উপদেশক 2 - Chakma Bible

রঙ্গ-ফুত্তিগানি অলঅ বাহ্‌জে বাবোত্যে

¹ মুই নিজোরে কলুং, “সুগ্‌কান কি, সিয়েন বুঝিবাত্তে মুই নিজে রঙ্গ-ফুত্তি গুরিনে সিয়েন পোরোক্ষ্যে গুরি চেম্।” মাত্তর্ দেগিলুং, সিয়েন্অ বাহ্‌জে।

² মুই কলুং, “আজিলেয়ো ভুল্ আঘে, আর রঙ্গ-ফুত্তিত্‌অ কি লাভ্।”

³ মুই স্বজ্ঞানে আংগুর-রস হেইনে কিয়্যেগানরে ঝাগেরেলুং আর ভুলো ধোক্ক্যেন কাম্ গুরিনে নিজোরে হুজি গুরিবার চেলুং। মুই দেগিবাত্তে চেলুং, আগাজ তলেদি মান্‌জ্যর বানা কয়েক দিনোর্ জিংকানিত্ তাত্তেই কুবোন্ গম-জ্ঞানর্ পধেদি যানা নাহি ভুল্ পধেদি যানা।

⁴ মুই কয়েক্কান দাঙর্ দাঙর্ কাম গুরিলুং। মুই নিজোত্তে বোউত্ ঘর বানেলুং আর বোউত্ আংগুর ক্ষেত গুরিলুং।

⁵ মুই চিগোন-দাঙর ভালোক্কুন্ বাগান্ বানেইনে নানান্ বাবোত্যে ফল গাজ্ লাগেলুং।

⁶ মুই নিজোত্তে কয়েক্কো পোর্ বানেলুং যেন গাজ্‌চুনোত্ পানি দিয়্যে যায়।

⁷ মুই বোউত্ চাগর-চাগরানি কিনিলুং, আর বোউত্ চাগর-চাগরানি মঅ ঘরত্ জোর্মেয়োন্। মঅ আগেদি যিগুনে যিরূশালেমত্ এলাক্ তারাত্তুন্অ বোউত গোরু-ভেড়া এলাক্।

⁸ মুই বোউত্ সনা-রুবো আর অন্য রাজাগুনোর্ আর নানান্ রেজ্যর্ ধন-সোম্বোত্তি আনিনে থুবেলুং। মুই বোউত্ গান গেইয়্যে মিলে-মরদ আর মরদরে ফুত্তি দিয়্যে বোউত্ লাঙনি পেলুং।

⁹ মঅ আগেদি যিগুনে যিরুশালেমত্ এলাক্ তারাত্তুন্‌অ বেশ্ মুই বোউত্ ধন পেলুং। সেক্কেয়ো জ্ঞানানে মরে পরিচালনা গোজ্যে।

¹⁰ মঅ চোগেদি যিয়েন্ গম্ লাগিদো মুই সিয়েনই গুজি লদুং; মুই নিজোরে বেক্ রঙ্গ-ফুত্তিগানি গুরিবাত্তে দিদুং। মর্ বেক্ কামানি ইদু মঅ মনানে হুজি অদঅ, আর ইয়েনই এলঅ মর্ বেক্ কামানির্ বক্‌শিজ্।

¹¹ তো মুই যিয়েনি গোজ্যং আর যিয়েনি পেবাত্তে কাম্ গোজ্যং সিয়েনি যেক্কে মুই চেলুং সেক্কে দেগিলুং বেক্কানি বাহ্‌জে। ইয়েনি বেক্কানি বোইয়্যের পিজেদি লড়ানা বাদে আর কিচ্চু নয়। বেলান তলেদি কনঅ কিজুত্ লাভ্ নেই।

¹² সে পরেদি মুই জ্ঞান, নীতিনেইয়্যে আর ভুল-বেদমার্ কধা ভাবি চেলুং। পুরোণি রাজাবো যেধোক্ক্যেন্ গুরি কাম্ গুরি যেইয়্যে আমি কি কোই পারিই, তা পরেদি রাজাবো সেধোক্ক্যেন্ গুরিনে কাম্ গুরিবো?

