ইষ্টের 9 - Chakma Bibleযিহূদীগুনোর জিদেনা 1 অদর মাজর্, অত্তাৎ বার মাজর্ তের দিনোত্ রাজার উগুমান কামত্ লাগেবার অক্ত এলঅ। এ দিনোত্ যিহূদীগুনোর শত্রুগুনে তারারে দোঙেবার্ আজা গোজ্যন্, মাত্তর্ ঘটনাগান অলঅ উগুদো। যিহূদীগুনোরে যিগুনে ঘিনেইদাক্ যিহূদীগুনেই তারারে দোঙেলাক্। 2 যিগুনে তারারে ভস্ত গুরিবাত্তে চেইয়োন্ তারারে আক্রমণ গুরিবাত্তে যিহূদীগুনে রাজা অহশ্বেরশর বেক্ জাগানিত্ তারার্ নিজো নিজো শঅরানিত্ এগত্তর্ অলাক্। তারার্ বিরুদ্ধে কনজনে ন-এলাক্, কিত্তেই অন্য জাদর্ মানুচ্চুনে তারারে দরা ধুরিলাক্। 3 জাগায়ানির বেক্ দাঙর্ পোজিশনর্ কাম্গুরিয়্যেগুনে, রেজ্যর্ আর দাঙর্ চাগালার শাজন্গুরিয়্যেগুনে আর রাজার অন্য কামগুরিয়্যেগুনে যিহূদীগুনোরে বল্ দিয়্যে ধুরিলাক্, কিত্তেই তারা মর্দখয়রে দোরেয়োন্। 4 মর্দখয়ে রাজঘরর্ বেগঅ দাঙর্বো অলঅ; তা নাঙান্ সে চাগালাত্ বেক্ জাগায়ানিত্ হবর্ পেলাক্ আর তে দিন দিন খেমতাবলা ওই উদিলো। 5 যিহূদীগুনে তারার্ বেক্ শত্রুগুনোরে শেজ্ গুরিবাত্তে, মারে ফেলেবাত্তে আর এক্কুবারে শেজ্ গরা ধুরিলাক্ আর যিগুনে তারারে ঘিনেইদাক্ তারা উগুরে যিয়েন্ হুজি সিয়েনই গরা ধুরিলাক্। 6-10 শূশনর্ তাম্বুলোত্ তারা পাচশত্ মান্জ্যরে মারে ফেলেলাক্। তারা যিহূদীগুনোর শত্রু হম্মাদাথার পূঅ হামনর দশজন পূঅরে মারে ফেলেলাক্। তারার্ নাঙানি অলঅ পর্শন্দাথঃ, দল্ফোন, অস্পাথঃ, পোরাথঃ, অদলিয়ঃ, অরীদাথঃ, পর্মস্ত, অরীষয়, অরীদয় আর বয়িষাথঃ। মাত্তর্ তারা লুদেয়্যে পযাপিরানিত্ আঢ্ ন-দিলাক্। 11 শূশনর্ কেম্পত্ যিগুনোরে মারে ফেলা ওইয়্যে তারার্ সোংখ্যেগুন্ সেদিন্যে রাজারে জানা অলঅ। 12 রাজা সেক্কে রাণী ইষ্টেররে কলঅ, “শূশনর্ তাম্বুলোত্ যিহূদীগুনে পাচশঅ মানুচ্ আর হামনর দশজন পূঅরে মারে ফেলেয়োন। রাজার বাদবাগি চাগালানিত্ তারা কিজেনি কি গোজ্যন্। ইক্কিনে তঅ কোজোলিগান্ কি? সিয়েন্ তরে দিয়্যে অবঅ। তুই কি চাজ্? সিয়েন্অ গরা অবঅ।” 13 জোবত্ ইষ্টেরে কলঅ, “মহারাজর যুনি গম্ বিলিনে মনে অয় সালে এচ্চ্যে ধোক্ক্যেন্ এযেত্তে কেল্যেয়ো একই কাম্ গুরিবাত্তে শূশনর্ যিহূদীগুনোরে উগুম্ দিয়্যে ওক্; আর হামনর দোশ্চো পূঅরে ফাসি দিয়্যে ওক্।” 