যাত্রা 1 - Chakma Bible

ইস্রায়েলীয়গুনো উগুরে অত্যেচার্ গরানা

^1-2 ইস্রায়েলর, অত্তাৎ যাকোব লগে তার যিদুক্কুন্ পূয়ো নিজোর্‌ নিজোর্‌ পরিবারুন্দোই মিসর্‌ দেজত্‌ যেইয়োন তারার্ নাঙানি অলঅ রূবেণ, শিমিয়োন, লেবি, যিহূদা,

^3-5 ইষাখর, সবূলূন, বিন্যামীন, দান, নপ্তালি, গাদ আর আশের। সিগুনবাদে যোষেফে আগেদি মিসরত্ যেইয়্যে। যাকোব বংশর এ মানুচ্চুনে জনেদি এলাক্কে সত্তুরজন।

⁶ পরেদি যোষেফ, তা ভেইয়ুন্‌ আর তারার্ সময়োত্‌ বেক্কুনে মুরি গেলাক্।

⁷ মাত্তর্‌ ইস্রায়েলীয়গুনোর্‌ বংশবাড়েবার্‌ খেমতা কম ন-এলঅ; তারা জনেদি বেশ্‌ ওইনে চেরোকিত্তে ছিদি পড়িলাক্‌ আর অমকদ বোলিবন্দ ওই উদিলাক্, আর তারাল্লোই মিসর দেজ্‌ছান্‌ ভুরি গেলঅ।

⁸ পরেদি এক সময়োত্‌ মিসর দেজর্‌ বেক্‌ খেমতাগান এন্‌ এক্কো নূয়ো রাজার্ আঢত্‌ গেলঅ যিবে যোষেফ পৌইদ্যেনে কিচ্চু হবর্‌ ন পেদঅ।

⁹ তে তার্ মানুচ্চুনোরে কলঅ, “চঅ, ইস্রায়েলীয়গুনে আমাত্তুন্‌ জনেদি আর বলেদি বেশ্ ওইয়োন।

¹⁰ তারা জনেদি যেন আর বাড়ি ন-পারন্‌ সেনত্যে এজঅ, আমি তারা লগে চালাগি গুরিনে চুলিই; সিয়েন ন-গুরিলে যুদ্ধোর সময়োত্‌ তারা দগেনলে আমা শত্রুগুনো লগে আত্‌ মিলেইনে আমা বিরুদ্ধে যুদ্ধো গুরিবাক্ আর পরেদি দেজ্‌ছান ছাড়ি যেবাক্কোই।”

¹¹ সেনত্যে অমকদ কামত্‌ খাদেইনে ইস্রায়েলীগুনো উগুরে অত্যেচার্ গুরিবার আজাই মিসরীয়গুনে তারা উগুরে সদ্দার্ নেযেলাক্। ফরৌণর শোজ্যগুন থুবেবাত্যে ইস্রায়েলীয়গুনে পিথোম আর রামিষেষ নাঙে দ্বিয়ান শঅর্‌ বানেলাক্।

¹² মাত্তর্‌ তারা উগুরে যেদক্‌ অত্যেচার্ গরা অলঅ সেদক্‌ তারা জনেদি বাড়ি যেইনে দেজ চেরোকিত্তেদি ছিদি পড়িলাক্। সেক্কে ইস্রায়েলীয়গুনোত্তে মিসরীয়গুনো মনত্‌ অমকদ দর্‌বুক সোমেল।

¹³ তারা তারারে আরঅ জদবদে কাম্‌ গুরিবাত্তে বাধ্য গুরিলাক্।

¹⁴ খেদর্ অন্য বেক্‌ কামানি সমারে তারা সিগুনো উগুরে সিবিদি আর ইট্‌দলা বুয়োনা অমকদ দুগোর্‌ কামানিয়ো জোর্ গুরি দিলাক্ আর তারার জিংকানিগানি তিদে গুরি দিলাক্। এদক্কানি দুগোর্‌ কাম্‌ খাদেবাত্তে যেইনে মিসরীয়গুনে তারা উগুরে অমকদ চিৎ-নপুজ্যে বেবহার গুরিদাক্।

¹⁵ ইগুনবাদে শিফ্রা আর পূয়া নাঙে দ্বিজন ইব্রীয়, অত্তাৎ ইস্রায়েলীয় ওঝাগুনোরে মিসর রাজাবো কোই দিলো,

¹⁶ “গুরো অবার্‌ অক্তত্ ইব্রীয় মিলেগুনোরে বল্‌ দিবাত্তে গেলে তুমি গমেডালে রিনি চেবা তারা গুরোগুন্‌ মিলে না কি মরদ; মরদ অলে তারারে মারে ফেলেবা আর মিলে অলে বাজেই রাগেবা।”

¹⁷ মাত্তর্‌ সেই ওঝাগুনে গোজেনরে দোরেইনে চুলিদাক্। সেনত্যে মিসর রাজাবোর উগুম মজিম কাম্‌ ন-গুরিনে তারা মরদ পূয়োগুনোরেয়ো বাঁজেই রাগেলাক্।

¹⁸ সেক্কে রাজাবো সেই ওঝাগুনোরে ডাগি আনিনে কলঅ, “কিত্তে তুমি এ কামান্‌ গরর্? মরদ পূয়োগুনোরে বাঁজেই রাগর্‌ কিত্তে?”

¹⁹ জোবত্‌ তারা ফরৌণরে কলাক্, “ইব্রীয় মিলেগুন মিসরীয় মিলেগুন ধোক্ক্যেন নয়। তারার্‌ অমকদ বল্ আঘে, ওঝাগুনে তারা ইধু লুমিবার্‌ আগেদি তারার গুরোগুন্‌ ওই যান।”

²⁰ গোজেনে সেই ওঝাগুনোরে রোক্ষ্যে গুরিলো। ইস্রায়েলীয়গুনে জনেদি বাড়া ধুরিলাক্ আর তারা জদবদে বোলী ওই উদিলাক্।

²¹ সেই ওঝাগুনে গোজেনরে ভক্তি গুরিদাক্‌ বিলিনে তে তারার্‌ পূয়োগুন্দোই বংশ বাড়েই দিলো।

²² পরেদি ফরৌণে তা মানুচ্চুনো উগুরে এই উগুমান্‌ জারি গুরিলো, “ইব্রীয়গুনো ভিদিরে কনঅ পূয়োর্ জর্ম অলে তুমি তারে নীল গাঙত্‌ ফেলেই দিবা, মাত্তর্‌ মিলেগুনোরে বাঁজেই রাগেবা।”