দ্বি’লম্বর বিররণ 9 - Chakma Bibleইস্রায়েলীয়গুনোর্ অবাধ্য অনা 1 ইস্রায়েলীয়গুন্, শুনো। যিদুক্কুন জাদে তমাত্তুন মান্জ্যর সোংখ্যেন্দি আর বলেদি বেশ্ তুমি ইক্কিনে যেইনে তারার্ আগাজত্ বাস্যে দেবাল্লোই ঘিজ্যে দাঙর্ দাঙর্ শঅরানি গজক্ গুরিবাত্তে যর্দন গাঙান্ পার্ অবাত্তে যর্। 2 সিদুগোর্ মানুচ্চুনে অনাকীয়; তারা লাম্বা আর বোলী। তুমি অনাকীয়গুনো পৌইদ্যেনে হবর্ পঅ; তারা পৌইদ্যেনে তুমি এ কধাগান্ কবাত্তে শুন্ন্য, অনাকীয়গুনোর্ বিরুদ্ধে যেই পারন্ এধোক্ক্যেন মানুচ্ কুদু? 3 মাত্তর্ তুমি এ কধাগান মনত্ রাগেয়ো, তমার গোজেন লগেপ্রভুই ভস্তগুরিয়্যে আগুনো ধোক্ক্যেন তমার আগে আগে যর্দন গাঙান্ পার্ ওইনে যার্। তে তারারে ভস্ত গুরি দিবো; তেয়ই তমা ইদু তারারে অদেই দিবো। তমা ইদু লগেপ্রভু যে আশ্বাজ্ দিয়্যে সেই মজিম তুমি তারারে ধাবেই দিবা আর কম্ সময়োর্ ভিদিরে তারারে শেজ গুরি ফেলেবা। 4 তমার গোজেন লগেপ্রভু তমা মুজুঙোত্তুন্ তারারে ধাবেই দেনার্ পরেন্দি তমাত্তুন কনজনে যেন মনে মনে কই ন-পারন, মুই ধার্মিক বিলিনে লগেপ্রভু এ দেজ্ছান্ গজক্ গুরিবাত্তে মরে ইদু আন্যে। আসলে সিয়েন্ নয়; এ বেক্ জাদর্ মানুচ্চুনোর্ ভান্ন্যেই কামানিত্যেই লগেপ্রভু তমা মুজুঙোত্তুন্ তারারে ধাবেই দিবাত্তে যার্। 5 ধার্মিক বা গম্ বিলিনেই যে তুমি তারার্ দেজ্ছান্ গজক্ গুরিবাত্তে যর্ সিয়েন্ নয়, বরং তমার্ গোজেন লগেপ্রভু তমা পুরোণি মানুচ্ অব্রাহাম, ইসহাক আর যাকোব ইদু যে কধাগান্ এগেম্ গুরিনে কোইয়্যে সিয়েনি ছিড়েবাত্তে তে এ বেক্ জাদর্ ভান্ন্যেয়ানির্ কারনে তমা মুজুঙোত্তুন্ তারারে ধাবেই দিবো। 6 সেনত্যেই তুমি মনত্ রাগেয়ো, তুমি ধার্মিক বিলিনেই যে তমার গোজেন লগেপ্রভু এ দোল্ দেজ্ছান তমারে গজক্ গুরিবাত্তে দের্ সিয়েন নয়। তুমি দঅ এক্কো একবুস্যে জাদ্। সনার্ দামারা গোরু 7 তুমি ধূল্যেচর-চাগালাত্ তমার্ গোজেন লগেপ্রভুর রাক্কান্ কিঙিরিনে জাগেই তুল্য সিয়েন্ মনত্ রাগেয়ো, কনদিনঅ ভুলি ন-যেয়ো। মিসর দেজছান ছাড়ি এজানার্ দিনোত্তুন্ ধুরি আরাম্ভ গুরিনে ইদু লুমোনা সং তুমি লগেপ্রভুর বিরুদ্ধে উল্লোমির্ ভাব মনত্ গুরি এজর্। 8 তুমি হোরেবত্ এধোক্ক্যেনগুরি লগেপ্রভুর রাক্কান্ জাগেই তুল্য, সিয়েনত্তে তে তমারে ভস্ত গুরি ফেলেবাত্তে চেইয়্যে। 