উপদেশক 3 - Chakma Bible

বেক্কানির্ সময় আঘে

¹ বেক্কানিত্তে এক্কান্ সময় আঘে; আগাজ তলেদি পত্তি কামর্ এক্কান্ ঠিগ্ সময় আঘে-

² জোর্মেবার্ সময় আর মুরিবার্ সময়, লাগেবার্ সময় আর উগুরে ফেলেবার্ সময়,

³ মারে ফেলেবার্ সময় আর গম্ গুরিবার সময়, ভাঙি ফেলেবার্ সময় আর বানেবার্ সময়,

⁴ কানিবার্ সময় আর হা্‌জিবার্ সময়, আবিলেচ্ গুরিবার্ সময় আর নাজিবার্ সময়,

⁵ পাত্তর্ মারিবার সময় আর সিগুনোরে এগত্তর্ গুরিবার্ সময়, কোচ্‌পেইনে আজাবোধে ধুরিবার্ সময় আর আজাবোধে ন-ধুরিবার্ সময়,

⁶ তোগেইনে পেবার্ সময় আর আরেবার্ সময়, রাগেবার্ সময় আর ফেলেই দিবার্ সময়,

⁷ ফাদি ফেলেবার্ সময় আর সিলেবার্ সময়, জুরো গুরি থেবার্ সময় আর কধা কবার্ সময়,

⁸ কোচ্‌পানার সময় আর কোচ্ ন-পানার্ সময়, যুদ্ধোর্ সময় আর সুগ্-শান্দির্ সময়।

⁹ যে কাম্ গরে তে তার্ কামর্ ফল কি পায়?

¹⁰ গোজেনে মান্‌‌জ্য উগুরে যে কামানি চাপি দিয়্যে সিয়েনি মুই দেখ্যং।

¹¹ তে বেক্কানিত্তে যগাজ্যে সময় ঠিগ্ গুরি রাগেয়্যে। তে মান্‌জ্য মনত্ উমর কাল পৌইদ্যেনে বুঝিবার্ আওজ্‌চান দিয়্যে, মাত্তর্ তে পৌইল্যাত্তুন্ ধুরি থুম্ সং কি গরে সিয়েন মানুচ্ বুঝি ন-পারন্।

¹² মুই হবর্ পাং, মান্‌জ্য জিংকানিত্ হুজি আর গম কাম্ গরানা বাদে তাত্তেই আর গম্ কিচ্চু নেই।

¹³ ইয়েন গোজেনর্ দান, বেক্ মানুচ্চুনে হানা-দানা গুরিবাক্ আর তার বেক্ কামানিত্তে হুজি অবাক্।

¹⁴ মুই হবর্ পাং গোজেনে যিয়েনি গরে সিয়েনি উমর্ সং থায়; কিচ্চু তা সমারে মিজেই ন-পারে আর কিচ্চু সিয়েনিত্তুন্ বাদ্ দিয়্যে ন-যায়। গোজেনে সিয়েনি গরে যেন মানুচ্ তারে ভোক্তি গুরিনে দরান্।

¹⁵ যিয়েনি আঘে সিয়েনি আগেত্তুন্ ধুরি এলঅ, যিয়েনি অবঅ সিয়েনিও আঘে এলঅ; যিয়েনি ওই যেইয়্যে গোজেনে সিয়েনি আরঅ ঘদায়।

¹⁶ মুই বেলান তলেদি আর এক্কান বেপার দেগিলুং, ন্যায়বিচের আর গম্ জাগানিত্ পাজি কামানি আঘে।

¹⁷ মুই মনে মনে কলুং, “গোজেনে গম্ আর পাজি এ দ্বিজনরে বিচের্ গুরিবো, কিত্তে গোজেন ইদু বেক্ বেপারানি আর বেক্ কামানির্ এক্কান ঠিগ্ সময় আঘে।”

¹⁸ মুই ইয়েন্ ভাবিলুং, মান্‌জ্যরে গোজেনে পোরোক্ষ্যে গরে যেনে তারা দেগন্ তারা য়েমান ধোক্ক্যেন,

¹⁹ কিত্তে মান্‌জ্য উগুরে যিয়েনি ঘদে য়েমান উগুরেও সিয়েনি ঘদে। ইবে যেধোক্ক্যেন্ মরে সিবেও সেধোক্ক্যেন্ মরে। তারার বেক্কুনোর্ পরাণান্ এক বাবোত্যে। এ পৌইদ্যেনে য়েমান আর মান্‌জ্যর ফারগ্ কিচ্চু নেই; কনঅ কিজু থিদেবর্ নয়।

²⁰ বেক্কুনে এক জাগাত যান্; বেক্কুনে মাদিলোই বানেয়্যে আর মাদিত্ ফিরি যান্।

²¹ মান্‌জ্য পরাণান্ যে উগুরেদি যায় আর য়েমান পরাণান্ মাদি তলেদি যায় সিয়েন কন্না হবর্ পায়?

²² সেনত্তে মুই দেগিলুং, নিজো কামত্ রঙ্গ-ফুত্তি বাদে আর গম্ কিজু মান্‌জ্যত্তে নেই। সিয়েনই তার্ পাওনা, কিত্তে তা মরণর্ পরেদি কি ঘুদিবো সিয়েন কন্না তারে দেগেই পারিবো?