14 রাজা সিয়েন্ গুরিবাত্তে উগুম দিলো। শূশনত্ রাজার সেই উগুমান ফগদাঙ্ গরা অলঅ আর মানুচ্চুনে হামনর দোশ্চো পূঅরে ফাসি দিলাক্। 15 শূশনর্ যিহূদীগুনে অদর মাজর্ চৌদ্দো দিনোত্ একসমারে এগত্তর্ ওইনে সিয়েনত্ তিনশঅ মান্জ্যরে মারে ফেলেলাক্, মাত্তর্ তারা লুদেয়্যে পযাপিরানিত্ আঢ্ ন-দিলাক্। 16 এ ভিদিরে রাজার দাঙর্ চাগালাগানিত্ বাদবাগি যিহূদীগুনেয়ো নিজো জিংকানিগানি রোক্ষ্যে গুরিবাত্তে আর তারার্ শত্রুগুনোর আঢত্তুন্ মাব্ পেবাত্তে একলগে এগত্তর্ অলাক্। তারা তারার্ পাচাত্তুর্ আজার্ শত্রুরে মারে ফেলেলাক্ মাত্তর্ কনঅ লুদেয়্যে পযাপিরাত্ আঢ্ ন-দিলাক্। 17 অদর মাজর্ তের দিনোত্ এ ঘটনাগান ঘুদিলো আর চৌদ্দো দিনোত্ তারা জিরেলাক্। দিন্নো তারা মেইট্বানর আর হুজির্ দিন ইজেবে পালেলাক্। 18 মাত্তর্ শূশনর্ যিহূদীগুনে তের আর চৌদ্দ দিনোত্ একসমারে এগত্তর্ ওইয়োন। সে পরেদি পন্দর দিনোত্ তারা জিরেলাক্ আর দিন্নোরে হানার আর ফুত্তি গুরিবার দিন ইজেবে পালেলাক্। 19 ইয়েনত্যেই আদামর্ যিহূদীগুনে, অত্তাৎ যিগুনে দেবাল নেইয়্যে জাগাত্ বজত্তি গরন্ তারা অদর মাজর্ চৌদ্দ দিনোর দিন্নোরে হুজির আর মেইট্বানর দিন আর একজন আরেকজনরে হানা পাদেবার দিন ইজেবে পালান্। পূরীম পরব্ পালানা 20 মর্দখয় এ বেক্ ঘটনাগানি লিগি রাগেল আর রাজা অহশ্বেরশর রেজ্যর দূরোত্ বা কায়-কুরে বেক্ চাগালানিত্ যিহূদীগুনো ইদু চিদি লিগিনে পাদেল। 21 তে তারারে উগুম দিলোদে যেনে তারা পত্তি বজর অদর মাজর্ চৌদ্দো আর পনর দিন দ্বিবে পালান। 22 ইয়েনর্ ভেদ্তান্ অলঅ, এ দ্বিবে দিনোত্ যিহূদীগুনে তারার্ শত্রুগুনোর আঢত্তুন্ মাব্ পেইয়োন আর সে মাজত্ তারার্ দুঘ্ আর আবিলেচ্ হানাগান্ মেইট্বান পালেইনে বুদুলি যেইয়্যে। তে তারারে লিগিলো যেনে তারা সেই দিনুনোত্ মেইট্বান আর হুজির দিন আহ্ একজন আরেকজনর ইদু খানা পাদেবার আর নাদামানুচ্চুনো ইদু বক্শিজ্ দিবার দিন বিলিনে পালান্। 23 সেনত্তেই যিহূদীগুনে যেধোক্কেন্ আরাম্ভ গোজ্যন্ আর মর্দখয় তারারে যেধোক্কেন্ লেখ্যে সেবাবোত্যে দ্বিবে দিন পালেবাত্তে তারা রাজী অলাক্। 