ইফিষীয় 4 - Chakma Bibleখ্রীষ্টর্ কিয়্যেগান্দোই এক অনা 1 প্রভুত্যে বন্দী অবস্থায় মুই তমা ইধু এ কোজোলীগান গরঙত্তে, গোজেনে যিয়েনত্যে তমারে ডাক্ক্যে সিয়েনর যগাজ্যে ওইনে চলঅ। 2 তমার খাচ্চ্যদ্তানি যেন পুরোপুরি গুরি নম্র আর নরম অয়। ধৈজ্জ্য ধরঅ আর কোচ্পানার মনভাব্পোই একজন আরেকজনরে সোজ্জ্য গরঅ। 3 যে শান্তিগানে আমারে একসমারে এগত্তর্ গোজ্জ্যে সেই শান্তিগান্দোই সুদ্ধো-সাংগ আত্মাগানে দিয়্যে যদা অনাগান্ রোক্ষ্যে গুরিবাত্যে জদবদে চেট্ট্যা গরঅ। 4 গোজেনে তমারে ডাক্ক্যে বিলিনে তমা ইধু বানা এক্কান আজা আঘে, বানা এক্কানই কিয়্যে আঘে, একজনই সুদ্ধো-সাংগ আত্মাবলা আঘে, 5 বানা একজন প্রভু আঘে, একই বিশ্বেজ্ আঘে, একই বাপ্তিস্ম আঘে, 6 বেক্কুনোর গোজেন আর বাপ বানা একজনই আঘে। তে বেক্কুনো উগুরে; তেয়ই বেক্কুনো ইধু আর বেক্কুনো মনত্ আঘে। 7 মাত্তর্ খ্রীষ্ট যেধোক্ক্যেন গুরি ঠিগ গুরি থোইয়্যে সেই ইজেব মজিম আমি পত্তি জনে যদবদে দোয়্যে পেইয়্যেই। 8 পবিত্র বোইবোত্ ইয়েনত্যে লেগা আঘেদে, তে যেক্কে স্বর্গত উদিলো, সেক্কে বন্দীগুনোরে চালেইনে নেযেল, আর তে মানুচ্চুনোরে বোউত্ দান্অ দিলো। 9 “তে উদিলো,” এ কধাগানত্তুন্ কি ইয়েন বুঝো ন-যায় যে, খ্রীষ্ট পিত্থিমীর মূঢ়োত্ সং লাম্মেগোই? 10 যিবে লাম্মেগোই তে বেক্কানি পূরোণ গুরিবাত্যে আরঅ আগাজত্তুন্অ বোউত্ উগুরে উঠ্যেগোই। 11 তে কুদুক্কুন মান্জ্যরে দূত, কুদুক্কুন মান্জ্যরে ভাববাদী, কুদুক্কুন মান্জ্যরে গম হবর্ প্রচার গুরিয়্যে আর কুদুক্কুন মান্জ্যরে পালক আর মাষ্টর ইজেবে নেযেল। 12 তে ইগুনোরে নেযেল যেন গোজেনর বেক মানুচ্চুনে তারে সেবা গুরিবাত্যে যুক্কোল্ অন্ আর এবাবোত্যেগুরি খ্রীষ্টর কিয়্যেগান গাঢেই তুলো অয়। 13 ইয়েনর্ উদ্দেচ্চ্যগান অলঅ, আমি যেন বেক্কুনে গোজেন পুয়োবো উগুরে বিশ্বেজ্ গুরিনে আর তারে গমেডালে কোই পারিনে এক ওই; আর খ্রীষ্ট যেবাবোত্যে বেক্ গুণেদি ভরা, আমিয়ো যেন সেবাবোত্যেগুরি বেক্ গুণেদি ভরা ওইনে পেলেং পেলেং ওই। সেক্কে আমি আর চিগোন গুরো ধোক্ক্যেন ন-থেবং। 14 মান্জ্যে পাজি বুদ্ধি খাদেইনে অন্যগুনোরে ভুল্ পধেদি নেযেবাত্যে যে ভুল্ শিক্ষ্যেনি দুয়োন, সেই ভুল্ শিক্ষ্যেনি ভিদিরে আমি বৈয়্যেরে দুলি উঠ্যে তুবোল ধোক্ক্যেন ইন্দি উন্দি ন-দুলিবোং। 15 আমি বরং কোচ্পানার মনভাব্পোই খ্রীষ্ট পৌইদ্যেনে সত্য কধা কবং আর বেক্কানিদি বাড়ি উদিইনে খ্রীষ্ট ধোক্ক্যেন অবং। তেয়ই দঅ কিয়্যেগানর্ মাঢা। 