উপদেশক 7 - Chakma Bible

জ্ঞানর্ কধা

¹ গম্ তুম্বাজত্তুন্ সুনাঙ্ পানা গম্, জর্ম দিনোত্তুন্ মরনর্ দিন্নো গম্।

² হানা ঘরত্ যানাত্তুন্ আবিলেচ্ গরেদে ঘরত্ যানা গম্, কিত্তে বেক্কুনে একদিন্ মুরি যেবাক্; জেদা মানুচ্চুনোর্ এ কধাগান্ মনত্ রাগানা উজিত্।

³ ফুত্তি গরানাত্তুন্ দুঘ্ পানা গম্, কিত্তে মুয়োত্ দুঘোর্ ভাব্ থেলেয়ো রিবেঙত্ সুগ্ থেই পারে।

⁴ জ্ঞানীবোর্ রিবেঙান্ আবিলেচর্ ঘরত্ থায়, মাত্তর্ ভুল্ মানুচ্চুনোর্ রিবেঙানি থাইদে রঙ্গ-ফুত্তির্ ঘরত্।

⁵ ভুল বেদমাগুনোর্ গানানি শুনোনাত্তুন্ জ্ঞানী মানুচ্চুনোর্ গেইল্ শুনোনা গম্।

⁶ পিলে তলাত্ আগুনো জিলে লেবেলে বানা রঅ অয়; ভুল্ মানুচ্চুনোর্ হা্জিগুন ঠিগ্ সেধোক্ক্যেন্। ইয়েন্ বাহ্‌জে।

⁷ জ্ঞানি মান্‌জ্যে যুনি জুলুম্ গরে সালে তে ভুল্ ওই যায়, আর ঘুষ্‌চানে রিবেঙানরে বর্‌বাত্ গরে।

⁸ কনঅ কামর্ আরাম্ভত্তুন্ থুমান্ গম্, আর বাড়্ গরানাত্তুন্ ধৈজ্যগান্ গম্।

⁹ তঅ রিবেঙানরে যাদিমাদি রাগ্ গুরিবাত্তে ন-দিচ্, কিত্তে রাগ্‌কান ভুল্ মানুচ্চুনোর্ রিবেঙত্ বজত্তি গরে।

¹⁰ “ইক্কিনেত্তুন্ পুরোণি দিনুন্ কিত্তে গম্ এলঅ?” এ কধাগান্ পুযোর্ ন-গুরিচ্, কিত্তে এ পুযোর্ গরানাগান্ বুদ্ধিবলা মান্‌জ্যর্ কাম্ নয়।

¹¹ জ্ঞানান্ সোম্বোত্তি পাইদ্যে ধোক্ক্যেন্ গম্ জিনিস; সিয়েন্ জেদা মানুচ্চুনোরে ভালেদি গরে।

¹² টেঙা-পোইজ্যে ধোক্ক্যেন্ জ্ঞানানে রোক্ষ্যে গরে, মাত্তর্ জ্ঞানর্ সুবিধেগান্ অলঅ ইয়েন্, জ্ঞানী মান্‌জ্যর্ জ্ঞানানে তা জিংকানিগান্ রোক্ষ্যে গরে।

¹³ গোজেনর্ কামানি চিদেগুরি চাহ্। তে যিয়েন্ বেঙা গোজ্যে কন্না সিয়েন্ উজু গুরি পারে?

¹⁴ সুগো দিনোত্ সুগি অ; মাত্তর্ দুঘোর্ দিনোত্ এ কধাগান্ চিদে গুরি চাহ্, গোজেনে যেধোক্ক্যেন্ সুগে রাগেয়্যে সেধোক্ক্যেন্ দুঘোত্অ রাগেয়্যে, যেনে মান্‌জ্যে তা ভবিচ্চদর্ কনঅ কিজু হবর্ ন-পান্।

¹⁵ মর্ এ বাহ্‌জে জিংকানিত্ মুই দেখ্যংগে, এক্কো গম্ মান্‌জ্যে তা গমান্দোই শেজ্ ওই যায়, আর এক্কো পাজি মান্‌জ্যে তা পাজিগানিলোই ভালোক্ দিন বাঁজি থায়।

¹⁶ নিজোর্ চোগেদি অমকদ গম্ বা অমকদ জ্ঞানী ন-ওয়ো। কিত্তে তুই নিজোরে ভস্ত গুরিবে?

