উপদেশক 5 - Chakma Bible

গোজেন উগুরে ভোক্তিবলা দর্

¹ গোজেন ঘরত্ যেবার অক্তত্ তঅ টেঙানি উজিয়ারে ফেলেচ্। যিগুনে নিজো অন্যেয়ানি ন-বুঝোন্ সে ভুল্ মানুচ্চুনো ধোক্ক্যেন্ উৎসর্বর অনুষ্ঠান গুরানাত্তুন্ বরং গোজেনর্ বাধ্য অনা গম্।

² তঅ মুয়োনে যাদিমাদি গুরিনে কধা ন-হোক্; গোজেন ইদু যাদিমাদি গুরিনে কনঅ কধা ন-কোচ্। গোজেনে স্বর্গত্ আঘে আর তুই আগচ্ পিত্‌থিমীত, সেনত্তে তঅ কধাগান্ যেন কম অয়।

³ চিদে-চজ্জা বেশ্ থেলে মান্‌জ্যে যেধোক্ক্যেন্ স্ববন্ দেগন্ সেধোক্ক্যেন্ বেশ্ কধা কলে ভুলানি নিগিলি এজে।

⁴ গোজেন ইদু কনঅ মানত্ গুরিলে সিয়েন্ ছিড়েবাত্তে দিরি ন-গোজ্য। ভুল্ বেদমা মানুচ্চুন্দোই তে কনঅ হুজি ন-অয়। তঅ মান্যেগান্ ছিড়ে।

⁵ মানত্ গুরিনে সিয়েন্ ন-ছিড়েনাত্তুন্ বরং মানত্ ন-গরানা গম্।

⁶ তঅ মুয়োনে যেনে তরে পাপ পধেদি ন-নেযায়। “মর্ মানত্ গরানা ভুল্ ওইয়্যে,” এ কধাগান্ উবোসনা ঘরর্ সেবাগুরিয়্যেবোরে ন-কবে। তঅ কধাগানত্তে কিত্তে গোজেনে বেজার্ ওইনে তঅ আঢ কামানি বর্‌বাত্ গুরিবো?

⁷ বেশ্ স্ববন দেগানা আর বেশ্ কধা কনা বাহ্‌জে, মাত্তর্ তুই গোজনরে ভোক্তিগুরিনে দরা।

ধন-সোম্বোত্তি থিদেবর্ নয়

⁸ তঅ চাগালাত্ যুনি কনঅ নাঢা মান্‌জ্যরে অত্যেচার্ অদে দেগচ্ বা কনজনরে ন্যায়বিচের্ বা তার পেবার্ অধিকার ন-পাদে দেগচ্ মাত্তর্ ন-দোরেচ্, কিত্তে এক্কো কামগুরিয়্যে উগুরে দাঙর্ আর এক্কো কামগুরিয়্যে আঘে আর তারার্ দ্বিজন উগুরে আরঅ দাঙর্ দাঙর্ নেতা আগন্।

⁹ তো চায্ গরেদে ভূইয়ানি রোক্ষ্যে গুরিবাত্তে এক্কো রাজা থেলে দেজর্ সুবিধে অয়।

¹⁰ যে মানুচ্চো টেঙা-পোইজ্যে কোচ্‌পায় তার কনদিন্অ যগাজ্যে ওইয়্যে বিলিনে মনে ন-অয়। যে মানুচ্চো ধন-সোম্বোত্তি কোচ্‌পায় তে তার ইনকাম্বোই কনদিন্অ হুজি ন-অয়। ইয়েন্অ বাহ্‌জে।

¹¹ সোম্বোত্তি বাড়িলে সিয়েনি ভোগ্ গুরিবার্ মানুচ্অ বাড়ন্। বানা রিনি চেবার্ সুগ্‌কান বাদে সে সোম্বোত্তিত্ গিরোজর্ কি লাভ্?

¹² যে কাম গরে তে কম হোক্ বা বেশ্ হোক্ তা ঘুমান্ গম্ অয়। মাত্তর্ তাগোয়্যে মানুচ্চোর্ বোউত্ ধন-সোম্বোত্তি তারে ঘুম্ যেবাত্তে ন-দে।

¹³ বেলান তলেদি মুই এক্কান্ অমকদ দুঘোর্ বেপার দেখ্যং-তাগোয়্যেবো বোউত্ ধন থুবেই রাগায় মাত্তর্ যেরেদি তার্ খেতি অয়।

¹⁴ কনঅ দজাত্ পুরিনে সিয়েনি শেজ্ ওই যায়। সেনত্তে তা পুয়োবোত্তে কিচ্চু ন-থায়।

¹⁵ মা পেদত্তুন্ মানুচ্ লাংটা-বাংটা এজন্; তে যেধোক্ক্যেন্ এজে সেধোক্ক্যেন্ গুরি যায়। তা কামানির্ কনঅ কিজু তে আঢত্ গুরি নেযেই ন-পারে।

¹⁶ ইয়েন্অ এক্কান্ অমদক দুঘোর্ কধা, মানুচ্ যেধোক্ক্যেন্ গুরি এজন্ সেধোক্ক্যেন্ গুরি যান্; সিয়েনর্ লাভ্‌পান কি? তে দঅ বোইয়্যেরানত্তে কাম্ গরে।

¹⁷ হাঙেলেত্যে, যন্ত্রণা আর রাগ্‌কোই সারা জিংকানিবর্ তে আন্ধারত্ কাদায়।

¹⁸ সে পরেদি মুই বুঝিলুং, গোজেনে বেলান তলেদি মান্‌জ্যরে যে কয়দিন বাঁজি থেবাত্তে দিয়্যে সেনত্তে হানা-দানা গরানা আর তার্ জদবদে কাম্ গরানার্ মাধ্যমে ঈল্ অনা তার্ তপ্পে গম্ আর যগাজ্যে, কিত্তে সিয়েনই তার্ পাওনা।

¹⁹ ইয়েনি বাদেয়ো যেক্কে গোজেনে কনঅ মান্‌জ্যরে ধন-সোম্বোত্তি দে সেক্কে তারে সিয়েনি ভোগ্ গুরিবাত্তে দে, তার্ নিজোত্তে এক্ ভাগ্ গুজি লবাত্তে দে আর নিজো কামত্ ফুত্তি গুরিবাত্তে দে। ইয়েনি বেক্কানি গোজেনর্ দান।

²⁰ তা আয়ুগান দিনুনো ইন্দি তে ফিরি ন-চায়, কিত্তে গোজেনে তা মনত্ হুজিলোই তারে কামত্ রাগায়।