ইষ্টের 2 - Chakma Bibleইষ্টের রাণী অলঅ 1 পরেদি রাজা অহশ্বেরশর রাগ্কান কুমি গেলে তে বষ্টীর কধা, অত্তাৎ বষ্টী যিয়েন্ গোজ্যে আর তা পৌইদ্যেনে যে উগুমান্ দিয়্যে ওইয়্যে সিয়েন্ চিন্তে গুরিলো। 2 সেক্কে রাজার্ নিজো কাম্গুরিয়্যেগুনে কলাক্, “মহারাজত্তে দোল্ গাবুজ্যে মিলে তগা ওক্। 3 মহারাজে তা রেজ্যর্ বেক্ জাগানিত্ কাম্ গরেদে মানুচ্ নেযেল যেনে তারা সেই বেক্ দোল্ মিলেগুনোরে শূশনর্ তাম্বুলোত্ রাজঘরর্ হারেমত্ পাদেই দি পারন্। মহারাজ হেগয় নাঙে যে ইজিরেবো আঢত্ মিলেগুনোর্ ভারান্ দিয়্যে তে এ মিলেগুনোরে দেগাশুনো গোরোক্। তারার্ দোলানি বাড়েবাত্তে যিয়েনি লাগে সিয়েনি দিয়্যে ওক্। 4 সে পরেদি মহারাজর্ যিবে গম্ লাগে তেয়ই বষ্টীর জাগানত্ রাণী অবঅ।” এ সল্লাগান রাজার ইদু গম্ লাগিলো। তে সেধোক্কেন্ কাম্ গুরিলো। 5 সে অক্তত্ মর্দখয় নাঙে বিন্যামীন-গুট্টির এক্কো যিহূদী শূশনর্ তাম্বুলোত্ এলঅ। তে অলদে যায়ীরোর্ পূঅ, যায়ীর শিমিয়ির পূঅ আর শিমিয়ি কীশোর্ পূঅ। 6 যিহূদার রাজা যিকনিয়োর, অত্তাৎ যিহোয়াখীনোর লগে যিদুক্কুন্ মান্জ্যরে বাবিলোর রাজা নবূখদ্নিৎসরে যিরূশালেমত্তুন্ বন্দী গুরিনে নেযেয়্যে মর্দখয়র গুট্টিবোয়ো তারা সমারে এলঅ। 7 মর্দখয়র কুত্তোবোর্ হদসা নাঙে এক্কো মিলে এলঅ। মিলেবোর্ মা-বাপ্ নেই বিলিনে মর্দখয় তারে পালেয়্যে। এ মিলেবোরে, যিবেরে ইষ্টেরঅ কুয়া অদঅ, তে কিয়্যেন্দি আর চেঙেরান্দি অমকদ দোল্ এলঅ। মিলেবোর্ মা-বাপ্পুনে মুরি যানার্ পরেন্দি মর্দখয় তারে নিজোর্ ঝি ইজেবে মানি ললঅ। 8 রাজার উগুম্ আর হুকুমানি ফগদাঙ্ গরা অলে সে পরেন্দি ভালোক্কুন্ মিলেরে শূশনর্ তাম্বুলোত্ আনিনে হেগয়র দেগাশুনোর্ অধীনোত্ থুয়ো অলঅ। ইষ্টেররেয়ো রাজঘরত্ নেযেইনে হেগয়র কায়-কুরে থুয়ো অলঅ। 9 মিলেবোরে হেগয়র্ অমকদ গম্ লাগিলো আর হেগয় ইত্তুন্ মিলেবো গম্ বেবহার্ পেলঅ। হেগয়ে পৌইল্যাত্তুন্ ধুরি তার্ দোলান্ বাড়েবাত্তে পযাপিরানি দিলো আর বিশেজ্ হানা দিলো। তে রাজঘরত্তুন্ বেঈ লোইনে সাতজন চাগর্ তাত্তেই নেযেল আর হারেমর বেগত্তুন্ গম্ জাগানত্ তারে আর তার্ চাগরানীগুনোরে রাগেল। 10 ইষ্টেরে তার্ জাদ আর বংশ পরিচয় ন-দিলো, কিত্যে মর্দখয় তারে মানা গোজ্যে। 11 ইষ্টেরে কেন্জান্ আঘে আর তার্ কি অর্ ন-অর্ সিয়েনি জানিবাত্তে মর্দখয় পত্তিদিন হারেমর উদোন মুজুঙোত্ আদাউদো গুরিদো। 12 রাজা অহশ্বেরশর ইদু কনঅ মিলের্ যেবার্ পালা এবার্ আগেন্দি এক বজর্ সং মিলেগুনোত্তে দোল্ অবার্ বেবস্থা গরা অদঅ। তাত্তুন্ ছয় মাস গন্ধরজর্ তেল্ আর ছয় মাস তুম্বাজ্ তেল্ আর সাজিবার্ জিনিসপাদি বেবহার্ গরা অদঅ। 