উপদেশক 1 - Chakma Bible

বেক্কানি বাহ্‌জে

¹ উপদেশকর্ কধা; তে যিরূশালেমর্ রাজা আর দায়ূদো পুয়ো।

² তে কোইয়্যেদে, “বাহ্‌জে, বাহ্‌জে ধরনর্! কনঅ কিজু থিদেবর্ নয়। বেক্কানি বাহ্‌জে!”

³ বেলান তলেদি মান্‌জ্যে যে কামানি গরন্ সে কামানিলোই তার্ কি লাভ্?

⁴ এক বংশ যায়, আর এক বংশ এজে, মাত্তর্ পিত্‌থিমীগান্ উমরত্তে থেবঅ।

⁵ বেলান্ উদে, বেলান্ ঢুবেগোই, আর যাদিমাদি নিজো জাগাত্ ফিরি যেইনে আরঅ সিত্তুন্ উদে।

⁶ বোইয়্যেরান্ দোগিনেদি বায়, সে পরেদি উত্তোরেদি ঘুরি যায়; এবাবোত্যেগুরি ঘুরে আর নিজো পধেদি ফিরি এজে।

⁷ বেগ্ গাঙানি সাগরত্ যেইনে পড়ে, তো সাগরান্ কনদিন্অ পেলেং পেলেং ন-অয়; যিয়েনত্তুন্ বেগ্ গাঙানি নিগিলি এজে আর সিদু তা পানিগান্ ফিরি যায়।

⁸ বেক্কানি ঘুরি ঘুরি এজে আর বল্‌পোজ্যে অয়; সে পৌইদ্যেনে কবার্ কধা কারর্ নেই। চোগ্‌কুনে যেদক্ দেগিদাক্ সাৎ আরঅ দেগিবাত্তে চায়, কানানিয়ে যেদক্ শুনিদো সাৎ আরঅ শুনিবাত্তে চায়।

⁹ যিয়েন ওই যেইয়্যে সিয়েন আরঅ অবঅ; যিয়েন গরা ওইয়্যে সিয়েন আরঅ গরা অবঅ; বেলান তলেদি নূয়ো বিলিনে কিচ্চু নেই।

¹⁰ এবাবোত্যে কিজু থেই পারে যিয়েনর পৌইদ্যেনে মান্‌জ্যে কন্, “চাহ্, ইয়েন নূয়ো।” মাত্তর্ সিয়েন দঅ বোউত্ আগেত্তুন্ ধুরি এলঅ, আমা আগেদিয়ো এলঅ।

¹¹ পুরোণি কাল মানুচ্চুনোর্ কধা কারত্তুন্ মনত্ নেই; যিগুনে ভবিচ্চদে জোর্মেবাক্ তারার্ কধানিয়ো তারা মনত্ রাগেই ন-পারিবাক্ যিগুনে তারার্ পরেদি জোর্মেবাক্।

জ্ঞানান্ বাহ্‌জে

¹² মুই উপদেশক; মুই যিরূশালেম ইস্রায়েল উগুরে রাজা এলুং।

¹³ আগাজ তলেদি যিয়েনি গরা অয় সিয়েনি জ্ঞানদি পোরোক্ক্যে গুরিবাত্তে আর তোগেবাত্তে মুই মনান্ থির্ গুরিলুং। চেলুং, কি অমকদ দুঘ্ গোজেনে মান্‌জ্য উগুরে জাবেই দিয়্যে!

¹⁴ বেলান তলেদি যিয়েনি গরা অয় সিয়েনি বেক্কানি মুই দেগিলুং, দেগিলুং বেক্কানি বাহ্‌জে, বানা বোইয়্যের পিজেদি দাবা দেনা বাদে আর কিচ্চু নয়।

¹⁵ যিয়েন্ বেঙা সিয়েন্ উজু গরা ন-যায়; যিয়েন্ বাগি আঘে সিয়েন্ পুরোন্ গরা ন-যায়।

¹⁶ মুই মনে মনে কলুং, “মঅ আগেদি যিগুনে যিরূশালেমত্ রাজাগিরি গুরি যেইয়োন্ সিগুনোর্ বেক্কুনোত্তুন্ মুই জ্ঞানেদি বোউত বেশ্; মর্ বোউত্ জ্ঞান আর বুদ্ধি ওইয়্যে।”

¹⁷ সে পরেদি মুই জ্ঞান বুদ্ধি আর নীতি নেইয়্যে বুদ্ধি নেইয়্যে পৌইদ্যেনে বুঝেবার চেলুং। সেক্কে বুঝিলুং, সিয়েন্অ বোইয়্যের পিজেদি দাবা দেনা বাদে আর কিচ্চু নয়;

¹⁸ কিত্তে জ্ঞান বাড়িলে তা সমারে বোউত কাঙেলেত্যে বাড়ে, আর যেদক্ বুদ্ধি বাড়ে সেদক্ জ্বালা বাড়ে।