9 লগেপ্রভু যে সুদোমান তমাত্যে থিদেবর্ গোজ্যে সেই সুদোমান লেখ্যে পাত্তরর্ ফলগত্ দ্বিবে গুজি লবাত্তে মুই মুড়ো উগুরে উদিনে চোল্লিশ দিন আর চোল্লিশ রেত্ সিয়োদোই এলুং। সেক্কে মুই পানি বা পিদে কিচ্ছু ন-খাং। 10 লগেপ্রভুর নিজোর্ লেগা রোইয়্যে এন্ দ্বিবে পাত্তরর্ আরুগ লগেপ্রভু মরে দিয়্যে। তুমি বেক্কুনে যেদিন্যে লগেপ্রভুর মুজুঙোত্ এগত্তর্ ওইয়ো সেদিন্যে তে মুড়ো উগুরে আগুনো ভিদিরেত্তুন্ যেদক্কানি উগুম তমা ইদু ফগদাং গোজ্যে সিয়েনি সেই আরুগ্ দ্বিবে উগুরে লেগা এলঅ। 11 সে চোল্লিশ দিন আর চোল্লিশ রেত্ কাদানার্ পরেন্দি লগেপ্রভু সে সুদোমানি লেখ্যে পাত্তরর্ আরুগ্ দিবে মরে দিয়্যে। 12 সে পরেন্দি তে মরে কোইয়্যেদে, তুই আর দেরি ন-গুরিনে ইক্কিনে তলেন্দি লামি যাহ্, কিত্যে যে মানুচ্চুনোরে তুই মিসর দেজত্তুন্ নিগিলেই আন্যচ্ তারা ভান্ন্যেই পদথ্ যেইয়োন। যে পধন্দি চলিবার্ উগুম্ মুই দুয়োং এ ভিদিরে তারা সিয়েনত্তুন্ দূরোত্ সুরি যেইয়োন আর পূজোত্তে ছাঁঝি ফেলেয়্যে এক্কো মূত্তি বানেই নেযেয়োন। 13 লগেপ্রভু মরে আরঅ কোইয়্যেদে, মুই এ মানুচ্চুনোরে দেখ্যং; ইগুনে এক্কো একবুস্যে জাদ্। 14 না, তুই মরে মানা ন-গুরিচ্; মুই তারারে ভস্ত গুরি ফেলেম্ আর পিত্থিমীত্তুন্ তারার্ নাঙানি তুলি ফেলেম্। সে পরেন্দি তর্ মাধ্যমে মুই আরঅ বোলী আর দাঙর্ এক্কো জাদর্ সৃট্টি গুরিম্। 15 ইয়েনর্ পরেন্দি মুই মুড়োবোত্তুন্ লামি এলুং; সেক্কেয়ো মুড়োবোত্ আগুন্ জ্বলের, আর মর্ আদত্ এলদে বেবস্থা লেখ্যে সেই দ্বিবে আরুগ। 16 মুই চেইনে দেগিলুং, তুমি তমার গোজেন লগেপ্রভুর বিরুদ্ধে পাপ গোজ্য; পূজোত্তে তুমি ছাঁঝি ফেলেয়্যে এক্কো দামাড়া গোরুর্ মূত্তি বানেই নেযেয়ো। লগেপ্রভু তমারে যে পধন্দি চলিবার্ উগুম্ দিয়্যে তুমি সেই সময়ান ভিদিরে সে পথ্তানত্তুন্ সুরি যেইয়ো। 17 সেনত্যেই মুই সে পাত্তর আরুগ্ দ্বিবে মঅ আদত্তুন্ লুঙি মারিনে ফেলেই দিলুং। তমা চোগোর্ মুজুঙোত্ সেই দ্বিবে পাত্তর্ কট্টা কট্টা ওইনে ভাঙি গেলঅ। 18 লগেপ্রভুর চোগেদি ভান্ন্যেই এধোক্ক্যেন বেক্ পাপ্পানি গুরিনে তুমি তার্ রাগ্কান জাগেই দুয়ো বিলিনে মুই আগঅ ধোক্ক্যেন আরঅ চোল্লিশ দিন আর চোল্লিশ রেত্ লগেপ্রভুর মুজুঙোত্ আদু পাড়িনে পড়ি রোলুং; পানি বা পিদে কিচ্ছু মুয়োত্ ন-দিলুং। 