উপদেশক 8 - Chakma Bible

¹ কন্না জ্ঞানী মান্‌জ্য ধোক্ক্যেন্? যিয়েনি ঘদে কন্না সিয়েনির অত্তগান্ বুঝে? জ্ঞানানে মান্‌জ্যর্ মুয়োনি জোল্‌জোল্যে গরে আর তার মু দরগান্ লারেই দি পারে।

রাজার্ বাধ্য অ

² মঅ উবদেশ্‌ছান ইয়েন্, তুই রাজার্ উগুমান্ পালঅ, কিত্তে গোজেন মুজুঙোত্ তুই সে শমক্তান্ গোজ্যস্।

³ যাদিমাদি রাজারে ফেলেই ন-যেয়ো। ভান্ন্যেয় কনকিজু সমারে ন-মিজেয়ো, কিত্তে রাজা তার আওজ্ মজিম্ কাম্ গরে।

⁴ রাজার্ কধানি যেক্কেনে বেক্কানিত্তুন্ দাঙর্ সেক্কেনে কন্না তারে কোই পারে, “তুই কি গোজ্যস্?”

⁵ যে তার্ উগুমানি পালায় তার্ কনঅ ক্ষতি ন-অবঅ। জ্ঞানী মান্‌জ্যর্ মনানিয়ে যগাজ্যে সময় আর কামর্ সুদোমানি হবর্ পায়।

⁶ পত্তি জিনিজো পৌইদ্যেনে যগাজ্যে সময় আঘে আর কাম্ গরানার্‌‌অ সুদোম্ আঘে, মাত্তর্ মান্‌জ্যর জ্ঞানানি ইজেবর্ বিলিনে তে অমকদ দুঘ্ পায়;

⁷ কিত্যে কনঅ মান্‌জ্যে যেক্কে হবর্ ন-পায় কি ঘুদিবো সেক্কে কনজনে তারে কোই ন-পারন্ কক্কেনে সিয়েন্ ঘুদিবো।

⁸ বোইয়্যেরানরে যেধোক্ক্যেন্ ধুরি রাগেবার্ খেমতা কারর্ নেই আর যুদ্ধোত্ যেধোক্ক্যেন্ কনজনে ছড়ান্ ন-পায়, সেধোক্ক্যেন্ মরণ দিন্নো উগুরেয়ো কারর্ আঢ্ নেই। পাজিগুনোর্ পাজিগানিও সিয়েনত্তুন্ তারারে রোক্ষ্যে গুরি ন-পারে।

⁹ বেলান তলেদি যিয়েনি গরা অয় সিন্দি মনযোগ্ দিইনে মুই দেগিলুং, এক্কো মান্‌জ্যে অন্যগুনো উগুরে সদ্দারি গঙায় আর সিয়েনত্তে তারার্ ক্ষোতি অয়।

¹⁰ সে পরেদি মুই ইয়েন দেগিলুং, পাজি মানুচ্চুনোরে গোর্ দিয়্যে অর্। ইগুনে উবোসনা-ঘরত্ যানা-এযানা গুরিদাক্; যেরেদি তারার্ শঅর মানুচ্চুনে তারার্ পাজিগানির্ কধা ভুলি গেলাক্। ইয়েন বাহ্‌জে।

¹¹ অন্যেয় কামর্ সাজা যুনি যাদিমাদি দিয়্যে ন-অয় সালে মানুচ্চুনোর্ মনানি অন্যেয় গুরিবাত্তে পুরোপুরি যুক্কোল্ অয়।

¹² পাপী মান্‌জ্যে যুনিয়ো একশত্তান্ ভান্ন্যেই কাম্ গুরিনে ভালোক্ দিন বাঁজি থায় তো মুই হবর্ পাং গোজেনরে যিগুনে ভোক্তিগুরিনে দরান্ তারার্ ভালেদি অবঅ।

¹³ মাত্তর্ পাজিগুনে গোজেনরে ভোক্তিগুরিনে ন-দরান্ বিলিনে তারার্ ভালেদি ন-অবঅ আর তারার্ আয়ুগান অবঅ ছাবা ধোক্ক্যেন্।

¹⁴ পিত্‌থিমীত্ আর এক্কান্ বাহ্‌জে বাবোত্যে অলঅ, পাজিগুনোর্ যিয়েনি পাওনা সিয়েনি পান্ গম্ মানুচ্চুনে, আর গম্ মানুচ্চুনোর্ যিয়েনি পাওনা সিয়েনি পান্ পাজি মানুচ্চুনে। মুই কঙে ইয়েনিয়ো বাহ্‌জে।

¹⁵ সেনত্তে মুই জিংকানিত্ রঙ্গ-ফুত্তিত্ বাঈনী গোজ্যং, কিত্তে বেলান তলেদি হানা-দানা আর ফুত্তি গরানা বাদে মান্‌জ্যত্তে গম্ আর কিচ্চু নেই। সালে বেলান তলেদি গোজেনর্ দিয়্যে মান্‌জ্য জিংকানির্ বেক্ দিনুনোত্ তা কামত্ ফুত্তিগান্ অবদে তার্ সমাজ্যে।

^16-17 জ্ঞানান্ পেবাত্তে আর পিত্‌থিমীত্ যিয়েনি অয় সিয়েনি বুঝিবাত্তে যেক্কেনে মুই মনযোগ্ দিলুং সেক্কেনে দেগিলুং, এক্কো মান্‌জ্যর্ চোগ্ যুনি দিনে-রেদে কাঢাও ন-যায় তো বেলান তলে গোজেনে যিয়েনি গোজ্যে সিয়েনি তে বেক্কানি বুঝি ন-পারে। মানুচ্ সিয়েন তোগেই নিগিলেবাত্তে নানান্ বাবোত্যে চেট্ট্যা গুরিনেয়ো সিয়েনি নিগিলেই ন-পারন্। এমন্ কি, এক্কো জ্ঞানী মানুচ্অ যুনি সিয়েন হবর্ পায় বিলিনে দাবি গরে তো তে ঘেচ্চেক্‌গুরি বেক্কানি বুঝি ন-পারে।