ইষ্টের 8 - Chakma Bibleযিহূদীগুনোর পক্ষে রাজার উগুমান্ 1 সেদিন্যে রাজা অহশ্বেরশে যিহূদীগুনোর শত্রু হামনর সোম্বোত্তিগানি রাণী ইষ্টেররে দিলো। ইয়েনর্ পরেন্দি মর্দখয় রাজার মুজুঙোত্ লুমিলো, কিত্যে ইষ্টের সমারে তার্ কুদুম্মোর্ কধাগান ইষ্টেরে রাজারে জানেয়্যে। 2 রাজা তার্ সই দিবার যে আন্দিক্কো হামনর ইত্তুন্ নেযেয়্যে সিবে নিজোর আঢত্তুন্ খুলিনে মর্দখয়রে দিলো। ইষ্টেরে হামনর সোম্বোত্তিগানি উগুরে মর্দখয়রে নেযেল। 3 ইষ্টেরে রাজার টেঙত্ পড়িনে কানদে কানদে আরঅ তাইদু কোজোলি গুরিলো। যিহূদীগুনোর বিরুদ্ধে অগাগীয় হামনে যে কুজুরোমি সল্লা গোজ্যে সিয়েনি বন্ধ গুরি দিবাত্তে তে রাজারে কোজোলি গুরিলো। 4 সেক্কে রাজা তার্ সনার লুদিক্কো ইষ্টেরর্ ইন্দি বাবেই দিলো আর ইষ্টেরে উদিনে রাজার মুজুঙোত্ থিয়্যেল। 5 ইষ্টেরে কলঅ, “মহারাজর যুনি গম্ বিলিনে মনে অয়, তে যুনি মরে দোয়্যের্ চোগেন্দি দেগে আর যুনি মনে গরেদে, কামান্ গরানা উচিত্ আর যুনি তে মঅ উগুরে হুজি ওই থায়, সালে মহারাজর পুরো রেজ্যত্ যিহূদীগুনোরে ভস্ত গুরিবাত্তে ফন্দী গোজ্যে অগাগীয় হম্মাদাথার পূঅ হামনে যে চিদিগান লেখ্যে সিয়েন্ বাতিল গুরিবাত্তে এক্কান্ উগুম্ লেগা ওক্। 6 মঅ জাদ্তুনো উগুরে আর মর্ নিজো মানুচ্চুনো উগুরে দযা লামি এবঅ সিয়েন্ দেগিনে মুই কেধোক্কেন্ গুরিনে সোজ্য গুরিম।?” 7 সেক্কে রাজা অহশ্বেরশে রাণী ইষ্টের আর যিহূদী মর্দখয়রে কলদে, “হামনে যিহূদীগুনোর বিরুদ্ধে কাম্ গোজ্যে বিলিনে মুই তার্ সোম্বোত্তিগানি ইষ্টেররে দুয়োং আর মানুচ্চুনে তারে ফাসি দুয়োন। 8 মাত্তর্ রাজার নাঙে লেখ্যে আর রাজার আন্দিক্কোই সীলমহ্র মাজ্যে কনঅ উগুম্ বাদ দিয়্যে ন-যায়। সেনত্তেই ইক্কিনে যেধোক্কেন্ তমার্ গম্ বিলিনে মনে অয় সেই যিহূদীগুনোর পক্ষে রাজার নাঙে আর এক্কান্ উগুম্ লিগিনে রাজার সই গোজ্যে আন্দিক্কোলোই সীলমহ্র মারঅ।” 9 সেই অক্তত্ তিন মাজত্, অত্তাৎ সীবন মাজর্ তেইশ দিনোত্ রাজার লিগিয়্যেগুনোরে ডাগা অলঅ। মর্দখয়র উগুম মজিম্ হিন্দুস্থানত্তুন্ কূশ সং একশঅ সাতেশ্সো চাগালার্ যিহূদীগুনোর, রেজ্যর্ আর চাগালার্ শাজন্গুরিয়্যেগুনোর আর দাঙর্ পোজিশনর্ কামগুরিয়্যেগুনো ইদু চিদি লেগা অলঅ। এ চিদিগান পত্তি চাগালার্ অক্ষর আর পত্তি জাদর্ ভাষা মজিম্ আহ্ যিহূদীগুনোর অক্ষর আর ভাষা অনুসারে লেগা অলঅ। 10 মর্দখয় সেক্কে রাজা অহশ্বেরশর নাঙে চিদিগানি লিগিনে রাজার সোই গোজ্যে আন্দিক্কোলোই সীলমহর্ গুরিলো। সে পরেন্দি তে রাজার এক বাবোত্যে জোরেই দাবা দি পারেদে ঘোড়ালোই হবর্ কোইয়্যেগুনোরে দিইনে চিদিগানি পাধেই দিলো। 11-12 রাজা অহশ্বেরশে সে চিদিগানত্ অদর মাজর্, অত্তাৎ বার মাসর তের দিনোত্ যেনে তার্ রেজ্যর পত্তি শঅরর্ যিহূদীগুনে এগত্তর্ ওইনে নিজোরে রোক্ষ্যে গুরি পারন্ সেই অধিকারান দিলো। কনঅ জাদর্ বা চাগালার্ মানুচ্চুনে যিহূদীগুনোরে আর তারার্ মিলেগুনোরে আর ঝি-পূঅগুনোরে আক্রমণ গুরিলে তারা সে দল্লোরে ভস্ত গুরিবার, অত্তাৎ মারে ফেলেবার বা এক্কুবারে শেজ্ গুরি দিবার অধিকারান পেলাক্, আর সে শত্রুগুনোর সোম্বোত্তিগানি লুদেবার অধিকারান পেলাক্। 13 রাজার উগুম পত্তি চাগালাত্ সুদোম্ মজিম ফগদাঙ্ গরা অলঅ আর পত্তি জাদরে সিয়েন্ জানা অলঅ যেনে যিহূদীগুনে সেদিন্যে তারার্ শত্রুগুনো উগুরে হেনা সুজিবাত্তে যুক্কোল্ থেই পারন্। 14 রাজার বিশেজ্ ঘোড়াত্ চড়িনে হবর্ কোইয়্যেগুনে রাজার উগুমে যাদিমাদি নিগিলি গেলাক্। শূশনর্ তাম্বুলত্অ সেই উগুমান জানা অলঅ। 15 মর্দখয়ে মসীনা সুদোর্ বিগুনো রঙর্ পোজাগ উগুরে য়েল্ আর ধুব্ রংয়র্ রাজপোজাক্ উরিনে আর সনার এক্কো দাঙর্ মুকুট মাদাথ্ দিইনে রাজার মুজুঙোত্তুন্ নিগিলি গেলঅ। শূশন শঅরর্ মানুচ্চুনে রঅ ছাড়িনে হুজিয়ে ফূত্তি গুরিলাক্। 16 যিহূদীগুনোত্তে সময়ান অলদে অমকদ হুজির্, ফূত্তির্ আর সর্মানর। 17 পত্তি চাগালাত্ আর শঅরত্ যিয়েনত্ যিয়েনত্ রাজার উগুম গেলঅ সিদুগোর্ যিহূদীগুনো ভিদিরে হুজির্-ফূত্তির্ পরব্ পালা অলঅ। অন্য জাদত্তুন্ ভালোকজনে যিহূদী ওই গেলাক্, কিত্যে তারা যিহূদীগুনোরে দোরেয়োন্। |
Copyright © 2021 Bangladesh Bible Society
Bangladesh Bible Society