13 কনঅ মিলে রাজার ইদু যেবার অক্ত অলে হারেমত্তুন্ রাজার মুজুঙোত্ নেযেবাত্তে তে যিয়েন চেদঅ তারে সিয়েন দিয়্যে অদঅ। 14 সাজোন্যে অক্তত্ তে যিয়েনত্ যেদঅ আর বেন্যেমাদান্ দ্বিতীয় ঘরর্ মোগ্কুনোর্ কাম ভারান্ পেইয়্যে রাজার নেযেয়্যে ইজিরে শাশ্গসর চেইচিদিবার অধীনোত্ হারেমর অন্য গুদিবোত্ ফিরি এদাক্। রাজা তা উগুরে হুজি ওইনে নাঙ্ ধুরি ন-ডাগিলে তে আর রাজার ইদু যেই ন-পারিদো। 15 মর্দখয় তা কুত্তো অবীহয়িলোর যে মিলেবোরে নিজোর ঝি ইজেবে মানি লোইয়্যে সে মিলেবোর, অত্তাৎ ইষ্টেরর্ যেক্কে রাজার ইদু যেবার্ পালা এলঅ সেক্কে হারেমর চেইচিদিয়্যেগুনে রাজার নেযেয়্যে ইজিরে হেগয় তারে যিয়েনি নেযেবাত্তে কলঅ সিয়েনি বাদে তে আর কিচ্ছু ন-চেলঅ। যে কনজনে ইষ্টেররে চেলে তা চোগোত্ তারে গম্ লাগিদো। 16 রাজা অহশ্বেরশর রাজাগিরির সাত বজরর্ দশ মাজত্, অত্তাৎ টেবেৎ মাজত্ ইষ্টেররে রাজঘরত্ রাজার ইদু নেযা অলঅ। 17 অন্য মিলেগুনোত্তুন্ ইষ্টেররে রাজা বেশ্ কোচ্পেলঅ আর তে অন্য গাবুজ্যে মিলেগুনোত্তুন্ রাজার ইদু বেশ্ দোয়্যে-মেয়্যে আর কোচ্পানা পেলঅ। সেনত্তেই রাজা তা মাদাথ্ মুকুট পিনেই দিলো আর বষ্টীর জাগানত্ ইষ্টেররে রাণী বানেল। 18 সে পরেন্দি রাজা তার্ দাঙর্ পোজিশনর্ মানুচ্চুনোরে আর তার্ কামর্ সদ্দারুনোত্তেই ইষ্টেরর্ হানা নাঙে এক্কো দাঙর্ হানা দিলো। তে বেক্ জাগানির্ মানুচ্চুনোত্তে ছুটি ফগদাং গুরি দিলো আর খুলো আত্তোই বোউত্ দান গুরিলো। মর্দখয়ে কুজুরোমির কধানি হবর্ পেলঅ 19 দ্বিবারত্ গাবুজ্যে মিলেগুনোরে তুবেবার্ সময়োত্ মর্দখয়ে রাজঘরর্ গেদোত্ বোজেবার জাগানত্ নেযা ওইয়্যে। 20 ইষ্টেরে মর্দখয়র কধামজিম্ তা বংশ পরিচয় আর জাদর্ কধা লুগেল। ইষ্টেরে মর্দখয়র ইদু লালন-পালন অবার্ অক্তত্ যেধোক্কেন্ মর্দখয়র কধামজিম্ চলিদো সেক্কেয়ো তে সেধোক্কেন্ চলিদো। 21 মর্দখয়ে রাজঘরর্ গেদোত্ থেবার্ অক্তত্ একদিন্যে রাজঘরর্ চুগিদারুনো ভিদিরেত্তুন্ বিগ্থন আর তেরশ নাঙে রাজার দ্বিজন কামগুরিয়্যে রাগ্ গুরিনে রাজা অহশ্বেরশরে মারে ফেলেবার্ কুজুরোমি গুরিলাক্। 22 মর্দখয়ে কুজুরোমির্ কধা হবর্ পেইনে রাণী ইষ্টেররে সে কধাগান জানেল। রাণী মর্দখয়র নাঙান্ কোইনে সিয়েন্ রাজারে জানেল। 23 সে পৌইদ্যেনে হবর্ নেযেইনে যেক্কেনে জানা গেলদে কধাগান সত্য সেক্কে সে দ্বিজন চাগররে ফাসি দিয়্যে অলঅ। এ বেক্ কধানি রাজার মুজুঙোত্ বিজগ বোইবোত্ লেগা অলঅ। |
Copyright © 2021 Bangladesh Bible Society
Bangladesh Bible Society