ইফিষীয় 6 - Chakma Bibleপুয়ো-ছা আর মা-বাব উগুরে উপদেচ্ 1 পুয়ো-ছা লগ্, প্রভু যেধোক্ক্যেন চায় সেধোক্ক্যেন গুরি তুমি মা-বাবর্ বাধ্য ওইনে চলঅ, কিয়া সিয়েনই অনা উজিত্। 2 পবিত্র বোইবোত্ পত্তম্ যে উগুমো সমারে এগেমান্ আঘে সিয়েন এই-“তমা মা-বাবরে সর্মান গরঅ, 3 যেন তর্ মংগল অয় আর তুই ভালোক্ দিন সং এ পিত্থিমীত বাঁজি থেই পারচ।” 4 তুমি যিগুনে বাপ, তুমি তমার পুয়ো-ছাগুনোরে তোচ্চ্যে ন-লাগেইয়ো, বরং প্রভুর শাসন আর শিক্ষ্যেই তারারে মানুচ্ গুরি তুলো। চাগর্ আর গিরোজ উগুরে উপদেচ্ 5 তুমি যিগুনে চাগর্, তুমি যেধোক্ক্যেন খ্রীষ্টর্ বাধ্য সেধোক্ক্যেন দর্ আর সর্মান লগে মনত্তুন্ তমার এ জগদর্ গিরোজ্চুনোর্ বাধ্য ওইয়ো। 6 মান্জ্যরে হুজী গুরিবার মনভাব্পোই তমা গিরোজ্চুনোর চোগো মুজুঙোত্ বানা তারার্ বাধ্য ন-ওইয়ো; তাত্তুন্ বরং খ্রীষ্টর্ চাগর্ ইজেবে গোজেনর্ আওজ্চান মনেপরাণে পালেইনে তুমি গিরোজ্চুনোর বাধ্য ওইয়ো। 7 তুমি যেন মান্জ্যরে সেবা ন-গরর্ মাত্তর্ প্রভুর সেবা গরর্ সেবাবোত্যে গুরি হুজি মনে তমা গিরোজ্চুনোরে সেবা গরঅ, কিয়া তুমি জানঅ যে, 8 পত্তিজনে তার বেক্ গম কামানিত্যে প্রভুত্তুন্ বক্শিজ্ পেবঅ-সিয়েন সেই চাগর্বো ওক্, আর গিরোজ্সো ওক্। 9 তুমি যিগুনে গিরোজ্, তুমিয়ো তমার চাগরুনো উগুরে ঠিগ্ সেবাবোত্যে বেবহার গরঅ। তারারে দর্বুগ্ দেগানা বাদ্ দুয়ো, কিয়া তুমি দঅ কোই পারঅ যে, তারার্ আর তমার একই প্রভু আর তে স্বর্গত্ আঘে; তা চোগেদি বেক্কুনে সং সং। শদানর্ বিরুদ্ধে যুদ্ধ 10 যেরেদি কং, প্রভু লগে মিজেইনে তার্ দিয়্যে দাঙর্ খেমতালোই বোলী অ। 11 যুদ্ধোত্যে গোজেনর্ দিয়্যে বেক্ সাজ্-পোজাগ্কানি পিনি লঅ, যেন তুমি শদানর্ বেক্ চালাগ্কানির্ বিরুদ্ধে দরমর ওইনে থিয়্যেই পারঅ। 12 আমার্ এ যুদ্ধোগান দঅ কনঅ মান্জ্যর বিরুদ্ধে নয়, বরং সিয়েন আন্ধার রেজ্যর্ বেক শাসনগুরিয়্যে আর খেমতার্ অধিকারীগুনোর বিরুদ্ধে, আন্ধার জগদর্ খেমতাবলা আত্মাগুনোর্ বিরুদ্ধে, আর আগাজর্ বেক ভান্ন্যেই আত্মাগুনোর বিরুদ্ধে। 13 সেনত্যে তুমি যুদ্ধোত্যে গোজেনর্ দিয়্যে বেক্ সাজ-পোজাগ্কানি পিনো, যেন শদানে যেদিন্যে আক্রমণ গুরিবো সেদিন্যে তুমি তারে থেগেই পারঅ আর বেক্কানি থুম্ গুরিনে থির্ ওইনে থিয়্যেই থেই পারঅ। 14 ইয়েনত্যে সত্যলোই কমর্ বানিনে, বুগ্ রোক্ষ্যে গুরিবাত্যে গম্ জিংকানিলোই বুগ্কো ঢাগিনে, 15 আর শান্তির্ গম্ হবর্ প্রচারত্যে ঠেঙানি যুক্কোল্ গুরিনে থিয়্যেই থাগঅ। 16 ইয়েনবাদে বিশ্বেজর্ ঢালানিয়ো তুলি লঅ; সেই ঢালানিলোই তুমি শদানর্ বেক্ জোল্জোল্যে সেলুন্ মারেই ফেলেই পারিবা। 17 মাঢাগুন্ রোক্ষ্যে গুরিবাত্যে গোজেনর্ দিয়্যে উদ্ধোর্ মাঢাত্ দিইনে পবিত্র আত্মার্ ছুরি, অত্তাৎ গোজেনর্ কধানি মানি লঅ। 18 পবিত্র আত্মালোই পরিচালিত ওইনে মনে-পরাণে নিত্য তবনা গরঅ। ইয়েনত্যে সজাগ্ থেইনে গোজেনর্ বেক্ মানুচ্চুনোত্যে আমিঝে তবনা গরানাত্ থাগঅ। 19 মত্যেয়ো তবনা গরঅ যেন মুই যেক্কে কধা কং সেক্কে গোজেনে মরে এমন্ ভাষা যুগেই দে যাতে মুই সাহচ্ গুরিনে তার্ দিয়্যে গম হবরর্ গুমুরো সত্যগান্ প্রচার গুরি পারং। 20 এই গম্ হবরান্ প্রচারত্যে মুই শিগোলত্ বান্যে খেলেয়ো খ্রীষ্টর দূতোর্ কাম গরঙর্। তবনা গরঅ যেন জেলো ভিদিরে থেইনে যেবাবোত্যে গুরি সেই গম্ হবরান মর্ প্রচার গরানা উচিত সেবাবোত্যেগুরি সাহচ্ গুরিনে সিয়েন গুরি পারং। শেচ্ কধা 21 মুই কেধোক্ক্যেন আঘং আর মর্ দিনুন্ কেধোক্ক্যেন গুরি কাদাঙর্ সিয়েন কোচ্পেইয়্যে ভেই আর প্রভুর বিশ্বেজি সেবাগুরিয়্যে তুখিকত্তুন্ জানি পারিবা। 22 আমা পৌইদ্যেনে যেন তুমি কোই পারঅ আর তে যেন তমারে উচ্চোমি দি পারে সেনত্যে মুই তারে তমা ইধু দিপাধেলুং। 23 বাবা গোজেনে আর প্রভু যীশু খ্রীষ্ট ভেইয়ুনোরে শান্তি, বিশ্বেজ্ আর কোচ্পানা দান গোরোক্। 24 আমা প্রভু যীশু খ্রীষ্ট উগুরে যিগুনোর্ থির্ কোচ্পানা আঘে সিগুনোর্ বেক্কুনো উগুরে গোজেনর্ দোয়্যে থোক্। |
Copyright © 2021 Bangladesh Bible Society
Bangladesh Bible Society