দ্বি’লম্বর বিররণ 7 - Chakma Bibleঅন্য জাদ্তুনো পৌইদ্যেনে উগুম 1 তুমি যে দেজ্ছান গজক্ গুরিবাত্তে যর্ সিদু তমার্ গোজেন লগেপ্রভু তমারে নেযেব আর নানান্ জাদরে তমা মুজুঙোত্তুন্ ধাবেই দিবো। এ জাদ্তুনে অলাক্ হিত্তীয়, গির্গাষীয়, ইমোরীয়, কনানীয়, পরিষীয়, হিব্বীয় আর যিবূষীয়। এ সাত্তো জাদ মান্জ্যর সোংখ্যেন্দি আর বলেদি তমাত্তুন্ দাঙর্। 2 তে যেক্কে তারারে তমা আঢর্ মুদোত্ আনি দিবো আর তুমি তারারে অদেই দিবা সেক্কে তুমি তারারে এক্কুবারে ভস্ত গুরি ফেলেবা। তুমি তারা সমারে কনঅ চুক্তি ন-গুরিবা আর তারা উগুরে কনঅ মেইয়্যে ন-দেগেবা। 3 তুমি তারা সমারে কনঅ মেথ্বানর সম্পর্ক ন-গুরিবা। তমার মিলেগুনোরেয়ো তুমি তারার্ পূঅগুনোর্ আদত্ ন-দিবা আর তারার্ মিলেগুনোরেয়ো তুমি তমা পূঅগুনোত্তে ন-আনিবা, 4 কিত্যে সে মিলেগুনে তমা পূঅগুনোরে মত্তুন্ দূরোত্ সোরেই নেযেবাক্ আর দেব-দেবেদাগুনোর্ পূজো গুরিবাক। সেক্কে লগেপ্রভুর রাগর্ আগুনান্ তমার বিরুদ্ধে জুলি উদিবো আর লগে লগে তমারে ভস্ত গুরি ফেলেব। 5 তুমি সে বেক্ জাদ্তুনোর্ পূজোগুন্ ভাঙি ফেলেবা, পূজোগুনোর্ পাত্তরুন্ ভাঙি দিবা, পূজোর্ আশেরা-খুঁদোগুন কাবি ফেলেবা আর মূত্তিগুন্ আগুনোত্ পুড়ি দিবা। 6 তুমি এন্ এক্কো জাদ যিবেরে তমা গোজেন লগেপ্রভুর্ নাঙে যুদো গুরি রাগা ওইয়্যে। তুমি যেনে তমার গোজেন লগেপ্রভুর নিজোর্ মানুচ্ আর সোম্বোত্তি অ সেনত্যে পিত্থিমীর বেক্ জাদর্ ভিদিরেত্তুন্ তে তমারে বেঈ লোইয়্যে। 7 অন্য জাদত্তুন্ তমার মান্জ্যর সোংখ্যেগুন বেশ্ মনে গুরিনে যে লগেপ্রভু তমা সমারে নিজোরে কোচ্পানার্ সুদোলোই বাঁন্যে বা তমারে বেঈ নেযেয়্যে সিয়েন্ নয়, কিত্যে অন্য বেক্ জাদত্তুন্ তমার মান্জ্যর সোংখ্যেগুন কম। 8 তে সিয়েনি গোজ্যেদে তমা উগুরে তার্ অমকদ কোচ্পানাত্তে আর তমার পুরোণি মানুচ্চুনো ইদু তে যে শমক্ গোজ্যে সিয়েনি রোক্ষে গুরিবাত্তে। সেনত্যে তে খেমতাবলা আঢ্তানি বেবহার্ গুরিনে তমারে নিগিলেই আন্যে আর মিসরর্ রাজা ফরৌণর্ আঢত্তুন্ আর চাগর খাদানার্ দেজত্তুন্ তমারে উদ্ধোর্ গোজ্যে। 9 সেনত্যেই তুমি মনত্ রাগেয়ো, তমার গোজেন লগেপ্রভুই গোজেন। তারে বিশ্বেজ্ গরেদে গোজেন; যে তারে কোচ্পায় আর তার্ উগুমানি পালন্ গরে তারাত্তে তে যে সুদোমানি থিদেবর্ গোজ্যে সিয়েনি তে আজার্ আজার বংশ সং রোক্ষ্যে গরে আর তারা উগুরে তার্ অমকদ কোচ্পানা দেগায়। 10 মাত্তর্ যিগুনে তারে কোচ্ ন-পান তারারে ভস্ত গুরিনে তে তার্ হেনা উগুরোই; আর সিয়েন্ গত্তে তে দেরি ন-গরে। 11 সেনত্যেই এচ্ছ্যে মুই তমারে যেদক্কানি উগুম্, নিয়ম আর হুকুম্ দুয়োঙর্ সিয়েনি তুমি যত্তন্ গুরিনে পালন গুরিবা। 12 যুনি তুমি এ বেক্ সুদোমর ইন্দি মনান্ দুয়ো আর সিয়েনি যত্তন্ গুরিনে পালঅ, সালে তমার গোজেন লগেপ্রভু তমা পুরোণি মানুচ্চুনো ইদু যে শমক্ গোজ্যে সেই মজিম তমাত্তে তে যে সুদোমানি থিদেবর্ গোজ্যে সিয়েনি তে রোক্ষ্যে গুরিবো আর তমা উগুরে অমকদ কোচ্পানা দেগেব। 