উপদেশক 12 - Chakma Bible

¹ তঅ গাবুজ্যে জিংকানিত্ তর্ গোজেনরে ইদোত্ তুল্, কিত্তে বুড়ো বয়জর্ দিনুন্ এজের্, অত্তাৎ দুঘো দিনুন্ এজের্ যেক্কেনে তুই কবে, “মর্ এ বুড়ো বয়জত্ মর্ কনঅ রঙ্গ-ফুত্তি নেই।”

² সে অক্তত্ বেলান্, পহ্‌রানে, চান্নো আর তারাগুন্ আন্ধার্ ওই যেবাক্, আর ঝর্ দেনার্ পরেদি মেঘ্‌কানে আরঅ ফিরি এঅঅ।

বুড়ো বয়জত্ কিয়্যেগান অবস্থা

³ সে অক্তত্ ঘরর্ চুগিদারুনে গির্‌গিরেবাক্, আর বোলীবন্দ মানুচ্চুনে আঢুর্ ওই যেবাক্; যিগুনে গম্ মাড়ন্ তারা মানুচ্ কম্ বিলিনে কাম্ ছাড়ি দিবাক্, আর জানালাদি যিগুনে রিনি চেদাক্ তারা আর্ গমেডালে ন-দেগিবাক্।

⁴ সে অক্তত্ পধ মোক্ক্যে দোরান্ নাঢা যেবঅ; সেক্কে গম্ মাড়েদে মিশিনান রঅবো মিলেই যেবঅ, পেগো রঅলোই বুড়ো মানুচ্চুনে জাগিবাক্, আর গান-বাজনার্ রঅ কুমি যেবঅ।

⁵ সে অক্তত্ অজল্ জাগানত্ আর পধেদি যাদে তে দোরেব। সেক্কে বাদাম্ গাজত্ ফুল ধুরিবাক্, ফিরিঙুনে লাম্বা টেঙোই আঢিবাক্ আর কামনা-বাসনা আর্ উত্তেজিত ন-অবঅ। সে পরেদি তে যেবগোই তা উমর ঘরত্, আর আবিলেচ্ গুরিয়্যেগুনে পধে পধে ঘুরিবাক্।

⁶ রূবোর্ তারান্ ছিনি যেবার্ আগেদি, বা সনার্ পিলেবো ভাঙি যেবার্ আগেদি, পয়নালাবো ইদু কুম্মো ভাঙিবার্ আগেদি, বা কূয়ো পানিগান্ তুলিবার চাক্কাবো ভাঙি যেবার্ আগেদি তঅ গোজেনরে ইদোত্ তুল্।

⁷ মাদিগান্ মাদিত্ ফিরি যেবঅ, আর যে আত্মাগান্ গোজেনে দিয়্যে সে আত্মাগান্ তাইদু ফিরি যেবঅ।

⁸ উপদেশকে কোইয়্যেদে, “বাহ্‌জে, বাহ্‌জে, বেক্কানি বাহ্‌জে!”

শেজ্ কধাগান্

⁹ উপদেশকে নিজে জ্ঞানী এলঅ আর তে মানুচ্চুনোরেয়ো জ্ঞান পৌইদ্যেনে শিক্ষ্যে দিদো। তে ভাবি ভাবাই আর পোরোক্ষ্যে গুরিনে বোউত্ দাঘ কধানি সাজেয়্যে।

¹⁰ তে যগাজ্যে রঅ তোগেয়্যে, আর তে যিয়েন্ লেখ্যে সিয়েন্ খাটি আর সত্য।

¹¹ জ্ঞানী মানুচ্চুনোর্ কধা গরগর্ লুদিগো ধোক্ক্যেন্। তারা কধানি এগত্তর্ গুরিলে মনে অয় যেন বেক্কুন্ দরমর গুরি বানেয়্যে জোলোই। সিয়েনি এক্কো গরগে দিয়্যে কধা।

¹² মঅ পুয়োবো, এ কধাগান সমারে কিজু মিজে দিয়্যে অর্ নাকি সে পৌইদ্যেনে উজিয়ার্ থেচ্। বোই লিগিবার থুম্ নেই আর বেশ্ লেগাপড়া গুরিলে কিয়্যেগান্ বল্‌পোজ্যে অয়।

¹³ ইক্কিনে বেক্কানি দঅ শুনো অলঅ; মাত্তর্ শেজ্ কধাগান্ ইয়েন্, গোজেনরে ভোক্তিগুরিনে দোরেবার্ আর তা উগুমানি পালানার্ মাধ্যমে মান্‌জ্যর্ বেক কামানি পালা অয়।

¹⁴ গোজেনে বেক্ কামানির, এমন্ কি, বেক্ গুমর কধানি পৌইদ্যেনে বিচের্ গুরিবো-সিয়েন্ গম্ ওক্ বা ভান্ন্যেই ওক্।