¹⁷ পাজির্ বেশে ন-থেচ্, ভুলো কাম্অ ন-গুরিচ্। কিত্তে তুই অ কালত্ মুরি যেবে?

¹⁸ এ দ্বিয়েন্ উবদেশ্ ধুরি রাগেচ্, কন গানরে ছাড়ি ন-দিচ্; যে মানুচ্চো গোজেনরে ভোক্তিগুরিনে দরায় তে কনকিজু বেশ্ ন-গরে।

¹⁹ দশজন শাজন্‌গুরিয়্যে শঅরানরে যেত্তমান্ দরমর গুরিবাক্ জ্ঞানানে এক্কো জ্ঞানী মান্‌জ্যরে তাত্তুনো বেশ্ দরমর গরে।

²⁰ পিত্‌থিমীত এবাবোত্যে কনঅ গম্ মানুচ্ নেই যে নিত্য গম্ কাম গরে, কনদিন্অ পাপ ন-গরে।

²¹ মান্‌জ্যে যিয়েনি কন্ সিয়েনি বেক্কানি ন-শুন্ন্য, অয়ত শুনিবে, তঅ চাগর্‌বো তরে অভিশাব্ দের্;

²² কিত্তে তুই দঅ তঅ মনানরে হবর্ পাজ্, ভালোক্‌বার্ তুই নিজে অন্যগুনোরে অভিশাব্ দুয়োচ্।

²³ ইয়েনি মঅ জ্ঞান্দোই মুই পোরোক্ষ্যে গুরিনে কলুং, “মুই জ্ঞানী ওম্‌বে ওম্।” মাত্তর্ সিয়েন মর্ নাগালর্ বারেদি।

²⁴ জিংকানির আজল্ অত্তগান্ অমকদ গভিন্, সিয়েন নাগালর্ বারেদি; কিত্তে সিয়েন্ তোগেই পারে?

²⁵ সেনত্তে মুই মনান্ থির্ গুরিলুং যেনে জ্ঞান আর বেক্কানির্ পিজেদি যে সল্লাগান্ আঘে সিয়েন্ জানি পারং আর পোরোক্ষ্যে আহ্ তোগেইনে চেই পারং, আর বুঝোং, পাজিগান্ অলঅ ভুলো কাম্ আর বুদ্ধিনেইয়্যেগান্ অলঅ বিচেরবুদ্ধিনেইয়্যে।

²⁶ মুই চেলুং, মরণত্তুন্ বেশ্ তিদে অলঅ সে মিলেবো, যিবের্ মনান্ এক্কো ফাল্ আর জাল ধোক্ক্যেন্ আর আঢ্ দ্বিয়েন্ শিগোল্লোই বান্যে। যে মানুচ্চো গোজেনরে হুজি গরে তে সিয়েনি আঢত্তুন্ নিজোরে রোক্ষ্যে গুরিবো, মাত্তর্ পাপীবোরে তে ফালত্ ফেলেব।

²⁷ উপদেশকে কোইয়্যেদে, “চাহ্”, বেক্কানির্ পিজেদি যে সল্লাগান্ আঘে সিয়েন্ তোগেই চেবাত্তে মুই উজেই যেইনে কয়েক্কান পৌইদ্যেনে হবর্ পেলুং।

²⁸ মুই যেক্কেনে জ্ঞানানরে তগাঙর্ মাত্তর্ ন-পাঙর্ সেক্কেনে মুই আজার্ জন ভিদিরে এক্কো খাটি মরদরে পেলুং, মাত্তর্ তারা ভিদিরেত্তুন্ এক্কো মিলেরেয়ো খাটি ন-দেগং।

²⁹ বানা ইয়েন্ মুই হবর্ পেলুং, গোজেনে মান্‌জ্যরে গমেডালে বানেয়্যে, মাত্তর্ মানুচ্ নানান্ বাবোত্যে চালাগিগুরি পিজেদি যেয়োন্দোই।