13 তে তমারে কোচ্পায়, বর্ দিবো আর তমা মান্জ্যর সোংখ্যেগুন বাড়েই দিবো। যে দেজ্ছান তমারে দিবার্ কধা তে তমার পুরোণি মানুচ্চুনো ইদু শমক্ খেইনে কোইয়্যে সে দেজত্ তে তমারে বর্ দিবো। সেক্কে তমার্ ভালোক্কুন্ পূঅ-ছা অবাক্, তমা ভূইয়োত্তুন্ তুমি জদবদে শোজ্য, আংগুরো-রস আর তেল পেবা, আর তমার্ গোরু, ছাগল আর ভেড়াগুনোরঅ ভালোক্কুন ছঅ অবাক্। 14 অন্য বেক্ মানুচ্চুনোত্তুন্ তুমি বেশ্ বর্ পেবা। তমাত্তুন্ কনজনে গুর-গারা নেইয়্যে ন-থেবাক্ আর তমা পালত্তুন কনঅ য়েমান ছঅছাড়া ন-থেবাক্। 15 লগেপ্রভু বেক্ পিড়েনিত্তুন্ তমারে উদ্ধোর্ গুরিবো। মিসরত্ যেদক্কানি অমকদ পিড়ে তুমি দেক্কো সিয়েনি তে তমা উগুরে অবাত্তে ন-দিবো, মাত্তর্ যিগুনে তমারে ঘিনান্ তারা উগুরে সিয়েনি অবাত্তে দিবো। 16 তমার গোজেন লগেপ্রভু তমা আদঅ মুদোত্ যিদুক্কুন্ জাদরে আনি দিবো বেক্কুনোরে তমাত্তুন্ ভস্ত গুরি ফেলা পুরিবো। তারারে তুমি মেইয়্যে ন-দেগেবা আর তারার্ দেবেদাগুনোরেয়ো পূজো ন-গুরিবা, কিত্যে সিয়েনি তমা পক্ষে ইদি ওইনে থেবঅ। 17 তুমি মনে মনে কোই পারঅ, এ জাদর্ মানুচ্চুনে আমাত্তুন্ সোংখ্যেন্দি বেশ্; আমি কেধোক্ক্যেন গুরি তারারে ধাবেই দিইনে নিগিলেই দিবোং? 18 মাত্তর্ তুমি তারারে ন-দোরেয়ো। ফরৌণ আর গোদা মিসর্ দেজ উগুরে তমা গোজেন লগেপ্রভু কি গোজ্যে সিয়েনি পুরি ন ফেলেইয়ো। 19 তমা গোজেন লগেপ্রভু যেদক্কানি জদবদে পোরোক্ষেলোই, আমক্ অবার্ কাম্ আর চিহ্নোলোই আর তার্ দরমর আর খেমতাবলা আঢ্তোই তমারে নিগিলেই আন্যে সিয়েন্ দঅ তুমি নিজোর্ চোগেদি দেক্কো। তুমি ইক্কিনে যিদুক্কুন্ জাদরে দেগিনে দরর্ তারা উগুরেয়ো তে সেধোক্কেন্ গুরিবো। 20 ইয়েনর্ পরেন্দিয়ো তারা ভিদিরে যিগুনে বাঁজি থেবাক আর তমাত্তুন্ নিজোরে লুগেই রাগেবাক তমা গোজেন লগেপ্রভু তারা ভিদিরে ভিঙুর পুক্ পাধেই দিবো আর তারা বেক্কুনে ভস্ত ওই যেবাক্। 21 তুমি তারারে ন-দোরেয়ো, কিত্যে তমা গোজেন লগেপ্রভু যিবে তমা ভিদিরে আঘে, তে দাঙর্ আর ভোক্তিলোই ভোজ্যে দর্ জাগেয়্যে গোজেন। 22 তমার গোজেন লগেপ্রভুই তমা মুজুঙোত্তুন্ সে বেক্ জাদ্তুনোরে লারে লারে ধাবেই দিবো। তারারে বেক্কুনোরে তুমি একসমারে ধাবেই ন-দিবা, সালে তমার চেরোকিত্তে ঝাড়্বো য়েমানর্ সোংখ্যেগুন্ বাড়ি যেবাক্। 23 তমা গোজেন লগেপ্রভু অমকদ যাগুলুগোত্ ফেলেইনে তমা আঢত্ তারারে তুলি দিবো যেদক্কন সং তারা এক্কুবারে ভস্ত ওই ন-যান। 24 তারার্ রাজাগুনোরে তে তমা আঢত্ তুলি দিবো আর তুমি তারার্ নাঙানি পিত্থিমীত্তুন্ পুজি ফেলেবা। কনজনে তমারে মানা গুরিনে রাগেই ন-পারিবাক্; তুমি তারারে ভস্ত গুরি ফেলেবা। 25 তারার্ দেব-দেবেদার্ মূত্তিগুন্ তুমি আগুনোত্ পুড়ি ফেলেবা। তুমি তারার্ কিয়্যের্ সনা-রুবোগানি লুভ্ ন-গুরিবা। নিজোত্তে তুমি সিয়েনি ন-নেযেবা, কিত্যে সিয়েনি গুরিলে তুমি সিগুনোর্ কেরাবত্ পুরিবা। তমা গোজেন লগেপ্রভু ইদু সিয়েনি ঘিনাইদে জিনিস। 26 কনঅ ঘিনাইদে জিনিস তমা ঘরত্ ন-আনিবা। সিয়েনি তুমি মনে-পরাণে ঘিনেবা আর ঈচ্ গুরিবা, কিত্যে সিগুনো উগুরে আগেদে ভস্ত অবার্ অভিশাব। সিয়েনি যুনি তুমি ঘরত্ আনঅ সালে তমা উগুরেয়ো ভস্তর্ অভিশাব লামি এবঅ। |
Copyright © 2021 Bangladesh Bible Society
Bangladesh Bible Society