উপদেশক 6 - Chakma Bible

¹ বেলান তলেদি মুই আর এক্কান্ দুঘোর্ বেপার দেখ্যং, আর সিয়েন্ মান্‌জ্যত্তে অমকদ দুঘোর্।

² গোজেনে কনঅ মান্‌জ্যরে এদক্ ধন, সোম্বোত্তি আর সর্মান দান গরেদে যে, তার্ চাইদ্যে ধোক্ক্যেন্ আর্ কিচ্চু ন-থায়, মাত্তর্ গোজেনে তারে সিয়েনি ভোগ্ গুরিবার খেমতা ন-দে, অন্য একজনে সিয়েনি ভোগ্ গুরিবো। ইয়েন বাহ্‌জে, ইয়েন অমকদ দুঘো কধা।

³ কনঅ মান্‌জ্যর্ একশ জন ঝি-পুয়ো থেই পারন্ আর তে ভালোক্ দিন বাঁজি থেই পারে, মাত্তর্ তে যুনি জিংকানিত্ সুগ্ ন-পায় আর গমেডালে গোর্ ন-পায় সালে যেদক্ বজর সং তে বাঁজি থেদঅ সাৎ মুই কোম্বে তাত্তুন্ বরং মরা-পুয়ো পুদোনা বোউত্ গম্ এলঅ।

⁴ সে মরা পুয়োবো অনত্তক্ এইনে আন্ধারত্ বিদেয় নেযায় আর আন্ধারত্ তা নাঙান্ নাঢা যায়।

⁵ যুনিয়ো তে কনদিন্অ বেলান ন-দেগে বা কিচ্চু হবর্ ন-পায় তো সেই মানুচ্চোত্তুন্ বেশ্ তে বোউত্ জিরেন্ পায়।

⁶ সেই মানুচ্চো যুনিয়ো বা দ্বিআজার্ বজর্ বাঁজি থায় মাত্তর্ জিংকানিত্ সুগ্ ন-পায় সালে তার্ লাভ্ কি? বেক্কুনে কি এক জাগাত্ ন-যান্?

⁷ মান্‌জ্যর বেক্ কাম্ গরানাগানি তারার্ পেদত্তে, তো তার্ পেট্ পুরোনা কনদিন্অ মন্ ন-ভরে।

⁸ ভুলোত্তুন্ জ্ঞানী মানুচ্চোর্ সুবিধেগান্ কি? অন্যগুনো মুজুঙোত্ কিবাবোত্যেগুরি যাহ্ পুরিবো সিয়েন্ হবর্ পেলে এক্কো নাঢা মান্‌জ্যর্ কি লাভ্ অয়?

⁹ আরঅ পেবার্ আওজত্তুন্ বরং চোগেদি যিয়েন্ দেগা যায় সিয়েন্দোই হুজি থানা গম্। ইয়েন্অ বাহ্‌জে, বানা বোইয়্যের পিজেদি দাবা দেনা বাদে আর কিচ্চু নয়।

¹⁰ যিয়েন্ আঘে সিয়েন্ আগে ঠিগ্ গরা ওইয়্যে, আর মানুচ্ যে কি, সিয়েন্অ হবর্ পাহ্ যেইয়্যে; নিজোত্তুন্ বেশ্ যিবে বোলি তা সমারে কনজনে তর্কাতর্কি গুরি ন-পারে।

¹¹ যেদক্ বেশ্ কধা কুয়ো অয় সেদক্ বেশ্ ভান্ন্যেয়ানি বাড়ে, আর সেক্কে মান্‌জ্যর্ কি লাভ্ অয়?

¹² মান্‌জ্যর্ জিংকানিত্ তাত্তে কুবোন্ গম্ সিয়েন্ কন্না হবর্ পায়? তে দঅ তার্ কয়েক্কো দিন ছাবা ধোক্ক্যেন্ কাদায়। তে যানার্ পরেদি বেলান তলেদি কি অবঅ সিয়েন্ কন্না তারে কোই পারিবো?