উপদেশক 4 - Chakma Bible

অত্যেচার্, কাম্ গরানা আর সমাজ্যে নেইয়্যে অবস্থা

¹ বেলান তলেদি যেদক্কানি অত্যেচার্ অয় সিন্দি মুই একবার্ রিনি চেয়োং, অত্যেচার্ ওইয়্যেগুনে কানদন্, মাত্তর্ তারারে বুঝেবার্ কনজন্ নেই। যিগুনে অত্যেচার্ গরন্ তারার্ আঢত্ খেমতা আঘে, মাত্তর্ অত্যেচার্ ওইয়্যেগুনোরে বুঝেবার্ কনজন্ নেই।

² মুই বুঝিলুং, যিগুনে এজঅ বাঁজি আগন্ তারাত্তুন্ যিগুনে আগে মুরি যেইয়োন্ তারা আরঅ গমেডালে আগন্।

³ মাত্তর্ এ দ্বিজনত্তুন্ তা অবস্থাগান্ আরঅ গম্ যিবে এজঅ জর্ময়ো ন-অয় আর বেলান তলেদি যে অন্যেয়ানি গরা অয় সিয়েনি ন-দেগে।

⁴ মুই দেগিলুং, পাড়াল্যেগুনো উগুরে ইংসের্ কারনে মান্‌জ্যে বেক্ কামানি গরন্ আর ফোলেই পারন্। ইয়েন্অ বাহ্‌জে, বানা বোইয়্যের পিজেদি দাবা দেনা বাদে আর কিচ্চু নয়।

⁵ ভুল্ মান্‌‌জ্যে আঢ্‌তান গুজেই থোইনে নিজোরে ভস্ত গরে।

⁶ বোইয়্যের পিজেদি যেবাত্তে কাম্ গুরিনে দ্বিমুঠ্ পানাত্তুন্ সুগে-শান্দিয়্যে এক মুঠ্ পানা বোউত্ গম্।

⁷ বেলান তলেদি মুই আরঅ কিজু ন-ফলেদে জিনিস দেগিলুং।

⁸ কনঅ এক্কো মানুচ্ এক্কুবারে গায় গায়-তার্ পুয়োও নেই, ভেইঅ নেই; তো তার্ কামর্ শেজ্ নেই আর ধন-সোম্বোত্তিলোই তা চোগ্ ন-ভরে। তে পুযোর্ গুরিলো, “কাত্তে মুই কাম্ গরঙর্? কিত্তে রঙ্গ-ফুত্তিত্তুন্ নিজোরে সোরেই রাগেয়োং?” ইয়েন্ বাহ্‌জে, অমকদ দুঘোর্ কধা।

⁹ একজনত্তুন্ দ্বিজন্ গম্, কিত্তে তারার কামত্ বোউত্ ফল অয়।

¹⁰ এক্কো যুনি পড়েগোই সালে তা সমাজ্যেবো তারে তুলি পারে; মাত্তর্ হায় সে মানুচ্চো, যে পড়িলেগোই তারে তুলিবার্ কনজন ন-থান্।

¹¹ ইয়েন্ বাদেয়ো দ্বিজন্ এক সমারে পড়ি থেলে কিয়্যেগান্ গরম্ অয়, মাত্তর্ একজনর কেধোক্ক্যেন্ গুরিনে গরম্ অবঅ?

¹² মানুচ্ গায় গায় অলে সহজে উদিই যেই পারন্, মাত্তর্ দ্বিজন্ অলে নিজোরে রোক্ষ্যে গুরি পারন্। তিনেন্ দুড়ি একসমারে পাগেয়্যে অলে যাদিমাদি ন-ছিনে।

সর্মান পানা বাহ্‌জে

¹³ এক্কো বুড়ো ভুল্ বেদমা রাজা, যিবে আর সল্লা পেবাত্তে ন-চায় তাত্তুন্ বরং এক্কো নাঢা মানুচ্ অদচ বুদ্ধিবলা গাবুজ্যে পুয়ো গম্।

¹⁴ সে গাবুজ্যেবো যুনিয়ো সে রেজ্যর্ এক্কো নাঢা পরিবারত্ জোর্মেয়্যে তো তে জেল্‌খানাত্তুন্ নিগিলিনে যেরেদি রাজা ওইয়্যে।

¹⁵ মুই দেগিলুং, যিগুনে বাঁজি এলাক্, অত্তাৎ বেলান তলেদি আঢাউদো গোজ্যন্ তারা সে বুড়ো রাজাবোর পরেদি যে গাবুজ্যেবো রাজা ওইয়্যে তা পিজেদি আঢিলাক্।

¹⁶ আগে এ গাবুজ্যে রাজাবোর্ বোউত্ মানুচ্ এলাক্ যিগুনো উগুরে তে রাজাগিরি গোজ্যে, মাত্তর্ সে পরেদি মানুচ্চুনে তা উগুরে হুজি ন-এলাক্। ইয়েন বাহ্‌জে, বানা বোইয়্যের পিজেদি দাবা দেনা বাদে আর কিচ্চু নয়।