16 গোদা কিয়্যেগান এমন্ গুরিনে বান্ন্যে আঘেদে যে, পত্তি ভাগ্কানি যার্ যার্ জাগাত থেইনে কিয়্যেগান সমারে এগত্তর্ থায়। পত্তি ভাগে যেক্কে গমেডালে কাম্ গরে সেক্কে গোদা কিয়্যেগান মাঢাবো চাল্লই বাড়ি উদে আর কোচ্পানার্ মাধ্যমে নিজোরে গাঢেই তুলে। বিশ্বেজি ইজেবে যগাজ্জ্যে জিংকানি কাদানা 17 ইয়েনত্যে মুই কঙর্, আর প্রভুর্ ওইনে বিশেষ জোর্ দিইনে কঙর্-অযিহূদীগুনে যেবাবোত্যেগুরি বাজে চিন্তেলোই তারার্ জিংকানি কাদান্ তুমি আর্ সেবাবোত্যেগুরি জিংকানি ন-কাদেয়ো। 18 তারার্ মনানি আন্ধারত্ পড়ি আঘে। মনানি দরঅ বিলিনে তারা গোজেন পৌইদ্যেনে কিচ্চু কোই ন-পারন্, আর সেনত্যে গোজেনর্ দিয়্যে জিংকানিত্তুন্ তারা বোউত্ দূরোত্ আঘন। 19 তারার বিবেগ্কানি বাজে ওই যেইয়্যে, সেনত্যে ঈল্ ন-ওইয়্যে আওজ্চোই নানান্ বাবোত্যে অসিজি কাম্ গুরিবাত্যে তারা লাগাম নেইয়্যে কামনার্ আঢত্ নিজোরে ইরি দুয়োন্। 20 মাত্তর্ তুমি দঅ খ্রীষ্ট পৌইদ্যেনে এবাবোত্যে শিক্ষ্যে ন-পঅ। 21 তুমি তা পৌইদ্যেনে শুন্ন্য, আর তা সমারে মিলিনে তা ভিদিরে যে সত্যগান আঘে সেই অনুসারে শিক্ষ্যে পেয়ো। 22 তুমি এ শিক্ষ্যেগান পেয়োদে যে, তমা পুরোণি জিংকানির পুরোণি “মুই” পুরোণ্ কাবড় ধোক্ক্যেন বাদ দিয়্যে পরিবো, কিয়া ছলনার কামনালোই সেই পুরোণি “মুই” বর্বাদ ওই যার্। 23 সিয়েনর্ বদলে গোজেনরে তমার মনানিরে নুয়ো গুরিনে গাঢেই তুলিবাত্যে দুয়ো, 24 আর গোজেনর্ দিয়্যে নুয়ো “মুই” নুয়ো কাবড় ধোক্ক্যেন উরো। সত্যর্ নিদ্দুজিগান আর পবিত্রতালোই এই নুয়ো “মুই” গোজেন ধোক্ক্যেন গুরি বানা ওইয়্যে। 25 ইয়েনত্যে তুমি মিজে কধা ছাড়ি দুয়ো আর একজন আরেকজন ইধু সত্য কধা কঅ, কিয়া আমি বেক্কুনে একজন আরেকজন সমারে এগত্তর্। 26 যুনি রাগ গরঅ সালে সেই রাগত্যে পাপ ন-গোজ্জ্য; বেলান্ ডুবিবার আগেদি তমা রাগ্কানি বাদ্ দুয়ো, 27 আর শদানরে কনঅ সুযোগ ন-দুয়ো। 28 যে চুর্ গরে তে আর চুর্ ন-গোরোক, বরং নিজো আঢে গমেডালে কাম্ গোরোক্ যেন অভাবী মানুচ্চুনোরে দিবাত্যে তার্ কিজু থায়। 29 তমা মুয়োত্তুন্ কনঅ বাজে কধা ন-নিগিলোগ্, বরং দরকার্ মজিম অন্যরে গাঢেই তুলিবাত্যে যিয়েন গম সেবাবোত্যে কধা নিগিলোগ্, যেন যিগুনে সিয়েনি শুনোন্ সিয়েনিত্যে তারার্ উপকার অয়। 30 তুমি গোজেনর্ পবিত্র আত্মাগানরে দুঘ্ ন-দুয়ো, যিবেরে দিইনে গোজেনে উদ্ধোর্ পেবার দিন্নো সং তমারে সীলমারি থোইয়্যে। 31 নানান্ বাবোত্যে কাঙেলেত্যে ফগদাং, মেজাজ দেগানা, রাগ, জোগার্ পারিনে কোজ্জ্যে গরানা, গেইল্ দেদি আর নানান্ বাবোত্যে ইংসে তমাত্তুন্ দূর্ গরঅ। 32 তুমি একজন আরেক জন উগুরে দোয়্যেলু অ, অন্যর্ দুঘে দুঘি অ, আর গোজেনে যেবাবোত্যে গুরি খ্রীষ্টর্ মাধ্যমে তমারে খেমা গোজ্জ্যে সেধোক্ক্যেন গুরি তুমিয়ো একজন আরেক জনরে খেমা গরঅ। |
Copyright © 2021 Bangladesh Bible Society
Bangladesh Bible Society