19 লগেপ্রভুুর্ অমকদ বেজার্ অনাগান মুই দোরেয়োং, কিত্যে তমারে ভস্ত গুরি ফেলাইদে ধোক্ক্যেন তার্ রাগ ওইয়্যে। মাত্তর্ এবেরায়ো লগেপ্রভু মঅ কধানি শুন্যে। 20 হারোণরে ভস্ত গুরি ফেলাইদে ধোক্ক্যেন রাগঅ তার্ ওইয়্যে মাত্তর্ সে অক্তত্ মুই হারোণত্তেয়ো কোজোলী গোজ্যং। 21 তমার্ সে পাপর জিনিস্ছান, অত্তাৎ তমার বানেয়্যে সেই দামাড়া গোরুবোরে নেযেইনে মুই আগুনোত্ পুড়ি দুয়োং। সে পরেন্দি মুই সিবে ধূল্যে ধোক্ক্যেন গুঁড়ি গুরি নেযেইনে মুড়োত্তুন্ বেঈ এচ্চ্যে গাঙর্ গঙারত্ ফেলে দুয়োং। 22 তবিয়েরাতত, মঃসাতত আর কিব্রোৎ-হত্তাবাততঅ তুমি লগেপ্রভুর রাক্কান্ জাগেই তুল্য। 23 লগেপ্রভু কাদেশ-বর্ণেয়ত্তুন তমারে রওনা গুরিবার্ অক্তত্ কোইয়্যেদে, যে দেজ্ছান মুই তমারে দুয়োং তুমি যেইনে সিয়েন গজক্ গরঅ। মাত্তর্ তুমি তমার গোজেন লগেপ্রভুর উগুমোর্ বিরুদ্ধে উল্লোমী গুরিলে। তুমি তারে বিশ্বেজঅ ন-গরঅ, তার্ কধালোই কানঅ ন-পাদঅ। 24 মুই যেক্কেত্তুন্ ধুরি তমারে চিনি পাজ্যং সেক্কেত্তুন্ ধুরি দেখ্যংগে, তুমি লগেপ্রভুর বিরুদ্ধে বানা উল্লোমী গুরি যল্লোই। 25 লগেপ্রভু তমারে ভস্ত গুরি দিবার্ কধা কোইয়্যে বিলিনে মুই সে চোল্লিশ দিন আর চোল্লিশ রেত্ সং লগেপ্রভুর মুজুঙোত্ আদুপাড়িনে পুড়ি রোইয়োং। 26 তাইদু মুই ইয়েন্ কোইনে তবনা গোজ্যং, ও প্রভু লগেপ্রভু, তঅ মানুচ্চুনোরে তুই ভস্ত গুরি ন-ফেলেচ্। তারা দঅ তরই সোম্বোত্তি যিগুনোরে তুই তর্ দাঙর্ বল্লোই উদ্ধোর্ গোজ্যস্ আর তর্ বোলী আত্তান্ বেবহার্ গুরিনে মিসর দেজত্তুন্ নিগিলেই আন্যচ্। 27 তর্ চাগর্ অব্রাহাম, ইসহাক আর যাকোবর কধানি মনত্ তুল্। এ মানুচ্চুনোর্ একবুস্যেগানি, ভান্ন্যেয়ানি আর পাপর্ কামানন্দি ন চেইচ্। 28 সিয়েন্ গুরিলে যে দেজত্তুন্ তুই আমারে নিগিলেই আনিলে সে দেজর্ মানুচ্চুনে কবাক্, লগেপ্রভু তার্ এগেম্ গোজ্যে দেজত্ তারারে নেযেই ন-পারে বিলিনে বা তে তারারে ঘিনাই বিলিনে তারারে মারে ফেলেবাত্তে এ ধূল্যেচর-চাগালাত্ আন্যে। 29 মাত্তর্ ইগুনে দঅ তরই মানুচ্, তরই সোম্বোত্তি যিগুনোরে তুই তর্ আত্তান বাড়ে দিইনে দাঙর্ বল্লোই নিগিলেই আন্যচ্। |
Copyright © 2021 Bangladesh Bible Society
Bangladesh Bible Society