দ্বি’লম্বর বিররণ 8 - Chakma Bibleলগেপ্রভুর কামানি মনত্ রাগেবার্ উগুম 1 এচ্চ্যে মুই তমারে যেদক্কানি উগুম্ দুয়োঙর্ সিয়েনির্ পত্তি উগুম পালন গুরিবাত্তে তুমি মন দুয়ো, যেনে তুমি বাঁজি থাগঅ আর সোংখ্যেন্দি বাড়িই উদো আর লগেপ্রভু তমার পুরোণি মানুচ্চুনো ইদু যে দেজ্ছান দিবার্ কধা শমক্ খেইনে এগেম্ গোজ্যে সিদু সুমিনে সিয়েনি গজক্ গুরি পারঅ। 2 মনত্ গুরি চঅ, তমা গোজেন লগেপ্রভু এ চোল্লিশ্সো বজর্ কিঙিরিনে ধূল্যেচর-চাগালার্ ভিদিরেন্দি গোদা পদ্থান্ তমারে চালেই আন্যে। তমা বাড়্ গরানাগানি ভাঙি দিবাত্তে আর তমা মনত্ কি আঘে, অত্তাৎ তুমি তার্ উগুমানি পালেবা নাহি, সিয়েন পোরোক্ষেত্ ফেলেইনে চেবাত্তে তে এ কামানি গোজ্যে। 3 পেত্পুড়োনার দুঘ দিইনে আর যে মান্নার্ কধা তমারে আর তমার পুরোণি মানুচ্চুনোর্ অজানা এলঅ সিয়েন্ খাবেইনে তে তমার বাড়্ গরানাগানি ভাঙি দিয়্যে। ইয়েন্দোই তে তমারে এ শিক্ষ্যেগান্ দিবাত্তে চেয়্যেদে, মান্জ্যে বানা পিদেলোই ন-বাঁজন, মাত্তর্ লগেপ্রভুর্ মুয়োর্ এক্ এক্কান কধালোই বাঁজন্। 4 এ চোল্লিশ বজর্ সং তমার কিয়্যের্ কাবড়ানি ফাদি ন-যায় আর টেঙানিয়ো ফুলি ন-যায়। 5 এ কধাগান্ তমার মনত্ বানি রাগেয়ো, বাপ্পো যেধোক্ক্যেন পূঅবোরে শাজন গরে ঠিগ্ সেধোক্ক্যেনগুরি তমার গোজেন লগেপ্রভু তমারে শাজন গুরিবো। 6 তুমি তমার্ গোজেন লগেপ্রভুর্ উগুমানি পালন গুরিবা, তার্ পথ্তানন্দি চলিবা আর তারে ভোক্তি গুরিবা। 7 তমার গোজেন লগেপ্রভু যে দোল্ দেজ্ছানত্ তমারে নেযার্ সিদু আগেদে মুড়ো আর কিঝিঙোন্দি বেই যেইয়্যে ছড়া, উইফুদ আর মাদিত্ তলেত্তুন্ পানি। 8 সিদু আগেদে নানান্ বাবোত্যে গম আর কেচবিজি, আংগুর আর ডোমোর্ গাজ্ আর ডালুম, জলপাইয়র তেল আর মধু। 9 সে দেজত্ তুমি পেবা নানান্ বাবোত্যে খানা আর কনঅ কিজুর্ অভাব তমাত্তুন্ ন-থেবঅ। সিদুগোর্ পাত্তরুনোত্ আঘে লুয়ো। সিদুগোর্ মুড়োবোত্তুন্ তুমি তামা খুঁড়িনে তুলি পারিবা। 10 তুমি সিদু খেই-দেই ঈল্ অনার্ পরেদি তমার গোজেন লগেপ্রভুর্ দিয়্যে সে দোল্ দেজ্ছানত্তে তার্ বাঈনী গুরিবা। 11 তুমি উঝিয়ার্ থেবা যেনে এচ্চ্যে মুই তার্ যেদক্কানি উগুম, হুকুম আর সুদোম তমারে দুয়োঙর্ সিয়েনি ন-মানিনে তুমি তমার গোজেন লগেপ্রভুরে পুরি ন-ফেলেইয়ো। 12 যুনি তুমি উঝিয়ার্ ন-থাগঅ, সালে তমার যেক্কে খেই-দেই ঈল্ অবঅ আর দোল্ দোল্ ঘর্-বাড়ী বানেইনে সিদু বজত্তি গুরি পারিবা, 13 যেক্কে তমার পালর্ গোরু-ছাগল-ভেড়ার্ সোংখ্যেগুন বাড়ি যেবাক্ আর তমার্ বোউত্ সনা-রুবো অবঅ আহ্ তমার্ বেক্কানি বাড়ি যেবঅ, 14 সেক্কে তুমি বার্বো ওইনে উদিবা আর যিবে মিসর দেজর্ চাগর্ খাদানাত্তুন্ তমারে নিগিলেই আন্যে তমার সেই গোজেন লগেপ্রভুরে তুমি ভুলি যেবা। 15 তে তমারে এক্কো দাঙর্, দর্গরেপারা, শুগুনো, পানিনেইয়্যে আর বিষবলা সাপ আর কাঁঙারা-বিজেলোই ভোজ্যে ধূল্যেচর-চাগালার্ ভিদিরেন্দি আন্যে। তে দরঅ পাত্তর ভিদিরেত্তুন্ তমাত্তে পানি নিগিলেই দিয়্যে। 16 তে সে ধূল্যেচর-চাগালাত্ তমারে মান্না হেবাত্তে দিয়্যে যিবের্ কধা তমা পুরোণি মানুচ্চুনে কনদিনঅ ন-জানন্। তমারে পোরোক্ষে গুরিবাত্তে আর বার্বোগানি ভাঙি দিবাত্তে তে সিয়েনি দিয়্যে যেনে যেরেন্দি তমার্ ভালেদি অয়। 17 তুমি অয়ত কনজনে মনে মনে কোই পার, মর্ নিজোর্ বল্লোই, নিজোর আত্তোই কাম্ গুরিনে মুই এ বেক্ ধন-সোম্বোত্তিগানি গোজ্যং। 18 মাত্তর্ তুমি তমার্ গোজেন লগেপ্রভুর কধানি পুরি ন-ফেলেইয়ো; তেয়ই এদক্কানি গুরিবার্ খেমতা তমারে দিয়্যে, আর ইঙিরিনে তে তমার্ পুরোণি মানুচ্চুনো ইদু যে নিয়মর্ কধানি শমক্ খেইনে কোইয়্যে সিয়েনি তে ইক্কিনে পুরেই দের্। 19 যুনি তুমি কনদিনঅ তমা গোজেন লগেপ্রভুরে ভুলি যেইনে দেব-দেবেদাগুনোর্ পিজেন্দি যঅ আর তারারে সেবা আর পূজো গরঅ, তো এচ্চ্যে মুই তমা বিরুদ্ধে এ কধাগান্ জদবদে গুরি কঙত্তে, তুমি ভস্ত ওই যেবা। 20 লগেপ্রভু তমা মুজুঙোত্ যিদুক্কুন জাদরে ভস্ত গোজ্যে তারা ধোক্ক্যেন তুমিয়ো তমা গোজেন লগেপ্রভুর অবাধ্য অনার্ কারনে ভস্ত ওই যেবা। |
Copyright © 2021 Bangladesh Bible Society
Bangladesh Bible Society