিজোর্ চোগে দেখ্য। 23 সেনে উবোসনাত্তে তুমি কনঅ কিজু বানেইনে মর্ লগে তুলনা ন-গুরিবা। সনা বা রূবোলোই নিজোত্তে কনঅ দেব্-দেবেদায়ো ন-বানেবা। 24 তুমি মাদিলোই মত্তে এক্কো ডালিপূজো বানেবা, আর তা উগুরে তমার্ পুজ্যে-উৎসর্ব আর উদোলোলি-উৎসর্বর গরু-ছাগল-ভেড়া উৎসর্ব গুরিবা। যেদক্কানি জাগাত্ মুই মর্ নাঙান্ ইদোত্ তুলি দিবার্ সুদোম্ গুরিম্ সেদক্কানি জাগাত্ মুই আঝিল্ ওইনে তমারে বর্ দিম্। 25 পাত্তর্লোই মত্তে কনঅ ডালিপূজো বানেবাত্তে যেইনেই সেই পাত্তরুন্ ন-কাবিবা। সিগুনো উগুরে মেচিন্ বেবহার্ গুরিলে তুমি সিগুন্ অসিজি গুরি ফেলেবা। 26 মর্ ডালিপূজোবো এধোক্ক্যেনগুরি বানেবা যেনে সিবে উগুরে সাঙু দিইনে উদো ন-পড়ে, কিত্তে সাঙু দিইনে উদিবাত্তে গেলে তমারে লাংটা-বাংটা ধোক্ক্যেন দেগিবো।’” |
Copyright © 2021 Bangladesh Bible Society
Bangladesh Bible Society