24 ইয়েনর্ ভেদ্তান্ অলঅ, বেক্ যিহূদীগুনোর শত্রু অগাগীয় হম্মাদাথার পূঅ হামনে যিহূদীগুনোরে ভস্ত আর কট্টা কট্টা গুরিবার আর এক্কুবারে শেজ্ গুরি দিবার্ কুজুরোমি গোজ্যন্ আর সেনত্তেই তে পূর, অত্তাৎ চাম্বা চেইয়োন্। 25 মাত্তর্ হামনর কুজুরোমিগানি যেক্কে রাজার কানত্ যেইয়্যে সেক্কে তে লিগিনে উগুম্ দিয়্যেগান্ যেনে যিহূদীগুনোর বিরুদ্ধে হামনে যে কুজুরোমিগান্ ফন্দি গোজ্যে সিয়েনি তার্ নিজো মাধাত্ পড়ে আর তারে আহ্ তা পূঅগুনোরে ফাসি দিয়্যে অয়। 26-27 সেনত্তেই পুর কধাগানত্তুন্ এ দিনুনোরে কুয়ো অয় পূরীম। সেই চিদিগানত্ যিয়েনি লেগা এলঅ আর তারা উগুরে যিয়েনি ঘোট্যে সেনত্যেই যিহূদীগুনে ঠিগ্ গোজ্যন্দে, তারা এক্কান্ সুদোম্ থিদেবর্ গুরিবাক্। তারা আর তারার্ গুট্টিগুনে আর যিগুনে যিহূদী ওই যেইয়োন্ তারা বেক্কুনে সে চিদিগানর উগুম্ আর ঠিগ্ সময় মজিম পত্তি বজর্ এ দিনোত্ দ্বিবে হামাক্কাই পালেবাক্। 28 পত্তি চাগালার্ পত্তি শঅরর্ পত্তি গিরির্ বংশর পর বংশ ধুরিনে এ দ্বিবে দিন মনত্ গুরিবাক্ আর পালেবাক্। সেক্কে যিহূদীগুনো ভিদিরেত্তুন্ পূরীমোর সেই দ্বিবে দিন পালানা কনদিনঅ ন-থামেব আর তারার্ বংশধরুনোর মনত্তুন্ সে কধাগানি বাদ ন যেবঅ। 29 সেনত্তেই অবীহলিয়োর ঝি রাণী ইষ্টের আর মর্দখয় পূরীমোর এ সুদোমান্ থিদেবর্ গুরিবাত্তে এ দ্বিলম্বর চিদিগান্ পুরো খেমতালোই লিগিলো। 30 অহশ্বেরশর রেজ্যর্ একশঅ সাতেশ্চান্ চাগালার পুরো যিহূদীগুনো ইদু মর্দখয়ে শান্তি আর নিরাপত্তার কধা লেখ্যে চিদি পাধেই দিলো। 31 সে চিদিগান পাদা ওইয়্যে যেনে তারা ঠিগ্ সময়োত্ যিহূদী মর্দখয় আর রাণী ইষ্টেরর্ উগুম্ মজিম্ পূরীমোর এ দ্বিবে দিন পালেবাত্তে থির্ গুরি পারন্, যেধোক্কেন্ গুরি তারা নিজোরে আর তারার্ বংশধরুনোত্তে অন্য উবোস্ থানা আর আবিলেচ্ হানার্ অক্তবো ঠিগ্ গোজ্যন। 32 ইষ্টেরর্ উগুমে পূরীমোর এ সুদোমানি থির্ গরা অলঅ আর সিয়েনি লিগি রাগা অলঅ। |
Copyright © 2021 Bangladesh Bible Society
Bangladesh Bible Society