¹³ মুই দেগিলুং, আন্ধারত্তুন্ যেধোক্ক্যেন্ পহ্‌রান গম্, সেধোক্ক্যেন্ ভুলোত্তুন্ জ্ঞানান্ গম্।

¹⁴ জ্ঞানী মান্‌জ্যর চোগ্ আঘে, মাত্তর্ ভুলো আন্ধারত্ আঢাউদো গরে; মাত্তর্ মুই ইয়েনই বুঝিলুং, সে দ্বিজনর্ শেজ্ দজাগান্ এক্কুই।

¹⁵ সে পরেদি মুই নিজো মনেদি কলুং, “ভুলোর্ যে দজাগান্ অয় মরঅ দঅ সে দজাগান্ অবঅ। সালে এদক্ জ্ঞানী ওইনে মর্ কি লাভ্ অলঅ? ইয়েন দঅ বাহ্‌জে।”

¹⁶ মান্‌জ্যে ভুলোরে যেধোক্ক্যেন্ মনত্ ন-রাগান্ সেধোক্ক্যেন্ জ্ঞানীবলারেয়ো বেশ্ মনত্ ন-রাগান্; আগামিদি এ দ্বিজনরে মান্‌জ্যে ভুলি যেবাক্। ভুলো যেধোক্ক্যেন্ মুরি যায় জ্ঞানী মানুচ্চোয়ো সেধোক্ক্যেন্ গুরি মুরি যায়।

¹⁷ সেনত্তে মুই মঅ জিংকানিগান্ ঈচ্ গরা ধুরিলুং, কিত্তে বেলান তলেদি যে কামানি গরা অয় সিয়েনি মইদু দুঘোর্ কধা বিলিনে মনে অলঅ-ইয়েনি বেক্কানি বাহ্‌জে, বোইয়্যের পিজেদি দাবা দেনা বাদে আর কিচ্চু নয়।

¹⁸ বেলান তলেদি যে জিনিস্‌চানি পৌইদ্যেনে মুই কাম্ গোজ্যং সিয়েনিরে ইক্কিনে মুই ঈচ্ গরা ধুরিলুং, কিত্তে মঅ পরেদি যে এবঅ তাত্তেই দঅ সিয়েনি থোই যাহ্ পুরিবো।

¹⁹ সে মানুচ্চো জ্ঞানী না বুদ্ধিবলা অবঅ সিয়েন্ কন্না হবর্ পায়? তো তে মর্ বেক্ কামর্ ফলুন্ ভোগ্ গুরিবো, যিয়েনত্তে মুই বেলান তলেদি কাম্ গোজ্যং আর কাবিদ্যেংগিরি দেগেয়োং। ইয়েন্‌অ বাহ্‌জে।

²⁰ সেনত্তে বেলান তলেদি মুই যে দুঘোর্ কামানি গোজ্যং সিয়েনত্তে মঅ মনান্ আজা নেইয়্যে ওয়া ধুরিলো।

²¹ ইয়েনর্ কারনান্ অলঅ, জ্ঞান, বুদ্ধি আর যোগ্যতালোই একজনে কাম্ গুরি পারে, মাত্তর্ সে পরেদি তার্ বেক্কানি অধিকার্ ইজেবে এধোক্ক্যেন্ একজনত্তে থোই যাহ্ পুরিবো যে মানুচ্চো তাত্তে কনঅ কাম্ ন-গরে। ইয়েন্অ বাহ্‌জে আর অমকদ দুঘোর্ কধা।

²² বেলান তলেদি মান্‌জ্যে যেদক্কানি কাম্ আর চিদে-চজ্জা গরন্ যেরেদি সিয়েনির কি লাভ্ অয়?

²³ পত্তি দিন্ তা কামানিত্ থায় পিড়ে আর কাঙেলেত্যে; রেদোত্‌অ তা মনান্ জিরেন্ ন-পায়। ইয়েন্‌ অ বাহ্‌জে।

²⁴ সালে মান্‌জ্যর পক্ষে হানা-দানা গরানা আর নিজো কামত্ হুজি থানা বাদে গম্ আর কিচ্চু নেই। মুই দেগিলুং ইয়েনি বেক্কানি গোজেন আঢত্তুন্ এজে,

²⁵ কিত্তে তে ন-দিলে কন্না হেই পারে বা হুজি ওই পারে?

²⁶ গোজেনরে যে হুজি গরে তারে তে জ্ঞান, বুদ্ধি আর রঙ্গ-ফুত্তি দান গরে, মাত্তর্ পাপিরে তে ধন-সোম্বোত্তি তুবেবার্ আর সিয়েনি জোমেবার্ কামানি দে, যেনে তে সিয়েনি সে মানুচ্চোরে দি যায় যে গোজেনরে হুজি গরে। ইয়েন্অ বাহ্‌জে, বোইয়্যের পিজেদি দাবা দেনা বাদে আর কিচ্চু নয়।