উপদেশক 10 - Chakma Bible1 মরা মাছিগুনে যেবাবোত্যেগুরি তুম্বাজ্ তেলানরে পযাবাজ্ গরন, সেবাবোত্যেগুরি এক্কেনা ভুলো জ্ঞানানরে আর সর্মানানরে পুযি ফেলায়। 2 জ্ঞানীগুনোর্ মনানি গম্ পধেদি ফিরে, মাত্তর্ বেদমাগুনোর্ মনানি ভান্ন্যেই পধেদি যায়। 3 এমন কি, পধেদি আঢিবার্ অক্তত্অ দেগা যায় ভুলোর্ বুদ্ধির অভাব আঘে; তে যে বেদমা সিয়েন্ বেক্কুনে বুঝি পারন্। 4 শাজন্গুরিয়্যেবো যুনি তঅ উগুরে রাগ্ গরে তো তুই তঅ পোজিশনান্ ন-ছাড়িচ্; শান্তভাব থেলে দাঙর্ দাঙর্ অন্যেয়অ খেমা গরা যায়। 5 বেলান তলেদি মুই এক্কান বেপার দেখ্যং যিয়েন্ ঠিগ্ নয়; শাজন্গুরিয়্যেগুনে এবাবোত্যে ভুল্ গুরি থান্- 6 বুদ্ধিনেইয়্যেগুনে কাম্ পান্দে দাঙর্ দাঙর্ পোজিশনত্, আর তাগোয়্যেগুনে কাম্ পান্ চিগোন্ পোজিশনত্। 7 মুই চাগরুনোর্ ঘোড়া পিদিত্ আর দাঙর্ পোজিশনর্ কামগুরিয়্যেগুনোরে চাগর ধোক্ক্যেন্ টেঙোই আঢি যাদে দেখ্যং। 8 যে গাদ্ খুড়ে তে সিবে ভিদিরে পড়ি পারে; যে দেবাল্ ভাঙে তারে সাবে কামেড়েই পারে। 9 যে পাত্তর্ কাবে তে সিবেলোই আঘাত্ পেই পারে; যে তক্তা কাবে তে সিয়েন্দোই দজাত্ পড়ি পারে। 10 কুড়োলান্ যুনি ভোদা অয় আর সিয়েন ধারা ন-অয়, সালে সিয়েন্ বেবহার গত্তে বেশ্ বল্ লাগে, মাত্তর্ জ্ঞানান্ বেবহার গুরিনে মান্জ্যে ফলান্। 11 সাপ্পোরে মুগ্ধ গুরিবার্ আগেদি যুনি তে কামড় দে সেক্কে সাপুড়েবোর্ কনঅ লাভ্ ন-অয়। 12 জ্ঞানী মান্জ্যর মুয়োর্ কধাত্ দোয়্যে থায়, মাত্তর্ ভুলো তা মুয়োর্ কধালোই নিজোরে ভস্ত গরে। 13 তা কধা কনার্ আরাম্ভত্ আগেদে ভুল্, যেরেদি আগেদে পুরোপুরি বিচেরবুদ্ধি নেইয়্যেগান্। 14 বুদ্ধি নেইয়্যেগুনে বোউত্ কধা কন্, মাত্তর্ কি অবঅ সিয়েন্ কনজনে হবর্ ন-পান্, আর আগামিদি কি ঘুদিবো সিয়েন্ মান্জ্যরে কন্না কোই দি পারিবো? 15 ভুলোর্ কামানিয়ে তারে বল্ পোজ্যে গরে; তে এদক্ বেদমা যে, শঅরত্ যেবার্ পথ্তান্অ তে হবর্ ন-পায়। 16 অভিশাবপেইয়্যে সে দেশ্ছান, যিয়েনত্ চিগোন্ পুয়োবো রাজপদ্তান পায় আর সিদুগোর্ মন্ত্রীগুনে বেন্যেমাদান্ হানা হান্। 17 বর্পেইয়্যে সেই দেশ্ছান, যিবের্ রাজাবো গম্ বংশর্ মানুচ্, আর সিদুগোর্ মন্ত্রীগুনে মাত্তলে ধুরিনে পাগালামি গুরিবাত্তে নয় মাত্তর্ খেমতাত্তে যগাজ্যে সময়োত্ হানা-দানা গরন্। 18 আল্সি মান্জ্যর ঘর ছালান্ লুঙি পড়ে; আল্সির কারনে ঘরত্ পানি পড়ে। 19 আজিহুজিত্তে হানার্ যুক্কোল্ গরা অয়; আংগুর-রস্চানে জিংকানিত্ হুজি আনে; টেঙা-পোজে বেক্কানি যুগেই দে। 20 রাজারে মনে মনে অভিশাব্ ন-দুয়ো বা নিজো বিচ্চোন উগুরেত্তুন্ তাগোয়্যেগুনোরে অভিশাব্ ন-দুয়ো, কিত্তে আগাজ পেক্কুনেয়ো তঅ কধাগান্ বুয়োই নেযেই পারন্; তে উড়ি যেইনে তঅ কধানি কোই দি পারে। |
Copyright © 2021 Bangladesh Bible Society
Bangladesh Bible Society