উপদেশক 11 - Chakma Bible

বুদ্ধিবলা মান্‌জ্যে যিয়েনি গরে

¹ তুই তঅ টেঙাগুন্ খাদা, কিত্তে ভালোক্ দিন পরেদি সিগুন আরঅ ফিরি পেবে।

² তঅ ধনুন্ নানান্ বাবোত্যেগুরি খাদা, কিত্তে পিত্‌থিমীত্ কি বাবোত্যে দজা এবঅ সিয়েন্ দঅ তুই হবর্ ন-পাজ্।

³ মেঘ্‌কানে যুনি পানিলোই ভরা থায় সালে সিয়েনত্তুন্ পিত্‌থিমীত্ ঝড় পড়ে। গাজ্‌সো দোগিণে কি উত্তোরে পোড়োক্, যিয়োত্ পুরিবো সিয়োদই পড়ি থেবঅ।

⁴ যে মানুচ্চো যগাজ্যে বোইয়্যেরত্তে বাজ্জেই থায় তা বীজিগুন্ ফেলা ন-অয়; যে মানুচ্চো যগাজ্যে সময়ত্তে বাজ্জেই থায় তার্ খেত্-খেত্তি কাবা ন-অয়।

⁵ কেধোক্ক্যেন্ গুরিনে মা পেদ ভিদিরে পুয়োবো ইদু আত্মাগান্ চমায়োই সিয়েন্ যেধোক্ক্যেন্ তুই হবর্ ন-পাজ্, সেধোক্ক্যেন্ বেক্কানি বানেয়্যে গোজেনর্ কামানিয়ো তুই বুঝি ন-পারচ্।

⁶ তঅ বীজিগুন্ বেন্যেমাদান্ ফেলা, বেল্যে মাদান্অ তঅ আঢ্‌তানিরে সে কামানি গুরিবাত্তে দিচ্, কিত্তে কন্ সময়োত্ কামানি গম্ অবঅ না কি দুনোগান্ সং সং গুরি গম্ অবঅ, সিয়েন্ দঅ তুই হবর্ ন-পাজ্।

⁷ পহ্‌রান্ দোল্, আর বেলান্ দেগানা গম্।

⁸ এক্কো মানুচ্ যুনি ভালোক্ বজর্ বাঁজি থায় সালে তে যেন সে দিনুনোত্ রঙ্গ-ফুত্তি গরে। মাত্তর্ আন্ধার দিনুনোর্ কধায়ো যেন তে মনত্ রাগায়, কিত্তে সিগুন বোউত্ অবাক্। যিয়েনি ঘুদিবো সিয়েনি বেক্কানি কানক্কনত্তে।

গাবুজ্যেগুনো ইদু উবদেজ্

⁹ ও গাবুজ্যে, তঅ গাবুজ্যে জিংকানিত্ তুই সুগি অ, গাবুজ্যে বয়জর্ দিনুনোত্ তঅ মনানে তরে হুজিয়ে রাগোক্। তঅ মনানর্ আওজ্ মজিম্ পধেদি যাহ্ আর তঅ চোগেদি যিয়েন্ গম্ লাগে সিয়েনই গর্, মাত্তর্ মনত্ রাগেচ্, এ বেক্ কামানিত্তে গোজেনে তঅ বিচের্ গুরিবো।

¹⁰ সেনত্তে তঅ মনানত্তুন্ হুজ্‌তেরিগানি দূর্ গুরি দে, আর তঅ কিয়্যেগানরে দুঘ্ পেবাত্তে ন-দিচ্, কিত্তে গাবুরো জিংকানিগান্ আর বলান্ জনমত্তে নয়।