উপদেশক 9 - Chakma Bible

বেক্কুনোর্ শেজ্ অবস্থাগান্ এক্কুই

¹ সেনত্তে মুই ইয়েনি পৌইদ্যেনে চিদে গুরিলুং আর দেগিলুং, গম্ আর জ্ঞানী মানুচ্চুনে আর তারার্ কামানি বেক্কানি গোজেন আঢত্। কনজনে হবর্ ন-পান্ তাত্তে কি বাজ্জেই আঘে-কোচ্‌পানা না ঘিনেনা।

² বেক্কুনোর্ শেজ্ অবস্থাগান্ এক্কুই-তে গম্ ওক্ বা পাজি ওক্ আর সিজি ওক্ বা অসিজি ওক্, উৎসর্বর পরব্ গোরোক্ বা ন-গোরোক্। গম্ মান্‌জ্যত্তে যেধোক্ক্যেন্, পাপীত্তেও সেধোক্ক্যেন্; যিগুনে শমক্ খান্ তারাত্তে যেধোক্ক্যেন্, যিগুনে সিয়েন গুরিবাত্তে দরান্ তারাত্তেও সেধোক্ক্যেন্।

³ বেলান তলেদি যিয়েনি ঘদে সিয়েনি ভিদিরে দুঘোর্ বেপারান্ অলঅ ইয়েন, বেক্কুনোর্ এক্কুই দজা ঘদে। ইয়েনিবাদেয়ো মান্‌জ্যর্ মনানি দুঘে ভরা আর যেদকদিন্ তে বাঁজি থায় সেদকদিন তা মনানত্ বিচের বুদ্ধি ন-থায়, আর সে পরেদি তে মুরি যায়।

⁴ জেদা মানুচ্চুনোর্ আজা আঘে; এমন কি, মরা সিংহত্তুন্ জেদা কুগুরুন্অ গম্।

⁵ জেদা মানুচ্চুনে হবর্ পান্, তারাত্তুন্ মরা পুরিবো, মাত্তর্ মরাগুনে কিচ্চু হবর্ ন-পান্। তারার্ আর্ কনঅ বক্‌শিজ্ নেই, কিত্তে তারা কধানিয়ো মানুচ্চুনে ভুলি যান্।

⁶ তারার্ কোচ্‌পানা, ঈচ্ গরানা আর ইংসে গরানা আগেদি থুম্ ওই যেইয়্যে; বেলান তলেদি যিয়েনি ঘুদিবো সেক্কে তারার্ আর কনঅ ভাগ্ ন-থেবঅ।

⁷ সেনত্তে তুই যেইনে হুজিয়ে রাজিয়ে তঅ হানাগান্ হা আর মনঅ হুজিয়ে আংগুরো-রস্ হা, কিত্তে তর্ এ কামানি গোজেনে আগে এলাফেলা গোজ্যে।

⁸ নিত্য ধুব্ কাবড় উরিনে আর মাঢাত্ তেল্ দিইনে রঙ্গ-ফুত্তি গুরিবে।

⁹ বেলান তলেদি গোজেনে তরে এ কয়েক্কো দিন দিয়্যে, তঅ জিংকানির্ সে দিনুন্ তঅ মোক্কো, যিবেরে তুই কোচ্‌পাজ, তা সমারে হুজিয়ে-রাজিয়ে কাঢা, কিত্তে বেলান তলেদি তর্ জিংকানিগান আর তর্ দুঘে কাম্ গরানা ভিদিরে ইয়েনই তর্ পাওনা।

¹⁰ তঅ আঢত্ যে কনঅ কাম্ এদঅ সাৎ সিয়েনি তর্ বেক্ খেমতালোই গুরিবে, কিত্তে তুই যে জাগানত্ যর্ সে গোর জাগানত্ কনঅ কাম্, সল্লা গরানা, বুদ্ধি বা জ্ঞান বিলিনে কিচ্চু নেই।

¹¹ বেলান তলেদি মুই আরঅ কিজু দেখ্যং, সিয়েনি অলঅ: যিগুনে যাদিমাদি দাবা দুয়োন্ তারা যে নিত্য জিদোন্, সিয়েন্ নয়; খেমতাবলাগুনে যে নিত্য যুদ্ধোত্ জিদোন্, সিয়েন্ নয়; জ্ঞানীগুনে যে নিত্য পেট্ ভুরিনে হানা পান্, সিয়েন্ নয়; বুদ্ধিবলাগুনে যে নিত্য তাগোয়্যে অন্, সিয়েন্ নয়; কাবিল্ মানুচ্চুনে যে নিত্য জু পান, সিয়েন নয়; কিত্তে তারা বেক্কুনে সময় আর সুযোগ আঢত্ বান্যে।

¹² কনজনে হবর্ ন-পান্ তার্ মরণর্ অক্তবো কক্কে এবঅ। যেধোক্ক্যেন্ গুরিনে মাছে জালত্ ধরা পড়ন্ আর পেগ্‌কুনে ফালত্ পড়ন্ সেধোক্ক্যেন্ গুরিনে দজা অদাতৎ মান্‌জ্য উগুরে এজে আর তারে ফালত্ ফেলায়।

ব কলমত্তুন্ জ্ঞানান্ গম্

¹³ মুই বেলান তলেদি জ্ঞান পৌইদ্যেনে আর এক্কান্ বেপার দেগিলুং যিয়েন মঅ মনত্ গভিন্ গুরিনে মনত্ থেলঅ।

¹⁴ এক্কান চিগোন্ শঅরত্ কয়েক্কো মানুচ্ এলাক্। এক্কো খেমতাবলা রাজা তা বিরুদ্ধে এইনে সিয়েন ঘিরিনে আক্রমণ গুরিবাত্তে যুক্কোল্ অলঅ।

¹⁵ সে শঅরত্ এক্কো জ্ঞানী নাঢা মানুচ্ এলঅ। তে তার্ জ্ঞানান্দোই শঅরান্ রোক্ষ্যে গুরিলো, মাত্তর্ কনজনে সে নাঢা মানুচ্চোরে মনত্ ন-রাগেলাক্।

¹⁶ সেনত্তে মুই কলুং, “খেমতাত্তুন্ জ্ঞানান্ গম্,” মাত্তর্ নাঢা মান্‌জ্যর্ জ্ঞানান্ ঈচ্ গরা অয় আর তা কধানি কনজনে ন-শুনোন্।

¹⁷ ভুল্ বেদমাগুনোর্ শাজন্‌গুরিয়্যেবোর্ রঅ ছাড়ানাত্তুন্ বরং জ্ঞানীগুনোর্ দোল্ কধানি শুনোনা গম্।

¹⁸ যুদ্ধোর্ আত্যেরানিত্তুন্ জ্ঞানান্ গম্, মাত্তর্ এক্কো পাপী বোউত্ গম্ গম্ কাম বর্‌বাত্ গরে।